Kategorie: Nuus

Zuma neem opening van wapenfabriek in Saoedi-Arabië waar

Die webblad, World Defense het foto’s gepubliseer wat na bewering wys waar President Zuma optree by die opening van `n wapenfabriek in Saoedi-Arabië.

Die presidensie wou tot dusver nie bevestig dat Zuma betrokke was nie, het RSG berig.

`n Foto toon aan waar Zuma langs die adjunk-kroonprins, Mohammed bin Salman bin Abdulaziz staan. In die agtergrond is `n plakkaat wat sê Zuma open die militêre vuurpylfabriek.

Volgens die webblad gaan die staatsbeheerde wapenvervaardiger, Denel met sy Saoedi-Arabiese eweknie saamwerk.

Die Minister van Finansies, Pravin Gordhan het vroeër gewaarsku dat die Denel sal skuldig wees aan finansiële wangedrag indien hy sonder die nodige toestemming, voortgaan met ‘n gesamentlike onderneming met ‘n maatskappy wat bande het met die Gupta-familie het.

Denel het vroeër gesê hy het ‘n gesamentlike onderneming met die Guptabeheerde VR Laser Services aangegaan en dat al die regsprosesse gevolg is.

Intussen is die transaksie waarvolgens die Gupta-famlie se Oakbay Investments die Glencore mynmaatskappy se Optimum steenkoolmyn in Mpumalanga vir meer as as twee-miljard rand aankoop, afgehandel.

Dit volg nadat Oakbay moes inderhaas ander bankgeriewe moes bekom nadat vier Suid-Afrikaanse handelsbanke hul bande met die maatskappy opgeskort het.

Die banke het hul bande verbreek na gerugte dat die Gupta-familie ‘n onbehoorlike invloed op President Jacob Zuma uitgeoefen het.

Oakbay se bestuurshoof, Nazeem Howa, sê die transaksie bewys net weer Oakbay se betrokkenheid in Suid-Afrika. Hy sê dit het meer as drie-duisend werksgeleenthede gered.

Julius Malema het vroeër gesê Zuma het na die Midde-Ooste gereis om die Guptas se geld uit die land te neem sodat dit nie deur die Resewerbank se kanale hoef te gaan nie.

Zuma het glo R6 miljard in Doebaai afgelewer volgens Malema voordat hy in Saoedi-Arabië aangedoen het.

Pentagon moet begroting laat klop met Russiese ‘aanvalle’

Pentagon-amptenare het probeer die verbyvlugte van Russiese vegvliegtuie as “nagebootste aanvalle” voor te hou terwyl hulle die VSA se militêre begroting bespreek.

Een amptenaar het die voorval sonder ironie beskryf as een van die “aggressiefste” optredes deur Rusland in die onlangse verlede, terwyl die Amerikaanse vloot digby Rusland in die Baltiese See militêre oefeninge uitvoer.

Die Sukhoi SU-24’s, sonder wapentuig, het glo baie behendig laag verby die USS Donald Cook gevlieg.

Die Noord-Atlantiese Verdragsorganisasie, NAVO, is tans besig met sy grootste militêre opbou in Oos-Europa sedert die Koue Oorlog as teenvoeter vir wat Navo as ’n “meer aggressiewe Rusland” beskou.

Maar die Pentagon het nie kommentaar gelewer daarop dat die USS Donald Cook die week binne die operasionele gebied van die Russiese vloot se Baltiese basis was nie.

Met EU-lidland wat traag is om NAVO se duur aankope te befonds, moet die Pentagon steun op ‘n “bedreiging” sodat hulle begroting kan klop.

Die Russiese ministerie van verdediging het gesê sy vliegtuie het alle vereiste veiligheidsmaatreëls nagekom toe dit oor ’n Amerikaanse oorlogskip in internasionale water gevlieg het en kritiek oor die risiko verwerp.

SU-24-vliegtuie het toetsvlugte onderneem en “nadat hulle die oorlogskip opgemerk het, het hulle weggedraai ten einde alle veiligheidsmaatreëls na te kom,” het die ministerie gesê.

Die Amerikaanse weermag se bevelsentrum in Europa het die insident nogtans probeer voorhou as ‘n “gesimuleerde aanval” omdat een van die verbyvlugte glo nege meter van die USS Donald Cook was.

Terwyl Washington die voorval as “aggressie” beskryf, het vlootsoldate op die skip ten tyde van die Russiese verbyvlugte dit met belangstelling en sonder die minste kommer gadegeslaan.

“Hierdie optrede het die potensiaal om spanning tussen die twee lande onnodig te verhoog en kan tot wanberekeninge lei,” lui die bevelsentrum se alarmistiese verklaring.

Die Amerikaans Vloot self, het egter gesê dat die verbyvlugte nie ‘n werklike bedreiging ingehou het nie.

Betrekkinge tussen Rusland en die Neocons het versuur nadat pres. Vladimir Poetin ‘n stokke gesteek het voor hul stropingspogings.

Walus-saak: Netwerk24 beskou Chris Hani as ‘held’

In sy berig van 15 April 2016, beskryf Netwerk24, die aanlynpublikasie van Media24 wat Die Burger, Beeld en Volksblad se nuusberigte insluit, die kommunistiese terroris Chris Hani met ‘n Engfrikaanse term, “struggle-held”. Hani was in die tagtiger- en vroeë negentigerjare betrokke by terreuraanvalle op onskuldige burgerlikes in Suid-Afrika. Indien hy dieselfde dade in die VSA of Europa gepleeg het, sou iemand soos Barack Obama of mev. Hillary Clinton die spesmagte afgevaardig het om hom te gaan “elimineer” soos wat die VSA met Osama bin Laden gedoen het. Beide Obama en Clinton het die teregstelling van Bin Laden intyds meegemaak, waarna die liberale mev. Clinton met ‘n kekkellaggie gesê het: “Ons het gekom, ons het gesien, ons het doodgemaak.”

Chris Hani is volgens ‘n oud-Weermaggeneraal byna deur die Suid-Afrikaanse spesmagte in Lesotho geneutraliseer, maar ná die sameswering tussen mnr. De Klerk, die Britse ambassade en die SAKP, is Hani toegelaat om as ‘n vry man Suid-Afrika te betree en steeds agter die skerms geweld en terreur te organiseer. In reaksie hierop het die Poolse Suid-Afrikaner, mnr. Janusz Walus, die reg in eie hande geneem en hom blykbaar sonder die medewete van sy vriend, Clive Derby-Lewis, met dié se pistool gaan doodskiet. Beide Walus en Derby-Lewis het aanvanklik die doodstraf ontvang, maar dit is later in lewenslange gevangenisstraf omgeskakel. Mnr. Derby-Lewis is verlede jaar in Junie op parool vrygelaat, ná ‘n jare lange hofstryd omdat die ANC-bewind onder invloed van die Kommunistiese Party hom strydig met toepaslike wetgewing en gevangenisreëls nie op gewone parool wou uitlaat nie.

Daar word ook gepoog om Walus tot sy dood in die tronk aan te hou. Die staat se advokaat, Marumo Moerane, het aangevoer dat daar “geen gronde vir regter Nicolene Janse van Nieuwenhuizen se bevinding was” dat Walus soos enige ander gevangene op parool geregtig is nie. Hy het ook verwys na die moordenaar van Robert Kennedy wat reeds 48 jaar in ‘n Amerikaanse gevangenis verkeer, met die implikasie dat Walus ook tot sy dood in die gevangenis behoort te sit.

In haar reaksie het Hani se weduwee, Limpho Hani, die regter aangeval en gesê dat sy “nie God is nie” en nie oor die mag beskik om “haar lewe” te besluit nie, nadat die regter gister verlof geweier het dat die staat teen haar bevinding appelleer.

Mev. Hani se reaksies, wat ook op minagting van die hof neerkom omdat sy openlik die bekwaamheid en integriteit van die regter bevraagteken, is op eensydige wyse deur Beeld en Netwerk 24 gepubliseer, sonder enige konteks. Mev. Hani het destyds reeds by ‘n ander man geslaap terwyl Chris Hani self ook reeds ‘n ander houvrou geneem het. Nietemin dring sy aan op ‘n soort “huweliksreg” om haar man se moordenaar in die tronk te hou. Daarbenewens is Suid-Afrika destyds in konflik en wanorde gedompel deur die NP se holderstebolder-oorgawe wat groot verwarring en vrees by die publiek geskep het.

Walus en sy familie het in Pole aan eie bas die verskrikking van kommunisme ervaar, ‘n totalitêre ideologie wat die dood van 100 miljoen mense in die twintigste eeu veroorsaak het.

Gevra om kommentaar oor Beeld se gebruik van die Engfrikaanse term, “struggle-held”, het dr. Dan Roodt van PRAAG gesê:

“Myns insiens het ons hier met twee elemente te make: die Engfrikaans en die bewondering vir Chris Hani. Beeld, asook Netwerk24, staan vyandig teenoor Standaardafrikaans, hoewel dié twee organe natuurlik self voorlopig nog in Afrikaans publiseer. Vele van hul rubriekskrywers verwerp ook Afrikaanse skole en universiteite en wil dat Engels nog meer as tans in die land oorheers. Dus verklaar dit die Engfrikaans. Wat die tweede element betref, bespeur ‘n mens gereeld simpatie vir ekstreme gelykheid of kommunisme by sommige Beeld-redaksielede en rubriekskrywers. Beeld het reeds voorheen simpatie vir Heleen Pastoors, die Belgiese vrou wat die Kerkstraatbom vervoer het, uitgespreek. Dus verbaas dit nie dat Beeld nou so ‘n bietjie mosterd-na-die-maal sy bewondering vir Chris Hani en SAKP-terreur betuig nie.”

Die staat en die minister van korrektiewe dienste, gaan nou ‘n petisie na die Appèlhof in Bloemfontein rig in ‘n verdere poging om teen Janse van Nieuwenhuizen se uitspraak te appelleer. Aanstaande week bring Walus egter nog ‘n hooggeregshofaansoek waarin hy vra dat hy ten minste tydelik vrygelaat moet word terwyl die staat die appèlproses uitput.

Stem hiernaas op die regterkant van die blad in ons meningsopname: “Beskou u, soos Netwerk24, Chris Hani as ‘n ‘struggle’-held?”

Dene onttrek uit Suid-Soedan na hulpwerkers geskiet word

Onbekende gewa­pende mans het twee ­noodlenigingswerkers in Suid-Soedan ­doodgeskiet.

Dit sal ’n invloed op die werksaamhede van die Deense groep, die Danish Demining Group (DDG) hê, wat landmyne in die suidelike Yei-streek onskadelik stel.

Volgens ’n verklaring van DDG was die twee oorledenes deel van ’n groep van sewe wat van hul basis in Yei onderweg na hul werkplek was, toe die voertuig waarin hulle gery het, aangeval is.

Die ander vyf werknemers is ongedeerd.

Die twee hulpwerkers was plaaslike inwoners en in diens van die Dene.

“Wat gebeur het, is tragies,” het Christian Jakob Hansen, die afdelingshoof van die Raad op Deense Vlugtelinge aan die Metroxpress koerant gesê.

“Ons het ons aktiwiteite in die gebied waar dit plaasgevind het gestop. Ons het dit gedoen ten einde aan die oorsake van die spesifieke omstandighede van die situasie te kom.”

Die Raad op Deense Vlugtelinge werk sedert 2005 in Suid-Soedan en die DDG sedert 2006 om landmyne ­onskadelik te stel en gewa­pende ­geweldpleging te verminder.

Reeds 50 hulpwerkers is reeds in die gebied gedood oor die afgelope twee jaar.

Afrikanervroueregter verwerp staat se argumente om Janusz Walus in die tronk te hou

‘n Beleefde regter in Pretoria, en boonop ‘n Afrikanervrou, het vandag geskiedenis gemaak deur die staat se desperate argumente om Janus Walusz in die tronk te hou, tydens ‘n aansoek om verlof tot appèl te verwerp. Die linkse media, waaronder die Business Day, Mail & Guardian en News24, het in die aanloop tot vandag se uitspraak gedurig daarop gesinspeel dat Walus ‘n “uitermate bose daad” gepleeg het deur sy sluipmoord op die kommunistiese terroris, Chris Hani, uit te voer. Die boosheid daarvan moes swaarder weeg as die Kerkstraatbom, die Amanzimtoti-bom, Hani se eie terreurdade, asook die dikwels grusame geweld wat ANC-“vryheidsvegters”, gesteun deur die ou Sowjetunie en Oos-Duitsland, gepleeg het.

Feit is dat feitlik al die ANC, APLA en ander terreurorganisasies se boosdoeners amnestie van Biskop Tutu se Waarheidskommissie ontvang het. As “regse blankes”, moes Walus en Clive Derby-Lewis egter meer as 21 jaar in die gevangenis deurbring. Boonop is beide parool herhaaldelik, teenstrydig met wetgewing en regulasies van die departement van korrektiewe dienste, parool geweier.

Ná haar opspraakwekkende uitspraak van 10 Maart, toe sy gelas het dat Walus op parool vrygelaat moet word, het regter Nicolene Janse van Nieuwenhuizen vandag weer eens téén Suid-Afrika se linkse openbare mening in, ‘n uitspraak gelewer waarin die minister van korrektiewe dienste, Michael Masutha, se aansoek om verlof tot appèl teen haar vorige bevinding verwerp word. In haar vorige uitspraak, het regter Janse van Nieuwenhuizen bevind dat die minister “irrasioneel en onredelik” opgetree het deur Walus nie op parool vry te laat nie.

Dié woorde het telkens in die staat se pleit vir verlof tot appèl opgeduik. Die staat se senior advokaat, Marumo Moerane, het geargumenteer dat daar “geen gronde vir haar bevinding was nie”, weens die “gevaar” wat Walus se daad van 23 jaar gelede ingehou het.

Walus se advokkaat, Roelof du Plessis SC, het Dinsdag geredeneer dat ‘n oortreder steeds gestraf word al word hy op parool vrygelaat, maar dat die fokus dan verskuif na sy rehabilitering.

 

Parys-plaasaanval: Valke rand glo werkers aan

Dit blyk dat die Valke swart plaaswerkers glo aangerand het sodat hulle valse verklarings teen hul wit werkgewers maak.

Die twee plaaswerkers het intussen ‘n klagte van aanranding teen lede van die Valke by ’n polisiekantoor in Klerksdorp aanhangig gemaak, en die dossiere is aan die Buffelshoek-polisiekantoor in Noordwes oorhandig.

Die polisie se onafhanklike klagtedirektoraat ondersoek tans twee lede van die Valke wat die dood van twee plaasaanvallers ondersoek het.

Die Valke het hulle glo aangerand en gedwing om te sê hul werkgewers was aandadig aan die moorde op Samuel Tjixa en Simon Jubeba.

Tjixa en Jubeba is op 6 Januarie dood nadat hulle ‘n bejaarde boer by Parys, Loedie van der Westhuizen aangeval het.

Daar word beweer dat die swart plaasaanvallers deur wit boere aangerand is en verskeie wit boere is reeds aangekla weens die voorval.

Van der Westhuizen is na die plaasaanval deur boere in die gemeenskap bygestaan wat die aanvallers uiteindelik vasgetrek het en aan die polisie oorhandig het. Die twee is daarna dood.

Boeta van der Westhuizen het glo te hore gekom van die Valke se aanranding van sy werkers om hulle te dwing om valse verklarings af te lê, en die Valke se bevelvoerder geskakel oor die insident.

Van der Westhuizen is die volgende dag in hegtenis geneem op ‘n aanklag van intimidasie en kon eers ná 27 dae in aanhouding borg kry.

Liggaam van vermiste hengelaar gevind

Polisieduikers het vanoggend die liggaam van Louis Jacobus Lotter uit die Vaaldam gehaal, nadat hy Sondag daar vermis geraak het.

Volgens Gautengse polisiewoordvoerder, Shado Mashobane, het die 43-jarige Lotter, van Meyerton, glo oor die kant van sy kano geval terwyl hy besig was om te hengel.

Lotter se familie het gesien hoe hy van sy kano afval en nie weer na die oppervlak kom nie. Die polisie se Soek en Redding- en Watervleuel het dadelik hul soektog na Lotter begin.

Sy liggaam is vanoggend om 08:30 gevind.

Bloemfontein-verkragter vasgetrek

Die polisie in Bloemfontein het mense bedank vir hul behulpsaamheid en die verskaffing van inligting wat daartoe gelei het dat ‘n gesoekte vermeende verkragter en rower aangekeer is.

Die 32-jarige verdagte is Woensdagmiddag by Bochabela in die stad by ‘n vriend se huis deur lede van die Parkweg-polisiekantoor in hegtenis geneem.

Polisiewoordvoerder, Chaka Marope, sê ‘n lasbrief vir sy inhegtenisneming is onlangs uitgereik. Inligting wat deur mense verskaf is het ‘n groot bydrae gelewer tot die polisie se sukses.

Volgens Marope is die verdagte die afgelope vier maande vir verskeie misdrywe in Bloemfontein gesoek. Hy was vermoedelik betrokke by ‘n voorval waarin ‘n bejaarde vrou in Februarie in die Uitsig-woonbuurt in haar huis aangeval, verkrag en van verskeie waardevolle items beroof is.

Marope sê hy word ook met ander voorvalle van verkragting verlede jaar verbind. Die man verskyn binnekort in die plaaslike landdroshof.

Welkom-aanvallers nog op vrye voet

Die swart aanvallers wat ‘n vrou van Welkom verras het terwyl sy gebid het, is nog nie vasgetrek nie.

Die 41-jarige vrou was voorverlede Vrydag in die vroeë oggendure in haar huis in Bedelia langs haar bed in ‘n knielende posisie toe sy bewus geword het van iemand wat naby haar is.

Polisiewoordvoerder, Stephen Thakeng, sê twee mans met klapmusse en handskoene het agter die vrou gestaan en na haar gestaar.

Volgens hom het die booswigte vermoedelik toegang tot die vrou, wat alleen tuis was, se huis verkry deur ‘n venster in die studeerkamer. Die vrou, wat verkies om anoniem te bly, het ná 12:00 reggemaak om te gaan slaap.

Die mans het haar daarna beveel om stil te bly en op ‘n rusbank in ‘n ander vertrek te sit, sê Thakeng. Hulle het haar kop met ‘n laken toegegooi en haar hande met ‘n handdoek agter haar rug vasgebind.

Die mans het haar met ‘n moersleutel aangeval. Volgens hom het die mans aan die vrou gesê hulle is hier om ‘n plasmaskerm-televisiestel te vat en haar dood te maak.

Thakeng sê die rowers het ‘n televisiestel, ‘n selfoon, huissleutels en drie trouringe gevat. Terwyl hulle op pad uit was, het een van die mans aan die ander man gesê hulle moet doen wat hulle beplan het om te doen.

In reaksie daarop het die ander man gesê hulle moet die vrou alleen laat. Die geskokte vrou kon daarin slaag om haarself te bevry.

Thakeng vra enigiemand met inligting om hul naaste polisiekantoor te bel.

Mantashe maan ANC om saam te staan na Gupta-skandaal

Die Sekretaris-Generaal van die ANC, Gwede Mantashe, het ‘n beroep op die drieparty-alliansie gedoen om saam te staan om die Gupta-skandaal die hoof te bied.

Mantashe het Woensdag op ‘n provinsiale beraad van die alliansie in Kimberley gepraat. Hy het gesê dit is die plig van die drieparty-alliansie om hul kragte saam te snoer om die ANC te red.

Mantashe het met verwysing na verlede week se Grondwethof-uitspraak oor Nkandla gesê die hof kan nie die president in ‘n staat van beskuldiging plaas nie.

Hy sê die hof se beslissing is nie die ANC se grootste bedreiging nie, maar wel pogings om die staat te kaap.

Mantashe sê onlangse kritiek teen Zuma is ‘n aanval op die party en nie die president nie.

Die tesourie sê intussen die aansoek van die staatsbeheerde wapenvervaardiger, Denel, om sake te doen met ‘n Gupta-maatskappy word ondersoek.

Die Guptas is in die spervuur oor die nou bande wat hulle met president Jacob Zuma het.

Denel het vroeër gesê hy het ‘n gesamentlike onderneming met die Guptabeheerde VR Laser Services aangegaan en dat al die regsprosesse gevolg is.

Die gesamentlike onderneming met die naam Denel Asia, wat in Hongkong gevestig sal wees, sal ‘n verskeidenheid staalprodukte vervaardig vir verdediging, mynwese en die spoor-en vervoernywerhede.

Die tesourie sê hy het bykomende inligting van Denel versoek.

Die Gupta het na Doebaai uitgewyk nadat hulle Suid-Afrika verlede week verlaat het.

Die minister van Minerale Hulpbronne, Mosebenzi Zwane en die minister van Samewerkende Regering en Tradisionele Sake, Des van Rooyen, het Doebaai ook onlangs besoek.

Die premier van Noordwes, Supra Mahumapelo, het ook na Doebaai gereis. Opposisiepartye sê hy het van sy aanvanklike ampsbesoek aan China in Doebaai aangedoen.

Die maatskappy van die Gupta-familie, Oakbay Resources, het Suid-Afrika se vier grootste banke vroeër genader om die besluit te hersien om die maatskappy se bankrekeninge te sluit.

Drie van die banke, FNB, Standard en Nedbank het die maatskappy tot die einde van Mei kennis gegee om hulle rekeninge te sluit. ABSA het reeds die rekeninge gesluit.

Die bestuurshoof van Oakbay, Nazeem Howa sê geen rede is vir die besluit gegee nie, buiten dat die termes en voorwaardes sal geld.

Hy sê hy hoop die banke sal hulle kans gee om die besluit te hersien.