Kategorie: Suider-Afrika

Suid-Afrikaanse nuus, d.w.s. sowel nuus uit Suid-Afrika én Suider-Afrika.

Oproer by Tuks

Ten minste een motor is verbrand en die dameskoshuis Nerina is met klippe aangeval tydens die jongste oproer by die Universiteit van Pretoria. Swart studente en ander betogers wat nie met die universiteit verbind is nie, het gepoog om Burnettstraat in Hatfield, die voorstad waarin die universiteit geleë is, te versper.

Polisie verkeer op die toneel. Brigadier Sally de Beer van die SAPD het in ‘n verklaring gesê:

Klipversperrings is in die strate rondom die kampus deur betogers aangebring
Klipversperrings is in die strate rondom die kampus deur betogers aangebring

“Nadat ‘n nagwaak gisteraand gehou is, het studente aan die Universiteit van Pretoria, Hatfield, die ingang tot die kampus versper.

“Ons verstaan dat voertuie op die kampus beskadig is en die SAPD sal dit kontroleer.

“Openbare-ordepolisiëringslede verkeer op die toneel. Die polisie sal die situasie monitor en waar nodig optree, terwyl die maksimum versigtigheid en die minimum geweld gebruik sal word om vrede, kalmte en stabiliteit te handhaaf,” het sy bygevoeg.

Die universiteit se woordvoerder, Anna-Retha Bouwer, het gesê dat ‘n “beperkte akademiese program soos beplan is, sal voortgaan.
“In die vroeë oggendure is betogings deur ‘n groep betogers in die Hatfield-gebied van stapel gestuur, buite die kampus, wat tot ‘n mate van skade aan universiteitsgeboue in die Prospectstraat en Festivalstraat-gebied gevolg het.
“Die polisie hanteer die situasie,” het sy gesê.
Hierdie bord by die Prospectstraatingang van die kampus is deur betogers geskend
Hierdie bord by die Prospectstraatingang van die kampus is deur betogers geskend
Die huidige betogings is deel van die #MustFall-veldtog, wat met #RhodesMustFall begin het, waarna #AfrikaansMustFall, #FeesMustFall and #ScienceMustFall gevolg het.Swart studente wil alle standbeelde en skilderye waarin blankes uitgebeeld word van die kampus verwyder hê, en wil ook sillabusse “gedekoloniseer” sien om alle Westerse inhoud uit te sluit. Ten minste een student aan die Universiteit van Kaapstad het geëis dat Westerse wetenskap “afgeskaf” word.

Betogers wil instellings met nagwaak dwing tot oorgawe

Betogers van die Fees Must Fall-veldtog het Sondagaand ‘n nagwaak by die Universiteit van Johannesburg se Aucklandpark Kingsway-kampus gehou.

Betogers van ander instellings, soos die Tshwane Universiteit van Tegnologie en die Noordwes Universiteit se Mahikeng-kampus was nog in die aand per bus na Johannesburg op pad.

Die amokmakers eis dat die regering daadwerklike stappe moet doen om gratis tersiêre onderrig moontlik te maak.

‘n Organiseerder van die nagwaak, Lindokuhle Xulu sê hulle gaan vandag ‘n optog deur die middestad hou. Xulu sê die protesoptrede sal voortduur totdat daar aan hul eise gehoor gegee word.

Intussen is berigte ontvang van brandstigting toe die nagwaak by die Universiteit van Pretoria in geweld ontaard het.

Duitse maatskappy weier glo om Zim-note te druk

‘n Duitse maatskappy, Giesecke and Devrient, het ‘n versoek van Zimbabwe van die hand gewys om die nuwe geld vir die tesourie te druk wat tans met enorme kontantvloeiprobleme worstel.

John Mangudya, president van Zimbabwe se reserwebank, het na bewering gesê die Zimbabwiërs wat teen die nuwe ruiliddel gekant is, is besig met “politiekery deur lande soos Duitsland te oortuig om daarvan af te sien om die surrogaatgeldeenheid te druk”.

Zimbabwe het Suid-Afrika en ander lande om hulp oor die kwessie genader. Luidens die Zimbabwe Independent wat Vrydag verskyn het, het Mangudya gesê die nuwe betaalmiddel sal nie in Duitsland, Suid-Afrika of Zimbabwe gedruk word nie.

“Wat ek julle kan sê, is dat hulle [die nuwe note] nie in Duitsland of Suid-Afrika gedruk word nie. Hulle word beslis buite die land gedruk.”

Mangudya het onlangs aangekondig dat die nuwe note teen die einde van Oktober in sirkulasie sal wees en dat note ter waarde van ongeveer $75 miljoen teen die einde van Desember in sirkulasie sal wees.

Volgens News Day, sê Patrick Chinamasa, die land se minister van finansies, dit is onwaarskynlik is dat die note binnekort in die mark sal wees aangesien die regering nog nie sekere sake afgehandel het rakende die note nie.

Zimbabwe gebruik Amerikaanse dollar en die Suid-Afrikaanse rand sedert 2009 nadat inflasie by 231 miljoen% gedraai het. Dollarnote het die laaste paar maande egter skaars opgeraak. Die nuwe note moet glo help om die kontantvloei­tekort op te los.

Akkreditasie van Universitas Akademiese Hospitaal ondersoek

Die Openbare Dienstekommissie (ODK) gaan die akkreditasie van die Universitas Akademiese Hospitaal in Bloemfontein moontlik ondersoek.

‘n Aankondiging deur die Gesondheidsminister, Aaron Motsoaledi, dat die Universitas-hospitaal nou die swakste opleidingshospitaal in die land is, is deur klagtes gevolg oor dié hospitaal en die Pelonomi-hospitaal na die kommissie verwys is.

Motsoaledi het gesê hy is nie bewus van die oorsaak nie, maar die hospitaal se standaardvereistes het van 90% tot 60% geval. Hy het gesê die redes hiervoor gaan dringend ondersoek moet word.

Die Vrystaatse kommissaris van die Openbare Dienstekommissie, Henk Boshoff, sê hy het reeds die Vrystaatse Gesondheidsdepartement om kommentaar genader oor doe kwessie.

Boshoff sê hulle het ‘n klag met betrekking tot dié twee gesondsgeriewe via die nasionale antikorrupsie-blitslyn ontvang.

Hy sê dit is nie ‘n ondersoek nie, maar hy het wel inligting aangevra.

Vrystaat landbou veroordeel 2 aanvalle in een naweek

Vrystaat Landbou het twee afsonderlike plaasaanvalle wat die naweek in die provinsie plaasgevind het, ten sterkste verwerp.

Voorsitter van VL se wet-en-ordekomitee, Tommie Esterhuyse, sê daar was vanjaar al 40 plaasaanvalle in die provinsie gewees. Hy sê die aanval op ‘n boervrou van Ladybrand en nog ‘n beweerde aanval op ‘n boer op sy plaas tussen Petrusburg en Edenburg bring die getal plaasaanvalle vandeesmaand op ses.

Hy sê altesaam ses mense is al vanjaar op plase vermoor. Dit sluit ‘n boer en vier plaaswerkers in. Esterhuyse maan boere en plaasbewoners om veral nóu op hul hoede te wees.

Boere moet paraat wees met die oog op die naderende feestyd. Hulle moet betrokke raak by bestaande veiligheidstrukture omdat VL ‘n toename in aanvalle en rooftogte op plase voorsien.

Esterhuyse sê in albei plaasaanvalle die naweek is die landelike beveiligingsplan in werking gestel.

Dit is verblydend om te sien boere is paraat en betrokke by veiligheid in hul gebiede. Hy sê dit is duidelik dat boere daarop let om nou saam met die polisie te werk om plaasaanvalle hok te slaan.

Volgens Esterhuyse is 15 aanvalle op plase in die Vrystaat vanjaar afgeweer.

Bron: OFM

Hittegolf oor grootste deel van die land

Suid-Afrikaners kan hulself gereed maak vir ‘n hittegolf.

Die stygende temerature sal die grootste deel van die land vandag raak.

In die noordelike dele van die land sal na verwagting by 40 grade gaan draai.

Die Suid-Afrikaanse Weerburo voorspel die hittegolf sal na verwagting tot Maandag duur.

Sover loop Gauteng, plekke in die Noordwes- en Limpopo-provinsies, asook Ermelo en die Mpumalanga-platorand deur.

Swartes gooi klip op SunCity-pad

Twee polisievoertuie en vyf vragmotors is aan die brand gesteek en beskadig naby Brits in die Noordwes Donderdag en vandag ná gewelddadige optrede deur lede van die swart gemeenskap.

‘n Polisiewoordvoerder, Sabata Mokgwabone, sê lede van die Majakaneng gemeenskap het na bewering verbygaande motoriste met klippe bestook en die N4 met brandende bande versper naby die Sun City-afrit op Woensdagoggend.

Dit is nog onduidelik wat aanleiding gegee het tot die geweld. Mokgwabone sê vier verdagtes tussen 19 en 27 ouderdomme het daarna in hegtenis geneem in verband met gewelddadige optrede.

Hy sê die polisie monitor die situasie en die verkeer vloei tans. Motoriste word nogtans aangeraai om versigtig te wees.

“Dit is nou stil. Die polisie is tans daar om die situasie te monitor. Daar was geen voorvalle sedert vanoggend nie. Ons het vier verdagtes in hegtenis geneem en hulle sal in die Brits-landdroshof verskyn later vanoggend op aanklagte van openbare geweld en opsetlike saakbeskadiging. Ons doen ‘n beroep ook die gemeenskap om die oppergesag van die reg te respekteer,” het Mokgwabone gesê.

Polisie beveg misdaad ‘sonder lugreëling’

Die Openbare Dienste Kommissie (ODK) het gister sy kommer uitgespreek oor die impak wat hoë misdaadsyfers en slegte werksomstandighede het op die moraal van polisiebeamptes in die groter Bloemfontein area.

Provinsiale ODK Kommissaris Henk Boshoff sê die moraal van polisiebeamptes is baie laag alhoewel hulle lojaal bly en hard werk onder baie moeilike omstandighede.

Hierdie bevinding is gemaak tydens inspeksies by drie polisiekantore – Bainsvlei, Bloemspruit en Kopanong . Twee van dié kantore het van die hoogste moord en geweldsmisdaadsyfers in die provinsie.

‘n Ernstige tekort aan polisiebeamptes is ook tydens die inspeksies gevind. Boshoff het ‘n dringende beroep gedoen op regeringsdepartemente om saam te span en dringend in te gryp.

Hy sê alhoewel daar tans gekyk word na die opgradering van polisiekantore – wat die aanstel van meer beamptes kan beteken – sal die werkslas en die tekort aan kantoorspasie aangespreek moet word.

Boshoff sê by een van die polisiekantore moet drie beamptes vanuit ‘n beknopte kantoor sonder lugreëling werk.

Bron: OFM

Chaos toe raadslede mekaar bydam

Chaos en geweld het tydens ‘n sitting van die Nelson Mandelabaai Metroraad in Port Elizabeth uitgebreek, en twee raadslede is beseer.

‘n DA-raadslid, Rano Kayser en ‘n ANC-raadslid, Rosi Daaminds is hospitaal toe geneem raadslede mekaar met waterbekers en glase bygedam het.

Daaminds het tydens die voorval ineengestort.

‘n Woordvoerder van die burgemeester, Kristoff Adeldorf sê raadslede wat by die voorval betrokke was sal aangekla word van aanranding met die doel om ernstig te beseer.

Hy beskuldig die ANC daarvan dat hulle vir die voorval aanspreeklik is.

Adeldorf sê Kayser is intussen uit die hospitaal ontslaan nadat hy behandel is vir ernstige kop- en oorwonde.

Die geweld het volgens berigte uitgebreek na pogings om die ANC-raadslid, Xola Sabani weens beweerde wangedrag te dissiplineer.

Die ANC het beswaar teen die stap aangeteken, waarna gevegte uitgebreek het. ‘n Aantal skote is ook afgevuur. Die ANC het aangedui dat hulle aanklagte teen ‘n DA-raadslid gaan indien weens die afvuur van skote.

Die burgemeester, Athol Trollip sê egter dit was waarskuwingskote wat deur veiligheidswagte afgevuur is om orde te herstel.

‘n Ondersoek sal van stapel gestuur word na gdie voorval.

Vrou dood in lugballonongeluk naby Brits

Die Mediclinic Brits het bevestig dat die vrou wat in ‘n lugballon-ongeluk by die Hartbeespoortdam ernstig beseer is, Woensdagaand in dié hospitaal oorlede is.

Hospitaal-woordvoerder, Retha Mostert, sê die vrou was in haar 40’s.

Volgens Mostert is nog ‘n beseerde vrou in ‘n stabiele toestand in die hospitaal. Haar vierjarige dogtertjie is ook beseer en per helikopter na ‘n hospitaal in Johannesburg vervoer. Haar toestand is ook bestendig.

Bill Harrop, eienaar van Bill Harrop’s Original Safaris, sê die vlieënier moes ‘n noodlanding uitvoer weens sterk wind naby die Buffelspoortdam in Noordwes.

Die lugballonmandjie het tydens die landing op die grond gesleep. Daar was 12 passasiers aan boord, insluitend die vlieënier. Dié lugballon-onderneming het intussen sy medelye uitgespreek teenoor die oorledene se naasbestaandes.

Harrop sê hulle werk nou saam met die Burgerlugvaartowerheid wat die ondersoek na die ongeluk hanteer. Dié onderneming het ook sy eie ondersoek begin.

Die Burgerlugvaartowerheid het bevestig dat hulle die ongeluk ondersoek waarin die lugballonmandjie tydens die noodlanding op die grond gesleep en teen ‘n boom gebots het.

Harrop sê die wind was gister ses keer sterker as die weervoorspelling se skatting.

“Die wind het ‘n baie wye area gedek. Ander vlieëniers het ook gevlieg daardie oggend en het dieselfde toestande ervaar. Hulle was gelukkig genoeg om veilig te kon land,” voeg Harrop by.

Harrop sê die ongeluk kon nie vermy word nie en dit is die eerste ongeluk waarby een van sy lugballone betrokke is. Hy sê hulle het al sowat 100 000 passasiers vervoer.

“Ons kyk tans waar ons kan help en wil duidelikheid oor die kwessie kry. Eerlikwaar dink ek nie sou enige ander vlieënier beter gevaar het as ons vlieënier in daardie omstandighede op die gegewe oggend nie,” sê Harrop.

Die beseerde dogtertjie is met ‘n Netcare2-helikopter na ‘n hospitaal in Johannesburg vervoer. Twee ander passasiers is deur paramedici van Hartbeespoort EMS na ‘n nabygeleë hospitaal vervoer.