Kategorie: Suider-Afrika

Suid-Afrikaanse nuus, d.w.s. sowel nuus uit Suid-Afrika én Suider-Afrika.

Universiteit van Transkei betaal studente ‘per ongeluk’ R14m, toe tref sy die winkels

‘n Diensverskaffer van die voormalige Universiteit van die Transkei, wat tans as die Walter Sisulu-universiteit bekendstaan, het vyf maande gelede “te veel nulle” by ‘n betaling vanuit die NFSAS-beursfonds gesit en R14 miljoen aan ‘n studente betaal. Die eintlike bedrag moes R1400 gewees het.

Die studente het dit aanvanklik stil gehou en het reeds R500 000 van haar “meevaller” uitgegee alvorens die universiteit sy fout agtergekom het. Dit was eers toe die gelukkige Transkeise studente begin het om ‘n strokie van haar rekening op sosiale media te versprei dat die administrasie van die Walter Sisulu-universiteit onraad bemerk het.

Radiostasies het vanoggend gegons oor die R14 miljoen en op Radio 702 het omroepers en luisteraars die rede gevoer oor wat hulle sou doen indien dit met hulle gebeur. Oor SAFM het Yonela Tukwayo, die universiteit se woordvoerder, gesê dat “die studente daarvan bewus is dat die geld per ongeluk in haar rekening gedeponeer is”. Sy kon egter geen besonderhede verskaf oor waarop die studente intussen die geld bestee het nie. Hulle hoop om die geld van haar terug te eis omdat NSFAS reëls neerlê waarop beursgeld bestee mag word.

Sy het net R68 by die Spar van haar fortuin bestee, maar die oorblywende boerpot op die strokie toon meer as R13,6m.

Die hoof van die Betalingsvereniging van Suid-Afrika, Walter Volker, het egter tydens ‘n onderhoud gesê dat dit nie so eenvoudig is om die geld terug te eis nie. Geen bank mag die geld uit haar rekening onttrek nie en die universiteit sal haar eers moet dagvaar om dit van haar terug te eis.

“Dit is wat ‘n mens noem ‘n ‘elektroniese-fondsoorplasings-krediet’,” sê mnr. Volker. “As die geld in die ander persoon se rekening is, is dit hulle geld. En die bank kan nie eensydig net die betaling omkeer nie. Ooglopend kan die bank, indien daar ‘n fout van die een of ander aard was, kan die bank die persoon vra in wie se rekening die geld verkeer, of hulle dit vrywillig aan die regmatige eienaar sal teruggee. As hulle nie daartoe bereid is nie, dan het die persoon wat die fout begaan het geen ander keuse as om ‘n regsproses aanhangig te maak nie… Dit kan duur wees.”

Die hof van die SA Betalingsvereniging het voorts gesê dat die meeste mense sou toelaat dat die bank die transaksie omkeer en die geld aan die regmatige eienaar laat terugkeer. “Maar as hulle nie saamwerk nie, dan is die enigste uitweg om ‘n mens na die howe te wend, want die banke beskik nie oor die reg om net eensydig fondse rond te skuif nie,” sê Volker.

Blykbaar “ondersoek”die universiteit die saak en waarom die studente “so lank stilgebly het”.

 

Munisipaliteite verloor oor ou skuld in Grondwethof

Die Grondwethof van Suid-Afrika het vanoggend beslis dat nuwe huiseienaars nie verantwoordelik is vir die historiese skuld van vorige eienaars teenoor munisipaliteite nie. Van die laer howe het voorheen uitsprake gelewer dat munisipaliteite hul uitstaande erfbelastings en ander skuld van die huidige eienaar mag invorder, selfs jare nadat vorige eienaars sulke skuld laat ophoop het.

Verskeie munisipaliteite, waaronder dié van Pretoria, Durban en die Oos-Rand (Ekurhuleni) het aangevoer dat dit wettig is om op ‘n onlangs verkrygde eiendom beslag te lê en dit op te veil om skuld wat hulle toekom, te delg.

Die saak in die Grondwethof is aanhangig gemaak deur verskeie huiseienaars wat dié praktyk wou betwis.

In die verlede kon ‘n eiendom nie na ‘n nuwe koper oorgedra word alvorens ‘n munisipale sertifikaat uitgereik is nie, wat alle skuld oor ‘n tydperk van twee jaar uitwis.

Die nuwe eienaar is egter belas met alle skuld wat jonger as twee jaar was.

Die kruks van die huidige appèl was die interpretasie van die munisipale stelselswet wat deur munisipaliteite gebruik is om te weier om sulke klaringsertifikate uit te reik totdat alle skuld betaal was.

Regter Edwin Cameron het vandag se uitspraak, waaroor die regters eenstemmig was, gelewer. Volgens hom kan dit gelees word as sou munisipale skuld nie die oordrag van eiendom oorleef nie.

 

Zuma se vrou dalk vervolg omdat sy hom vergiftig het

Suid-Afrika se eerste dame, Nompumelelo Ntuli-Zuma gaan dalk vervolg word omdat sy na bewering die president in 2014 probeer vergiftig het. Zuma het haar toe uit Nkandla uitgeskop, waarna die voorval deur die Valke ondersoek is.

Die Valke se ondersoek is nou voltooi en gaan volgens dié liggaam binnekort aan die nasionale vervolgingsgesag (NV) oorhandig word wat sal besluit of hulle mev. Ntuli-Zuma van poging tot moord gaan aankla. Die Valke wou nie sê of sy steeds as ‘n verdagte in die saak beskou word nie.

In 2015 is Nompumelelo Ntuli-Zuma wel deur die Valke ondervra toe die dossier by die polisiestasie in Nkandla geopen is en waarin die bewerings van poging tot moord gemaak word. Gister was daar mediaverslae wat ‘n bron in die polisie aanhaal wat sê dat Ntuli-Zuma binne die volgende paar weke in hegtenis geneem kan word omdat sy glo haar man vergiftig het.

 

Die woordvoerder vir die Valke, brigadier Hangwani Mulaudzi, sê het hy dra geen kennis van die komende inhegtenisname van die eerste dame nie, maar het bevestig dat die ondersoek voltooiing nader en dat dit “binne enkele weke aan die NV oorhandig sal word”.

“Die Valke is klaar met die ondersoek en dit is aan die NV oorhandig, maar toe het die NV die dossier teruggestuur met enkele tegniese kwessies wat uitgelig is en waaraan aandag geskenk moet word. Daardie kwessies word nou hanteer en gefinaliseer en, as dit eers gedoen is, gaan dit na die NV teruggeneem word,” sê Mulaudzi.

Vroeër vanjaar het Ntuli-Zuma se prokureur, Ulrich Roux, bevestig dat sy steeds ‘n verdagte in die saak is, maar ‘n besluit afwag of sy aangekla gaan word, aldan nie. Sy is in Januarie verlede jaar deur die minister van staatsveiligheid, David Mahlobo, uit die Nkandla-landgoed uitgesit.

Die hoof van die NV, Shaun Abrahams, het in November 2016 bevestig dat sy steeds as ‘n verdagte beskou word.

President Jacob Zuma het vroeër vandeesmaand by ‘n ANC-vergadering in Kwazulu-Natal gesê dat hy reeds drie pogings om hom te vergiftig oorleef het.

Swart leerlinge betoog vir stoofpypjeans by Pretoriase hoërskool

Die departement van onderwys in Gauteng gaan vanoggend die Hoërskool Pretoria-Wes besoek omdat vroulike swart leerlinge klasse boikot en eis dat hulle stoofpypjeans skool toe mag aantrek.

Die LUR vir onderwys in die die provinsie, Panyaza Lesufi sê “die leerlinge het nie die korrekte prosedure gevolg deur ‘n formele klag aan die skoolbeheerraad te rig nie” aangesien hulle reeds Vrydag begin betoog en amok maak het.

Lesufi voel “teleurgesteld” met die gedrag van die leerlinge.

“Ek is verbaas, ek weet nie hoekom nie. My eerlike vrees is dat hierdie neiging ‘n presedent binne die skoolomgewing mag skep, ek wil niks doen om die verkeerde presedent binne die skoolomgewing te skep nie.

“As hulle stoofpypbroeke wil dra, verkeer dit binne hul regte om die skoolbeheerraadliggaam te nader.

Die leerlinge meen dat die skooldrag “te los” is. Blykbaar word leerlinge in Mamelodi toegelaat om stoofpypjeans vir skooldrag aan te trek, daarom voel hulle dat die Hoërskool Pretoria-Wes dit ook behoort toe te laat.

Waarnemende hoof van misdaadinligting se matrieksertifikaat glo vals

‘n Nuwe waarnemende streekskommissaris van die afdeling: misdaadinligting is met onmiddellike ingang aangestel, volgens ‘n verklaring wat die SA Polisiediens gister uitgereik het. Sy naam is majoor-genaarl King Bhoyi Ngcobo en hy is ‘n vorige hoof van president Zuma se lyfwagte, asook hoof van die BBP-beskermingseenheid.

Vroeër vanjaar is Ngcobo egter daarvan beskuldig dat hy ‘n vervalste matrieksertifikaat aan die SAPD voorgelê het.

‘n Woordvoerder vir die polisie, brigadier Vishnu Naidoo het egter Ngcobo beskryf as iemand met “‘n rykdom aan polisie-ervaring” wat die polisie vir meer as 20 jaar gedien het.

“Gedurende dié twee dekades van getroue diens, het majoor-generaal Ngcobo ook in die misdaadinligtingsomgewing gewerk. Misdaadinligting is ‘n uiters belangrike omgewating wat ‘n leier nodig het wat hardwerkend, ervare, met goeie leierskapsvaardighede is, asook iemand van goeie inbors. Majoor-generaal Ngcobo pas volmaak by dié vereistes,” het Naidoo gesê.

In sy gelukwensing aan Ngcobo, het die waarnemende kommissaris luitenant-generaal Mothiba gesê: “Namens die SAPD, wens ek majoorgeneraal Ngcobo geluk met sy aanstelling in die waarnemende hoedanigheid en ons het geen twyfel dat hy aan alle verwagtinge sal voldoen nie.”

 

Guptas verkoop hul mediagroep aan Jimmy Manyi vir R450m

Die Gupta-familie het ooreengekom om hul aandele in die New Age-koerant en die ANN7-televisiekanaal aan Lodidox vir R450m te verkoop. Dié maatskappy behoort aan Mzwanele Jimmy Manyi.

In ‘n persverklaring het Oakbay-beleggings gesê: “Die verkoping sal ook die aandeelhouer die tyd gun om daarop te fokus om sy naam skoon te maak teenoor ongegronde media-aantygings.”

 

Die transaksie word soos volg saamgestel: Oakbay se belang in Infinity Media, waaraan ANN7 behoort, word verkoop vir R300-miljoen. Die maatstkappy se tweederdebelang in TNA Media, uitgewer van The New Age, word vir R150-miljoen verkoop.

 

Die ooreenkoms sal na verwagting binne die volgende twee weke voltrek word, onderworpe aan owerheidsgoedkeuring.

“Die transaksie is deel van Oakbay se verbintenis tot die behoud van werksgeleenthede en om sekerheid aan die 7 500 hardwerkende werknemers dwarsdeur die groep te verskaf, asook om die inherente waarde van die ondernemings waarvoor hulle werk te beskerm,” lui Oakbay se verklaring.

Op sy beurt het Jimmy Manyi gesê: “Ek is verheug dat ek ‘n ooreenkoms met Oakbay bereik het en sien daarna uit om die transaksie af te handel.

“Dit gaan om twee sterk ondernemings wat oor baie potensiaal beskik en, onder die regte eksterne omstandighede, toenemend belangrik en ‘n tersaaklike deel van die Suid-Afrikaanse medialandskap kan word.

“Ek is besonder beïndruk met die aandeelhouers van Oakbay wat daartoe ingestem het om verkopersfinansiering op aanvaarbare terme te doen as deel van hul verbintenis tot transformasie en om die transaksie te bespoedig.”

Ronica Ragavan, die waarnemende uitvoerende hoof van Oakbay het verklaar: “Ons is verheug om ‘n ooreenkoms met Lodidox en die bestuurspan te bereik; die verkoop van ons aandeelhouding sal die toekoms van die ondernemings verseker en help om werksgeleenthede te beskerm. Beide ondernemings is wesentlik gesond en goed geposisioneer vir groei in hul onderskeie marksegmente. Ons wens hulle alle sukses toe vir die toekoms.”

Kritici van die transaksie meen egter dat die beweegrede dalk mag wees dat die Gupta-familie sodoende die bankrekening van Lodidox mag gebruik om die boikot van Suid-Afrika se groot banke teenoor Oakbay te omseil.

Grace Mugabe ‘steeds in SA’ ná aanranding op model

Grace Mugabe, eggenote van Robert Mugabe van Zimbabwe, bevind haar volgens bronne steeds in Suid-Afrika. Haar ligging word egter geheim gehou aangesien sy steeds deur die SA Polisie gesoek word om op ‘n klag van aanranding te verskyn. Sy sou gistermiddag in die Randburgse Landdroshof verskyn het, maar het nie opgedaag nie.

Die klag hou verband met ‘n voorval wat in die Sandtonse hotelkamer van een van haar twee seuns plaasgevind het. Sy het na bewering ‘n Suid-Afrikaanse model, Gabriella Engels, met ‘n elektriese verlengkoord geslaan sodat Engels se voorkop oopgekloof is en begin bloei het. Engels het agterna ‘n klag van aanranding aanhangig gemaak en het tydens ‘n onderhoud met RSG gesê dat haar “loopbaan as model nou geruïneer is omdat my voorkop ‘n letsel opgedoen het”.

Gabriella Engels sê dat “geen vlak van intimidasie sal versaak dat ek die aanrandingsaak teen Mugabe sal terugtrek nie”. Die 20-jarige Engelse sê verder dat sy daarvan bewus is dat Grace Mugabe oor ‘n geskiedenis van beweerde aanrandings beskik en haar in ‘n geregshof wil konfronteer.

In 2009 het ‘n fotograaf in Hong Kong beweer dat hy herhaaldelik deur Grace Mugabe met die vuis geslaan is.

 

 

Google dank ingenieur af omdat hy geslagsverskille raaksien

Nadat Google vir James Damore, skrywer van ‘n manifes waarin ‘n feitelike, wetenskaplike benadering tot die beweerde “geslagsgaping” by tegnologie verdedig word, afgedank het, het vele Google-werknemers sy mening ondersteun.

Damore se manifes van tien bladsye lank druis in teen die heersende linkse en “progressiewe” narratiewe by die maatskappy. Die voormalige Google-ingenieur staan by sy sienings en sê dat die maatskappy poog om sy reputasie skade te berokken.

Damore, wat Maandag deur die soekenjinreus afgedank is, het sy menings Woensdag in gesprek met Bloomberg TV verdedig, waartydens hy aangevoer het dat die biologie vroue verhoed om ewe goed as mans in die tegnologienywerheid te vaar en het die maatskappy vir sy “links-neigende vooroordele” gekritiseer.

Damore sê hy het reeds  ‘n maand gelede sy memorandum gedeel, maar niemand “hoër op het ooit na my toe gekom en gesê, ‘Moenie so iets doen nie,’ in weerwil daarvan dat vele mense daarna gekyk het,”het Damore aan Bloomberg gesê. “Dit was eers toe dit viraal begin versprei dat senior bestuur begin het om my te hoon en my uiteindelik af te dank.”

Hy het ‘n klag by die Nasionale Arbeidsverhoudingeraad in die VSA aanhangig gemaak waarin hy aanvoer dat Google se senior bestuur “wanvoorstellings van my maak en my hoon ten einde my griewe in die doofpot te stook”.

Damore voer aan dat biologiese verskille veroorsaak dat vroue onderverteenwoordig is in die tegnologiebedryf  en nie weens vooroordeel of diskriminasie nie. Hy benadruk verder dat “die verspreiding van voorkeure en vermoëns van mans en vroue ten dele om biologiese redes verskil en dat dié verskille mag verklaar waarom ons nie ‘n ewe verteenwoordiging van vroue in tegnologie en leierskap sien nie”.

“Daar was ‘n gesamentlike poging deur die senior bestuur om ‘n baie duidelike sein uit te stuur dat dít waarmee ek besig is skadelik en verkeerd is en nie Google verteenwoordig nie,” verduidelik Damore. “Dit sou op loopbaanselfmoord neerkom vir enige uitvoerende amptenare of direkteure om my te ondersteun.”

Ondanks Siliconvalleimaatskappye  wat hoog opgee oor “personeeldiversiteit” in ‘n bedryf wat deur blanke mans oorheers word, het die geslagsbalans nie verbeter nie. Maatskappye soos Google, Facebook en Microsoft maak gereeld “diversiteitsverslae” bekend waarin dié toestand duidelik is.

Maandag, op dieselfde dag waarop Damore deur Google afgedank is omdat hy “maatskappyreëls verbreek het”, het die maatskappy se hoofuitvoerendebeampte, Sundar Pichai, paradoksaal genoeg verklaar dat dit “nie OK” is vir werknemers om te voel dat hulle nie “veilig hul menings mag uitspreek nie (veral diegene met ‘n minderheidstandpunt)”.

In sy internetmemorandum met die opskrif “Google’s Ideological Echo Chamber – How bias clouds our thinking about diversity and inclusion”, argumenteer die ingenieur dat geslagsverskille “nie bloot sosiaal gekonstrueer word nie”.

Die skrywer sê dat dié beleid op ideologie gegrond is en nie op rasionaliteit nie en noem verskeie wetenskaplike studies waarin bevind is dat mans en vroue (as kategorieë, nie as spesifieke individue nie) vanuit verskeie maatskaplike gesigspunte ongelyk is.

Hy voer insgelyks aan dat kulturele vooroordeel alleen nie die gaping kan verklaar nie, en dit maak nie sin om na gelyke groepsverteenwoordiging in alle beroepe te streef nie. Google se beleid, wys hy inderdaad uit, is gegrond op onbewese ideologie, nie op die wetenskap nie.

In weerwil van al die praatjies oor inklusiwiteit en diversiteit, is die werklikheid dat as jy nie blank of Asies is nie, het jy slegs ‘n vyf persent kans om lid van Google se leierskapspan te word. En terwyl 31 persent van Google se werknemers vroue is, is slegs 20 persent van die maatskappy se tegniese werknemers vroulik.

As dit by rekenaar- en wiskundige beroepe kom, toon die syfers duidelik dat vroue en mans nie gelyk verteenwoordig is nie. In 1960 het vroue 27 persent van sulke betrekkings beklee, en dertig jaar later is hulle 35 persent.

In 2013 het die aantal vroue in rekenaar- en wiskundige beroepe tot 26 persent teruggesak, en duidelik nie omdat minder vroue universiteit toe gaan nie.

‘n Ondersoek deur die Amerikaanse onderwysdepartement het aangetoon dat meer vroue as mans universiteit toe gaan en grade behaal, maar mans en vroue oefen verskillende keuses uit. ‘n Onlangse studie deur die Georgetownse Universiteit het aangetoon dat 80 persent van petroleumingenieursgraduandi mans is. So ook byna 70 persent van diegene wat wiskunde rekenaarwetenskap as hoofvakke neem.

Man dood, vrou ernstig na gewapende aanvalle te Muldersdrift

Gewapende aanvalle op blanke kleinhoewebewoners in Muldersdrift duur voort. Oor die afgelope naweek is ‘n blanke man doodgeskiet en ‘n blanke vrou swaar gewond in twee afsonderlike voorvalle.

Volgens konstabel Lucky Matome van die Suid-Afrikaanse Polisiediens is ‘n eenheid omstreeks 20:30 Saterdagaand na ‘n kleinhoewe in Muldersdrift se Rietfonteingebied ontbied. Daar aangekom, het hulle die vrou in ‘n plas bloed aangetref.

“Die voorlopige ondersoek dui daarop dat die vrou tydens ‘n huisroof in die rug geskiet is,”  het konstabel Matome gesê. “Dit is nie duidelik hoeveel verdagtes by die hartelose misdaad betrokke was nie.” Enkele waardevolle items is as vermis aangemeld, waaronder selfone, ‘n tuisteaterstel en ‘n onbekende bedrag kontant.

Matome het voorts gesê: “Daar kon nie veel inligting by die slagoffer verkry word nie, aangesien sy in ‘n ernstige toestand was. Sy is vir dringende mediese behandeling na ‘n hospitaal gehaas.

‘n Saak van poging tot moorde en huisroof word tans ondersoek.

Die vorige oggend, Vrydag, het ‘n blanke man in dieselfde omgewing gesterf terwyl hy hom teen ‘n gewapende aanval probeer verdedig het. Die man het skuins voor ses in die oggend onraad bemerk en sy huis verlaat om ondersoek in te stel. Hierna het die aanvallers op hom losgebrand en het hy teruggeskiet, maar is noodlottig in sy bolyf gewond.

Volgens Matome is die polisie “bekommerd” oor die toename in aanvalle op kleinhoewebewoners in Muldersdrift.

Lede van die publiek met inligting kan die Muldersdrift-polisie skakel by 011 952 4600 of die Wesrand-trio-taakspan by 079 496 6288.

Adjunkminister van hoër onderwys slaan vrou toe sy hom ‘n ‘moffie’ noem

Suid-Afrika se adjunkminister van hoër onderwys, Mduduzi Manana, het na bewering Sondagoggend omstreeks halfdrie ‘n vrou begin aanrand omdat hulle eers in ‘n politieke argument betrokke geraak het en sy hom daarna ‘n “moffie” (stibane) genoem het. Die voorval het in die nagklub Cubana in die Cedar Square-winkelsentrum te Fourways, Johannesburg, plaasgevind.

‘n Video van die voorval is agterna op sosiale media, waaronder Twitter, geplaas van waar PRAAG dit afgelaai het.

Die slagoffer van die adjunkminister en sy vriende het agterna gesê: “Hulle het my geskop en geslaan en aan my hare getrek… My niggie Thando is ook geklap, hulle het haar hare getrek. My vriendin is rondgegooi toe sy probeer het om my te kom help.”

Die vrou het agterna ook foto’s aanlyn geplaas wat op Twitter gedeel is.

Sy het agterna ook ‘n klag van aanranding teen Manana by die Douglasdale-polisiestasie aanhangig gemaak (sien dokument hier onder). Volgens haar het die nagklub se “uitsmyters net rondgestaan en kyk terwyl die aanranding plaasgevind het”.

In haar verklaring sê sy dat hulle by ‘n tafel naby die minister gesit het toe “ons in ‘n politieke debat betrokke raak, en hy wou ‘n toespraak maak teenoor almal wat daar was, waaronder sy personeel”.

‘n Vriendin van haar, Thando, het begin om ‘n selfoonvideo van die toespraak te maak toe sy gevra is om op te hou. Hierna het Manana woedend geraak, gevra wie hulle is, asook die veiligheidspersoneel by die kroeg gevra om haar en haar vriende te verwyder.

Mduduzi Manana. Hy is ‘n ‘moffie’ (stibane) genoem.

Met dié dat hulle wegloop, het een van haar vriende na die minister toe gedraai en vir hom gesê: “Maar jy is ‘n moffie (stibane).”

Toe sy buite die kroegarea kom, met haar vriende steeds binne, is sy na bewering geslaan. Toe sy val, is sy ook geskop. ‘n Werknemer van die SAUK wat ook teenwoordig was, het op verskeie radiostasies bevestig dat Manana “op die vrou se lyf en kop getrap het”.

Die vrou sê ook dat Manana “my hare gertrek het sodat my pruik van my kop afgekom het”.

Die vrou sê die uitsmyters wat haar en haar vriendin tot by hul motor vergesel het, het aan hulle gesê “om die plek te verlaat aangesien Mduduzi gevaarlik is en oor ‘n vuurwapen beskik”.

Die minister van polisie, Fikile Mbalula, het bevestig dat ‘n saak van aanranding by die Douglasdale-polisiestasie naby die klub aangemeld is.

Volgens Mbalula ontken Manana enige betrokkenheid, hoewel daar opnames op sosiale media bestaan waarin hy blyk skuld te erken.

Op sy persoonlike Twitter, het die adjunkminister gesê dat hy nie “bewerings ontken nie” en ook “nie trots” is nie. Desnieteenstaande meen hy dat die video-opname van die gebeure “vals” is.

Nasionale Gesondheidslaboratoriumdienste ‘stort in duie’

Die Nasionale Gesondheidsdienslaboratoriumdienste het nie meer geld nie weens wanbetaling deur provinsies en “is besig om in duie te stort”. Só het die waarnemende hoof van die NGLD, Shabir Madhi, gister aan die media gesê. Volgens hom is die NGLD, wat al die staatshospitale en -klinieke in Suid-Afrika bedien, die grootste laboratoriumdiens in Afrika en een van die grootstes ter wêreld.

Wanbetaling deur provinsies, veral dié van Gauteng en Kwazulu-Natal, versoorsaak dat die laboratoriumdiens nie meer toerusting kan aankoop nie, asook sy gekwalifiseerde personeel soos patoloë verloor. Personeel van die NGLD het oor die afgelope vyf dae gestaak, maar sal vanoggend terugkeer werk toe waar ‘n opgehoopte werklading hulle in die gesig staar.

Na bewering skuld Gauteng en Kwazulu-Natal die laboratoriumdiens nagenoeg R4 miljard wat weens “wanbestuur” nie aan hulle betaal word nie. Net Gauteng skuld die diens R2,5 miljard. Volgens Shabir Madhi sal dit moeilik wees om die provinsies te dagvaar aangesien beide die NGLD en die provinsies staatsinstellings is. Gauteng betaal tans ongeveer R100 miljoen per maand terwyl hul maandelikse rekening R153 miljoen beloop, iets wat veroorsaak dat die skuld met vyftig miljoen rand per maand ophoop.

 

Die reuse-Baragwanath-hospitaal in Soweto, wat deur die vorige blanke regering gebou is, het gesê dat dit tydens die staking opgehou het om monsters vanaf die 53 klinieke in te neem wat dit veronderstel is om te bedien.

Die sakebestuurder van die NGLD by die hospitaal, Bongiwe Xhakaza, meen dat pasiënte tans onder die staking ly.

“Al die pasiënte wat nie opgedaag het weens die staking nie, gaan waarskynlik nou terugkeer om in te haal met hul behandelings,” sê sy.

‘n Enkele werknemer van die hospitaal het besluit om nie die staking deur die Nehawu-vakbond te steun nie omdat sy nie wou hê dat pasiënte daaronder moet ly nie.

“Stel jou voor dat jou familielid nie oor ‘n privaat mediese fonds beskik nie en hulle lê sterwend in die hospitaal,” sê sy.

Met al die nuwe toetse wat nou gaan instroom, gaan die laboratoriumdiens moeilik die agterstand uit die weg kan ruim.

Malema vra nie om verskoning vir anti-Indiëruitlatings

Die leier van die Ekonomiese Vryheidsvegters (EFF), Julius Malema, verseg om sy uitlatings oor Indiërs in Durban terug te trek of daarvoor om verskoning te vra. Tydens sy party se vierde verjaardagvieringe in dié stad het Malema gesê:

“Hier in Durban, hier in KZN, word alles wat strategies is aan Indiërs gegee… elke groot tender … hulle is dié wat alles besit. Ons sê dat hulle met ons mense moet deel. Ons wil ook sê: hou op ons mense in KZN te mishandel. Hulle mishandel ons mense erger as wat die Boere-Afrikaners ons mense mishandel het. Dit is nie anti-Indies nie, dis die waarheid, hulle moet ons mense behoorlik behandel.”

Malema het Indiërs ook van “rassisme” teenoor swartmense beskuldig. “Dit moet end kry,” het hy gesê.

Die DA het Malema se uitsprake oor Indiërs veroordeel en gevra dat hy om verskoning moet vra.

Die South African Minority Rights Equality Movement (Samrem) het ‘n klag van “haatspraak” en “aanhitsing tot geweld” teen Malema by die polisie aanhangig gemaak. Volgens Deleep Lutchman, voorsitter van Samrem, is Malema se uitlatings oor Indiërs “loutere onsin en sonder enige feite”.

“Wat hy gesê het, het die moontlikheid om rassehaat in die land aan te hits,” het Lutchman voorts gesê. “Mense neem emosionele uitlatings soos dié ernstig op, ons het dit al in die verlede gesien”.

Lutchman se uitspraak oor “die verlede” kan moontlik verwys na die Durban-onluste in Januarie 1949 toe meesal arm Indiërs deur Zoeloes doodgemaak is. Die aantal mense wat in die onluste omgekom het, het 142 beloop en 1 087 is beseer. Dit het ook tot die vernietiging van 58 winkels, 247 woonplekke en een fabriek gelei.

 

Swartes vertrap mekaar weer by sokker met fopkaartjies

Suid-Afrika is nie net die bestemming van reënboog-fopnuus nie, maar ook fopkaartjies vir swart sokkerwedstryde in Johannesburg. Saterdag het nog ‘n dodelike stormloop by die FNB-stadion tot gevolg gehad.

Twee mense is doodgestrap en ‘n ander persoon is kritiek toe swart aanhangers ‘n hek tydens die Carling Black Label Cup wedstryd tussen die land se twee gunsteling swart spanne, Orlando Pirates en Kaizer Chiefs, platgetrap het.

Stadium Management South Africa het aangekondig dat ‘n voorlopige ondersoek aan die lig gebring het dat die voorval veroorsaak is deur fopkaartjies wat aan aanhangers verkoop is, wat toe probeer het om toegang tot die stadion te verkry.

Die polisie het reeds sowat 3000 sulke fopkaartjies gekonfiskeer wat aanhangers in hul besit gehad het. Die kaartjies is amptelik gedruk deur die Suid-Afrikaanse aanlynkaartdiens, Computicket.

“Die voorraad is genommer, dit moes gesluit gewees het, dit moet uitgeteken word teen behoorlike registers. Ons lei af in hierdie stadium dat die kaartjievoorraad gesteel is,” het die hoofbestuurder van Stadium Management South Africa, Jacques Grobbelaar aan die Suid-Afrikaanse stasie, Eyewitness News, gesê.

Grobbelaar sê die validering van die kaartjies wys verder na meer interne korrupsie, en ondersoeke deur die polisie sal van stapel gestuur word.

Die Johannesburgse openbare veiligheid bestuurskomiteelid, Michael Sun het aan Eyewitness News bevestig dat die vertrapping veroorsaak is deur die verkoop of gebruik van fopkaartjies by die lokaal.

Die stormloop het plaasgevind waar meer as 87 000 swart aanhangers by die stadion aangekom het. Ten spyte van die voorval het die wedstryd voortgegaan. Nie die toeskouers of spelers het ‘n saak gehad met die slagoffers nie.

Die polisie het eers laat die aand die lyke verwyder van die stadion.

Die vertrapping is soortgelyk aan die Ellis Park-ramp, waar 43 aanhangers in April 2001 in ‘n wedstryd tussen Pirates and Chiefs doodgetrap is.

Die Ellis Park-stadion-ramp was die grootste sportongeluk in die Suid-Afrikaanse geskiedenis op 11 April 2001, toe 43 swart toeskouers dood is toe aanhangers in die stadion in Johannesburg gestormloop het om die sokkerwedstryd tussen die twee swart spanne Kaizer Chiefs en Orlando Pirates te sien.

Die finale ondersoek na die voorval het bevind dat ‘n belangrike oorsaak was dat sekuriteitspersoneel omgekoop is, om toeskouers toe te laat om sonder kaartjies die stadion te betree.

‘Johannesburgse polisiestasies vol weens klopjagte op gekaapte geboue’

Die burgemeester van Johannesburg, Herman Mashaba, se strategie om klopjagte op gekaapte geboue in die middestad uit te voer, lei blykbaar tot “oorvol polisiestasies” aangesien 80% van die inwoners van sulke geboue uit buitelanders bestaan. Die munisipaliteit versoek die Suid-Afrikaanse Polisie om onwettige immigrante te arresteer en uit die land te deporteer, wat veroorsaak dat polisieselle nie meer die duisende onwettiges kan huisves nie.

Gerugte dat die departement van binnelandse sake die munisipaliteit en die polisie gevra het om nie verdere onwettiges in hegtenis te neem nie, is deur die departement se direkteur-generaal, Mkuseli Apleni, ontken. In ‘n onderhoud met Radio 702 het hy vanoggend verklaar:

“Hoe kan ons onwettigheid bevorder as ons as departement sê iemand het die wet oortree, en omdat hulle die wet oortree het, dus, moenie hulle arresteer nie want daar is nie plek nie. Dit kan nie moontlik wees nie.”

Apleni het egter die burgemeester gekritiseer omdat hy “xenofobie” aanwakker. Die departement beskou migrasie as ‘n “internasionale verskynsel wat bestuur moet word”.

Suid-Afrikaanse swartes is daarvoor bekend dat hulle buitelanders aanval en in 2008 het ten minste 62 buitelanders uit ander Afrikalande in xenofobiese onluste gesterf. In 2015 het xenofobiese moorde weereens opgevlam en het ten minste twee lande, Malawi en Kenia, van hul burgers gerapatrieer uit vrees dat hulle deur plaaslike swartes aangeval sou word.

Herman Mashaba het twee dae gelede gesê dat hy die situasie geërf het waardeur geboue in die middestad deur krotbase en inwoners gekaap word en dan aan buitelanders verhuur word.

Mashaba, wat aan die DA-opposisieparty behoort, regeer tans in Johannesburg danksy steun van die Afro-kommunistiese party, die EFF wat die ANC vanuit die mag uitgesluit het. Die burgemeester van Johannesburg het gesê: Ek gaan nie die krotbase toelaat om deel hiervan te wees nie. ‘n Minimum van 80% van die mense wat in gekaapte geboue woon, is buitelandse burgers. Ek sal alles moontlik doen om huisvesting te verskaf, maar die stad van Johannesburg sal slegs huisvesting aan Suid-Afrikaners voorsien.”

Volgens Mashaba sal hy nie toelaat dat vervalle geboue gekaap word nie.

Twee weke gelede het sewe mense gesterf nadat ‘n uitgesette inwoner uit weerwraak ‘n brand in een van die geboue gestig het.