Kategorie: Internasionale nuus

Eers was die aanslag van desperate aankomelinge op die Egeïese eilande, maar deesdae is die hoofstad in rep en roer. Die historiese sentrum van Athene het hierdie maand gebuk gegaan onder sewe straatgevegte tussen dwelmhandelaars van Afghanistan, Irak en Afrika en is met swaarde, byle en kapmesse besleg.

Elf mense is in Augustus beseer en die polisie patrolleer nou die gebied dag en nag. Winkel- en restauranteienaars trek nou uit en die publiek vermy die stadsentrum en verkies om elders inkopies te gaan doen. Huurders trek ook uit. Inwoners het bang en teneergedruk geraak, sê belangegroepe.

Griekse owerhede blameer die immigrante en sê hulle gaan nie weer 'n inkomende mensegolf wettig nie. Dit is reeds drie keer onderneem sedert 1997. Owerhede is bekommerd dat regse partye opgang maak. Laos, 'n verregse party, se gewildheid het van 3,5% na 5,4% geklim in die parlement. Selfs die linkse partye erken dat daar 'n probleem met die immgrante bestaan.

Thomas Hammarberg, 'n Sweedse menseregteverteenwoordiger van die Europese Raad, het Griekeland gekritiseer omdat hulle immigrante se onwettige teenwoordigheid "kriminaliseer". Die Grieke sê egter dat Nigeriërs en Marrokane nuwe onwettige aankomelinge dadelik in bendes opneem.

Griekeland gee slegs aan 1% vlugtelingtoegang, terwyl die gemiddeld in die EU vir geslaagde asielaansoeke 20% is. Intussen word Lesbos en Samos steeds daagliks oorval met bootvragte vol onwettige immigrante en het 'n beroep gedoen op die regering om dadelik in te gryp.

Geselsprogramme op die radio word oorval deur luisteraars wat sê dat hulle al hulle spaargeld uit die bank wil onttrek. Jan Alleman het lankal verstaan dat geen deposito meer veilig is nie en dat enige bank enige tyd kan faal.

Die probleem, sê ekonome, is dat kollektiewe paniek 'n groter krisis kan veroorsaak indien almal gelyk hulle spaargeld onttrek vir kontant. Vertroue is die fondament waarop die bankstelsel opgerig is. Daarsonder kan die stelsel nie funksioneer nie.

Die Ierse regering het Woensdag verklaar dat hulle alle deposito's in Ierland sal verseker. Die Franse het by monde van Nicolas Sarkozy 'n soortgelyke onderneming gegee. Maar hoe meer die politici probeer om mense te paai, hoe meer onrustig raak hulle. Banke, in teenstelling met politici, laat hulle kliënte nooit weet as hulle bekommerd voel nie, omdat dit juis paniekonttrekkings kan veroorsaak.

Banke hou ook nie genoeg kontant aan om almal se geld dadelik terug te gee nie. Maar meer nog boesem Gordon Brown geen vertroue by Britte in nie. Die man in die straat hou hom vir die ekonomiese krisis verantwoordelik.

Sover dit die eens gerespekteerde Northern Rock-spaarbank se bankrotskap, die eerste om Brittanje te tref, aangaan, het kliënte die eerste paar dae nie 'n idee gehad van wat aangaan nie en dié kwessie maak die publiek tans lugtig vir wat ander banke mag aanvang.

Tussen 2006 en 2007 is een uit 10 Parmesaanse kaasprodukte uit supermarkte gesteel. Die gewilde kaas is een van drie items wat onweerstaanbaar blyk te wees vir lang vingers. Die ander items is skeermeslemmetjies, waarvan 22% gesteel word, en inkhervulle vir drukkers, waarvan 15% verdwyn.

Die afgelope jaar is 11% meer kaas gesteel as die vorige jaar. Parmesaanse kaas is ook die Italiaanse kosproduk wat die meeste nagemaak word. Die ware jakob moet van ongepasteuriseerde koeimelk gemaak word en moet 12 maande lank verouder word om die DOP of IGP waarmerk van die Parmastreek of van die Reggio Emilia-gebied in Noord-Italië te kry.

Veral Argentinië, Brasilië, Japan, Brittanje en Duitsland is lande waar nagemaakte Parmesaanse kaas onder 'n vals etiket te koop aangebied word.

Alhoewel Indië nie die Kernsperverdag onderteken het nie, sal hulle nou Amerikaanse hulp en bystand ontvang om hulle burgerlike kernprogram uit te bou. Kenners sê artikel VI van die sperverdrag plaas in elk geval net 'n vae verpligting op lande om nie aan die kernresies deel te neem nie. Dit vereis nie dat ondertekenaars noodwendig moet ontwapen nie, maar slegs dat hulle in "goeie trou moet onderhandel".

Indië is in die verlede gekritiseer omdat hulle nie volle toegang wou verleen vir inspeksie van hulle kernaanlegte nie. Met die nuwe ooreenkoms met die VSA sal Indië nou 14 van hulle 22 kernfasiliteite klassifiseer as burgerlike kernaanlegte. Oostenryk, Ierland en Nieu-Seeland het skerp te velde getrek teen die IAEA se besluit in Augustus 2008 om Indië toe te laat om aan kernhandel deel te neem terwyl hulle nie die Kernsperverdrag onderteken het nie. Indië het ook nie die Omvattende Toetsverbodverdrag onderteken nie.

'n Soortgelyke versoek van Pakistan is deur die VSA verwerp omdat hulle volgens Amerika nie dieselfde energiebehoeftes as Indië het nie.

'n Meningspeiling wat pas gedoen is, dui daaop dat die swart kandidaat se veldtog nuwe woema het. Die Quinnipiac-universiteit se peiling wys dat McCain en Palin besig is om terug te gly. Kiesers het ook meer vertroue in Obama se hantering van die huidige ekonomiese krisis volgens die ondersoek.

Ondersoekers sê daar was nog nooit 'n onlangse magstryd waarin een kandidaat so dramaties, vinnig en meteories opgang gemaak het, so laat in die wedloop nie.

Peter Brown, assistent-direkteur van Quinnipiac sê in Pennsilvanië is Obama nou met 'n gapende 54% teenoor 39% van McCain, die voorloper ná die onlangse debat. In Florida is dit 51% teenoor 43%. Voorheen was dit, soos in Pennsilvanië, 49% en 43% onderskeidelik.

In Ohio, is Obama se gewildheid met agt punte op. Die deelstate kan die verkiesing swaai omdat hulle 'n geskiedenis het dat hulle kiesers nie net aan een spesifieke party getrou is nie. Die Pew Research Center toon aan dat Obama McCain met sewe punte voor is. Sy nasionale gewildheid staan op 49% teenoor 42% vir die Republikeine se kandidaat.

Die peiling wys dat meer as 84% van die kiesers hulle mening oor hulle gunstelingkandidaat verander het en tussen 13% en 17% dink dat Obama 'n beter president gaan wees. Palin se gewildheid het ook getuimel en Demokrate is beslis opgewonde oor die positiewe wending. Voorheen was hulle bekommerd dat Palin die blouboordjiestem kan trek.