Nuus Archives - Page 511 of 1583

Zuma se seun verbind met onwettige sigaretsmokkel

President Jacob Zuma se seun Edward is betrokke in ‘n stryd met SAID.

Die inkomstediens beweer hy smokkel sigarette en steek miljoene weg van die wins wat hy maak.

Zuma se regstryd met die SA Inkomstediens het in 2011 begin, maar dit sal na verwagting hierdie week weer opvlam as sy Amalgamated Tobacco Manufacturing (ATM) maatskappy verskyn nadat hulle ‘n SAID-sperdatum op 25 Januarie verontagsaam het.

Die geskil kom na ‘n ondersoek na ATM se sigaretvervaardigingbedryf in Pietermaritzburg in 2011.

Die duur fabriek is ingevoer uit China en Chinese werkers beman die toerusting. ATM is in 2009 geïnkorporeer.

Die maatskappy is geregistreer om tabakverwante produkte te vervaardig en te versprei.

Amptenare van die SAID het toegeslaan op die perseel, beslag gelê op goedere en masjinerie, en die fabriek gesluit.

ATM is later toegelaat om weer te heropen, maar Zuma en sy vennote is steeds in ‘n bitter stryd gewikkel met amptenare van die SAID.

Zuma beskuldig die belastinggaarder van korrupsie, rassisme en ‘n smeerveldtog teen hom.

Zuma se vennote in die onderneming sluit sakemanne Paul de Robillard en Yusuf Kajee in. Zuma het egter bedank as direkteur van ATM in 2011.

Ondersoeke na die maatskappy het in 2010 begin nadat die SAID vermoed het dat die maatskappy betrokke is by die invoer van tabak uit Zimbabwe en die verspreiding van vervaardiging van sigarette sonder om die nodige belasting en aksyns te betaal.

Binne ‘n jaar is byna 8,5 miljard onwettige sigarette is in Suid-Afrika gerook en die regering het meer as R5 miljard aan belasting verloor.

Oor die afgelope drie jaar het die verlore belasting byna verdriedubbel tot R12 miljard.

OTM verklaar glo die vervaardiging van 972.000 sigarette, of ongeveer 15.800 pakkies. Maar SAID het bewyse gevind van die vervaardiging van minstens 3,8 miljoen sigarette, of 190.000 pakkies.

SAID-woordvoerder Adrian Lackay het ontken dat ATM geteiken word. Hy het gesê tydens Desember 2013 is gereelde inspeksies uitgevoer op ‘n aantal pakhuise, vervaardigingsaanlegte, asook invoerders en uitvoerders.

“As deel van hierdie intervensie, kan die SAID bevestig dat twee groot tabakprodukte uitesonder is gedurende Desember 2013 , waar die potensiële verlies aan inkomste vir die staat ‘n paar honderd miljoene rand beloop.”

Twee van die Waterkloof-vier weer aangehou

Die departement van Korrektiewe Dienste sê volgens die Wet op Korrektiewe Dienste kan gevangenes wat uit is op parool weer in hegtenis geneem word en vir tot 72 uur aangehou word, hangende ‘n ondersoek.

Twee lede van die Waterkloof-vier is Sondag weer in hegtenis geneem nadat selfoonopnames van ‘n gefuif in die tronk uitgelek het.

Christoff Becker en Frikkie du Preez, albei 27, het glo vryelik toegang tot alkohol en selfone in die tronk gehad en die beeldmateriaal is op sosiale media versprei.

‘n Woordvoerder van die departement, Manelisi Wolela het bevestig dat twee van die vier weer in hegtenis geneem is. Hy sê die bewerings word in ‘n ernstige lig beskou.

Die twee is Dinsdag op parool vrygelaat nadat hulle die helfte van hulle twaalf jaar vonnis uitgedien het vir die moord op ‘n hawelose man in Pretoria-Oos in 2001.

In ’n verklaring het Wolela gesê die twee is weer in hegtenis geneem in verband met ’n ondersoek na bewerings dat drank in die tronk ingesmokkel is en hulle na bewering ’n partytjie in die tronkselle gehou het.

’n Ondersoek daarna sal in die volgende 72 uur gedoen word.

Hulle is in die Kgosi Mampuru-gevangenis in Pretoria aangehou.

“Die DKD-kommissaris in Gauteng het die ondersoek reeds gelas,” het Wolela gesê.

Becker en Du Preez, wat verlede Dinsdag op parool vrygelaat is, en die beamptes wat tydens die maak van die selfoonopname aan diens was, sal ondervra word.

Die ander twee lede van die groep wat uit is op parool het geen kontak meer met Becker en Du Preez nie en is nie betrokke by die voorval nie.

Honderde Zama-Zamas in myn vasgekeer

Honderde Zama-Zamas, of onwettige myners kan steeds in ‘n ongebruikte mynskag in Benoni in die Oos-Rand vasgekeer wees.

Van die onwettige myners het Sondagaand geweier om uit die skag te kom nadat hulle besef het hulle sal in hegtenis geneem word vir hul roofbedrywighede.

Die Ekurhuleni-nooddienste het Sondag elf van die myners uit die mynskag van Gold One in Benoni gered.
Hulle is sedert Saterdagmiddag daar vasgekeer.

Nooddienswerkers moes die reddingspoging laat vaar omdat die oorblywende myners geweier het om uit die skag te kom. Die reddingspanne sal nie terugkeer nie.

Die polisie en mynveiligheidswagte is steeds by die skag om die Zama-Zamas in hegtenis te neem wat dit bo-gronds waag.

Volgens die metropolisie is ‘n groep onwettige myners Saterdag met hul buit deur ‘n ander groep Zama-Zamas oorval en beroof en daarna terug in die skag gedwing.

Die rowers het toe groot rotsblokke in die skag afgegooi.

Die mynskag is ongeveer 7 m diep, waarna dit in ‘n sygang vertak. Rotse en sementblokke verstop tans die sygang.

Ekurhuleni se noodwerkers en mynreddingspanne moes Sondag ure lank spook om die skag oop te boor om die vasgekeerdes ‘n ontsnapkans te bied.

Daar kan steeds soveel as 300 myners in die skag wees.

Die Ekurhuleni Metroraad sê daar sal nuwe strategie bedink moet word om onwettige mynbedrywighede in die gebied te keer.

Vryheidsfront Plus verwerp Europese ‘regse partye’

Mnr. André Fourie, woordvoerder vir buitelandse sake van die VF Plus en 'n voormalige adjunkminister onder FW de Klerk se Nasionale Party — Mnr. André Fourie, woordvoerder vir buitelandse sake van die VF Plus en ‘n voormalige adjunkminister onder FW de Klerk se Nasionale Party

Mnr. André Fourie, die woordvoerder vir buitelandse sake van die Vryheidsfront Plus, het by herhaling al gesê dat sy party die nuwe Europese regse partye soos die PVV in Nederland of die Front National in Frankryk verwerp en eerder met die tradisionele Christen-Demokratiese of liberale partye wil kontak maak.

Hiermee sit die VF Plus die vorige Nasionale Party se buitelandse beleid voort. André Fourie was ‘n adjunkminister vir buitelandse sake onder mnr. FW de Klerk in die Nasionale Party en het hom in die geskiedenis verewig toe hy in die vroeë negentigerjare aan mnr. Andries Beyers op TV gesê het:

“Hier is die voorstelle van die Nasionale Party. As u in hierdie voorstelle die bewys kan kry dat ons die regering aan ‘n swart meerderheid gaan oorhandig wat beheer sal word deur die kommuniste en deur mnr. Mandela, dan belowe ek vir u R5 000 vir die Konserwatiewe Party se fonds.”

Aan die einde van dié YouTube-video gee Fourie sy beroemde belofte (‘n mens wonder of die R5 000 al betaal is?).

Die Nasionale Party het destyds ‘n groteske fout gemaak deur die hand van vriendskap van Europese regse partye weg te klap, want die hoofstroom- konserwatiewe en liberale partye wou nie met ‘n tang aan Suid-Afrika of die Afrikaner raak nie. In ‘n tyd waar die nuwe regse partye in Europese lande geweldig opgang maak en dalk vir die Afrikaner uitkoms kan bring of ten minste internasionale simpatie kan wek, haak die VF Plus vas by die Nasionale Party se mislukte gekruip by Christen-Demokrate in Europa en bederf sodoende die Afrikaner se kanse op vryheid en selfbeskikking.

Daarmee steek die VF Plus insgelyks die potensiële bondgenote van die Afrikaner in die rug in ‘n groteske herhaling van die foute van die verlede.

Fourie is ook deel van ‘n groepering in die VF Plus wat ongemaklik voel met die oorblywende Afrikaneridentiteit van die party en glo dat die party hom eerder as ‘n “Christelik-Demokratiese” party, soortgelyk aan die ACDP, moet posisioneer.

Tiener in die nek geskiet na plundertog

‘n Sewentienjarige skoolmeisie is in die nek geskiet en beseer in ‘n wraakaanval deur Pakistani-winkeliers.

Tientalle betogers het na bewering die mans se winkels geplunder en het paaie met klippe en brandende motorbande versper.

Die buitelanders het daarna op ‘n skare swart leerlinge en voetgangers in Botleng naby Delmas losgebrand.

Volgens kolonel Jannie van Tonder van die SAPD was dit vermoedelik ‘n aanval deur die winkeliers in weerwraak op inwoners wat hulle winkels Donderdag geplunder het.

Die beseerde meisie is na ‘n waakeenheid by ‘n Witbank-hospitaal geneem.

Die SAPD het die winkeliers in hegtenis geneem en op ‘n gesteelde 9mm-pistool beslag gelê.

Die situasie in Delmas is gespanne.

Die ANC se kantoor in Botleng is vroeër aan die brand gesteek en ander geboue is beskadig.

Betogers, waaronder jong kinders, het Vrydag weer die strate ingevaar. Die polisie monitor die situasie.

Dinsdag, voor die skietery, is briewe is onder leerlinge versprei wat maan dat hulle weg van die skool moet bly en aan optogte moet deelneem.

Die jeugdiges beweer dat ‘n gebrek aan werksgeleenthede te wyte is aan ‘ n korrupte verhouding tussen die mynbase en munisipale amptenare .

Hulle ook ‘n groot vragmotor wat aan ‘n wit boer behoort met bale veevoer Donderdagmiddag aan die brand gesteek.

Die twee Pakistani burgers sal binnekort in die hof verskyn op aanklagtes van poging tot moord en die besit van ‘n ongelisensieerde, gesteelde vuurwapen.

Pa van seun wat kapers bydam kritiek

Deon Burger van Boksburg veg steeds vir sy lewe in die Union-hospitaal nadat hy gedurende ‘n kaping in die bors geskiet is.

Sy 16-jarige seun het die swarte wat sy pa geskiet het met ’n bofbalkolf bygedam en is self in die been geskiet.

Volgens Burger se vrou Magda moes ’n deel van haar man se long intussen verwyder word en hy is onder swaar verdowing. Met haar seun Dylan gaan dit beter.

Dylan is gistermiddag na die Glynnwood-hospitaal in Benoni oorgeplaas vir verdere behandeling. Hy is in die bo-been geskiet.

Dylan het glo deur die sitkamervenster gesien hoe die kapers toeslaan en sy pa te hulp gesnel.

Dylan het met sy bofbalkolf uitgestorm en een van die kapers wat op hom geskiet het, katswink oor die kop gemoker.

Hulle kon die ander swarte ook aankeer nadat hy die eerste kaper neergevel is. Omstanders het die ambulans, polisie en metropolisie glo ontbied.

‘n Buurman met noodhulpopleiding kon die ergste bloeding keer. Die ambulans was vinnig op die toneel en Burger senior is daarna per helikopter hospitaal toe afgevoer.

Die swarte wat met die bofbalkolf geslaan is, is ook hospitaal toe geneem vir waarneming.

Die ander een verkeer in aanhouding, het lt. Juanita Coetzer, woordvoerder van die Boksburg-Noord-polisie,
gesê.

EU moedig VSA aan om bande met Kuba te herstel

Die Kubaanse regering sê hy hoop die VSA gaan die voorbeeld van die Europese Unie volg, nadat die EU vroeër aangekondig het dat onderhandelinge met die doel om verhoudings met die eiland te herstel, binnekort sal begin.

In die afgelope maande het Nederland die inisiatief geneem om te druk vir ‘n “nuwe fase” in EU-Kuba-verhoudings.

Kuba se verhouding met die VSA is meer pragmaties as voorheen met amptenare van beide kante wat sê daar is verbetering. Maar Washington het nog nie verder beweeg na hul besluit om Kubaanse reisbeperkinge in 2011 op te hef nie.

Amerika het voorheen druk uitgeoefen op Europa om die Kubaanse regering te isoleer.

‘n Senior amptenaar van die EU wat Amerikaanse amptenare verlede week ingelig het oor Europa se planne, het gesê Washington het “volle begrip” vir die stap.

Die EU-amptenaar het ook ontken dat Brussel probeer om Kuba te “koop”, en gesê die EU-hulp aan Havana sal op die huidige vlakke bly. Hy het nie gesê of die hervormingsvoorstelle gekoppel sal word aan hulp nie.

Die EU verwag om volgende maand met formele samesprekings te begin.

Kuba ontvang oor die 80.000.000 € in ontwikkelingshulp van die EU sedert 2008. Ontleders sê Brussel is gereed om meer hulp te verleen indien die Kuba konkrete stappe in die rigting van “demokratisering” neem.

Na Venezuela, is die EU is Havana se tweede grootste handelsvennoot.

Die Kubaanse minister van Buitelandse Sake, Bruno Rodriguez sê die Amerikaanse president Barack Obama behoort nou ‘n soortgelyke gebaar te maak.

Midmarswemmer se lyk gevind

Die lyk van die man wat Saterdag gedurende die Midmar-myl in Howick, KwaZulu-Natal, vermis geraak het, is Donderdagmiddag gevind.

Geen sigbare besering was aan Thabo van Straten (43) se lyk wat dadelik ‘n leidraad kon verskaf tot die oorsaak van sy dood nie.

Van Straten is positief uitgeken aan die resies se registrasiebesonderhede op sy swemklere.

Die polisie se K9-soek-en-reddingspan het die laaste ses dae na Van Straten gesoek.

Kapt. Lolly Moodley, polisiewoordvoerder in Howick, het gesê Van Straten se lyk is Donderdag omstreeks 16:30 gekry. Een van die polisiehonde het hom opgespoor.

Volgens Moodley sal die oorsaak van sy dood eers ná ’n lykskouing bekend wees.

“Die lyk het omtrent 800 m van die beginpunt van die resies gedryf.

Die deel van die dam waar die lyk gevind is, is ongeveer 15,8 m diep.

EU-president boor ‘n aar raak oor Joodse water

Die Israelse media is in rep en roer nadat die president van die Europese parlement Israel se waterbeleid bespreek het.

Die president, Martin Schulz, het na die Jode se waterverbruik verwys wat vier keer meer water as die Palestyne kry.

“Hoe kan dit wees dat ‘n Israeliese persoon 70 liter water per dag kan gebruik, maar ‘n Palestynse inwoner net 17 liter?” het Schulz gevra.

Sy toespraak het groot ontevredenheid veroorsaak. Die regse Joodse Tuiste-party het uitgestorm uit die Knesset.

Die voorsitter Naftali Bennett, het gesê die toespraak was “smaaklose propaganda” en sy party eis ‘n verskoning van die president.

Premier Benjamin Netanyahu het Schulz daarvan beskuldig dat hy nie by “die feite” gehou het nie. ‘n Gratis koerant, die Israel HaYom, wat na aan die premier is, het Schultz van “valse laster teen Israel” beskuldig.

Schulz het ook die oprigting van Joodse vestings gekritiseer as ‘n struikelblok vir vrede. Hy het daarop gewys dat die Gasaversperring Israel se veiligheid ondermyn eerder as versterk.

Die meeste koerante het op hul voorblaaie skerp kommentaar gelewer oor die waterverbruiksyfers wat Schulz genoem het.

Verskeie organisasies gemoeid met die Palestynse kwessie, het Schulz egter gelyk gegee.

Volgens Friends of the Earth Middle East toon 2011-statistiek dat in Israel se watergebruik per kapita per dag 250 liter is, teenoor 70 liter in Palestina.

Die Israeliese regte-groep, B’Tselem, het ook gesê dat Joodse burgers baie meer water kry as die Palestynse inwoners in Gasa en aan die Wesoewer.

Volgens die Israeliese nasionale watermaatskappy Mekorot, is die gemiddelde huiswaterverbruik tussen 100 en 230 liter per persoon per dag.

Aan die Wesoewer is dit sowat 73 liter, indien hulle aan die hoofwatertoevoer verbind is. Anders is die inwoners afhanklik van rëenwater en water wat ten duurste by tenkwaens verkoop word.

Die Palestynse Bevrydingsorganisasie het gesê die gemiddelde daaglikse Palestynse huishoudelike verbruik is 70 liter per persoon , terwyl die Wêreldgesondheidsorganisasie ‘n minimum van 100 liter aanbeveel.

“In die suidelike deel van die Wesoewer is daar gemeenskappe wat minder as 15 tot 20 liter per persoon per dag kry,” het die PBO bygevoeg.

In ‘n onderhoud met die Duitse koerant Die Welt Donderdag, het Schulz gesê hy is uit die veld geslaan deur die tirades.

“Die woedende reaksie van sommige parlementslede in Jerusalem het my verras en bekommer,” het hy gesê en bygevoeg dat hy sy toespraak as “pro-Israel” beskou het.

Die gemiddelde verbruik in Gasa is tussen 70 en 90 liter per persoon per dag, maar die kwaliteit van die water is besonder swak, met 90 persent daarvan wat ondrinkbaar is, volgens Wêreldgesondheidsorganisasiestandaarde.

Staatsrede fokus op protes, myne

President Jacob Zuma het in sy staatsrede sy kommer uitgespreek oor geweld by protesoptogte.

Die president het ook gesê dat meer gedoen moet word om te verseker dat munisipale werkers beter gekwalifiseer is. Hy het gesê werk behoort nie aan onbekwame mense gegee te word nie.

Alhoewel die reg om te betoog ‘n demokratiese een is, word dit ondermyn deur optrede wat lewens bedreig en eiendom beskadig, het hy gesê.

Zuma sê die groot aantal sogenaamde diensleweringsbetogings word nie alleen die mislukkings van die regering veroorsaak nie. Hy sê dit is juis as gevolg van die regering se sukses in dienslewering dat verwagtinge hoër as ooit is.

Hy het die versekering gegee dat ekonomiese groei die daling in die waarde van die rand en die inflasie-risiko sal teëwerk.

Die geld-eenheid het verlede jaar met meer as 17 persent teenoor die dollar gedaal. Die skerp daling in die waarde van die rand het ook bygedra tot die eerste verhoging in rentekoerse in meer as vyf jaar.

Zuma sê Suid-Afrika word soos ander ontluikende markte negatief geraak deur ekonomiese probleme in die VSA wat aanleiding gegee het tot die verswakking van die rand.

Zuma het in ‘n passievolle pleidooi aan mynbase en vakbonde gesê onnodige stakings lei tot werkverliese.

Hy het van sy geskrewe toespraak afgewyk om mynmaatskappye en werkers aan te moedig om die land se belange voor hul eie te plaas. Die mynbedryf dra R60 miljard aan belasting by.

Die president het die regering se verbintenis tot skaliegasontginning bevestig, tot die ontsteltenis van omgewingsaktiviste.

Zuma se aandrang op opleiding vir handgebaretolke het vir ‘n geskater uit die gehoor gesorg.

Die leier van die IVP, Mangosuthu Buthelezi sê Zuma mislei die land oor die uitgebreide openbare werke program wat ses miljoen werksgeleenthede kan skep. Hy sê dit is tydelike werk, terwyl die land volhoubare werksgeleenthede nodig het.

Die leier van die UDM, Bantu Holomisa, het in sy reaksie die president daarvan beskuldig dat hy nie die werklike uitdagings waarmee gewone mense te kampe het, aangespreek het nie.

Holomisa sê Zuma het geen aandag gegee aan korrupsie, misdaad en ander uitdagings waardeur Suid-Afrika bedreig word nie.

Die leier van die DA, Helen Zille het in haar kritiek ook gekla oor werksgeleenthede wat slegs tydelik van aard is.

Die party se parlementêre leier, Lindiwe Mazibuko het gesê die land het nie onder president Zuma verbeter nie.

Die leier van COPE, Mosioua Lekota, sê president Zuma se Staatsrede het nie veel inhoud gehad nie. Zuma het in sy toespraak gesê die teenkorrupsiestrategie binne die Staatsektor is besig om vrugte af te werp met die meer as 1.500 amptenare wat afgedank is.

Hy het ook gesê die Nasionale Teenkorrupsie-blitslyn het ook gehelp om meer as R320 miljoen terug te kry. Lekota sê volgens hom misluk die regering in sy stryd teen korrupsie.