Kategorie: Nuus

De Kock gee onderneming om MK te help

Eugene de Kock, beter bekend as “Prime Evil” is uit die tronk en sal binnekort help om grafte van “vermiste slagoffers van apartheid” aan te wys.

Na byna 20 jaar in die tronk, is dit nie bekend waar De Kock homself tans bevind nie. Hy is glo vrygelaat voordat die aankondiging amptelik gemaak is.

De Kock is vrygelaat om die Nasionale Vervolgingsgesag te “help” om oorblyfsels van aktiviste wat tydens die apartheidsera verdwyn het, op te spoor.

De Kock het glo reeds voor sy vrylating aan die NVG ‘n onderneming gegee dat hy inligting aan hulle sal verskaf.

Dit is nie die eerste keer dat De Kock die span bystaan nie.

Vrydag, het die minister van justisie, Michael Masutha gesê een van die redes wat gelei het tot sy besluit om die voormalige Vlakplaas-bevelvoerder vry te laat, was die hulp wat hy aan die NVG gegee het.

De Kock is al meer as 20 keer onder gewapende wag uit die tronk gelaat sodat hy sy voormalige veiligheidsmagkollegas kon gaan ontmoet om hulle te oortuig om ook te praat.

“Logistiek sal nou makliker wees,” het ‘n lid van die NVG gesê.

Dit was ‘n geheime vergadering twee jaar gelede tussen De Kock en Umkhonto weSizwe (MK) se veterane wat die weg gebaan het vir De Kock se suksesvolle paroolaansoek.

Dr Piet Croucamp het die vergadering moontlik gemaak. Tydens hierdie vergadering het De Kock waardevolle inligting verskaf wat glo gelei het tot MK se besluit.

Croucamp het gesê dat dié vergadering – en baie soortgelykes wat gevolg het – was “absoluut noodsaaklik” in die besluit om De Kock se vrylating.

“Die empatie wat die MK-ouens het vir De Kock bestaan op ‘n onverstaanbare vlak,” het Croucamp gesê.

Die Sunday Independent het intussen berig dat De Kock doodsdreigemente ontvang het en dat hy na ‘n huis vir veilige bewaring geneem is.

Anonieme bronne het aan die koerant gesê die dreigemente is deur “verregse organisasies” gemaak wat glo bang is De Kock gaan mense identifiseer.

Daar was voor 1994 nooit verregse ondersteuners wat deel was van die polisie nie.

Die Sunday Times het berig dat Namibië se Swapo De Kock in die tronk besoek het en aangebied het dat hy in die Okavango gaan bly. Dié aanbod is glo ook genoem in die verslag wat ingedien is vir sy paroolaansoek.

AU wys Grondgryp-Bob as voorsitter aan

Die regerende Zanu-PF in Zimbabwe het die Afrika Unie intussen geloof vir sy besluit om President Robert Mugabe as AU-voorsitter aan te wys.

Mugabe het verlede week by die AU-beraad in Addis Abeba gesê dat die res van die vasteland moet Zimbabwe se grondgrypvoorbeeld volg.

Die party sê die besluit weerspieël Afrikaleiers se gehegtheid aan die negentigjarige staatsman.

Die party-woordvoerder, Simon Moyo sê Afrika sal vir ewig Mugabe se heldedade koester, ondanks die Weste se negatiewe siening van hom.

Honderde wit boere is van hul plase afgegjaag wat tot die ineestorting van die land se eens florerende landboubedryf en hongersnood gelei het.

President Jacob Zuma het die Suid-Afrikaanse afvaardiging in Addis Abeba, Ethopië, by die pasafgelope beraad verteenwoordig.

Van die kwessies wat bespreek is, is die toename in terreuraanvalle in Afrika en die AU se reaksie op ebola in Wes-Afrika.

Suid-Afrika sal die gasheer wees vir die vyf-en-twintigste beraad van die AU wat vandeesjaar in Johannesburg plaasvind.

Nog ‘n fees wil Steve verbied

Nog ‘n musiekfees het die sanger Steve Hofmeyr die rug toegekeer.

Die Innibos Nasionale Kunstefees het aangekondig dat Hofmeyr, wat deur talle mense as die grootste trekpleister by die fees beskou word, nie vanjaar genooi is nie.

Die besluit volg na ‘n reeks omstrede politieke uitlatings deur Hofmeyr op sosiale media. Die woordvoerder van Innibos, Sandra Jacobs sê Hofmeyr se politieke standpunte het ‘n rol gespeel.

Die Klein Karoo Nasionale Kunstefees het ook vroeër bekend gemaak dat hulle en Hofmeyr se paaie moet skei.

Intussen het ‘n Facebookgroep wat gestig is om die KKNK te boikot, sowat 36 000 stemme getrek.

Weerlig dood ses

Ses swartes is dood nadat hulle in twee afsonderlike voorvalle in KwaZulu-Natal deur weerlig getref is.

Drie familielede is Saterdag dood nadat hulle naby Colenso deur weerlig getref is. Robert McKenzie, woordvoerder van die provinsiale nooddienste, het gesê ‘n ma en twee kinders is dood nadat die huis waarin hulle was deur weerlig getref is. Die vrou se man het oorleef.

Volgens McKenzie is nog drie mense dood nadat hulle vroeër Saterdagoggend deur weerlig getref is in Vryheid.

Twee vroue, tussen 70 en 80 jaar oud, en ‘n ouerige man is dood nadat die huis waarin hulle was deur weerlig getref is.

Drie ander vroue is beseer.

Duisende swart matrieks by eksamenkullery betrokke

Meer as 2 800 meestal swart matrikulante en ten minste 34 onderwysers en skoolhoofde van KwaZulu-Natal en die Oos-Kaap was glo betrokke by grootskaalse eksamenkullery, het Sapa berig.

Elijah Mhlanga, woordvoerder van die departement van onderwys, het gesê 2 089 leerlinge van KwaZulu-Natal en 778 leerlinge van die Oos-Kaap word daarvan verdink dat hulle tydens hul 2014-matriekeksamens gekul het.

Mhlanga het gesê die uitslae van die vraestelle, wat by 19 lokale in KwaZulu-Natal en 14 lokale in die Oos-Kaap geskryf is, gaan nie bekend gestel word nie.

Die departement het oor die afgelope twee weke verskeie toesighouers en leerlinge ondervra.

“Van die betrokkenes het skriftelik erken dat hulle die vrae in ‘n sekere manier beantwoord het. Ander interessante bewerings het ook na vore gekom en die ondersoekbeamptes genoop om verder ondersoek in te stel.”

Hy het gesê daar was ‘n paar belydenisse, meestal van leerlinge, wat die ondersoekbeamptes se ondersoek versterk. “Daar is duidelike tekens dat daar gekoördineerde hulp was,” het hy gesê.

Die rede waarom die onderwysers deel van die kullery was, is nog nie vasgestel nie. ‘n Leerling het egter tydens ondervraging gesê die onderwysers is lui, en dat hulle nie altyd klas gee nie. Daar word vermoed dat die onderwysers en skoolhoofde die leerlinge gehelp het om vir die gebrek aan onderwys op te maak.

Mhlanga het gesê sommige leerlinge het tydens die eksamens hul eie oorspronklike antwoorde uitgewis en dieselfde identies verkeerde antwoorde gekies. Hy het toegegee dit is kommerwekkend dat, afgesien van die bedrog, die onderwysers skynbaar nie eens die korrekte antwoorde ken nie.

Dit is nie bekend wanneer die departement se formele verhore oor die aangeleentheid voltooi gaan wees nie. Leerlinge wat aan kullery skuldig bevind word, kan vir drie jaar verbied word om matriek te voltooi.

Polisie skiet op Diepslootgrondbesetters

Die Gautengse polisie moes ‘n tierend swart skare met rubberkoeëls verwilder nadat hulle probeer het om ‘n stuk grond tussen Pretoria en Johannesburg te beset.

A.o. Daniel Mavimbela, polisiewoordvoerder, het gesê ‘n groep van nagenoeg 100 mense het vroeër op ‘n oop stuk grond in die ooste van Diepsloot toegesak en onwettig beset.

Volgens Mavimbela het die skare toegang met brandende bande en ander voorwerpe versper en was die toestand Saterdag gespanne.

‘n Mag is in die gebied ontplooi nadat die polisie met klippe bestook is. Die skare is met rubberkoeëls verwilder.

‘n Vierjarige het ‘n besering aan sy bolyf opgedoen en is na ‘n hospitaal geneem vir behandeling en ‘n volwassene is vir openbare geweld in hegtenis geneem.

African Bank se uitspattige baas skielik oorlede

Omstrede voormalige hoof van risiko by African Bank, Tami Sokutu, is by sy huis in Kaapstad op die ouderdom van 53 ná ‘n kort siekbed oorlede, het die Sunday Times berig.

Sokutu, het opslae gemaak verlede jaar met sy opmerking “fok die armes” in die nasleep van die bank se probleme.

Die SA Reserwebank moes in Augustus 2014 instaan om African Bank te red, hoofsaaklik weens slegte skuld.
 
Sokutu het by dieselfde geleentheid gespog oor sy persoonlike rykdom, sy drie huise in Suid-Afrika, een in Portugal en ‘n vloot van luukse motors.

Hy is in die Sunday Times destyds aangehaal waar hy oor die bank se kliënte gesê het: “Fok hulle fok hulle”. Die bank het aan baie swartes lenings toegestaan wat nie kon bekostig om dit terug te betaal nie.
 
Hy het reeds meer as R50 miljoen in aandele-opsies en R35 miljoen aan salaris en bonusse verdien toe hy by die bank in Februarie verlede jaar bedank het.
 
Sokutu is naby Mthatha gebore. Hy het aan die Universiteit van Kaapstad studeer, en ‘n magistergraad in 1992 behaal. Hy het ook studies aan Wits Business School en Harvard voltooi.
 
Sokutu het in 2002 by African Bank aangesluit is ‘n jaar later op die direksie aangestel.
 

Koeberg sukkel weens tegniese probleme

Die Koeberg-kernkragsentrale het die helfte van sy opwekkingsvermoë – sowat 900 megawatt – weens ‘n tegniese prbleem verloor.

Eskom se woordvoerder, Khulu Phasiwe sê ‘n transformator het glo onklaar geraak wat die kragvoorsiener genoop het om eenheid-een van die netwerk te ontkoppel.

Hy sê die netwerk is tans stabiel maar het nie die moontlikheid van beurtkrag uitgesluit nie.

Phasiwe sê instandhoudingswerk sou vanaf 9 Februarie op Koeberg se Eenheid Een gedoen word.

Hy sê hulle vergader om 07:30 Maandagoggend waar vasgestel sal word of onderhoudswerk vroeër kan begin.

Bekende egpaar verwag eersteling

Die bekende Afrikaanse sanger-akteur paartjie wat verlede jaar in die geheim afgehaak het, spog nou met nog opwindende nuus.

Bok van Blerk en sy vrou Hanna Grobler, verwag hul eerste pienkvoet in Junie.

Van Blerk is bekend vir sy treffer oor die Boeregeneraal Koos de la Rey.

Die gewilde sanger het in Januarie malaria opgedoen tydens ‘n vakansie in Mosambiek. Hy was reeds terug in SA vir optredes toe hy die simptome opgemerk het en behandeling gekry het.

Jenny Griesel, woordvoerder van die glanspaar, het Sondagoggend die swangerskap aan Rekord bevestig.

“Hanna is nou 19-weke swanger en dit is ’n seuntjie. Hulle is baie gelukkig en opgewonde vir die nuwe seisoen in hul lewens,” het sy gesê.

Bron: Rekord Noord

VN ondersoek Namibiese bande met Noord-Korea

Namibië se skending van Resolusie 1718 van die Veiligheidsraad sal aanstons amptelik deur die VN ondersoek word, het die Republikien berig.

Agt deskundiges is in 2009 ingevolge resolusie 1874 aangestel met die mandaat om alle sanksies wat die VN teen Noord-Korea ingestel het, te monitor en inligting van lande wat in gebreke bly om aan die vereistes van die sanksies te voldoen, in te samel en te ontleed.

Die ondersoek kom ná ‘n berig wat op 8 Januarie in die Republikein verskyn het oor Namibië se bande met die Noord-Koreaanse maatskappy Korea Mining Development Trade Corporation (KOMID), wat onder die alias Mansudae Overseas Project Group of Companies (M.O.P.) in die land sake doen.

Republikein het betroubaar berig dat ’n amptelike brief waarin die ministerie van buitelandse sake gevra sal word om te verduidelik en oop kaarte met die VN ondersoekspan te speel, eersdaags gestuur sal word.

Vanweë die internasionale sanksies teen KOMID registreer die onderneming telkens ’n nuwe alias waaronder sake gedoen word. In Namibië het die maatskappy onder die naam van sy alias, Mansudae Overseas Project Group of Companies, onder meer die heldeakker, die nuwe Staatshuis (2008) en die Gedenkmuseum vir Onafhanklikwording (2011) gebou.

Wat nog meer kommerwekkend is, is dat die einste maatskappy nou besig is om ’n fabriek vir die vervaardiging van ammunisie by Luiperdsvallei op te rig.

Ingevolge die resolusie moet lidlande van die VN alle oorsese bates van individue en maatskappye betrokke by Noord-Korea se ­wapenprogramme vries. ’n Internasionale reisverbod is ook op werknemers van hierdie programme en hul families ingestel.

KOMID is een van die maatskappy wat in die bylaag tot resolusie 1718 by die naam genoem word.

“Dit word van alle lidlande van die VN verwag om die maatreëls wat hulle instel om te voldoen aan die bepalinge van die resolusie, binne 30 dae aan die Veiligheidsraad te rapporteer,” lui die resolusie.

Uit regeringskringe is nie vóór of nadat die berig geplaas is, ’n enkele woord gerep nie. Verskeie navrae na die skakelafdeling van die ministerie van buitelandse sake vir die regering om sy kant van die saak te stel en enige moontlike verduideliking te verstrek, het geen vrugte afgewerp nie.