Taiwan is terug op die wêreldverhoog. Ná vier dekades van isolasie omdat die land uit die VN uitgesit is, het Taiwan Vrydag 'n waarnemerspan na die Wêreld Gesondheidsorganisasie gestuur.
Danksy verbeterde verhoudinge tussen China en Taiwan het die WGO ingestem om die land toe te laat om deel te neem. Die WGO sal dus die eerste VN-organisasie wees wat weer toelaat dat Taiwan deelneem sedert hulle lidmaatskap in 1971 teruggetrek is.
Taiwan sal deelneem onder die naam Chinese-Taipei, omdat China die land as 'n provinsie beskou.
Gesondheidsminister Yeh Chin-chuan sal die 15-lid afvaardiging lei en het reeds aangekondig dat Taiwan 5 miljoen dollar sal skenk aan die WGO vir bystand aan derde wêreldlande. Taiwan het aangedui dat hulle die 193 lande wil toespreek oor die stryd teen siektes en epidemies.