Kategorie: Nuus

Wrakstukke van Indoniese vliegtuig opgemerk

Wrakstukke is Maandag vanuit ’n Indonesiese soek- en reddingsvliegtuig in die Papoea-provinsie opgemerk wat vermoedelik dié is van ’n vliegtuig met 54 mense aan boord wat vroeër neergestort het, het Reuters berig.

Trigana Air Service se ATR 42-300-vliegtuig het Sondag vermis geraak. Dit is die jongste in ’n reeks lugrampe in Suidoos-Asië.

Yunus Wally, die plaaslike polisiehoof, het aan die Antara-nuusagent­skap gesê die wrakstukke, vermoedelik van die Trigana Air Service-vliegtuig, is by die Tankokberg in die dig beboste Bintangbergreeks gesien.

“Dit is waar bemanning van ’n soekvliegtuig die wrakstukke by die Oksop-waterval raakgesien het.”

’n Soek- en redding­span wat bestaan uit onder meer 266 Indonesiese soldate het gister gereed gemaak om na die gebied te gaan. Die soektog sluit ook 20 klien vliegtuie en helikopters in.

Dit sal egter moeilik wees om die lyke te vind, weens die uiterste terreintoestande by die ongelukstoneel wat in ‘n baie hoë en steil gebied geleë is. Boonop is die weerstoestande onvoorspelbaar met mis wat skielik in die koue, bergagtige dele kan voorkom.

Altesaam 44 volwasse passasiers, 5 kinders en babas en 5 bemanningslede was op die kortafstandvlug van die Sentani-lughawe in Jayapura, hoofstad van Papoea, na Oksibil.

Weens kommer oor veiligheidstandaarde is die lugdiens sedert 2007 op die Europese Unie (EU) se lys van verbode lugdienste. Dit was by 14 ernstige voorvalle betrokke sedert dit in 1991 sake begin doen het. Voor Sondag se lugramp is 10 van die lugdiens se vliegtuie afgeskryf.

Indonesië het ’n swak lugvaartveiligheidsrekord en het reeds twee groot lugrampe vanjaar beleef. Dit sluit in ’n vlug van AirAsia wat in die Java-see neergestort het. Al 162 mense aan boord het gesterf.

Die Indonesiese president het in Julie ’n hersiening van die land se lugmagvliegtuie belowe nadat meer as 100 mense dood is toe ’n militêre vrag­vliegtuig neergestort het.

Indonesië het pas sy 70ste onafhanklikheidvieringe gevier.

Namibiese president lê klem op SAOG se kragvoorsiening

President Hage Geingob het by sy intreetoespraak by die SAOG-spitsberaad in Gaborone gesê die armes kan nie natuurlike hulpbronne, demokrasie of grondwette eet nie.

“Ons mense kan nie natuurlike hulpbronne eet nie. Ons mense kan nie demokrasie eet nie. Ons mense kan nie goeie grondwette eet nie. Demokrasie is egter die voorwaarde om in ons mense se basiese behoeftes te voorsien,” het Geingob gesê.

Hy het klem gelê op waardetoevoeging wat die ekonomiese onderbou van rustofverwerking behoort te vorm, het die Republikein berig.

“Die uitvoer van rustowwe beteken eenvoudig dat ons werkgeleenthede uitvoer. Dit ontneem ons die geleentheid om te industrialiseer en ons mens-like kapitaal te ontwikkel. Ons moet ’n einde maak aan die tendens wat meebring dat ons handel dryf met goedere wat ons nie verbruik nie, en goedere verbruik wat ons nie produseer nie,” het Geingob gesê.

Ten einde te industrialiseer, is betroubare elektrisiteitsvoorsiening noodsaaklik. Streeksamewerking is die sleutel om te verseker dat SAOG sy elektrisiteitstekort oplos. Nog ’n aspek wat streeksamewerking vereis, is die ernstige droogte wat die SAOG-streek teister, het Geingob gesê.

Hy het ook daarop gewys dat die streek sy afhanklikheid van buitelandse ontwikkelingshulp moet verminder ten einde ekonomiese soewereiniteit te verseker.

“Ongeag hoe karig ons finansiële bronne mag wees, is ek van mening dat indien ons saamstaan in die gees van ‘harambee’, (Swahili vir trek saam), ons die oogmerke vir ’n geïndustrialiseerde, vooruitstrewende streek sal verseker,” het Geingob gesê.

Buitelandse student by kultuurfees gesteek

’n Buitelandse student by die Universiteit van Namibië (Unam) is Vrydag in ‘n parkeerarea op die hoofkampus in Windhoek met ’n skerp voorwerp gesteek.

Die student is ’n Zambiese burger en die onder­onsie was oor ’n selfoon. Die student verkeer tans in ‘n stabiele toestand.

Uman se woordvoerder het ontken dat die voorval enigiets met die kultuurfees by die universiteit te make gehad het.

Die woordvoerder het gesê die kultuurfees het by Unam se stadion plaasgevind en geen voorvalle van soortgelyke aard of beserings is aangemeld nie.

Sekuriteitmaatreëls by die universiteit sal intussen opgeskerp word en daar sal veral na die ontspanningsareas gekyk word.

“Unam se sekuriteit neem die voorval ernstig op en probeer presies bepaal wat gebeur het,” het die woordvoerder aan die Republikein gesê.

Bruin ouers bots weer met swart onderwysdepartment

Vyf mense is na wat berig word beseer deur rubberkoeëls nadat die polisie na bewering Dinsdagoggend op ‘n skare bruin ouers by die Roodepoort Laerskool losgetrek het.

Die Citizen berig dat een ouer in die hospitaal opgeneem is nadat hy deur die polisie geskiet is.

Dit kom kort op die hakke van die departement van onderwys se aankondiging dat hulle tydelik die skool sal sluit weens voortgesette ontwrigting.

Die skool se roetine is ontwrig deur gewelddadige betogings oor die aanstelling van ‘n swart skoolhoof, Nomathemba Molefe, en haar adjunkte.

‘n Besluit is geneem om bruin leerlinge van die skool na die naburige skole te verskuif om die opstand te probeer ontlont.

Die LUR vir onderwys in Gauteng, Panyaza Lesufi, se kantoor is in ‘n krisis gedompel weens sy departement se besluit om ‘n swart skoolhoof oor bruin kinders aan te stel.

Hierdie besluit is grondig deur bruin lede van die gemeenskap verwerp.

Timeslive berig dat Lesufi sy kantoor beveel het om vir die volgende ses dae slegs op die rassekonflik by die skool te konsentreer.

Woedende bruin ouers by die Roodepoort Laerskool het gesê hulle weier om toe te laat dat hul kinders by ‘n tydelike fasiliteit onderrig ontvang omdat hulle bang is vir hul veiligheid.

Nadat die Gautengse premier, David Makhura die skool tydelik gesluit het, het ouers probeer keer dat busse bruin kinders na ‘n skool in Soweto neem.

Spanning by die skool het Maandag weer tot ‘n uitbarsting gekom met ‘n bruin ouers wat vra dat die swart skoolhoof bedank.

Bruin ouers beweer hul woede het niks te doen met ras nie en alles te doen met wat hulle beskou as korrupsie by die skool.

Hulle beweer die Departement van Onderwys speel van die rassekaart om die waarheid te verberg.

Voor die leerlinge van die skool vervoer is, het bruin ouers die “k”-woord vir die polisie geskree en hulle beveel om hul kinders terug te bring.

Die bruin gemeenskap buite die skool het glo die polisie oorweldig, waarna die wetstoepassers begin skiet het.

Die EFF sê hulle wil die gemeenskap van Dobsonville, wes van Johannesburg ondersteun om te verseker dat klasse by die Roodepoort laerskool, ongehinderd kan geskied.

Waterstaking kan 11 miljoen mense raak

Meer as 11 miljoen mense staar moontlike watertekorte in die gesig as werkers by Rand Water begin staak.

Samwu het gewaarsku dat krane kan droog loop indien die maatskappy nie reageer op die werkers se eise nie.

Sowat 4000 lede van die unie – betrokke in beide die behandeling en verspreiding van water – het Maandag kennis gegee van hulle voorneme om te staak.

Onderhandelinge het in duie gestort toe Samwu die aanbod deur die watermaatskappy verwerp het. Die twispunte handel oor salarisverhogings, behuisingstoelae en bonusse.

Die watermaatskappy sê daar is tydens ‘n vergadering met vakbonde wel bevestig dat die ooreenkoms oor minimum-diensvlakke nie betwis sal word nie.

“Ons volgende afspraak met Rand Water sal op die strate wees,” het Samwu gewaarsku.

Rand Water het egter die versekering gegee dat hy steeds hoë gehalte drinkwater aan sy al kliënte sal verskaf, selfs al staak sy werkers.

Indien die staking voortgaan kan inwoners in Johannesburg, Pretoria en dele van Mpumalanga geraak word.

Mandela se kleinseun vas vir verkragting

Die kleinseun van Nelson Mandela is volgens berigte in hegtenis geneem die naweek vir die beweerde verkragting van ‘n 15-jarige meisie by ‘n gewilde restaurant in Greenside, Johannesburg verlede Vrydag.

Volgens die meisie se familiewoordvoerder wat met die Daily Sun gepraat het, is die tiener na die toilet toe Mandela se kleinseun, Mbuso Mandela haar gegryp het en haar verkrag het in een van die toilette.

Die meisie se pa het probeer om ‘n strafsaak te open, maar is deur Winnie Madikizela-Mandela se lyfwag. geïntimideer om dit te laat vaar.

Madikizela-Mandela het glo gevra dat die familie van die meisie hul “tyd” gebruik om die kwessie te oordink en op te los.

Winnie se lyfwag het aan die familie voorgegee dat hy van die polisie is, sê die meisie se familiewoordvoerder.

“Dit blyk hy is deur Winnie gestuur,” het die woordvoerder gesê.

“Net omdat hulle ‘n bekende naam het, dink hulle hulle kan wegkom met misdaad,” het hy gesê.

Gauteng se polisiewoordvoerder brigadier Mashadi Selepe het gesê ‘n saak van verkragting is geopen op 14 Augustus en die verdagte het Maandag verskyn.

Die saak is intussen uitgestel en die beweerde verkragter sal in aanhouding bly.

Swak rand beperk petrolprysdaling

Alhoewel motoriste minder vir brandstof sal betaal, kan ‘n swakker rand nog ‘n invloed uitoefen.

‘n Brandstofprys daling word in September verwag met petrolpryse wat kan afneem tussen 55c en 64c per liter.

Die Automobiel-Assosiasie (AA), het Maandag gesê die skerp depresiasie van die rand teenoor die Amerikaanse dollar word deur die voortgesette daling in internasionale oliepryse veroorsaak.

Die rand het aansienlik teenoor die Amerikaanse dollar sedert die laaste week van Julie verswak.

Internasionale oliepryse neig afwaarts wat beteken dat daar nog ‘n redelike vooruitsig van ‘n daling in die brandstofprys aan die einde van die maand verwag word.

Brentru-olie vir Oktober was Maandag onveranderd op $49,10 per vat.

“Die kombinasie van verhoogde olievoorraad in die VSA en die verhoging van OPUL se produksie, trae groei in die vraag, en ‘n sterker VSA (dollar) sal voortgaan om oliepryse te beïnvloed” het ‘n markontleder aan AFP gesê.

Die AA het gesê sonder die impak van die swak rand, sou die daling in die petrolprys tussen 75c tot 83c per liter gewees het.

Oud-terroris op witskuld-boektoer

Een van die terroriste wat by Rivonia aangekla is, en goeie vriend van oud-president Nelson Mandela, Ahmed Kathrada het Grey Kollege in Bloemfontein Maandag besoek as deel van sy boekbekendstellingsprogram.

Die oud-terroris wou nie oor die hede praat nie, maar het net op die verlede van “onreg” gefokus voor ‘n gehoor wat weens hul ouderdom geen aanspreeklikheid daarvoor kan aanvaar nie.

Die leerlinge is almal lank na 1994 gebore.

Gesprekke met die jeug oor apartheid is dus gehou met die uitsluitlike doel om kollektiewe wit skuld aan te moedig.

Kathrada wou nie kommentaar lewer oor die huidige politieke situasie nie, maar het eerder gekonsentreer op die “vryheidstryd” in die land.

‘n Dokumentêre program oor die lewe van Kathrada is vertoon, waarna leerlinge die geleentheid gehad het om hom vrae oor sy 26 jaar in die gevangenis te vrae, insluitend die 18 jaar op Robbeneiland.

ANC wil provinsies afskaf

Volgens die Sunday Independent beplan die ANC om sekere provinsies af te skaf.

Die afskaffing kan lei tot groter magte vir betrokke munisipaliteite.

Dié voorstelle is vervat in ‘n verslag wat in Julie by die party se vergadering besluit is en intussen na provinsiale strukture uitgestuur is.

Die ANC se sekretaris-generaal, Gwede Mantashe, het by dié geleentheid ook verklaar dat oplossings gemik op werkloosheid, armoede en on­gelykheid nog geen vrugte afgewerp het nie.

Mantashe meen die ANC moet eerder op grondhervorming, mynboubelange en breë­band fokus.

Die party beplan glo ook om senior staatsamptenare se persoonlike uitgawes en magte te ondersoek.

Dodetal na Bangkok-bom styg

Die dodetal in die bomontploffing by ‘n gewilde heilige tempel in die Thaise hoofstad, Bangkok het tot 27 gestyg.

Minstens 123 mense is beseer in die ontploffing wat naby ‘n gewilde Hindoe tempel voorgekom het.

Volgens berigte is verskeie buitelanders vanuit Asië, waaronder ook Chinese, in die ontploffing dood. Die tempel word daagliks deur duisende Boeddhiste en toeriste besoek.

Die bom was volgens berigte op ‘n motorfiets geplant en die ontloffing het ‘n krater van sowat twee meter wyd veroorsaak en tot grutonele gelei van menslike ledemate wat oral gesaai lê.

Nog ‘n bom op die toneel is onskadelik gestel.

Alhoewel dit nog nie bekend is wie vir die ontploffing verantwoordelik is nie, sê die owerhede dat hulle die aanvallers op geslotekringtelevisie opgemerk het.

Die eerste minister van Thailand, Prayuth Chan-ocha, het die ontploffing as die ergste voorval nog beskryf wat die land getref het.

Volgens die Thaise regering is dit duidelik dat die aanvallers die land se ekonomie, waarvan toerisme ‘n groot deel is, wou vernietig.

Die dodetal is intussen tot 20 aangepas, terwyl 125 mense beseer is. Die ontploffing was omstreeks sewe-uur plaaslike tyd by die Erawan-tempel wat ‘n bekende toeriste-aantreklikheid is.

Thailand word sedert Mei 2014 deur ‘n militêre junta regeer.

Thailand se drie suidelike provinsies is die tuiste van Moslem-separatiste wat in opstand teen die regering is, maar volgens die owerhede stem die metode wat die aanvallers gebruik het nie ooreen met die van seperatiste groepe in die suide van Thailand nie.

Sedert 2004, is meer as 6500 mense, die meeste van hulle burgerlikes, dood in geweld in die streek.