Zimbabwe se MDC het Donderdag gesê dat president Robert Mugabe politieke selfmoord sou pleeg indien hy sou voortgaan om unilateraal 'n regering saam te stel.
Mugabe het aan die staatsdagblad The Herald gesê dat as Tsvangirai nie teken nie, hy sekerlik 'n kabinet gaan saamstel.
Samesprekings tussen Mugabe en die opposisieleier Tsvangirai het middel-Augustus 'n dooiepunt bereik oor wat die opposisie beweer Mugabe se wens is om beheer oor die veiligheidsmagte te behou.
Intimidasie van opposisiepartye en die media in die aanloop tot die parlementêre verkiesings in Angola bedreig die moontlikheid van 'n vrye en regverdige verkiesing, het Human Rights Watch vandeesweek gesê.
Human Rights Watch het ook gesê dat die regering misluk het om die basiese pligte na te kom soos hulle uiteengesit word in die Beginsels en riglyne vir verkiesings van die Suider-Afrikaanse ontwikkelingsgemeenskap.
Sy het byvoeg dat Angolese nie in staat gaan wees om hul stemme vrylik uit te bring nie.
Angolese gaan vandag vir 'n nuwe Nasionale Vergadering stem.
Die heersende Volksbevrydingsbeweging van Angola, MPLA, regeer sedert 1975.
Google Inc., die skepper van die wêreld se gewildste internet-soekenjin, het sy eie websnuffelaar ontwikkel wat beskou word as 'n direkte teenvoeter vir Microsoft se mark-dominante Internet Explorer.
'n Toetsweergawe van die nuwe programmatuur, genaamd Google Chrome, kan reeds in meer as 100 lande afgelaai word, het die maatskappy bekend gemaak.
Die oogmerk met Google Chrome is 'n vinniger, meer gebruikersvriendelike en veiliger snuffelaar.
Die snuffelaar is heeltemal gratis en maak van oopbronprogrammatuur gebruik. Onder andere het die maatskappy by 'n ander gratis websnuffelaar, Firefox, gaan leen vir die kode waarmee Google Chrome geskep is.
Saskok se soustreinryers sal hulle swak voorbereidings vir internasionale sport kompetisies moet verklaar.
Dit kom nadat klagtes van Suid-Afrika se Bladerunner, Oscar Pistorius, oor die organisasie ontvang is
Pistorius sê Saskok se bestuur het besigheidsklas Beijng toe gevlieg, maar die gestremde atlete moes maar met ekonomiese klas tevrede wees.
Atlete is na wat berig word vir die afgelope vier maande nog nie vergoed nie
Senior lede van die Olimpiese span het ook gekla oor die swak toerusting en gebrekkige ondersteuning van Saskok.
Die Verenigde State het Woensdag erken dat 'n helikopter vol Amerikaanse Spesiale Magte Al Kaida militante op Pakistanse grondgebied aangeval het.
Die aanval deur die Amerikaanse magte het 'n breër veldtog binne Pakistan aangekondig.
'n Ooggetuie het in 'n telefoononderhoud gesê dat 19 mense gedood is in die aanval, waarvan die meeste vroue en kinders.
Die alreeds onstabiele politieke situasie het versleg ná die bedanking van president Pervez Musharraf, 'n Amerikaanse bondgenoot.
Amerikaanse soldate in Afghanistan, wat aan Pakistan grens, opereer onder die vaandel van NAVO.
Die Spesiale Magte wat die aanval uitgevoer het, staan egter direk onder Amerikaanse beheer.
President Levy Mwanawasa, die ontslape leier van Zambië, is gister in 'n koperbeslaande kis begrawe.
Hy het Zambië sedert 2001 gelei en is in 2006 herkies.
Die Suid-Afrikaanse president Thabo Mbeki, die leier van Botswana Seretse Khama Ian Khama en die presidente van Namibië, Mosambiek en Malawi het die begrafnis bygewoon.
Mwanawasa was die enigste streeksleier wat hom oor die politieke en ekonomiese krisis in Zimbabwe en teen Mugabe uitgespreek het.
Mugabe het egter die begrafnis bygewoon en het hulde aan die oorlede Zambiese president gebring deur hom 'n uitgesproke en kloekmoedige leier te noem.
Die Pretoriase regter Nkola Motata se bloedalkoholvlak was vier keer oor die wettige vlak waarop mens mag bestuur.
Regter Motata se verdedigingspan is besig om die geldigheid van die proses te bevraagteken en hou vol dat die bloed wat ontleed is nie van die regter afkomstig was nie.
Hulle het daarteen beswaar gemaak dat die sertifikaat met die bloedalkoholuitslag as getuienis aanvaar word.
Advokaat Dorfling vir regter Motata het aangevoer dat die trauma en stres sy liggaamsfunksies en die bloedalkoholvlak kon beïnvloed het.
Die verhoor gaan vandag voort.
Die meeste vroue in die VSA is nie beïndruk deur die Republikeinse keuse van Sarah Palin, die goewerneur van Alaska, nie.
Palin is deur senator John McCain as sy visepresidentskandidaat gekies.
Byna 'n derde van die vroue wat ondervra is, sê hulle het nie van Palin se stemrekord in die senaat of van haar posisie oor aborsie gehou nie.
Hoewel dit die eerste keer is dat 'n vrou as Republikeinse presidensiële medekandidaat benoem is, het twee-en-vyftig persent van vroue gesê hulle gaan vir die Demokratiese span stem wat net uit mans bestaan.
Hoewel die ANC-regering nie presiese syfers wil bekendmaak nie, word beraam dat 90% van grondhervorming besig is om te misluk. 'n Spreker by die TLU SA-jaarkongres, mnr. Wannie Scribante, se eie navorsing toon dié uitslag.
In die meeste gevalle word die infrastruktuur van plase wat deur sogenaamde "nuwe boere" betrek word ook verwoes. Volgens Scribante kwel die mislukking van grondhervorming egter nie die ANC nie, want die herverspreiding van grond aan swartmense word gesien as 'n wesentlike element van die Nasionale Demokratiese Revolusie.
TLU SA het ook 'n mosie aanvaar waarin kennis geneem word van die Nasionale Demokratiese Revolusie en dat die uitwerking daarvan op landbou gemoniteer moet word.
Nog 'n spreker by die kongres het daarop gewys dat die grondbesitwette van 1913 en 1936 enersyds bedoel was om kommunale grondbesit deur swartes te beskerm en andersyds om swart grondbesit uit te brei.
Swartes besit reeds grond in die reënryke en vrugbare gebiede van Suid-Afrika; nietemin het hul landboubedrywighede klaaglik misluk in weerwil van damme en besproeiingskemas in sulke gebiede.
'n Vorige voorsitter van die TLU SA, mnr. Willie Lewies, het gewaarsku dat die terugtrekking van die onteieningswet nie die einde van onteiening in die land beteken nie. Die minister van landbou beskik steeds oor die magte om die bates van individue, byvoorbeeld boere se aandele in koöperasies, te konfiskeer.
TLU SA het ook 'n beskrywingspunt aanvaar dat daar na 'n nuwe staatkundige bestel gesoek moet word aangesien die Afrikanerboer se bestaan in sy totaliteit deur huidige regeringsbeleid bedreig word.
Die Nigeriese magnaat Mike Adenuga wil Telkom koop. Hy wil sy selfoononderneming Globacom met Telkom se 50%-aandeel in Vodacom saamsmelt.
Vodacom is die land se grootste selfoonoperateur.
Globacom kan nie 'n aanbod vir Telkom se aandeel in Vodacom direk maak nie omdat Brittanje se Vodafone die ander 50% besit en die reg op eerste weiering het.
'n Transaksie met Globacom kan Vodafone se planne in die wiele ry om beheer oor Vodacom te verkry deur 'n deel van Telkom se aandeel te koop.
