Kategorie: Nuus

Obama dreig met kuberoorlog na China, Rusland skroewe aandraai by G20

By die G20-beraad in China het president Obama gedreig om ‘n kuberoorlog teen Rusland te loods en gesê: “Kyk, ons beweeg in ‘n nuwe era hier waar ‘n aantal lande ‘n groot kapasiteit het. En eerlik, ons het meer kapasiteit as enigiemand, beide aanvallend en verdedigend.”

Die kil betrekkinge tussen die VSA aan die een kant en Rusland en China aan die ander, was duidelik uit die ontmoeting tussen die onderskeie staatshoofde (foto bo) by die beraad in Hangzhou.

Die kommentaar van Obama bestaan nie in ‘n vakuum nie, met die Withuis wat ‘n federale ondersoek na “Russiese inmenging” in die 2016 presidensiële veldtog van stapel gestuur het na aanleiding van ‘n brief deur Senator Harry Reid aan die FBI se Direkteur James Comey.

Daarin beweer Reid dat Poetin verkiesingsuitslae tot voordeel van Donald Trump kan manipuleer wat hy as ‘n “verraderlike agent van Rusland” in drie uit vyf paragrawe skets.

Die Chinese weermag het intussen aangekondig dat hulle Siriese soldate van die mediese dienste sal voorsien om Rusland by te staan.

Maar almal verstaan ​​dat hierdie ooreenkoms en Chinese toetrede die magsbalans in die Midde-Ooste teen die Obama-administrasie gelaai het.

Vir die afgelope vier jaar, is die helfte van die militêre dokters in Sirië opgelei in China, alhoewel die Volksrepubliek van China voorheen geweier het om betrokke te raak in enige vorm van samewerking wat deur Washington as militêre hulp geïnterpreteer kan word.

Rusland het voorheen ‘n identiese ooreenkoms met Sirië aan die begin van 2012 aangegaan, maar militêre hulp is drie en ‘n half jaar later goedgekeur.

Kennelik het die ooreenkoms ‘n Amerikaanse vrees aangewakker dat China ook binnekort militêr in Sirië sal toetree.

Afrika is intussen hoog op die beraad se ontwikkelingsagenda geplaas na druk deur China.

Een van die konsepresolusies deur leiers van die voorste nywerheidslande wat in Hangzhou was instemming tot samewerking om ekonomiese groei in Afrika te bevorder.

Die Chinese president, Xi JinPing, het deur middel van ‘n tolk gesê Afrikabevolkings sal bevoordeel word deur inklusiewe groei.

Nie-Westers leiers wat die beraad van die G20-lande bygewoon het wat pas in China te einde geloop het, eis die hervorming van die wêreld se leningsinstellings soos die Internasionale Fonds en die Wêreldbank.

Hulle eis dat die IMF sy kwota en stemreg herverdeel sodat dit ‘n regverdige weerspieëling is van die status van opkomende markte en ontwikkelende lande.

Xi JingPing het deur ‘n tolk gesê finansiële instellings behoort sensitief te wees teenoor armer lande.

‘n Aksieplan op die Agenda vir Volhoubare Ontwikkeling vir 2030 is aanvaar en dit is die eerste keer dat die G20 as ‘n groep hul steun toesê aan nywerheidsontwikkeling in Afrika en alle ander ontwikkelende lande.

Die leiers van die sterk nywerheidslande het ook onderneem om handelbeperkings te verwyder en die wêreldekonomie op ‘n groeipad te plaas.

Die IMF het die wêreldgroei vir die jaar tot net bokant drie persent aangepas en vir aanstaande jaar tot tussen drie en vier persent.

Wit pa in sy huis doodgeskiet

‘n Wit pa van Durban, Gary Mackay (foto), is dood toe hy probeer het om sy vrou en twee kinders by hul huis Duncanweg, Westville, Saterdag teen swart aanvallers te beskerm.

Drie swart indringers het hom in sy maag geskiet, en daarna die huis besteel voordat hulle gevlug het met die buit.

Die 35-jarige webbestuurder het geluide in sy huis gehoor omstreeks 04:00. Hy het gaan kyk wat aangaan onder. Hy is gekonfronteer deur die drie gewapende aanvallers en ná ‘n stryd, is hy geskiet.

Sy vrou en sy twee kinders, tussen die ouderdomme 19 maande en vier jaar, was wakker en op die boonste verdieping van die huis.

Na hulle Mackay doodgeskiet het, het die misdadigers op hul gemak voortgegaan om goedere te steel uit die huis.

Sy skoonpa, Orlando Pereira, het gesê almal is geskok, ook deur die aanvallers se koelbloedigheid.

“Mense is nie veilig in hul huise nie. Die mans wat dit gedoen het, het nie eens enige berou nie en het doodluiters [na hulle Gary doodgeskiet het] by die trappe opgegaan om besittings van my dogter te neem,” het hy gesê.

Hy sê die woonsbuurt het baie onveilig geword. Verlede jaar is twee huisaanvalle geregistreer, terwyl daar reeds nege aanvalle hierdie jaar was.

Poetin met roomys op rooi tapyt gul ontvang by G20

Met die aankoms van president Obama in Hangzhou, was geen trap vir hom om die vliegtuig te verlaat nie en geen rooi tapyt nie.

Obama moes ‘n nooduitgang gebruik. ‘n Chinese amptenaar is daarna deur die Amerikaanse perskorps en nasionale veiligheidsadviseur Susan Rice verskree, maar die Chinees het hom nie van stryk laat bring nie: “Dit is ons land. Dit is ons lughawe,” het die Chinese amptenaar ferm geantwoord.

Die Russiese president Vladimir Poetin, het geen sulke probleme ondervind nie. Hy is op die rooi tapyt ontvang met sy geskenk van Russiese roomys aan Chinese leier Xi Jinping: “Ek het belowe ek sal roomys bring,” het Poetin gesê.

Xi Jinping is ‘n liefhebber van Russiese roomys. “Baie dankie vir die geskenk, vir die lekker roomys. Met elke reis na Rusland vra ek altyd om Russiese roomys te koop. En dan, by die huis, eet ons dit,” het die Chinese leier geskerts toe hy die geskenk in ontvangs neem.

Die verskille in die ontvangs van die twee wêreldleiers, was oral merkbaar.

Gesprekke tussen die Amerikaanse president Barack Obama en die Russiese president Vladimir Poetin op die kantlyn van die G20-beraad in China se Hangzhou, het langer geduur as wat beplan is.

Die twee leiers het die Amerikaans-gesteunde inval in Sirië en die Oekraïne bespreek, het die Kremlin se woordvoerder Dmitri Peskov gesê.

“Die vergadering was langer as wat beplan is. Sirië was in die eerste plek bespreek, en die Oekraïne,” het die woordvoerder gesê.

Poetin en Obama het ingestem tot informele samesprekings by die G20-beraad.

In Sirië worstel Amerika en Rusland steeds met verskille oor ‘n skietstaking-ooreenkoms waar die gevegte in dié land onverpoosd voortduur.

Die twee is deel van 20 staatshoofde van die wêreld se grootste ekonomieë wat hul jaarlikse beraad in Hangzhou hou.

Aanduidings is dat die informele gesprekvoering meer produktief was. Die leiers van Duitsland en Turkye het samesprekings oor visumvergunnings gehou.

Daar was ‘n geleentheid vir die nuwe Britse eerste minister, Theresa May, om haar land se toekoms ná uittrede uit die Europese Unie te bespreek. Sy het ook met pres. Poetin vergader.

Die president van China, Xi Jinping het tydens die opening gewaarsku dat die wêreldekonomie by ‘n kruispad is en dat die G20-leiers op ekonomiese kwessies moet fokus.

Intussen het die US Peace Council (USPC) gesê die kommerwekkende toestand in Sirië is nie die gevolg van ‘n burgeroorlog nie, maar ‘n inval.

Henry Lowendorf, Lid van die Uitvoerende Raad van die USPC sê Christene word geteiken in Sirië.

“Ons het dorpe gesien, wat basies Christelike dorpe is, wat reeds beleër is deur die [Moslem]terroriste, maar hulle is nou bevry. En die skade wat aan ‘n kosbaarheid soos die dorp genoem Maaloula, wat ‘n dorp is waar hulle nog Aramees praat, die taal van Jesus. En aanvalle op die Christelike bevolking.”

Katar, Saoedi-Arabië, Turkye, die Verenigde State van Amerika, en veral Israel steun die inval in Sirië en die destabilisering van die land, ten spyte van propaganda wat die teendeel wil beweer.

Net soos Libië voor die NAVO-bombardement, het Sirië gratis gesondheidsorg en gratis onderwys tot universiteit, maar anders as Libië ook ‘n groot Christenbevolking.

Gewone naweek eis agt op SA se paaie

Die Padverkeersbestuurskorporasie (RTMC) het opnuut ‘n ernstige versoek aan motoriste gerig om padreëls na te kom en veilig te bestuur.

Dit kom nadat agt mense die naweek op die land se paaie dood is. Twee mans is Saterdagmiddag op die R57 in Sasolburg in die Vrystaat dood toe die bakkie waarin hulle gery het, in ‘n brug vasgery het. Die mans is uit die motor geslinger en is op die toneel dood verklaar.

Woordvoerder Simon Zwane sê drie mense is op die R617 naby die Underberg in KwaZulu-Natal dood toe hul motor Saterdag in ‘n botsing reg van voor met ‘n bus betrokke was. Hy sê 60 mense het beserings opgedoen. Daarmee saam is drie mense dood en sewe ander beseer toe ‘n bestuurder van ‘n bakkie in die baan vir aankomende verkeer gery het. Dié bakkie het met ‘n motor reg van voor gebots. Twee ander motors kon nie die ongeluk vermy nie.

Té veel onskuldige mense sterf op Suid-Afrika se paaie weens nalatige bestuurders. Hy sê nalatige bestuurders gaan vasgevat word en daar sal streng teen hulle opgetree word.

Intussen is ‘n 19-jarige man in ‘n kritieke toestand nadat hy vermoedelik beheer oor sy motor sowat 90km vanaf Kimberley op die Koffiefonteinpad verloor het. Zwane sê motorbotsings neem toe op paaie omdat mense onverskillig bestuur en nie die padreëls nakom nie. Hy sê spoed is ook ‘n probleem en mense vermy paaie waar owerhede diens doen en volg ander roetes waar hulle onverskillig kan bestuur.

Bron: OFM

ANC slaan Gordhan- en bankvure dood

Die ANC-vroueliga het die “skielike belangstelling” uit verskeie oorde bevraagteken om die minister van Finansies, Pravin Gordhan te beskerm.

“As jy ‘n lid van die ANC is en tot verantwoording geroep word, moet jy net gaan en rekenskap gee, soos die kwessie van die minister van Finansies. Ons is baie bekommerd oor die skielike belangstelling van almal, jou NRO’s en die burgerlike samelewing om die minister van Finansies te beskerm,” het die vroueliga se sekretaris-generaal Meokgo Matuba Sondag gesê.

Die Vroueliga het hul steun aan president Jacob Zuma herbevestig, gevra dat ‘n vrouepresident hom opvolg en dat dissipline binne die party gehandhaaf word.

Matuba het gepraat ná die Vroueliga sy nasionale uitvoerende komitee (NUK) se vergadering hierdie naweek gehou het.

Sy het gesê Gordhan “moet rekenskap gee” aan die relevante strukture.

Matuba het Gordhan gevra om gehoor te gee aan die Valke se versoek om voor hulle te verskyn en vrae oor ‘n beweerde spioenasie-eenheid binne die Suid-Afrikaanse Inkomstediens te beantwoord.

Die volgende president van die ANC moet ‘n vrou wees, het die Vroueliga ook Sondag verklaar.

Die voorsitter van die Afrika-Unie se Kommissie, Nkosazana Dlamini-Zuma, word glo tans voorberei om oor te neem van haar voormalige man Jacob Zuma.

Hulle het voorgestel dat die top ses van die ANC 50/50 verteenwoordig word deur beide mans en vroue: “Vroue moet die 50/50 verteenwoordigingsbeleid van die ANC afdwing in al ons strukture.”

Die Vroueliga het ook hul kommer uitgespreek oor politieke moorde.

In die Oos-Kaap ondersoek die polisie tans ‘n saak van brandstigting nadat die huis van die ANC-burgemeester van die Enoch Mgitjima-munisipaliteit in Tarkastad aan die brand gesteek is.

Die burgmeester, Lindiwe Gunuza-Nkwentsha, haar man en vier kinders was tydens die voorval in die huis.

Intussen het die organiseerders van die veldtog “Beset Luthuli-huis” gesê senior leiers van die ANC het die jeug in die steek gelaat.

Hulle sê in ‘n verklaring die groep wil red wat nog van die bevrydingsorganisasie oorgebly het.

Senior ANC-lui stel net belang in wie watter posisies binne die party moet beklee, sê hulle. Die groep beplan om vandag ‘n optog te hou na die ANC se hoofkwartier, Luthuli-huis.

Hulle sê hulle voer ‘n stryd teen teen gebrekkige intellek en morele waardes.

Die voormalige studenteleier van Wits, Mcebo Dlamini, ‘n ANC-lid van Johannesburg, Sasa Mananye en ‘n voormalige lid van die uitvoerende komitee van die ANC-Jeugliga, Ntibi Modise, is deel van die organiseerders.

Die organiseerders van die optog het ook die hotelbestuur in Pretoria om verskoning gevra waar hulle nuuskonfrensie Vrydag deur streekleiers van die ANC-Jeugliga ontwrig is.

Die sekretaris-generaal van die ANC, Gwede Mantashe het ook ‘n beroep op ANC-lede gedoen om hulle te weerhou van kommentaar in die media oor die opskudding rondom die minister van Minerale Hulpbronne, Mosebenzi Zwane.

Die presidensie en die ANC het hul gedistansieer van Zwane se verklaring dat ‘n interministeriële komitee aanbeveel het dat ‘n regterlike ondersoek na banke gedoen moet word oor hul besluit om bande met die Gupta-maatskappy, Oakbay Investments, te verbreek.

Mantashe sê dié soort verklarings benadeel die party. Hy het in Bloemfontein gepraat ná ‘n vergadering met ANC takke in die Vrystaat. Mantashe het beklemtoon dat dit nie ‘n verklaring van die kabinet was nie.

Die Vatikaan se openbare betrekkinge kom in rat: St Theresa van Kolkata

Anjezë Gonxhe Bojaxhiu, wêreldwyd bekend as Moeder Teresa, is tot heilige verklaar. Sy sal nou as St. Theresa van Kolkata bekendstaan.

Met ‘n Nobelprys onder die blad en ‘n nalatenskap van media-aandag wat ander supersterre in die skadu stel, is daar egter reeds aanduidings dat alles nie pluis was met die ontslape non nie.

Die Vatikaan se openbare betrekkinge oefening om haar as ‘n rolmodel voor te hou, terwyl sy twyfelagtige metodes gebruik het om haar werk te doen, moet ‘n mens tot nadenke stem.

Wat kan beter wees as saligverklaring gevolg deur kanonisering om die Kerk te vernuwe en lidmate te inspireer, veral op ‘n tydstip wanneer hul kerke besig is om leeg te loop en die Roomse owerheid paniekerig raak daaroor?

Saligverklaring is die derde stap in die rigting kanonisering. In kort, sal Moeder Teresa nou ‘n amptelike heilige van die Rooms-Katolieke Kerk word.

Wyle pous Johannes Paulus II het ‘n “wonderwerk” aan haar toegeskryf in 2003, buiten die twee ander wat ook moes plaasvind ten einde haar as ‘n heilige te erken.

‘n Vrou met abdominale pyn het herstel toe dokters en moderne medisyne nie die knoop kon deurhaak nie, het die pous destyds verklaar.

As die Vatikaan só ‘n saligverklaring aankondig, is daar gewoonlik ‘n vyf-jaar wagperiode.

Gerugte van Moeder Teresa se “goddelike heling” is daarna in die bekwame hande van Malcolm Muggeridge geplaas, ‘n joernalis met dieselfde Rooms-Katolieke ywer as sy.

Albei, en natuurlik die Roomse Kerk, wou ‘n bevolkingsontploffing in die Derdewêreld sien gebeur om hulle invloed te probeer herstel. Om daardie rede het sy en Muggeridge aktief teen alle vorms van voorbehoeding en geboortebeperking in die reeds oorbevolkte Indië gepreek.

Sonder Muggeridge, sou daar ongetwyfeld geen Moeder Teresa gewees het nie. Hy het sy bes gedoen om enige kritiek teen Moeder Theresa te smoor en haar aanhoudend buitenissige lof toegeswaai.

Die Duitse tydskrif Stern het vroeër nietemin ontbloot dat slegs 7 persent van skenkings aan haar organisasie wat gebruik is vir liefdadigheid eintlik daar beland het.

Die res is in geheime bankrekeninge weggesteek. Daar is berigte dat die missies wat met die geld gebou is, nie eens brood gekoop het om hul inwoners te voed nie, maar steeds staatgemaak het op plaaslike skenkings, terwyl daar oorgenoeg geld beskikbaar was.

In 2010, het Forbes aan die lig gebring dat die eerste huis ter beskerming van die armes, ‘n sterftesyfer van meer as 40 persent gehandhaaf het, nie veel beter as die ellende wat daagliks in Indië sigbaar is nie.

Dié soort onthullings is eerste deur ‘n Indiese dokter, Aroup Chatterjee gemaak wat ook gesien het hoe pasiënte by Moeder Theresa se sorgsentrums met besmette naalde ingespuit word.

‘n Britse joernalis, Christopher Hitchens het daarna ‘n program vir Channel4 gemaak. Hy het verder op Chatterjee se ondersoek voortborduur maar nie veel toegevoeg nie.

Die non is in 1997 in ‘n moderne Amerikaanse hospitaal oorlede met die beste sorg denkbaar, en is nie self onderwerp aan haar eie kultus van “lyding vir Christus” nie.

Meer as ‘n miljoen mense leef steeds op straat in Kolkata, Indië, byna ‘n vyfde van die bevolking.

Joost soek dringend geld uit vermoorde prokureur se trustfonds

Die sukkelende voormalige Springbok-rugbyspeler Joost van der Westhuizen soek dringend sy geld wat in die trustrekening van sy voormalige prokureur Robert Klinkenberg is.

Van der Westhuizen sal in die Gautengse Hooggeregshof, in Pretoria, volgende Dinsdag in ‘n poging aanwend om die meer as R380 000 wat hy beweer hy geskuld word, terug te kry.

Van der Westhuizen, wat ly aan motorneuronsiekte, het in hofstukke aangevoer dat hy afhanklik is van die geld om rekeninge en medikasie te betaal.

Hy het ook gesê dit is ‘n bekende feit dat stresvolle situasies ‘n nadelige uitwerking op ‘n persoon het wat ly aan motorneuronsiekte, wat negatiewe implikasies op sy lewe kon gehad het.

Volgens Van der Westhuizen, het hy van tyd tot tyd geld ontvang uit die trustrekening van Klinkenberg vir sy behoeftes.

Klinkenberg is dood aangetref in Desember verlede jaar in Magaliesberg. Sy lyk is naby sy Porsche gevind met een skietwond.

Klinkenberg (46), ‘n bekende prokureur in Roodepoort in Gauteng, se dood word nou as ‘n moordsaak ondersoek.

Kapt. Appel Ernst, woordvoerder van die polisie, het vroeër gesê die uitslae van die nadoodse ondersoek het die polisie uiteindelik genoop om die geregtelike doodsondersoek na dié van ‘n moordsaak te verander.

“Ons kan in dié stadium nie meer hieroor uitwei nie aangesien die ondersoek steeds aan die gang is,” het Ernst gesê.

Ernst sê die ondersoek na Klinkenberg se dood vorder, maar geen nuwe inligting is tans beskikbaar nie. Daar is ook nog niemand in hegtenis geneem nie.

Klinkenberg, wat ook jare lank Joost van der Westhuizen se regsverteenwoordiger was, se maatskappy, Klinkenberg Inc., het intussen finaal sy deure gesluit. Alle sake wat deur die maatskappy hanteer is ten tyde van Klinkenberg se dood is deur die Prokureursorde van die Noordelike Provinsies oorgeneem.

Die eertydse rugbyspeler kan tans glo nog net sy oë beweeg. Dit is nie seker of hy self sal kan verskyn nie, het sy regsverteenwoordiger gesê.

Suid-Afrika, die land van moord en doodslag

Moorde in Suid-Afrika het die afgelope finansiële jaar met bykans vyf persent toegeneem.

Die minister van Polisie, Nathi Nhleko sê daar is ‘n geringe afname in ander misdaad, maar moes erken dat geweldsmisdaad nie afgeneem het nie. Hy sê dit is ‘n aanklag teen die innerlike krag van die gemeenskap.

Die misdaadsyfers vir die tydperk tussen 1 April verlede jaar en die einde van Maart vanjaar is Vrydag in die parlement bekendgemaak.

Volgens die statistiek het poging tot moord met sowat drie en ‘n half persent toegeneem, terwyl aanranding met die doel om ernstig te beseer ‘n effense toename getoon het.

Generaal-majoor Norman Sekhukune sê dit is duidelik dat kontakmisdaad die grootste uitdaging vir die polisie is.

Die publiek het die afgelope boekjaar een komma sewe miljoen aanklagte by die polisie gelê.

Misdade soos moord, poging tot moord en roof het effens in drie van die nege provinsies afgeneem, maar nie in die ander ses nie.

In Gauteng, Limpopo, Mpumalnga, Noordwes, die Noord-Kaap en die Wes-Kaap het geweld toegeneem.

Sekhukune het daarop gewys dat alkoholmisbruik by die meeste misdade betrokke is.

Sekhukhune sê voorts betogings is besig om toenemend gewelddadig te raak. ‘n Yslike 3542 betogings is die afgelope jaar aangemeld.

Vreedsame betogings het met byna 56% verminder, terwyl onluste tydens betogings met meer as 10% vermeerder het.

In Pongola het die minister van Verdediging, Nosiviwe Mapisa-Nqakula gesê die weermag se grensbeheervermoë is onder druk weens begrotingstekorte.

Sy het op besoek in die noorde van KwaZulu-Natal gesê daar is tans vyftien militêre eenhede wat die grense beheer teenoor 22 eenhede wat verkieslik is.

Minstens agtien staatsvoertuie is vanjaar slegs in die noorde van KwaZulu-Natal gekaap en vermoedelik in buurlande verkoop.

Trump: Plan om muur tussen VSA en Mexiko met dwelmgeld te finansier

Die Republikeinse Party se presidentskandidaat, Donald Trump, het Woensdag in Phoenix, Arizona, in ‘n brander van ‘n toespraak belowe dat onwettige immigrante uit Mexiko se dae getel is want die VSA gaan ‘n muur bou met dwelmgeld.

“Ons gaan ‘n muur bou en Mexiko gaan daarvoor betaal!” het hy onder luide toejuiging gesê.

Trump het gesê die 11 miljoen mense wat onwettig in Amerika is, gaan teruggestuur word na waar hulle vandaan kom.

Ure nadat hy die Mexikaanse president, Enrique Peña Nieto, ontmoet het, het Trump gesê: “Ons sal ’n groot muur op die suidelike grens bou. En Mexiko sal daarvoor betaal, 100%. Hulle weet dit nog nie, maar hulle gaan vir daardie muur betaal.”

Die Republikeinse kandidaat het hom soos ‘n waardige president gedra en hy is met grasie deur die Mexikaanse president ontvang soos ‘n ware leier.

‘n Professor in joernalistiek, professor Carlos Bravo Regidor het beaam dat Trump soos ‘n leier opgetree het. “Hy was rustig, ferm, presidensieel.”

“Ons vernedering is nou totaal,” het ‘n Mexikaanse televisiejoernalis van Televisa getwiet.

Nieto het later getwiet: “Aan die begin van die gesprek met Donald Trump het ek dit duidelik gemaak dat Mexiko nie vir die muur gaan betaal nie.”

Die Mexikaanse president Peña Nieto het vroeër op ’n mediakonferensie saam met Trump egter gesê hy steun die Amerikaanse kandidaat se stryd teen oorgrensmisdaad.

Trumpveldtogbestuurders sê die plan is dat die onwettige dwelmkartels gaan betaal vir die muur.

Bronne na aan beide die Mexikaanse regering en die Trumpveldtog het bevestig dat hierdie voorstel voorgelê is, maar hulle wil anoniem bly, gegewe die voorlopige aard van die gesprekke.

Volgens die jaarlikse oudit van die Amerikaanse Departement van Justisie vir die boekjaar vir 2015, beloop die bates van die kartels waarop beslag gelê is reeds byna $9 miljard, en dit sluit nie die bates in wat deur die Mexikaanse regering gekonfiskeer is nie.

In sy toespraak in Phoenix het Trump gesê die stryd teen onwettige immigrante in Amerika sal afskop om dié wat ernstige misdade gepleeg het, so gou as moontlik te uit die VSA te sit.

Hy sê hy ‘n spesiale deportasie-taakmag moet misdadigers identifiseer wat gedeporteer kan word.

Nieto se besluit om Trump te nooi om die muur te bespreek is met ontsteltenis deur die Demokrate begroet en met groot vreugde deur Nieto se politieke vyande tuis.

Nieto het Hillary Clinton, die Demokratiese Party se presidentskandidaat, ook uitgenooi om sy land te besoek. Dit is nie bekend of sy die uitnodiging aanvaar het nie.

Mexikaanse opposisielede sê Nieto is deur Trump, die land se grootste vyand, vir propaganda misbruik en sy uitnodiging was ‘n “monumentale fout” omdat dit die Amerikaanse kandidaat se posisie verder verstewig het.

In ‘n 2012-skatting wat saamgestel is deur die RAND Corporation op versoek van die Withuis, is bevind dat Amerikaners gemiddeld $100 miljard jaarliks op die vier mees verhandelde onwettige dwelms spandeer: crack/kokaïen, heroïen, dagga, en methamphetamien (meth).

Geweld breek in Gaboen uit na Bongo wen

Gaboen se presidensiële wag het in die nag die opposisieparty se hoofkantoor aangeval. Minstens een persoon het omgekom en minstens 20 is beseer, het opposisiewoordvoerders gesê.

Dit volg na betogings teen die herverkiesing van die Sentraal-Afrika-land se president en waar ‘n duidend mense reeds aangehou word.

Pres. Ali Bongo Ondimba het die opposisie-kandidaat met ‘n klein meerderheid verslaan en daardeur die tafel vir die onluste gedek.

Bongo het met 49,8 persent van die stemme teenoor Ping se 48,2 persent geseëvier. Die grondwetlike hof moet die voorlopige uitslae nog finaliseer.

Die aanval deur soldate in groet barette, wat hulle as lede van die presidensiële wag geïdentifiseer het, het omstreeks 01:00 Donderdag plaasgevind. Ping was nie ten tyde van die aanval in die kompleks nie.

‘n Inwoner sê regeringsmagte het ook die RTN-opposisie se radio- en televisiestasie aangeval.

Voor die aanval het die polisie traangas na honderde opposisiebetogers in die hoofstad, Libreville, afgevuur. Die betogers het op hul beurt motors en rommel voor die Nasionale Vergadering aan die brand gesteek.

Ooggetuies sê betogers in verskeie distrikte het ‘n inkoopsentrum gevandaliseer, ‘n bank beroof en geboue aan die brand gesteek.

Onluste en plundery het ook voorgekom nadat Bongo tydens vorige verkiesings in 2009, ná die dood van sy pa, Omar Bongo, aan bewind gekom het.

Waarnemers van die Europese Unie het die gebrek aan deursigtigheid met verkiesingsuitslae gekritiseer.

Hulle het in ‘n verklaring ‘n beroep op Gaboen gedoen om die volledige uitslae vir elke stempunt te publiseer en alle rolspelers gemaan om te help om die vrede te bewaar.

Die sekretaris-generaal van die Verenigde Nasies, Ban Ki-moon, het politieke leiers en hul ondersteuners aangeraai om hulle te weerhou van verdere dade wat vrede en stabiliteit in die land kan ondermyn.

In Suid-Afrika het minstens 400 Gaboenese burgers by die Franse Konsulaat in Kaapstad Donderdag betoog oor die betwiste verkiesingsuitslae.

Die betogers het baniere opgehou terwyl hulle die volkslied van hul land gesing het.

Hulle beweer dat die regerende party stemme ten gunste van Bongo gemanipuleer het.

Die Bongo’s, een familie, klou nou al aan die Wes-Afrika-land se leierspos vir byna vyf dekades. Ali Bongo het oorgeneem by sy pa, Omar Bongo, in 2009 ná sy dood.

Daar word vermoed dat Jean Ping, die werklike verkose president van die land is na verkiesingsbedrog.

Die bevolkingsgetalle van Haut-Ogooué-streek is op Wikipedia vyf of ses keer aangepas gedurende die aanloop tot die verkiesing, met President Bongo wat met meer as 99% van die stemme gewen het.

Dit beteken dat die hele bevolking ouer as 18 jaar en stemgeregtig is, het een ontleder gesê.

Frankryk is besonder gretig dat Bongo die leisels aan Ping, ‘n half-Chinees, oorhandig. Parys het ‘n beroep op Bongo gedoen om af te stap omdat hulle voel dat China te veel van ‘n invloed oor Gaboen deur omkoopgeld verkry het.

Ping is ‘n gewese swaer van Bongo wat met sy suster getroud was. Hy is dus goed bekend met hoe die vurk in die hef steek in die Bongo-binnekring. Frankryk het Ping se verskiesingsveldtog in hul voormalige kolonie bestuur.