Suid-Afrikaanse nuus, d.w.s. sowel nuus uit Suid-Afrika én Suider-Afrika.
'n Totaal van 39 mense is gister in die Johannesburgse lokasie in hegtenis geneem.
Kriminele het intussen die situasie uitgebuit en plundery kom voor.
Die polisie-eenheid vir Openbare Orde is ontplooi om die toestand te monitor en kalmte te herstel.
Ses mense is in hegtenis geneem by Sun City gister nadat hulle probeer het om die ANC se provinsiale konferensie by te woon. 'n Groep mense het deur 'n versperring van ANC-toesighouers by die ingang gebreek en die polisie met klippe bestook.
Die mense wat nie kon inkom nie, glo dat die konferensie nie verteenwoordigend is nie. Sondagaand het die polisie 40 mense hardhandig uit die luukse oord verwyder nadat hulle aan die konferensie wou deelneem.
gemaak in die VSA. Maar dit is op die punt om te verander in Milwaukee. Milwaukee is die grootste stad in die deelstaat Wisconsin.
'n Lid van die Skoolraad en onderwysspesialis sê dat hulle besig was om skole in die mees stabiele swart woonbuurte in die stad te sluit as gevolg van die busse en dat iets met die prentjie geskort het.
Kennelik is skooldesegregasie in Milwaukee iets wat tot die verlede behoort soos die bekende 1945 hofuitspraak van Brown v. Board of Education, om nie van ware integrasie te praat nie.
Sloering met oordragte en gebrekkige ondersteuning van opkomende boere het voedselproduksie drasties verminder en het bygedra tot hemelhoë kospryse.
In Limpopo se Levubu-vallei, bekend as die vrugtemandjie van landbou, waar al die plase grondeise in die gesig staar, het produksie dramaties afgeneem die afgelope drie jaar vanaf 300 ton tot 60 ton.
Helen Zille, leier van die DA, het gister geëis dat Thabo Mbeki bedank as gevolg van sy inmenging met staatsinstellings soos die SAUK en die nasionale vervolgingsgesag. Sy hou hom ook verantwoordelik vir die huidige elektrisiteitskrisis.
Verder is Zille insgelyks gekant teen 'n toekomstige president Jacob Zuma. Volgens haar het Zuma en sy vennote reeds hul minagting vir die grondwet getoon.
Die DA eis dat die nasionale vergadering ontbind en dat daar 'n nuwe verkiesing gehou word.
'n Skare in Alexandra, 'n lokasie in die noorde van Johannesburg, het gister 'n groep immigrante aangeval, twee doodgemaak en omtrent 40 beseer, volgens die polisie.
Hierdie voorval volg op ander soortgelyke aanvalle wat 'n maand gelede op buitelanders in lokasies in die Pretoria-omgewing plaasgevind het.
Konstabel Neria Malefetse, 'n woordvoerder van die polisie, sê dat die aanval plaasgevind het weens die misdaadbedrywighede in die lokasie wat aan buitelanders toegeskryf word.
Sekere van die slagoffers was Zimbabwiërs, wat tot die grootste enkele groep immigrante in die land behoort.
Die minister het aangedui dat sy egter nog geen terugvoering van Mpofu ontvang het om haar siening meer gebalanseerd te maak nie.
Sy het die publiek gemaan om kalm te bly en om spekulasie te vermy sodat verdere skade aan die beeld van die openbare uitsaaier wat aan almal behoort, kan beëindig word.
Mnr. Kebby Maphotsoe, die MKVV se nasionale voorsitter, het Saterdag by dié assosiasie se konferensie in Gauteng gesê die Skerpioene is die tande van ‘n teen-rewolusionêre beweging in Suid-Afrika en dat hulle vol gif is.
Hy verduidelik dat misdadigers soos Mark Thatcher en Adriaan Vlok vrygespreek is, maar ANC-leiers voel die “brandende haatsteek van die Skerpioene”.
Maphotsoe voer verder aan dat Zuma se ondersoek gelei word deur die Skerpioene, maar dat dit verder aangedryf word deur die media en die opposisie, spesifiek die Demokratiese Alliansie (DA).
“Die ondersoek duur te lank. Mens kan nie iemand vir nege jaar lank ondersoek nie. Eers vir die wapentransaksie van R500 000 en dan vir ‘n karwas van R10. Geregtigheid wat uitgestel word, is geregtigheid wat ontken word,” sê Maphotsoe.
Hy sê ook dat politieke inmenging in dié saak broodnodig is, juis omdat dit ‘n polities gedrewe hofsaak is.
“Hoekom kan Tony Blair in die Verenigde Koninkryk ‘n ondersoek na ‘n wapentransaksie kanselleer om die land se belange te beskerm en ons kan nie dieselfde doen nie? Is die motivering agter die hele ondersoek nie miskien om die ANC te vernietig nie?”
Maphotsoe kritiseer ook sekere ANC-lede daarvan dat hulle hulself nou skaar in die Zuma-kamp, net om vir hulle setels te verseker wanneer die verkiesing kom. Hy doen ‘n beroep daarop dat dié mense, wat voor die Polokwane-konferensie in die Mbeki-kamp was, ontbloot moet word.
Nóg ‘n spreker by die MKVA-konferensie die naweek was die ANC-voorsitter in Gauteng en ook die party se provinsiale minister van finansies, mnr. Paul Mashatile. Hy het op sy beurt gemaan daarteen dat ANC-lede hulself beskou as die bewaarders van besluite wat geneem is tydens die ANC-konferensie. “Ons as party het almal saam besluite geneem en ons almal is die verdedigers daarvan,” sê Mashatile.
Suid-Afrika staar nóg ‘n krisis in die gesig, dié keer in die graanbedryf. ‘n Moontlike voedseltekort dreig met die stygende voedselpryse en die afname in plaaslike graanproduksie.
Die probleem is te wyte aan verskeie faktore, maar hoofsaaklik as gevolg van die regering se besluit om die buiteland ook op die plaaslike mark te laat meeding. Ander bydraende faktore wat dit byna onbekostigbaar maak vir graanboere is vervoer en die verval van infrastruktuur in Suid-Afrika, soos byvoorbeeld spoorwegvervoer wat, hoewel goedkoper, onprakties geword het.
Volgens die Suid-Afrikaanse Graaninligtingsdiens het graanproduksie vanaf 2,5 miljoen ton in 1997, tot 1,8 miljoen verlede jaar gedaal.
Mnr. Nico Hawkins, bestuurder van Graan Suid-Afrika (GSA) se nywerheidsdienste, sê die regering het in die 1990’s begin wegbeweeg van ‘n selfonderhoudende beleid sover dit voedselproduksie betref. Die nuwe voedselbeleid bring kortom mee dat: “solank as wat voedsel goedkoper op die internasionale mark is as die produksiekoste in Suid-Afrika, gaan dit nie lonend wees om dit self te verbou nie”.
GSA doen nou ‘n beroep op die regering om invoertariewe te verhoog. Hawkins verduidelik dat die vryemarkstelselbeleid dit moontlik maak vir die regering om tariewe te gebruik om boere te beskerm ten tye van lae winsgewendheid.
“Ons (die GSA) het die regering al in 2006 gevra om invoertariewe te verhoog, maar hulle het geweier. Dit het tot gevolg gehad dat die plaaslike mark nie beskerm was nie en sommige boere is ontmoedig om verder te boer,” sê Hawkins.
Mnr. Hans van der Merwe, die besturende direkteur van AgriSA, meen weer dat verhoogde invoertariewe nie die antwoord is nie. Ontwikkelende lande kan eenvoudig net nie meeding met die subsidies wat die staat aan reeds onwikkelde lande se boere betaal nie. Deur te probeer om daardie subsidiebedrae te ewenaar, gaan dit in elk geval voedselpryse die hoogte in laat skiet.
Van der Merwe sê: “Dit gaan heeltemal onbekostigbaar word vir arm mense om kos te koop, as die invoertariewe verhoog word. Die belangrikste is egter dat alhoewel subisidies steeds aangewend word in ryker nasies om hul landbousektor te ondersteun, is dit teen die gees en reëls van die Wêreldhandelsorganisasie”.
Volgens mnr. Jannie de Villiers, besturende direkteur van die Meulenaarsvereniging, dra die steeds verslegtende toestand van Suid-Afrika se infrastruktuur ook by tot die groeiende graankrisis. “In 1985 is 85% van Suid-Afrika se graan per spoor vervoer. Vandag is dit net 50% daarvan, ten spyte van die feit dat padvervoer 30% duurder is,” sê De Villiers.
Nóg ‘n bydraende faktor tot die krisis is as gevolg van ‘n tekort aan navorsing op dié gebied. Ferdi Meyer, ‘n senior lektor aan die Universiteit van Pretoria in landbou-ekonomie sê: “Navorsing en ontwikkeling het so te sê heeltemal ineengestort as gevolg van beperkte fondse en swak bestuur die laaste paar jaar. Baie min navorsing word nog gedoen met minimale finansiële ondersteuning van privaat instellings.”
Wiskunde en wetenskap is te moeilik en veeleisend, meen Suid-Afrikaanse skoolleerlinge. Meer as 60% van die 7 000 leerlinge wat aan 'n opname deur Mark Shuttleworth se stigting deelgeneem het, meen dit is waarom Suid-Afrika se wiskunde- en wetenskappunte so laag is vergeleke met ander lande.
Terwyl Suid-Afrika se swak prestasie op dié gebied gewoonlik aan swak opgeleide onderwysers toegeskryf word, weet leerlinge van beter want slegs 13% dink dat slegte onderwysers vir die swak akademiese prestasie en klein aantal leerlinge wat wiskunde en wetenskap as vakke neem, verantwoordelik is.
President Thabo Mbeki van Suid-Afrika sal vandag in Zimbabwe aankom vir samesprekings met die land se leiers, berig die departement van buitelandse sake. Woordvoerder Ronnie Mamoepa sê dat Mbeki met die land se politieke leierskap sal vergader binne die konteks van die Suider-Afrikaanse Ontwikkelingsgemeenskap se fasiliteringsproses.
Onlangs het Suid-Afrika, Sjina en Rusland sterker optrede deur Westerse lede van die VN se Veiligheidsraad teen Zimbabwe teengestaan.
Zimbabwiërs het op 29 Maart gestem, maar die uitslag van die presidensiële verkiesing is eers vyf weke later deur die Zimbabwiese verkiesingskommissie bekendgemaak met geen volstrekte meerderheid vir een van die kandidate nie.
Die uitslae wat verlede Vrydag aangekondig is, toon dat Morgan Tsvangirai 47,9% van die stemme ontvang het, teenoor 43,2% vir Robert Mugabe.
Volgens ʼn studie wat so pas deur die Instituut vir Sekerheidstudies in Pretoria vrygestel is, is Suid-Afrikaners nou meer vreesbevange oor misdaad as ooit tevore. Dít, in weerwil van polisiestatistieke wat sou toon dat misdaad aan die afneem is.
Die studie het 4 500 mense betrek. ʼn Navorser, Antoinette Louw, het gesê hoewel misdaadvlakke in die land laer was as in 1998 of in 2003, het die meeste respondente gevoel dat dit nou erger was, veral wat inbrake betref.
Volgens haar is inbrake en diefstal die twee mees algemene misdaadvorme waaroor Suid-Afrikaners klagtes ingedien het.
Die nasionale slagofferopname wat van Oktober tot November verleder jaar gevoer is, het getoon dat 81% van mense inbraakgevalle aan die polisie aangemeld het, teenoor 57% wat tydens dieselfde opname in 2003 gesê het dat hulle inbrake ervaar het.
Die studie het bevind dat Indiërs die etniese groep is wat die meeste oor misdaad bekommerd is. Nie minder nie as 85% van Indiërs voel dat misdaad aan die toeneem is, teenoor 63% van blankes wat dieselfde dink. Onder kleurlinge en swartes meen onderskeidelik 57% en 54% dat misdaad besig is om te styg.
Slegs 22% van blankes meen dat misdaad oor die afgelope vier jaar afgeneem het.
“Indiese respondente is meer vreesbevange as die res, en veel meer oor misdaad bekommerd en meer krities oor die regering,” sê Louw.
Rondom roof met verswarende omstandighede, het ʼn senior navorser van die ISS, Johan Burger, laat blyk dat dit ʼn “werklike uitdaging” is met roof op straat wat met 70% toegeneem het. Het het ook opgemerk dat die ISS ‘n toename in aanvalle op OTM’s bespeur, veral dié wat in die lokasies teenwoordig is.
Ook korrupsie is aan die toeneem, met 32% van mense wat gesê het hulle betaal omkoopgeld aan amptenare, veral in die vorm van geld vir verkeersoortredings. Dit vergelyk met 27% van mense at in die 2003-opname omkoopgeld betaal het. Sowel verkeersboets as bestuurslisensies word as probleemgebiede vir omkopery beskou.
Oor die kwessie of daar ‘n verandering in misdaadvlakke is, het die meeste mense gedink dat dit aan die toeneem is. Onder die respondente dink 57% dat misdaad gestyg het, teenoor 53% wat in 2003 so gedink het.
Hieroor het Louw opgemerk: “Interessant omtrent al die persepsiegegewens is dat in weerwil van die reële afname in misdaad, die meeste Suid-Afrikanes steeds dink dat misdaad besig is om toe te neeem, daarom is openbare vertroue nie goed nie.”
Gierigheid is volgens meeste mense die hoofrede waarom ander misdaad pleeg.
Groter straf vir misdaad is ook besig om al hoe meer gewild onder mense te word. Vier-en-dertig persent van respondente is ten gunste van groter straf teenoor 15% in 2003.
Maar 60% van mense erken dat hulle niks doen om hulself teen misdaad te beveilig nie. Diegene wat wel optree om hul huise teen misdaad te beveilig, is waarskynlik in die middel- tot hoër inkomstegroepe.
Polisiëring word allerweë as onbevredigend gesien. In 2007 het slegs 49% van mense gedink dat die polisie hul taak na behore uitvoer, teenoor 52% in 2003. Swartes en kleurlinge voel egter dat hulle wel polisiebeamptes aan diens opmerk.
'n Outomatiese tellermasjien van ABSA is op 8 Mei 2008 oopgeskiet in Secunda, uitbreiding 22. Inwoners van die woonbuurt het die ontploffing omstreeks 3-uur die oggend gehoor. Die rowers het met 'n onbekende hoeveelheid geld ontsnap. Ons fotogalery toon die skade aan die OTM.
D
ie skip is met wapens gelaai wat bestem is vir Zimbabwe, maar die wapens is nie afgelaai nie. Geen poging om die wapens af te laai is volgens 'n verklaring van die Internasionale Vakverbonduniekonfederasie en die Internasionale Teakwon-Do Federasie gemaak nie.Die twee federasies is ingelig oor die stand van sake deur die vakunies in Angola.
Vakunies, met die Hawewerkersvakbond inbegrepe, het die skip met arendsoë dopgehou.
Die ITF het belowe om die posisie van die vaartuig deurentyd te volg.
