Karin Roodt, Author at praag.co.za

‘Ramaphosa is ‘n Boer’

Cyril Ramaphosa, adjunk-president van die ANC, is ‘n “Boer” en die “werklike vyand”, sê Julius Malema, EFF-leier.

Ramaphosa het in Seshego in Limpopo gesê inwoners moet stem, anders gaan “die Boere” terugkom om “ons te beheer”.

Ramaphosa en die ANC het intussen gesê dit was ‘n misverstand en hy nie na Afrikaners of wit mense verwys nie.

Malema het in ’n artikel op Politicsweb gesê ANC-beeldpoetsers probeer sy uitlating toesmeer, maar “Suid-Afrikaners is nie idiote wat deur sulke sentimente skrikgemaak kan word nie, want hulle weet vandag is die werklike vyand van ekonomiese vryheid, of enige soort vryheid, mense soos Cyril Ramaphosa.”

“Die karaktereienskappe van die ‘Boere’ van destyds is dié wat Ramaphosa vandag kenmerk; iemand wat nie skroom om R18 miljoen vir ’n dier [’n buffel op ’n veiling] te betaal nie en wat waarskynlik saamgesweer het in die slagting van mynwerkers by Marikana, maar nie skroom om staatsinstellings te gebruik om homself te verontskuldig nie.

“Die mense van Suid-Afrika weet wie die werklike moordenaars is en sal hulle nie laat mislei deur die nuwe ‘Boere’ wat hulle wil wysmaak solank hulle (die ANC) regeer sal die apartheidsboere uit die regering gehou word nie.”

]Ramaphosa buit ook swartes uit soos wat onder apartheid gebeur het.

“Die mense van Suid-Afrika moet Cyril Ramaphosa se geveinsdheid verwerp en vir hom sê hy is vandag die regte ‘Boer’; iemand wat onderdruk, uitbuit en moontlik weerlose werkers doodmaak,” het Malema gesê.

Krejcir sê sy lewe is in gevaar

Die voortvlugtige sakeman Radovan Krejcir het gesê dit is walglik dat hy as ‘n mafiabaas, bose bendelid of ‘n onderwêreldfiguur uitgebeeld word.

Krejcir het Donderdagaand by sy prokureur se kantoor aan Eyewitness News ontken dat hy betrokke is by enige van die “onderwêreld”-moorde waarmee die media hom verbind.

Die Tsjeg, wat uitlewering aan sy tuisland beveg, het uiteindelik te media te woord gestaan oor misdade wat hom raak die afgelope paar weke.

Twee van sy vriende is Dinsdagaand in ‘n ontploffing by sy onderneming Money Point in Bedfordview dood. Inwoners in die ooste van Johannesburg waar Krejcir woon beskryf dit as gevaarlik weens bendebedrywighede daar.

Krejcir wou nie bespiegel oor wie verantwoordelik is vir dié aanval nie, maar hy glo hy word aangeval en dat sy lewe in gevaar is.

Renosterstroper se meesterbrein sit vir Kersfees

Die verhoor van ‘n vermeende meesterbrein agter renosterstropery, en twee medebeskuldigdes sal in Maart aanstaande jaar in die landdroshof op Middelburg in Mpumalanga voortgesit word.

Joseph Nyalunga is in Maart vanjaar in hegtenis geneem. Die polisie het in opvolgondersoeke afgekom op meer as R5 miljoen kontant wat in twee trommels in een van sy huise gehou is.

Twee Viëtnamese en ses Mosambiekse burgers het saam met hom verskyn.

Nyalunga en agt van sy mede-beskuldigdes sal ‘n tweede Kersfees in die tronk moet deurbring. – RSG

Zille veroordeel vir minagting van parlement

Opposisiepartye in die Wes-Kaapse parlement het die premier, Helen Zille se besluit om nie Donderdag ‘n vraagsessie by te woon nie, veroordeel.

Die ANC sê Zille toon minagting vir die parlement.

Die ANC se hoofsweep, Pierre Uys sê hulle is geen rede gegee vir Zille se afwesigheid nie.

Uys sê Zille kan nie rigting of leierskap verskaf indien sy nie daar is om haar party se beleid bekend te maak of vrae van die opposisiepartye te beantwoord nie.

Zille se woordvoerder, Zak Mbhele sê egter sy moes ‘n belangrike geleentheid in Gauteng bywoon, en sal vrae beantwoord by die volgende sessie. – RSG

Oproeriges brand DA-kantoor af

Oproeriges het Donderdagmiddag ‘n gemeenskapsaal, gesondheidskliniek en nuutgeboude kantore van die DA aan die brand gesteek in die Oos-Kaap.

Die situasie op Uitenhage bly gespanne na die geweld op die dorp uitgebreek het.

Die polisie het gesê buitebande is deur die nag aan die brand gesteek in Langa, Kamesh, Rosedale en Blikkiesdorp.

Geweld het uitgebreek toe die munisipaliteit van die Nelson Mandelabaai metro die onwettige krotte wat deur grondbesetters opgerig is, begin afbreek het.

Die metro het vroeër ‘n interdik gekry om die krotte te verwyder.

Vier mense is in hegtenis geneem en die polisie is in die gebied ontplooi.

Ma van rotgevrete babalyk vas

Die ma van die sewe maande oue baba, wat dood gevind is in ‘n plakkershut in Diepsloot, en haar kêrel is in hegtenis geneem, het die Gautengse polisie Donderdag gesê.

“Die ma is Dinsdagaand in ‘n kroeg in Randburg vasgetrek en haar kêrel is gister [Woensdag] in Diepsloot gearresteer,” het kapt. Tsekiso Mofokeng gesê.

Mofokeng het gesê die 23-jarige vrou word aangekla van kinderverwaarlosing en moord. Sy sal Donderdag in die landdroshof in Pretoria verskyn.

Haar 30-jarige kêrel word deur ‘n aanklagte van moord in die gesig gestaar. Hy sal Vrydag in die hof verskyn.

Die sewe maande oue babaseuntjie se verminkte liggaam (sy een voetjie is deur rotte afgebyt) is Sondag in die woning gekry. – Sapa

Valke ondersoek mafiabaas se onderwêreld

Die Valke wil ondersoek instel oor die Tsjeggiese voortvlugtige Radovan Krejcir se verbintenis met skietgevegte, bomaanvalle en moorde in Bedfordview.

Inwoners van Bedfordview, oos van Johannesburg vrees vir hul lewens weens die toename in geweldsmisdaad in die gebied

Die span wat Suid-Afrika se misdaad-onderwêreld te ondersoek is reeds maande gelede aangestel, maar bedrywighede is die afgelope ses weke verskerp, berig The Times.

In die mees onlangse voorval by Krejcir se onderneming Money Point is twee mense dood en vyf beseer.
Krejcir wou nie Woensdag kommentaar lewer nie.

Kapt. Paul Ramaloko, woordvoerder van die Valke, het bevestig dat speurders met baie ervaring ’n reeks moorde, poging tot moord, ’n huisroof en ’n inbraak waartydens juweliersware van miljoene rande gesteel is, ondersoek.

Al dié voorvalle het die afgelope ses weke in Bedfordview aan die Oos-Rand plaasgevind en die span het afsonderlike sake waarin Krejcir die klaer is.

‘n Aantal voorvalle die afgelope paar maande het verskeie lewens in die gegoede buurt geëis. Inwoners sê dit is veral kommerwekkend dat die voorvalle skynbaar in intensiteit toeneem.

Verlede maand is twee mans, Bassam Issa en Veselin Laganin doodgeskiet.

Dinsdagaand is nog twee mans dood in ‘n bomontloffing by die Tsjeggiese voortvlugtige, Radavon Krejcir se winkel. Drie ander mense is in ‘n kritieke toestand in die hospitaal opgeneem.

Volgens berigte was die twee mans meelopers Krejcir.

Die mafiabaas probeer om sy uitlewering aan die Tsjeggiese republiek waar gevangenisstraf op verskeie aanklagte hom in die gesig staar, te fnuik.

Somalië deur seldsame sikloon getref

Daar word gevrees dat honderde mense dood is nadat ‘n seldsame tropiese sikloon die noorde van Somalië die naweek getref het.

Die Verenigde Nasies sê swaar reën het oor die Puntland-gebied uitgesak. Kommunikasie-kabels en toegang tot die gebiede wat geraak is, is afgesny.

Dit bemoeilik noodleniging sowel as die bevestiging van berigte wat ontvang word.

Die Puntland-owerhede het die situasie tot ‘n noodtoestand verklaar en om hulp gevra. Die VN sê sowat 30.000 mense benodig voedsel, skuiling en mediese voorraad.

Die Wêreld Meteorologiese Organisasie het bevind dat vanjaar op ses na die warmste is sedert rekordhouding in 1850 begin het.

Die organisasie sê die stygende seevlak, wat deur klimaatsverandering veroorsaak word, vererger die uitwerking van storms soos Tifoon Haiyan in die Filippyne verder.

Die sekretaris-generaal van die WMO, Michel Jarraud sê meer kweekhuisgasse in die atmosfeer sal ‘n al hoe warmer toekoms tot gevolg hê.

Hy sê ook meer uitermatige weerstoestande is onvermydelik. Volgens die WMO was die eerste nege maande van 2013 saam met dié van 2003 die sewende warmste ooit.- RSG

Tifoonslagoffers opstandig

Die oorlewendes van Tifoon Haiyan raak opstandig oor die stadige pas waarteen hulp versprei word. Die amptelike dodetal staan op meer as 2 300, maar noodwerkers sê die syfer kan aansienlik styg.

‘n Massabegrafnis van die slagoffers in Tacloban is afgestel toe geweerskote gehoor is en die stoet geen keuse gelaat is as om om te draai nie.

Agt mense is dood toe ‘n groot skare honegeres ‘n ryswinkel bestorm het. Die muur van die gebou het op die mense ingetuimel.

Daar is byna geen voedsel of water nie, en volgens berigte is oorlewendes desperaat om van die verwoesting te ontvlug.

Skermutselinge het uitgebreek tussen mense wat graag op die skaars beskikbare vlugte wil kom.

Die Filippynse regering het vroeër gesê hy het te kampe met die grootste logistieke uitdaging tot nog toe ná die verwoesting wat die tifoon gesaai het. Meer as 11miljoen mense is geraak deur die ramp.

Die kabinetsekretaris, Rene Almendras sê die regering is oorweldig deur die omvang van Haiyan se impak.

Amerikaanse militêre vliegtuie het begin land op die Tacloban-lughawe, met voorraad van die Wêreldvoedselprogram aan boord.

Amerikaanse soldate sal met die weermag se Osprey-vliegtuie poog om die mees afgeleë gebiede van hulp te voorsien.

Die Britse en Amerikaanse vloot het ook voorraad en bemanning per skip gestuur, wat na verwagting binne die volgende paar dae sal begin aankom.

Die Moslemliefdadigheidsorganisasie Gift of the Givers sal uit Suid-Afrika na die Filippyne vertrek om hulp aan tifoonslagoffers te verleen.

Die span bestaan uit twintig personeellede wat spesialiste is in reddingsoperasies en ook bestuurders, paramedici, ‘n trauma dokter en ‘n pediater.

Die span sal mediese voorraad, energie aanvullings asook kos en water saam met hulle neem.

Vermeende moordenaars van Pinetown-bejaardes voor

Drie swart mans sal die 20ste November weer in verband met die moord op die 70-jarige John Noble en sy 68-jarige vrou, Hester in die Pinetown landdroshof, wes van Durban verskyn. Hester was ‘n Emphysemia-lyer.

Vyf ander verdagtes sal moontlik staatsgetuies word. Die moord op die bejaarde paartjie het plaaslike inwoners in die Shongweni-vallei verlede Donderdag geskok.

Die twee weerlose bejaardes is albei wreed vermoor. Hester is met haar suurstofpyp verwurg en John met ‘n stuk draad. Niks is uit die huis gesteel nie en hulle voertuig is ‘n entjie van hul woning verlate gevind.

Scelo Mathabane, Siyabonga Xaba en Philane Shange het Woensdag in die hof verskyn. Hulle staan tereg op aanklagte van moord en roof.

Die mans voer aan dat hulle veiligheid bedreig word, aangesien hulle glo dreigemente van die Hilcrest polisie ontvang het.

Landdros Ishmail Motaung het egter beslis dat hulle ter wille van ‘n spoedige ondersoek, in polisieaanhouding moet bly.

Hulle is vroeg Dinsdagoggend in hegtenis geneem en sal na verwagting die 20ste om borgtog aansoek doen.