Verkiesingsamptenare is van hulle stemlokaal op Nigel aan die Oos-Rand verwyder nadat stemmateriaal by die huis van ‘n party-agent gehou is.
Na afloop van die eerste dag van spesiale stemme, het die joernalis Aldrin Sampear getwiet dat die stemmateriaal wat gekonfiskeer is deur die SAPD deur ‘n vrou by name “Swazi” gehou is.
Die Onafhanklike Verkiesingskommissie sê personeel in wyk 77 het die verkiesingsprotokol oortree.
Twiets van Radio 702 het “Swazi” as ‘n ANC-agent voorgehou.
Die OVK-materiaal is glo by ‘n huis van ‘n DA-agent in Wyk 77 gekry volgens bronne op Twitter.
Die OVK het nie genoem van watter party die agent was nie, maar het bevestig dat personeel in Wyk 77 verkiesingsprotokol oortree het deur die gebruik van die huis van ‘n party-agent om stemmateriaal oornag tussen spesiale stemdae te hou.
Die OVK het gesê die stemmateriaal is van die perseel verwyder en na ‘n nabygeleë polisiestasie vir bewaring geneem.
Suid-Afrika se vyfde nasionale en provinsiale verkiesing sal gehou word op 7 Mei en die OVK verwag dat 25.390.000 geregistreerde kiesers hul stemme in 22 263 stemlokale in die land sal uitbring.
President Jacob Zuma het 90.000 juigende ondersteuners by die ANC se Siyanqoba-saamtrek in Soweto Sondag toegespreek.
Die ANC se DA se verkiesingsbeloftes was heeltemal ononderskeibaar.
Zuma het presies soos die DA belowe: “Ons sal die toepassing van die bepalings van die nuwe gewysigde Wet op Gelyke Indiensneming en die Wet op Breedgebaseerde Swart Ekonomiese Bemagtiging versterk vir suksesvolle implementering van meer oop geleenthede vir swart-, Indiër en bruin mense , asook vroue, die jeug en persone met gestremdheid, soos ons die apartheiderfenis omkeer.”
Hy het ook die ANC se aanspraak op ‘n nie-rassige beleid herbevestig.
“Ons is een nasie, uit die as van rasse-onderdrukking gebore. Ons is besig om ‘n gemeenskaplike identiteit te vorm. Ons sing een volkslied, hys ‘n nasionale vlag en omhels ons kulturele diversiteit ,” het hy gesê.
Hy het ook soos die DA 6 miljoen werksgeleenthede en meer huise belowe.
Sy ontvangs was baie anders as die vorige twee kere wat hy gepraat het by FNB-stadion en het sy gewildheid beklemtoon.
By Nelson Mandela se roudiens in Desember en by die eindstryd van die Afrika Nasies se sokkerkampioenskap in Maart is hy uitgejou deur ‘n deel van die skare, maar Sondag het hy ‘n helde-ontvangs geniet.
Malema, die EFF-leier is deur ‘n kapasiteitskare van byna 30.000 by die Lucas Moripe-stadion in Atteridgeville, Pretoria, verwelkom.
“As mens na hierdie massas kyk, is my plek in die parlement gewaarborg,” het Malema gesê.
Applous het gevolg toe Malema sy ondersteuners belowe het dat die EFF Zuma se multimiljoen-rand Nkandlahuis sal verkoop en die geld aan die armes sal gee. Hy het gesê die EFF sal die aankoop van motors en huise deur ministers stop en hul kredietkaarte wegneem.
Malema het sy party se beleid van nasionalisering van grond en natuurlike hulpbronne herbevestig.
“Ons gaan die waardigheid van plaaswerkers herstel. Na die verkiesing gaan ons die plase oorneem en dit aan werkers gee,” het hy gesê.
“Niks [van die myne] sal gaan na Engeland nie. Ons is nie bang vir wit mense soos die ander nie.”
Malema het die moontlikheid van die vorming van ‘n koalisie met die ANC of die DA verwerp.
Volgens ‘n peiling deur Ipsos namens die Sunday Times, sal die ANC 63,9% van die stemme kry.
Die lyk van ’n swart man in ’n blou DA-hemp met ’n stuk of vyf groot betonblokke by die kop, is Saterdagmiddag deur verbygangers oorkant ’n supermark in Browns Farm, Kaapstad gevind.
Volgens ’n Wes-Kaapse polisiewoordvoerder, kol. Tembinkosi Kinana, is die liggaam nog nie geïdentifiseer nie.
Die oorledene in sy vroeë veertigs was geklee in ’n roomkleurige broek, ’n blou DA-hemp, ligbruin leerbaadjie en leersandale.
Volgens ’n DA-raadslid in die gebied, Nceba Hinana was die motief vir die moord polities aangesien die slagoffer nie van sy leerbaadjie en ander besittings beroof is nie.
Politieke ontleders sê die DA bedryf “toerisme-politiek” waar gegoede DA-leiers voorgee om deel te wees van die arm massa om stemme te wen.
Zille se kombuisbediende-uitrusting met blou kopdoek op die koop toe, is deel van dié soort stemwerwery, sê hulle.
Hinana is in Maart in Philippi aangeval omdat hy die DA steun. Nompozolo was glo ook woedend omdat Hinana wit mense na die lokasie bring.
’n ANC-lid en gemeenskapsleier, Bonile Nompozolo, het Hinana na ’n gemeenskapsvergadering in die Siyahlala-lokasie vier keer met ’n mes in sy rug en hand gesteek.
Nompozolo het Woensdag in die Philippi-landdroshof verskyn op ’n klag van aanranding.
Sowat 16 DA-lede is beseer nadat hul busse in Alexandra, noord van Johannesburg, en Soweto Sondag glo in ‘n lokval gelei is.
‘n Busbestuurder is ernstig beseer in die aanval. Die DA se premierskandidaat Mmusi Maimane het gesê die boewe wat DA-ondersteuners aangeval het, moet in hegtenis geneem word.
Die party het gesê busse wat hul ondersteuners na Kliptown, Soweto aangery het waar sowat 8000 ondersteuners byeen was, is met klippe bestook. Drie busse is erg beskadig.
‘n Stoetbul en 10 ander beeste waaronder ook dragtige koeie, het die naweek op ‘n plaas buite Bloemfontein gevrek nadat hulle vermoedelik inkbessiebos gevreet het.
Landbou-organisasies het voorheen gewaarsku dat die inkbessie besig is om Suid-Afrika se natuurlike weiveld te verwoes.
Die plant is inheems aan Suid-Amerika en is na Suid-Afrika gebring as immergroen ornamentele struike, heinings en windbreke. Inkbessies het vanuit tuine versprei en groei nou wild in KwaZulu-Natal veral in die Chase Vallei naby Pietermaritzburg waar uitbreke van vergiftiging elke nou en dan in beeste voorkom.
In die Oos-Kaap kom die plant ook baie voor en word ook gevind langs die Vaalrivier by Parys. Dit word deur voëls wat die bessies vreet versprei.
Danie Nieuwenhuizen se beeste het klaarblyklik van die inkbessiebos (Cestrum laevigatum), wat die lewer en longe aantas, ingekry.
Nieuwenhuizen, ‘n deeltydse boer, sê die helfte van sy kudde wat hy teen sowat R200 000 aangekoop het, is nou vrek.
Die karkasse wat tans opgeblaas in die veld lê, sal deur die munisipaliteit verwyder word.
Die beeste was in goeie kondisie en spekvet en net reg om in Junie terug na die Boshof-plaas te gaan waar hulle voorheen was.
Nieuwenhuizen het hulle vroeër geskuif na Bloemfontein weens die die droogte.
Druk is besig om op te laai teen die stakende Amcu-lede in die platinumbedryf.
Die mynwerkersvakbond, die NUM het die regering se versoek ondersteun om die stakende werkers in die platinumbedryf te vra om na hul werk terug te keer.
President Jacob Zuma en die minister van arbeid, Mildred Oliphant het vroeër ‘n beroep op Amcu gedoen om die staking te beëindig.
Amcu-lede staak al die afgelope drie maande. Die adjunk-president van die NUM, Thamsanqa Matosa sê die stakers wil die ekonomie vernietig.
Matosa sê die NUM het mynmaatskappye versoek om werkers te beskerm wat wil teruggaan werk toe. Hy sê NUM-lede wat werk, word ook geïntimideer.
Intussen het die hoofsekretaris van Cosatu, Zwelinzima Vavi ‘n vraagteken oor eenheid in die drie-party alliansie in die aanloop tot die verkiesing geplaas.
Vavi en adjunk-president Kgalema Mothlanthe was hoofsprekers by die Werkersdagvieringe in Port Elizabeth.
Vavi het gesê die alliansie lyk goed op papier maar ‘n ware alliansie is een waarin mense saamwerk en met mekaar oorleg pleeg.
Hy het gesê niemand behoort in ‘n alliansie gemarginaliseerd te voel nie.
Drie Suid-Afrikaanse weermaglede is tydens ‘n aanval in die ooste van die Demokratiese Republiek van die Kongo gewond. Een verkeer in ‘n ernstige toestand.
Die twee anders sterk goed aan in ‘n hospitaal in Goma, volgens die SANW
‘n Woordvoerder van die departement van verdediging, Jaco Theunissen, sê een van die gewapende rebellegroepe in die DRK het in die vroeë oggendure ‘n Suid-Afrikaanse basis aangeval. Die soldaat wie se beserings as ernstig beskryf is, is stabiel.
Nog ‘n soldaat is deur skrapnel getref en ‘n derde soldaat het sy enkel in die skermutseling geswik.
Daar word geglo dat die rebelle gekoppel is aan die Mai Mai.
Die drie soldate is gewond in Nyabondo sowat 70 km noord van Goma in die oorloggeteisterde provinsie Noord-Kivu.
Die drie is deel van ‘n ontplooiing van 3000 soldate van Suid-Afrika, Malawi en Tanzanië, wat deel uitmaak van die VN-stabiliseringsending in die Kongo.
‘n Honderd Suid-Afrikaanse soldate uit ‘n 1000 in die DRK is by die Nyabondo-basis ontplooi, het kaptein Theunissen gesê.
Theunissen sê die soldate is aangeval deur ‘n geskatte 4500 rebelle in hul basis.
‘n Militêre kenner blameer die aanval op die Alliansie vir ‘n vrye en soewereine Kongo.
“Daar word geglo dit is Mai Mai. Hulle kom van Uganda na die DRK, want M23 is onlangs verslaan,” het hy gesê.
Die alliansie bestaan vermoedelik uit sowat 500 man, byna uitsluitlik lede van die Hunde-stam .
Die groep is betrokke in gewelddadige en uitgerekte grondgeskille met die Tutsi’s in Noord- Kivu.
Die Mai Mai is oënskynlik gevorm om die inval van Rwandese magte en geaffilieerde Kongolese rebellegroepe te weerstaan, maar daar word vermoed dat die groep spanning in die oostelike streek van die DRK uitbuit tot sy eie voordeel.
Theunissen het gesê die SANW het uitstekende werk gedoen in ‘n skoonmaakoperasie ná die aanval.
Indiërs wat so kerm oor die swart ANC-regering moet teruggaan na Indië, sê Visvin Reddy.
Reddy is ‘n voormalige ANC-raadslid en Chatsworth-takvoorsitter. Hy sê die klakouse marginaliseer hulleself net verder.
President Zuma het Indiërs voorheen as swart beskryf.
Reddy het kritiek gekry vir sy Facebook-opmerking, maar hy het gesê hy staan by sy omstrede opmerkings.
Op sy Facebook-blad oor ‘n week gelede het Reddy uitgevaar teen anti-ANC kommentaar. “Wag tot 8 Mei. Die ANC sal steeds die land regeer. Julle kermkouse moet die land verlaat. Gaan terug na Indië, en julle sal sien watter goeie lewe wat ons hier het. Gaan voort met julle gemors en marginaliseer julleself verder. Moenie die ANC blameer nie, blameer jouself. Jy het nog nie die demokrasie omhels nie. Slegs ‘n dwase Indiër in SA sal nie betrokke raak by die meerderheid op ‘n konstruktiewe wyse nie… ”
Hy het gesê enige kwaadwillige kritiek teen die regering wat kan lei tot die gespanne verhouding tussen swart en Indiër Suid-Afrikaners wil hy ontmoedig.
“Ek sê nie die kritiek teen die regering is nie welkom nie, maar dit moet op ‘n konstruktiewe wyse gedoen word, anders kan dit gesien word as ‘n aanval op die meerderheid en dat dit kan spanning skep,” het hy gesê.
“Ek sê, laat ons die meerderheid omhels… Soms is die kritiek wat jy sien kwaadwillig en is afkomstig van mense wat DA-propaganda gevoer word.”
Hy het gesê Indië het, ten spyte van sy ryk tradisies, ‘n groot bevolking en hoë vlakke van armoede.
Indiese leiers het Reddy vir sy kommentaar geroskam.
“Ons is hier gebore, ons is Suid-Afrikaners en niemand moet vir my sê om terug te gaan na Indië nie,” sê Ashwin Trikamjee , president van die Suid-Afrikaanse Hindoe Maha Sabha .
Trikamjee het egter saamgestem dat kritiek teen die ANC ongegrond en kwaadwillig is.
SA Minority Rights Equality Movement (Samrem) het gesê die kommentaar toon Reddy se eie rassistiese mentaliteit.
“Ons wil die ANC daaraan herinner dat wetgewing soos die Wet op Gelyke Indiensneming, die kwotastelsel wat gebaseer is op ras in die toelating van ons kinders by instellings van hoër onderwys, en die uitsluiting van minderheidsgroepe uit breë-gebaseerde swart ekonomiese bemagtiging is op sigself om apartheidstyl rassisme te bevestig,” het waarnemende voorsitter, Daleep Lutchman gesê.
Die ANC het hom gedistansieer van die uitlatings deur Reddy. Die provinsiale sekretaris van die ANC in KwaZulu-Natal, Sihle Zikalala sê Reddy se kommentaar is ongevraagd en is nie in voeling met die beginsels van ‘n demokrasie nie.
Zikalala sê die ANC besef hy het Indiërs se steun nodig en sal nooit teenoor hulle oneerbiedig wees nie.
Die verkiesingswiele het vanoggend amptelik begin rol toe Suid-Afrikaners in die buiteland hul kruisies kon trek, het RSG berig.
Die sowat 26.000 geregistreerde kiesers in die buiteland kan slegs aan die nasionale verkiesing deelneem en kan nie vir verteenwoordigers op provinsiale vlak stem nie.
Die meeste stemgeregtigde Suid-Afrikaners is in Londen, terwyl duisende kiesers ook in Afrika-lande woon en werk. In Nieu Seeland is die eerste kruisies in die Suid-Afrikaanse verkiesing getrek, terwyl Suid-Afrikaners in Amerika later vandag na die stembus sal gaan.
Slegs nege uit meer as 300 Suid-Afrikaners in Lesotho kon vandag hulle kruisies trek. Die adjunk-hoë kommissaris in Maseru, Sello Jele, sê gedurende die registrasieproses is meer as 300 mense geregistreer, maar slegs nege van hulle is goedgekeur om spesiale stemme uit te bring vir die komende algemene verkiesing.
Hy sê hulle was verbaas om dit te verneem. Hy sê van die redes is ongeldige identiteitsdokumente en die VEC-10-vorms wat voltooi moet word en wat nie betyds ontvang is nie.
In Swaziland verloop die stemmery vlot by die Hoë Kommissariaat in Mbabane. Die OVK se voorsittende beampte by die Kommissariaat,
Arron Themba sê kiesers kom drupsgewys aan en hulle hoop dat meer mense deur die dag sal opdaag. Meer as 70 Suid-Afrikaners in Swaziland het vir die verkiesing geregistreer. Stembusse sluit om negeuur.
In Kenia is Suid-Afrikaners besig om hul kruisies te trek by die Suid-Afrikaanse Hoë Kommissariaat in Nairobi.
Talle kiesers het reeds vroegoggend opgedaag om te stem vir die komende verkiesing Woesdag in Suid-Afrika.
Die Hoë Kommissaris in Kenia, Ratubatsi Moloi sê hulle verwag dat al 156 geregistreerde kiesers, wat oor ‘n wye gebied in Kenia woon, vandag na Nairobi sal reis om te stem.
RSG berig dat die Zola Jabulani Hospital in Soweto vandag eindelik sy deure open nadat die voltooiing van die hospitaal vir ses jaar vertraag is. Die distrikshospitaal met 300 beddens sal na verwagting druk verlig op die besige Chris Hani Baragwanath Hospitaal wat pasiënte van oral kry. Die Departement van Gesondheid het agt jaar gelede 600-miljoen rand vir die bou van die Zola Jabulani Hospitaal begroot, maar daar word beweer dat kostes tot meer as ‘n miljard rand gestyg het. Die Gautengse regering sê egter die kostes beloop 730-miljoen rand. Die hospitaal sal hoofsaaklik diens lewer aan die gemeenskappe van Soweto, insluitende Dobsonville, Meadowlands, Zola, Jabulani en Protea.
Die hospitaal is ongeveer ses jaar laat aangesien die aanvanklike openingsdatum Maart 2008 was. Daar was egter oponthoud weens wanbestuur, tenderonreëlmatighede en begrotingsoorskrydings.
Die oorspronklike tender van R336m is in 2006 aan ‘n gesamentlike onderneming van iLima Projects, Motheo Construction Group, Yikusasa Building Contractors and TTR General Building Construction toegeken.
Motheo, Yikusasa and TTR het agterna die consortium verlaat, wat beteken het dat die projek in duie gestort het. iLima het agterna ‘n tweede kontrak in 2007 ontvang, maar dit is gekanselleer toe dit aan die lig gekom het dat die firma die tender sonder ‘n geldige belastingsklaring ontvang het. Die kontrak is daarna in 2009 aan Maziya General Services toegeken.
Op daardie stadium het die kostes met omtrent 40 persent to R480m gestyg.
‘n Verdoemende verslag van die ouditeur-generaal Terence Mombembe het verlede jaar in Mei 2012 bevind dat die provinsiale departemente van gesondheid en maatskaplike ontwikkeling kontrakteurs aangstel het wat nóg oor die kwalifikasies nóg die bevoegdheid beskik het om hospitale te bou, iets wat tot miljoene rande se verliese gelei het.
Nombembe het bevind dat die begrote koste vir die bou van die hospitaal in 2012 tot R624,4m toegeneem het.
Die hospitaal beskik oor 100 ambulanse, waaronder 40 wat van hoësorgtoerusting voorsien is en aan swanger vroue toegewys is.
Verkiesingsamptenare is van hulle stemlokaal op Nigel aan die Oos-Rand verwyder nadat stemmateriaal by die huis van ‘n party-agent gehou is.
