Internasionale nuus Archives - Page 135 of 141

Bloeddorstigheid in Kenia

Keniaanse polisie in Mathare

Gister is een persoon net buite die Ambassadeur-hotel in Nairobi dood tydens ’n handgranaataanval. Ses persone is ernstig beseer. Die granaat het skynbaar ontplof toe ’n onbekende man in ’n bus net buite die hotel wou klim.

Hierdie aanval volg op weke van geweld in Nairobi, veroorsaak deur ’n misterieuse sekte/bende genaamd die Mungiki. Die Keniaanse polisie het verlede week op hulle bastion in Mathare, ’n krotbuurt net buite die Keniaanse hoofstad, toegeslaan. 30 Mense is deur die polisie doodgeskiet en honderde het gevlug. Vir die eerste keer het die meeste Westerlinge van hierdie eienaardige bende gehoor.

In Kikuyu beteken mungiki “verenigde mense.” Hierdie vreemde sekte het in die tagtigerjare die lig gesien en is in 2002 verban. Nie veel is oor die groep bekend nie, maar hulle staan ’n terugkeer na Afrika-tradisies voor en is gekant teen die Westerse beskawing. Hulle beskou hulleself as opvolgers van die Mau Mau-rebelle van die vyftigerjare wat teen Britse kolonialisme in opstand gekom het. Mungiki-lede verwerp ook die Christendom en forseer jong meisies om besny te word. In Mathare word inwoners gedwing om maandelikse bydraes aan die bende te maak en selfs openbare toilette word deur lede van die bende beman en geld geëis voor mense mag binnegaan. Bendelede verskaf ook onwettige water- en kragkonneksies aan inwoners. Volgens onbevestigde berigte is daar parlementslede in die Keniaanse regering wat bande met die bende het. Die leiers van die Mungiki beweer dat hulle ook ondersteuners in skole en die weermag het en spog dat hulle oor nagenoeg twee miljoen lede beskik.

Mungiki-lede het reeds in Mei vanjaar begin amok maak toe hulle mense onthoof het wat blykbaar inligting oor die groep aan die polisie deurgegee het. In Junie het hulle begin om matatu-bestuurders (bestuurders van minibus-taxis) in Nairobi te martel, dan te onthoof en hulle liggame in stukke op te kap. Die bestuurders het naamlik geweier om beskermingsfooie aan Mungiki te betaal. Dit is hierdie vlaag moorde wat tot die onlangse polisie-optrede in Mathare gelei het. Die groep is skynbaar daarop uit om die verkiesing van Desember vanjaar te ontwrig.

promos

‘n Nuwe stam ontdek

Nuwe aankomelinge

Verlede week is 88 lede van ’n onbekende stam ontdek in die suide van die Brasiliaanse staat Para. Hulle het nog nooit kontak met Westerlinge gehad nie.

Die groepie Indiane het eenvoudig uit die Amasone-oerwoud verskyn en kamp opgeslaan naby die dorpie Kapot, waar ’n vrou van die groep geboorte geskenk het. Daar word gereken dat die groep vyf dae lank deur die oerwoud geloop het vanaf Matto Grosso, ’n ander staat verder suid. Niemand weet regtig hoekom hierdie stamlede hulle dorpie verlaat het nie, maar volgens ’n woordvoerder van Survival International het hulle waarskynlik op die vlug geslaan toe hulle delwers en houtkappers gewaar het.

Die dorpie Kapot het dadelik sy deure vir die nuwe aankomelinge gesluit, want ervaring het gewys dat sulke geïsoleerde stamme gewoonlik geen immuniteit het teen selfs banale siektes soos verkoue en maagprobleme nie.

Daar word gereken dat daar sowat 40 sulke geïsoleerde stamme in die Amasone-oerwoud leef. Daar is ongeveer 700 000 Indiane, wat in 220 subgroepe verdeel is. In 1500, met die aankoms van die Portugese, was daar meer as 5 miljoen Indiane in Brasilië.

Survival International is ’n nie-regeringsorganisasie wat hom beywer vir etniese groepe (waaronder die San) en hulle regte. Die organisasie het reeds onderneem om ’n internasionale veldtog te voer om mense bedag te maak op groepe soos die Indiane. Hulle meen dat daar oor die 100 etniese groepe wêreldwyd is wat in isolasie leef.

Bush voel olik

George W. Bush moes Vrydag in sy suite van die luukse Kampinski-hotel in Heiligendamm bly en die oggendverrigtinge by die G-8 Spitsberaad uitsit vanweë ‘n maagaandoening. Sarkozy het die Amerikaanse president nogtans gaan besoek vir ‘n kort onderhoud en hy het daarna gesê Bush lyk ‘n bietjie olik.

Bush het later wel by die groep aangesluit, maar het nog nie wel gevoel nie. Withuis-woordvoerder, Dan Bartlett, het bevestig dat die president met opstaantyd "nie lekker gevoel" het nie en dat medici nie weet of die oorsaak ‘n maagvirus is of nie.

Bush se gewildheid is besig om verder tuis te daal. Net sewe uit elke tien Republikeine ondersteun hom en ‘n skamele 8% uit die Demokrate se kamp het enige vertroue in sy leierskap blyk dit uit die jongste meningspeilings.

Oor die redes wat aanleiding gegee het tot Bush se ongesteldheid is breed gespekuleer. Volgens sommige berigte is Bush, ‘n geheelonthouer, die vorige aand met ‘n bier in die hand opgemerk. Sy woordvoerder het egter benadruk dat dit ‘n alkoholvrye bier was.

Dan is daar die ooreenkoms met sy vader wat in Japan, in Januarie 1992, tydens ‘n staatsbanket aan huis van die Japannese Eerste Minister Kiichi Miyazawa, flou neergeval het. Die ongelukkige voorval is op Japannese TV gebeeldsaai. Sy seun wou glo ‘n soortgelyke situasie vermy deur Vrydagoggend nie deel te neem nie.

‘n Paar dae voor die Spitsberaad het die Duitse media berig oor wat te ete aangebied sal word. Die Chef, Tillmann Hahn wou nie uitwei oor die keuses nie, behalwe om te sê dat dit egte Duitse disse sal wees, geen à la carte aanbieding nie en dat Angela Merkel persoonlik sal besluit oor die finale spyskaart.

Hahn het reeds ‘n Michelin-ster, ‘n kenteken van Franse kookuitmuntendheid, losgeslaan. In sy onderhoud met die Mainpost het hy skertsend bevestig dat daar geen veiligheidspersoneel sal wees om disse vooraf te proe nie, alhoewel hulle al ‘n draai in die kombuis kom maak het by ‘n vorige besoek van Bush.

Onder die opskrif "Kein Gift im Essen" [Geen gif in die kos nie] het hy gesê dat hy en sy 40 personeellede ‘n vrye hand in die kombuis gehad het en nie deur enige iemand lastig geval is wat ‘n lepel in die kospotte wou druk nie.

Hahn het ook in Hong Kong gewerk. Hy is met ‘n Thaise vrou getroud. Hy is sedert 2003 werksaam as Hoofchef by die Kampinski-hotel.

Bush sal na afloop van die Beraad Pole en Italië besoek.

excalibur casino games

Bruce Fordyce meen Afrika-foto is ‘n ‘leuen’

’n Bekende foto deur Kevin Carter van ’n sterwende swart kind in Ethiopië het in 1994 die Amerikaanse Pulitzerprys vir fotografie ontvang, maar die beroemde Marathonatleet Bruce Fordyce meen die beeld skep ’n vals indruk oor die monnikaasvoël wat nie gewoonlik aas vreet nie.

Wil die aasvo?l die kind vreet of nie?

Die foto het destyds die wêreld se verbeelding aangegryp omdat die kind daarop, ’n slagoffer van die Ethiopiese hongersnood, blykbaar aankruip na ’n VN-vlugtelingkamp wat slegs ’n kilometer van die toneel geleë is. Byskrifte by Carter se foto lui gewoonlik soos volg: “Die aasvoël wag vir die kind om te sterf sodat hy hom kan eet. Hierdie foto het die hele wêreld geskok. Niemand weet wat van die kind geword het nie, Kevin Carter inkluis wat die plek verlaat het net na die foto geneem is. Drie maande later het hy weens depressie selfmoord gepleeg.”

Volgens Fordyce, wat ’n persoonlike vriend is van die Suid-Afrikaanse voëlkundige, Ian Sinclair, verteenwoordig die foto, “sonder dat mens die verskriklike invloed van armoede in Afrika wil ignoreer”, egter “een van die grootste leuens van fotojoernalistiek. Moontlik is dit waarom Carter homself doodgemaak het. Alle ornitoloë sal verduidelik dat die voël agter die kind ’n monnikaasvoël is. Dié aasvoëls, wat die kleinste en swakste van alle aasvoëls is, vreet nie gewoonlik aas nie. Hul gewone voedsel is diere-ontlasting en in dorpe en stede in Ethiopië, menslike ontlasting. Hul bekke is soos ’n graaf gevorm om “poefies” op te tel. Die kind op die foto is besig om gewoon te ontlas en die aasvoël wag vir hom om klaar te maak.”

Fordyce vertel verder dat hy en Ian Sinclair, skrywer van verskeie studies en gidse oor Afrika-voëls, enkele jare gelede saam op ’n voëlekspedisie in Ethiopië was. As ’n grap het hulle op hul hurke gaan sit en binne sekondes sou monnikaasvoëls rondom hulle versamel in die hoop dat daar “voedsel” sou wees. “Ons het ons gebreek van die lag,” sê Fordyce.

Maar, meen Fordyce: “Carter verdien sy Pulitzer. Nie vir akkuraatheid nie, slegs omdat hy die wêreld se aandag op Afrika se probleme gevestig het!”

Die slagter van Sierra Leone

Charles Taylor

Charles Taylor, voormalige staatshoof van Liberië, het gister die openingsdag van sy verhoor by die Internasionale Hof in Den Haag geboikot. Dit sou die eerste keer wees dat ’n gewese Afrika-staatshoof voor die internasionale gereg verskyn. Taylor het egter verkies om die dag in sy tronksel in Den Haag deur te bring.

Die hofsaak het ’n aanvang geneem toe ’n brief van Taylor deur sy Pakistanse advokaat, Karim Kahn, aan die hof voorgelees is. Hy is verskeie kere deur Julia Sebutinde, die Oegandese regter wat die saak hanteer, onderbreek. Sy het hom gevra om stadiger te lees, om nie ’n politieke toespraak af te steek nie en om binne die bestek van twee minute Taylor se afwesigheid te verduidelik.

Volgens Karim het Taylor geen vertroue in die hof nie. Hy beskou homself steeds as onskuldig, maar glo nie dat hy ’n regverdige verhoor sal hê nie, aangesien sy regspan “nie groot genoeg is en ook nie oor genoeg middele beskik nie.“ Hy beweer verder dat hy nie genoeg tyd gehad het om die hoeveelheid dokumentasie wat teen hom opgestel is, te bestudeer nie. Hy het voorts besluit om Karim in die pad te steek en self sy verdediging te hanteer. Volgens die aanklaer het Taylor 2 miljoen dollar tot sy beskikking om op sy regsaak te spandeer.

Ten spyte van regter Sebutinde se versoek dat Kahn ten minste vir die dag sy kliënt se belange verteenwoordig, het hy geweier en die hofsaal 40 minute ná die aanvang van die saak verlaat.

Die hofsaak het egter voortgegaan. Die sewe aanklagte teen Taylor is in besonderhede beskryf. Dit wissel van plundery, gedwonge arbeid, seksuele slawerny, verminkings en die gebruik van kindersoldate tydens die burgeroorlog wat tussen 1996 en 2002 in Sierra Leone gewoed het.

Taylor word onder andere daarvan beskuldig dat hy die Liberiese konflik na Sierra Leone uitgebrei het. Hy wou van Sierra Leone sy basis maak. Hy was aktief betrokke by steun aan die United Revolutionary Front wat ’n terreurveldtog in Sierra Leone gevoer het. Taylor, wat homself al met Jesus Christus vergelyk het, het sy soldate met alkohol en dwelms in zombies verander wat daarin gespesialiseer het om mense se oë uit te steek en hulle met kapmesse te amputeer.

Die vraag het nou ontstaan of Taylor gedwing kan word om die hofverrigtinge by te woon. Volgens regsgeleerdes is dit ’n sterk moontlikheid. Vanaf 25 Junie gaan 139 getuies teen hom begin getuig. Daar word verwag dat die hofsaak agtien maande gaan duur.

Фильчаков прокурор

Geweld in Rostock

Betoger in Rostock

Gewelddadige botsings het Saterdag in Rostock plaasgevind, in afwagting van die G8-beraad wat eersdaags begin. Polisiemanne en anti-globaliseringsbetogers het slaags geraak.

’n Wye versameling van pasifiste, ekoloë, feministe, kerkgroepe en anargiste was deel van die 30 000 persone wat aan die betoging deelgeneem het. Die G8-beraad vind vanaf 6-8 Junie in Heiligendamm, sowat 25 km van Rostock, plaas, wanneer kanselier Angela Merkel die leiers van Brittanje, Frankryk, Rusland, Japan, Italië, Kanada en Frankryk verwelkom. Klimaatsveranderinge en armoede in Afrika is op die agenda.

Gister se betoging was die begin van die weeklange protes wat teen die beraad beplan word.

Die betoging se amptelike slagspreuk was “’n Ander wêreld is moontlik.“ Tydens die oproer het mense ook geskreeu: “Water is ’n mensereg!“, “Wêreldvrede nou!“ en “Stop privatisering!“ Sommige betogers het maskers van George Bush en Vladimir Poetin gedra. Ander was weer soos Middeleeuse konings aangetrek, om die diktatoriale aard van die G8-leiers te beklemtoon.

Betogers gooi klippe na polisie in Rostock

Betogers het teen die einde van die betoging polisiemotors met verf, klippe en bottels bygekom. ’n Bank en ’n hotel waar die Amerikaanse afvaardiging later die week sal tuisgaan, is ook aangeval. Die polisie het toe met waterkanonne en traangas op die betogers losgebrand.

’n Heining van 12 km lank is rondom die dorpie Heiligendamm gespan en 16 000 polisiemanne sal hierdie week aan diens wees – die grootste veiligheidsoperasie in Duitsland sedert die Tweede Wêreldoorlog. Betogers dreig nou om die paaie na die dorp te blokkeer en afvaardigings sodoende te verhoed om by die beraad op te daag.

Volgens Silke Studzinsky, die regswoordvoerder van die betogers, is 20 mense reeds ernstig beseer en moes gehospitaliseer word. In hul geledere is daar talle Russe, Japannese, Franse, Swede en Spanjaarde. Volgens die polisie is tot ’n duisend mense, betogers en polisie tesaam, reeds beseer.

Фільчаков прокурор

Verbruikershoof die doodstraf opgel

Die afgesette hoof van China se Verbruikersveiligheidsraad is gister die doodstraf opgelê. Die stap kom nadat ‘n reeks skandale waar verbruikers in gevaar gestel is die wêreld onlangs geskud het.

Zheng Xiaoyu is skuldig bevind op aanklag dat hy 6,5 miljoen Yuan se omkoopgeld aanvaar het van farmaseutiese maatskappye om nuwe geneesmiddels goed te keur. Dit beklemtoon die Chinese regering se vasberadenheid om korrupsie en verbruikersveiligheidsoortredings vas te vat. Zheng is die mees senior beampte om ter dood veroordeel te word in sewe jaar.

Die regering vrees dat die afgelope reeks onreëlmatighede wat dodelike gevolge gehad het verbruikersvertroue erge skade kan berokken. In China is omkopery en swak wetstoepassing dikwels die oorsaak van probleme. Omdat die land toenemend produkte uitvoer, is die kwessie nie net van binnelandse belang nie, maar ook internasionaal.

Vir die grootste deel van die afgelope dekade was Zheng die gesig van China se verbruikersveiligheidsmaatreëls. Hy het eers as uitvoerende beampte in die farmaseutiese bedryf diens gedoen, voordat hy as die eerste Staatsadministrateur vir Voedsel en Geneesmiddels aangestel is. Dié liggaam is ‘n 1998 in die lewe geroep en is soortgelyk aan die Amerikaanse FDA (Food and Drug Administration)

Zheng se uiters magtige Administrasie moes alle nuwe geneesmiddels goedkeur asook lisensies vir die uitreiking van voedsel en farmaseutiese fabrieke koördineer. Volgens ‘n plaaslike bron, het een so ‘n "goedgekeurde" antibiotikum eers 10 pasiënte laat sterf voordat dit teruggetrek is. In 2005 – die jaar waarin Zheng gearresteer is – het die Gesondheidsministerie 34 000 voedselverwante siektes aangemeld.

Gegewe die feit dat China ‘n reuse bevolking van 1.3 miljard mense het, is dit nogtans nie baie nie. Die hof het beslis dat Zheng se grootste misdaad was dat hy sy gesin en homself verryk het deur sy posisie te misbruik.

Die Chinese nuusagentskap, Xinhua, het die hofuitspraak aangehaal wat die feit bekla het dat "Zheng sy mag deur die Staat aan hom toevertrou nie ernstig en eerlik aangewend het nie en die belange van die mense geïgnoreer het deur omkoopgeld te aanvaar." Dit het weer gelei tot "uiters benarde maatskaplike gevolge".

Die besondere swaar straf mag daarop gemik wees om verbruikersvertroue in China sowel as elders te herstel. Vandeesmaand is derduisende buisies tandepasta in Australië, Panama en die Dominikaanse Republiek inderhaas van winkelrakke verwyder omdat dit gevaarlike hoeveelhede van ‘n toksiese middel bevat wat normaalweg vir die verkoeling van enjins gebruik word.

In April het die VSA China daarvan beskuldig dat hulle giftige troeteldierkos vrygestel het wat tot die dood van talle honde en katte gelei het. Drie deelstate in Amerika het intussen ook ‘n verbod op sekere visinvoere vanaf China geplaas nadat dit aan die lig gekom het dat die vis ‘n ontoelaatbare antibiotikum bevat.

bad wolfe

Cheney is weer oupa

Ouma en oupa Cheney

Mary, die lesbiese dogter van die Amerikaanse vise-president Dick Cheney, het Woensdag ‘n seun ryker geword. Hy sal Samuel David Cheney heet.

Die baba het 3,8kg by geboorte geweeg en is die sesde kleinkind van die vise-president. Sy kantoor het ‘n foto van die vrolike ouma, Lynne Cheney, wat die baba vashou en haar glimlaggende man vrygestel. Altwee lyk hoog in hul noppies met die nuweling.

Dat ‘n groot deel van die Bush-regering se steeds krimpende steun uit die sogenaamde konserwatiewe Bybelgordel kom wat tradisionele waardes verdedig, het blykbaar nog nie enige werklike lastigheid vir Cheney of sy dogter veroorsaak nie.

Die manier waarop die baba verwek is, is nie bekend nie en die betrokke partye swyg in alle tale. Mary Cheney is 38 jaar oud en leef saam met haar vriendin Heather Poe, 45, ‘n eertydse natuurbewaarder. Hulle het mekaar ontmoet terwyl albei yshokkie gespeel het en in 2005 saam opgedaag by ‘n Withuis-dinee ter ere van prins Charles en Camilla.

Dit terwyl Bush aanhou om in die openbaar te verklaar dat die huwelik ‘n binding tussen man en vrou is, homoseksuele egverbintenisse verwerp en weier om wetgewing aan te pas in die verband.

Cheney self wys enige kritiek op sy dogter af deur te sê dat "vryheid vryheid vir almal is". Hy het tot dusver goed daarin geslaag om die kwessie aan geen polemiek te onderwerp nie. Mary word beskou as een van sy grootste raadgewers en was ten nouste betrokke by sy herverkiesingsveldtog in 2004.

Terwyl die Amerikaanse weermag sukkel om genoeg nuwe innames te registreer om hul militêre betrokkenheid in Irak, Afghanistan en elders vol te hou, het nie een van Cheney se kinders aangemeld vir diens nie. Cheney word nietemin as een van die prominente valke in die huidige administrasie uitgesonder.

Hy het ook reeds skerp kritiek verduur agv van sy eertydse voorsitterskap van Halliburton en in weerwil van sy verklaring dat hy geen bande met die maatskappy meer het nie, het joernaliste vasgestel dat hy steeds aandele hou. Die waarde daarvan het intussen met 3 281 persent toegeneem.

Die maatskappy het ook onlangs aankondig dat die hoofkantoor na die Midde-Ooste verskuif gaan word. Halliburton het uiters lukratiewe kontrakte met die oorlogsverklaring teen Irak losgeslaan.

Vanweë die feit dat Republikeinse wetgewing nie huwelike tussen dieselfde geslag erken nie, is dit nog nie duidelik of die nuwe aankomeling binne of buite die eg gebore is nie.

free bonus no deposit required

Merkel kritiseer Mugabe

Johnson Sirleaf en Merkel

Die Duitse Kanselier, Angela Merkel, huidige president van die EU sowel as tans van die G-8, het Dinsdag in Berlyn die "onaanvaarbare" politiek van die Zimbabwiese president Robert Mugabe skerp gekritiseer tydens die agtste Forum vir die Vennootskap met Afrika (APF).

"Ons volg die situasie in Zimbabwe met groot kommer. Niks kan die intimidasie van politieke opponente regverdig nie, die stokke in die wiele van ‘n onafhanklike media, die dreigemente teenoor landelike inwoners en die vernietiging van krotbuurte nie," het sy verklaar.

"Die politiek van president Mugabe is onaanvaarbaar. Vir hierdie rede, doen ek ‘n beroep op alle politieke ampsdraers van aangrensende lande om hul invloed ten behoewe van die mense, ook van Zimbabwe, te laat geld," het die Kanselier aan die Forum gesê. Liberië se president Ellen Johnson Sirleaf was ook onder die deelnemers aan die Forum.

Sy is in 2005 verkies as Liberië en Afrika se eerste vroue-president. Johnson Sirleaf spog met ‘n Duitse voorouer, ‘n oupa. ‘n Vergadering wat sy in 2006 gereël het met verteenwoordigers van die Ivoorkus, Ghana en Sierra Leone in die Liberiese ampswoning het inderhaas verdaag nadat ‘n brand uitgebreek het. Brandstigting is vermoed en sy moes van raadgewers verander.

Die Duitse Kanselier het egter Zimbabwe uitgesonder vir kritiek. Mevrou Merkel het belowe dat Afrika ‘n belangrike tema op die komende G-8 beraad vanaf 6 tot 8 Junie 2007 in Heiligendamm, in die noord-ooste van Duitsland, sal wees.

Die grootste opposisieparty in Zimbabwe, die MDC, het Vrydag ‘n veldtog geloods om druk op president Mugabe te plaas om parlementêre verteenwoordigers en aktiviste wat in Maart vir terrorisme gearresteer is, vry te laat.

Die aanhoudings het gevolg op die inhegtenisname en aanranding van Morgan Tsvangirai, MDC-leier, en ‘n dosyn van sy ondersteuners tydens ‘n biduur wat deur die opposisie, kerke en menseregteorganisasies georganiseer is.

детектор лжи томск

Bono en Bob pleit in Berlyn

Bono en Bob Geldof

Die G-8 skuld Afrika die geld wat hulle belowe het in 2005. Só sê die twee Ierse sterre Bono en Bob Geldof. Hulle het spesiaal na Berlyn in Duitsland gereis om hulle boodskap oor te dra.

Die Duitse Kanselier, Angela Merkel, is die voorsitter van die byeenkoms en sal ook as gasvrou optree vir die volgende spitsberaad van G-8 lande in Junie vanjaar. Na verwagting sal Afrika 700 miljoen Euro ontvang indien die beloftes wat Gerhard Schroeder, Merkel se voorganger, gedurende die 2005 Gleneagles-beraad in Skotland gemaak het, realiseer.

Bob Geldof het daarna verwys tydens sy perskonferensie. “Ons vra slegs dat politieke leiers hul beloftes hou, nie ‘n Euro meer nie,” het die stigter van Live Aid gesê. Die sanger het moeg gelyk tydens die geleentheid.

Bono, hoofsanger van die bekende groep U2, wat ook deelneem aan die inisiatief om hulp vir Afrika in te samel, het benadruk dat Duitsland ‘n spesiale rol het om te speel in dié opsig. “As julle nie julle beloftes nakom nie, gaan die ander (G-8 lande) van die wa afspring,” het hy gewaarsku van agter sy rooi sonbril.

“Mevrou Merkel,” het die groot Duitse rock-ster Herbert Groenemeyer uitgeroep, “ons het u in die oog!” Groenemeyer sal op 7 Junie neffens die G-8 spitsberaad in Rostock in die noord-ooste ‘n konsert teen armoede hou.

Die drie sangers het tydens hul perskonferensie die 2007 DATA-verslag (Debt, Aids, Trade, Africa) bekend gestel waarvan Bono die beskermheer is. Die verslag kyk veral na hoe die sewe rykste lande asook Rusland hul ondernemings van Julie 2005 by Gleneagles gestand doen.

Die ryk, geïndustrialiseerde lande het gedurende dié geleentheid onderneem om die 35 armste lande se skuldlas af te skryf en om hulpbystand aan die sukkelendes te vermeerder na 25 miljard dollar tot 2010.

Volgens DATA het egter net Groot Brittanje en Japan hul beloftes gehou. Die res van die betrokke lande het tussen 2004 en 2006 2,3 miljard dollar aan hulp gegee, maar “dis minder as die helfte van wat hulle behoort te gee,” het Jamie Drummond van DATA bevestig.

Die ryk lande se swak vertoning het Bono laat verklaar dat hy die “woede kan verstaan” van duisende betogers wat opruk na Heiligendamm om te protesteer teen die G-8 spitsberaad komende Junie. Hy het gesê dat indien die G-8 nie hul beloftes nakom nie dit die opstand verder mag aanwakker. Hy was nietemin “gekant” teen geweld wat mag uitbreek.

“Ek verstaan hulle woede, want ek het dit self gevoel toe ek by ‘n hospitaal (in Afrika) mense in ‘n ry sien doodgaan het.” was die ster se vermaning.

play Фильчаков