Tito Mboweni gaan aanstaande jaar bedank as sy termyn aan 'n einde kom. Hy het gesê om te lank aan die hoof van 'n organisasie te bly is waarskynlik no 'n goeie idee nie.
Volgens 'n berig in die Pretoria News, hou Mboweni se besluit nie verband met die magsverandering in die ANC-regering nie.
Mboweni se termyn by die SA Reserwebank verstryk op 8 Augustus 2009.
Die Pretoria News het gesê dat Mboweni niks aangaande sy toekoms wou uitlap nie.
Die meeste mense in Suid-Afrika vier vandag 'n koue lentedag met ysige weer en sterk wind.
Selfs al maak openbare swembaddens vandag oop, het die meeste van ons vanmore warm klere aangetrek.
Die vlaag koue sal na verwagting tot Woensdag duur.
Die Nelson Mandela-stigting het gerugte ontken dat die vorige president oorlede is.
Hulle het die publiek verseker dat Nelson Mandela steeds lewe.
Die stigting se uitvoerende beampte, Achmat Dangor, het die verlaring Sondag uitgereik.
Dangor sê hy wou mense gerusstel dat in teenstelling met gerugte, mnr. Mandela springlewendig is.
'n Landbourewolusie is besig om in Rusland plaas te vind. 'n Dekade nadat die vrye mark Russiese nywerhede getref het, is kollektiewe plase besig om te verdwyn.
Met die prys van koring alleen wat met 77% verlede jaar opgegaan het, is daar 'n stormloop na landbougrond.
Omdat Rusland so 'n uitgestrekte land is, is verskansingfondsbestuurders, oliemagnate, Sweedse portefeuljebeleggers en selfs die eerstydse Russiese adel besig om baie winsgewende grondtansaksies te beklink.
Die groot kollektiewe plase word nie in kleiner eenhede verdeel nie en eerder as korporatiewe verwerkingsaanlegte tesame met die boerdery bedryf.
Voor Stalin se kollektiwisering van grond was Rusland die belangrikste graanprodusent ter wêreld. Vandag behoort ten minste 7% van die aarde se bewerkbare grond aan Rusland, maar ongeveer 35 miljoen hektaar of 'n sesde daarvan, lê tans onbewerk.
Selfs sonder die gebiede soos Tsjernobil wat danksy radioaktiewe kontaminasie nie bewerkbaar is nie, is daar nog miljoene hektaar wat uiters geskik is vir landbou.
Opbrengste in Rusland is egter klein. Die gemiddeld is 1,85 ton per hektaar teenoor die die VSA se 6,36 ton en 3,04 in Kanada.
Grondpryse het van $570 per hektaar in 2006 tot $1000 vanjaar gestyg. Boere en beleggers het met John Deere-trekkers en Westerse boerderymetodes daarin geslaag om die opbrengste binne 'n jaar te verdubbel.
Om die skade wat kollektiwisme aangerig het reg te stel, stel korporatiewe plaaseienaars sielkundiges aan om landbouers en werkers te motiveer. Omdat geld nie 'n aansporing vir 'n landelike Rus is nie, word die klem op spanwerk en saamwerk geplaas.
Volgens Vedemosti, 'n saketydskrif, het 14% van Rusland se kolletiewe landbougrond reeds hierdie proses van konsolidasie ondergaan. Hulle meen dat Rusland binne 10 tot 15 jaar die wêreld se voorste landbouland kan word.
Die Ooskaapse polisie het dagga met 'n geraamde straatwaarde van R1,4 miljoen naby Maluti gevind.
Volgens 'n woordvoerder het polisiebeamptes 'n wenk oor die dagga ontvang en het ondersoek gaan instel.
Die verdagtes het gevlug toe hulle die polisie gesien het.
Die gekonfiskeerde dagga is waarskynlik van Lesotho afkomstig.
Geen inhegtenisname het nog gevolg nie.
Finland kan dalk sy neutraliteit laat vaar om by NAVO aan te sluit, het die buitelandse minister Alexander Stubb volgens 'n nuusbron gesê.
Rusland se inval in Georgië is die hoofrede waarom Finland die kwessie heroorweeg.
Die Oostenrykse koerant, Die Presse, het met Stubb 'n onderhoud gevoer.
Hy het gesê diegene wat dink dat wat vandeesmaand in Georgië gebeur het geen invloed op Finland se veiligheid het nie, op 'n ander planeet leef.
Die twee lande deel 'n 1 340-kilometergrens.
Finland het dwarsdeur die Koue Oorlog neutraal gebly maar skuifel tans nader aan NAVO.
In Maart het die land aangekondig dat hy aan toekomstige operasies van die alliansie se snelreaksiemag sal deelneem.
Die Suid-Afrikaanse president Thabo Mbeki sal die weg aandui sover dit die onderhandelings oor Zimbabwe betref.
Die hoofonderhandelaar vir Mugabe het Suid-Afrika gister besoek vir aparte bilaterale samesprekings.
Die MDC-woordvoerder Nelson Chamisa het ook bevestig dat die onderhandelaars Vrydag vir Mbeki ontmoet het en Sondag na Zimbabwe sal terugkeer.
Zimbabwe se staatsmedia het berig dat Mugabe se Zanu-PF 'n nuwe voorstel dat sowel Mugabe as Tsvangirai as voorsitter by kabinetsvergaderings optree as absurd verwerp.
Mbeki moet nog op die jongste verwikkelinge kommentaar lewer.
'n Amerikaanse toeris is Saterdagoggend in Durban geskiet en beroof.
Die 22-jarige Kaliforniese man is buite die Russelstraatingang tot die mark aangeval.
Die provinsiale EMRS-ambulansdiens het die gewonde man na die hospitaal vervoer.
Hy is in die St Augustine-hospitaal opgeneem in 'n bestendige toestand met 'n koeëlwond in sy been.
Tokyo Sexwale en ander direkteure van die Mvelaphanda-groep en Mvela-hulpbronne is meer as 'n miljard rand kwyt.
Hul Mvela-aandeelprys en verdienste is tans onder geweldige druk van die mark.
Mvela-groep se uitslae, wat vandeesweek vrygestel is, toon 'n netto jaarverlies van R1,7 miljard.
Sexwale alleen het R430 miljoen sedert die einde van Maart verloor.
Nietemin beskik hy oor verskeie ander bronne van rykdom.
Gefrustreerde inwoners van Durban het teen naamsveranderings protes aangeteken deur die nuut aangebringde padtekens te vandaliseer.
Die DA en IVP het 'n beroep op die hof gedoen om die onbillike, aanstootlike en onverantwoordelike hernoeming van strate te staak.
Hulle het gevra dat die ou name herstel moet word.
Die DA en IVP sê dat die ANC die naamsveranderings op die raad afgedwing het.
Meer as 28 000 openbare besware is geïgnoreer en versoeke om hulle te sien is geweier.
Die ANC beskik egter oor 'n meerderheid op die stadsraad.
