Twee vermeende renosterstropers is Donderdag in die Krugerwildtuin (KNP) doodgeskiet.
Die twee het gesterf in ‘n skietery met wildbewaarders by Krokodilbrug het Sanparke luidens ‘n verklaring gesê.
Die wildbewaarders het glo Donderdagoggend die drie stropers in die park gewaar.
‘n Skietery het daarna gevolg en een vermeende stroper het op vlug geslaan. Die ander twee is doodgeskiet, het Ike Phaahla, Sanparke-woordvoerder, gesê.
Beslag is ook gelê op ‘n jaggeweer en toerusting vir renosterstropery.
In ‘n ander voorval is vier voornemende stropers deur die polisie naby die Krugerpark se Malelane-hek in hegtenis geneem.
Hulle was in besit ‘n jaggeweer, ammunisie en toerusting vir renosterstropery.
Een van die land se mees gesoekte misdadigers is in besit van meer as 300 gewere , ammunisie en plofstof by sy huis in Norwood, noord van Johannesburg in hegtenis geneem Donderdag, het die nasionale kommissaris van polisie Riah Phiyega gesê.
Die verdagtes is vasgetrek na die polisie op ‘n groot wapenopslagplek afgekom het. Hulle is vermoedelik deel van ‘n sindikaat.
Die polisie het beslag gelê op die groot aantal wapens en ammunisie, asook dagga waarvan die waarde nog nie bekend is nie.
Drie mense is in hegtenis geneem, maar die hoofverdagte, die sindikaatbaas, was nie ten tyde van die klopjag tuis nie.
‘n Man, sy dogter en hul huishulp is in hegtenis geneem. Hulle is tussen die ouderdomme van 26 en 53 .
Plofstof wat vir die opblaas van kitsbanke gebruik word, is ook gevind.
Phiyega het die span van beamptes wat betrokke was in die operasie, gelukgewens. Sy was self op die toneel in Norwood.
“Die persoon wat ons vandag vasgetrek het, beheer ‘n groot sindikaat en is ook op die lys van die mees gesoekte kriminele,” het sy gesê .
“Ek is baie tevrede met die resultaat en ek wil hulle aanmoedig om voort te gaan met die harde werk.”
Sonder om ‘n skoot te skiet het die weermag in Thailand sy tweede staatsgreep in agt jaar uitgevoer, en die opskorting van die land se grondwet en die Kabinet Donderdag aangekondig.
Die weermag het op 20 Mei krygswet afgekondig.
Ontleders sê die naderende einde van ‘n era, die 64-jarige heerskappy van koning Bhumibol het bygedra tot dié stap.
Die koning word gerespekteer en is gewild, in teenstelling met sy seun, Prins Maha Vajiralongkorn. Die 61-jarige kroonprins blyk eksentriek te wees.
‘n Vreemde video van die prins met sy derde vrou, halfnaak by ‘n partytjie vir Foo Foo, sy poedel het onlangs uitgelek. Die hond het die rang van Hooflugmaarskalk.
Nou dat die koning se regering in sy skemer is, kan die koninklike opvolging die polarisasie van Thaise politiek verder aanhelp.
Die einde van die koning se heerskappy word deur drakoniese lèse-majesté wette stilgehou. Die leër, die mag agter die troon, is aan die einde van November beveel dat alle besluite deur die weermag onderworpe is aan veto deur die kroonprins.
Dit beteken dat die kroonprins nou hul baas is. Die Shinawatra-familie beheer die kroonprins se ondersteuners in die weermag.
Die weermag het meer as 100 vooraanstaande politieke leiers van die land se politieke spektrum, insluitend voormalige polisie- en weermaglede, opdrag gegee om Vrydag by ‘n militêre kantoor in Bangkok aan te meld.
Die invloedryke en skatryk Shinawatra-familie wat bande met die VSA het, is ook versoek om die vergadering by te woon. Dié vergadering volg ‘n dag na die bloedlose staatsgreep.
Die hoof van die weermag, generaal Prayut Chan-ocha het Donderdag aangekondig dat hy beheer van die land oorneem om wet en orde te herstel.
Die weermag het ook ‘n verbod op byeenkomste van meer as vyf mense ingestel om politieke onrus te beëindig uit vrees dat die land se krisis verder kan verdiep.
Onluste duur reeds sewe maande, met anti-regeringsbetogers wat eis dat die Shinawatra-familie en hulle beweerde korrupte invloed oor Thai-politiek, uitree.
Die voormalige premier Yingluck Shinawatra, wat afgedank is deur die konstitusionele hof vroeër hierdie maand vir nepotisme, was onder diegene wat Vrydag gevra is om saam met die waarnemende premier Niwattumrong Boonsongpaisan voor die militêre raad te verskyn.
Gerugte dat Niwattumrong reeds beskerming in die Amerikaanse ambassade opgesoek het, is deur die Amerikaanse ambassadeur Kristie Kenney ontken in ‘n twiet.
Minstens 28 mense is reeds dood sedert betogings in November begin het.
Onlangse omstrede hofuitsprake het die regering magteloos gelaat en die land diep verdeel.
Intussen het die VSA die militêre staatsgreep skerp veroordeel.
Die Amerikaanse minister van Buitelandse Sake, John Kerry sê daar is geen regverdiging vir die weermag se optrede nie.
Die woordvoerder van die departement sê die VSA heroorweeg sy militêre en ander hulp aan die regering van Thailand.
Die Sekretaris-Generaal van die VN, Ban Ki Moon het ‘n oproep om die terugkeer na demokrasie gedoen deur vreedsame dialoog wat alle partye insluit.
Die invloedryke Japannese Eksterne Handelsorganisasie het egter deur ‘n woordvoerder verklaar dat krygswet ‘n positiewe stap vir Thailand is.
Premier Shinzo Abe het Japan se buitelandse en militêre beleid aangepas vir die nuwe werklikheid in Asië.
Die Suid-Afrikaanse regering het die staatsgreep in Thailand veroordeel en ‘n beroep gedoen op die weermag om die grondwetlike orde te herstel.
Die departement van Internasionale Betrekkinge en Samewerking het in ‘n verklaring kommer oor die politieke situasie in Thailand in die lig van die militêre staatsgreep uitgespreek.
Die woordvoerder van die departement, Clayson Monyela het Suid-Afrikaners wat in Thailand woon of die land besoek gemaan om brandpunte te vermy.
Die weermagvakbond, Sandu, het bewerings oor ‘n dronk generaal se magsmisbruik veroordeel.
Die voorval dui op ‘n magstryd wat tussen die polisie en die weermag heers en wat tot verdere onverkwiklikhede kan lei sê ontleders.
Nòg die polisie, nòg die weermag wou egter uitbrei oor die voorval wat sommige polisielede as ‘n “militêre opstand teen die SAPD” beskryf.
Sandu sê die generaal het glo gepantserde voertuie en 120 soldate van die basis gemobiliseer om ander soldate en senior offisiere uit aanhouding te bevry.
Die polisie het die weermaglede by ‘n onwettige sjebeen in hegtenis geneem.
Die SANW-generaal wat lede van die weermag en twee Ratels gemobiliseer het om die 32 soldate te bevry, kan dalk geskors word, sê sommige bronne.
Die polisie het hulself glo toegesluit en bewapen toe die Weermag opdaag, maar geen skote is geskiet nie.
Die woordvoerder van Sandu, Pikkie Greef sê hulle oorweeg dit om ‘n klag van opstoking teen die generaal te lê.
Die polisie het intussen bevestig dat 31 mense Vrydagaand by ‘n sjebeen in hegtenis geneem is en dat aanklagte van intimidasie teen drie mense ondersoek word.
Die ontsetting van die soldate het by die Weermagbasis op Oudtshoorn oor die naweek gebeur.
Luidens mediaberigte was die generaal onder die invloed van drank toe hy die soldate, onder wie ‘n kolonel en ander offisiere, uit polisie-aanhouding gaan “red” het.
Die offisier kan binnekort aangekla word van dwarsboming van die gereg, misbruik van staatseiendom en magsmisbruik.
Hy kan selfs summier in hegtenis geneem word en lewenslange tronkstraf opgelê word weens die erns van die klag omdat hy as senior offisier homself as verhewe bo die reg beskou het, sê een militêre kenner.
Die offisier was glo Brigadier-generaal Xolani Mankayi van Pretoria.
Alhoewel die polisie intussen die gebeure bevestig het, het die SANW se infanterie-bevelvoerder enige kennis van die voorval ontken.
Die Wêreldbank het Suid-Afrika geloof vir sy kinderstaatstoelaes wat glo die maatskaplike band tussen mense en die staat ondersteun.
Die toelaes word allerweë beskou as ‘n geboorteversneller wat jong swart meisies tot vroeë moederskap oorreed.
Dit is ook al gekritiseer vir die aantal premature geboortes weens die tienerswangerskappe wat deur toelaes aangemoedig word.
‘n Nuwe verslag wat handel oor lande se maatskaplike toelaes, beskryf die land se stelsel van kindertoelaes as een van die voordeligstes op die vasteland.
Volgens die verslag getiteld The State of Social Safety Nets 2014 wat die Bank bekendgestel het, bestee Suid-Afrika sowat 3,4% van die Bruto Binnelandse Produk aan maatskaplike uitkerings.
Sulke uitkerings wat armoede verlig soos in Suid-Afrika noem die Bank “betroubaar” en “gereeld in kontant”.
Die Wêreldbank sê arm mense trek dikwels swaar ten spyte daarvan dat sekere aspekte van die ekonomie gesubsidieer word deur die staat.
Indonesië spandeer 2,6% aan brandstofsubsidies. Egipte, Irak en Ekwador bestee ook meer aan brandstofsubsidies, maar sulke subsidies help uiteindelik net die rykes.
Luidens die verslag is maatskaplike vangnette in die vorm van voordele en uitkerings nie alleen vir oorlewing nie, maar ook om die “sosiale kontrak tussen die burger en die staat te sterk en uit te bou”.
Die platinumprodusent Lonmin het die eensydige voedselhulp aan die gesinne van stakende Amcu-mynwerkers bevraagteken.
Die bestuurshoof van Lonmin, Ben Magara sê die skenkings bevoordeel net die stakende vakbond se lede.
Hy het gesuggereer dat die hulporganisasies nie gelykheid onder werkers erken nie.
Die voedselhulp sal daartoe bydra dat die staking nog langer uitgerek kan word.
Magara sê indien die staking onbepaald voortgaan gaan, sal kinders ophou skoolgaan en daar sal op mense se huise beslag gelê word.
Die Moslemhulporganisasie, Gift of the Givers het ontken dat hulle slegs lede van Amcu in die staking-geteisterde platinumgordel help.
Platinummynwerkers sukkel geldelik as gevolg van die Amcu-staking in Rustenburg wat nou reeds in die vierde maand is.
Die woordvoerder van Gift of the Givers, Emily Thomas sê hulle werk saam met die plaaslike Marikana-komitee om die gesinne wat die ergste geraak word, te identifiseer.
Verwarring heers onder honderde studente aan tersiêre inrigtings in Bloemfontein nadat ondernemings van die Motsepe-stigting om hulle studiegeld te betaal, nie gerealiseer het nie.
Die swart miljardêr Patrice Motsepe het voor die verkiesing by die Mangaung Indoor Sports Centre aangekondig dat sy Stigting geld vir studie sal bewillig in die Vrystaat.
In ‘n kort uiteensetting van hoe die fonds aangewend sal word, het Motsepe gesê ‘n R100 miljoen sal gebruik word om beurse en ander ondersteuning vir onderwys te voorsien.
Volgens studente het die stigting die geld nie betaal nie en het die Vrystaatse Universiteit gevolglik baie van hulle se registrasies teruggetrek.
Die studente sal dus moet afsien van hul studies as hul gelde nie betaal word nie.
Die Motsepe-stigting het intussen ontken dat hulle enige beurse beloof het.
Die voorsitter van die Stigting se sub-komitee in Mangaung, Sello Dire, sê hulle het geen magtiging as die sub-komitee om beurse aan studente aan te bied nie.
Dire sê dit is ‘n groot misverstand en die tersiêre instansies het hul aansoeke afgewys.
KwaZulu-Natal het ‘n duur e-tolstelsel vrygespring.
Die Suid-Afrikaanse Nasionale Padagentskap sal teen November e-toltegnologie by twee tolplazas in die provinsie aanbring om verkeersvloei te verbeter.
Anders as in Gauteng is dit egter nie ‘n bykomende tol wees nie, maar bloot ‘n alternatiewe manier van insameling van bestaande tol, het Sanral se Logashri Sewnarain gesê.
Sewnarain, die agentskap se Oostelike streekbestuurder, sê die tolplazas by Mariannhill en Oribi sal binnekort spesifieke e-tol bane insluit.
Voertuie wat met e-skyfies toegerus is, sal slegs kan deurry sonder om te stop. Sewnarain sê die tradisionele metodes van betaling sal nog steeds beskikbaar wees vir motoriste wat nie e-skyfies wil aanskaf nie.
Tol op die N3 en op die N2 sal teen ‘n spoed van sowat 40 km / h ingesamel kan word.
Sy het gesê die valbome in die e-tolbane sal outomaties oopgaan vir voertuie met e-skyfies.
Meer as 100.000 voertuie gebruik die N3 daagliks. Bestaande tol-hutte kan tussen 200 en 300 voertuie per uur hanteer. Tot 700 voertuie per uur kan egter elektronies tol betaal.
Boko Haram: Van bokwagters tot plofstofdeskundiges?
Die VSA het sy troepe in Tsjad ontplooi om glo na die skoolmeisies wat in Nigerië ontvoer is, te help soek.
Die Verenigde State van Amerika sal 80 militêre personeellede en ‘n Predator-tuig na Tsjad stuur as deel van ‘n poging om ‘n vastrapplek in die streek te kry.
Die onbemande verkenningstuig sal aansluit by soortgelyke tuie wat in Niger glo deelneem aan die soektog.
Die Amerikaanse ontplooiing in Tsjad is deur die War Powers Act Woensdag moontlik gemaak.
Tsjad se weermag word beskou as een van die bestoegeruste in sub-Sahara-Afrika. Die land is tans in staat om duur buitelandse intervensies te finansier sonder Westerse hulp danksy sy olie-inkomste.
‘n Resolusie deur die Afrika-unie (AU) het reeds die sukses in Afrika van Tsjad se militêre strategie om homself internasionaal onontbeerlik te maak, geloof. Die AU beoog trouens om Tsjad se kandidatuur vir ‘n nie-permanente setel in die Veiligheidsraad van die VN in 2014/15 te ondersteun.
Alhoewel die Weste steeds ‘n belangrike belegger en handelsvennoot in Tsjad is deur die Tsjad-Kameroenpyplynprojek, het China baie meer langtermyn-ontwikkelingshulp aan die land beskikbaar gestel en die oliesektor aansienlik uitgebrei.
Vir China is Tsjad ‘n belangrike bron van olie en ‘n suksesverhaal van Chinese invloed in die hele streek.
Tsjad se minister van finansies het vroeër aangekondig dat hy verwag dat olie-uitvoere sal verdriedubbel teen 2015.
Die Amerikaanse President, Barack Obama het sy Kongres ingelig dat die gewapende magte betrokke sal wees by intelligensie, waarneming en verkenning ten opsigte van missies in noord-Nigerië en omliggende gebiede.
Hy het aan die Kongres gesê dat die soldate in Tsjad sal bly totdat hulle hulp met die opsporing van die meer as 200 meisies nie meer nodig is nie.
Amerika het vroeër die jongste bomaanvalle in Jos in Nigerië skerp veroordeel waartydens minstens 118 mense dood is.
Die militante groep, Boko Haram, wat glo deur die Weste befonds word, word vir dié terreurdaad verantwoordelik gehou.
Die ontvoerings het straks ‘n handige rede verskaf vir Amerikaanse militêre ingryping in die streek.
