Die burgemeester van Dundee, ’n dorp in Noord-Natal, is op ’n moordklag in hegtenis geneem, tesame met twee medepligtiges.
Die polisiewoordvoerder, direkteur Phindile Radebe, het gister bevestig dat “die burgemeester van een van die munisipalititeite in die Dundee-gebied” gearresteer is.
Volgens ’n Sapa-korrespondent, is die burgemeester Donderdag in hegtenis geneem tesame met twee medepligtiges op klagtes wat verband hou met die skiet van die ANC-takvoorsitter, Grishen Bujram (42) op 15 Junie vanjaar.
Die drie persone sal waarskynlik more in die landdroshof op Dundee verskyn.
Bujram is in sy motor doodgeskiet gedurende die nag van 15 Junie in die Sibongile-woonbuurt.
Die Duitse kanselier, Angela Merkel, is vir die tweede agtereenvolgende jaar aangewys as die magtigste vrou ter wêreld deur die Forbes-indeks. China se vise-premier, Wu Yi, het vir ‘n verrassing gesorg deur die Amerikaanse Condoleeza Rice van haar tweede plek te ontneem.
Die Amerikaanse tydskrif Forbes publiseer hierdie jaar die vierde spesiale jaarlikse uitgawe waarin die honderd mees invloedryke vroue op die planeet volgens rangorde aangegee word. Die uitgawe het Donderdag verskyn.
Vroue wat regeringsposte beklee is in die minderheid teenoor sakevroue. Net 29% van die vroue op die lys dien in ‘n regering, terwyl 66% danksy bestuursvernuf hulle invloed laat geld. Onder hulle is die HUB van Chanel, die direktrise van die Wêreldgesondheidsorganisasie en die president van Harvard.
Vroue uit die Midde-Ooste het ook plekke verwerf. Die eerste dame van Kathar is in die 79ste plek en Sjeika Mozah Al-Missned van die VAE in die 99ste plek. Hillary Clinton en Nancy Pelosi is natuurlik ook teenwoordig op die 25ste en 26ste plekke, met Oprah Winfrey ‘n kortkop voor op nommer 21.
So lyk die telling tot dusver in die titaniese stryd om ‘n gepaste Afrikaanse weergawe van die naam "Tshwane" te vind.
Komaan, Bobbejaanburgers en Tshwanese, opskud en begin stem hieronder regs voordat die Apenaars (As inwoners van Kaapstad Kapenaars is, moet inwoners van Aapstad seker Apenaars wees?) julle die loef afsteek!
Onthou ook: op 24 September om 10-uur vm. vind ons groot betoging voor die SAUK-gebou in Aucklandpark teen die gebruik van die woord "Tshwane" op TV plaas. Ondersteun ook ons petisie teen die naamsverandering.
Teken ons petisie teen die naamsverandering van Pretoria.
"Hier is niks vir ons nie. Nie kunsmis nie, nie saad nie… Dis baie teleurstellend." So praat Mildred Chitada wat suikerriet en mielies verbou en vrees dat landbouers wat die landbouskou in Harare bywoon hierdie week met leë hande huistoe sal gaan.
"Die regering moes ten minste probeer het om kunsmis in die hande te kry vir ons, die nuwe boere. Die nuwe boere moet gehelp word want ons het niks," het sy bygevoeg. Die landbouskou is ‘n skadu van wat dit voorheen was nadat 4000 wit boere van hulle plase verwyder is.
Duisende Zimbabwiese boere het in Harare bymekaar gekom vir die landbouskou wat Vrydag amptelik deur Teodoro Obiang Nguema van Ekwatoriaal-Guinee geopen sal word.
Nuwe boere maak geen vordering nie omdat elektrisiteitsvoorsiening, voorrade en kennis ontbreek. Zesa, die Zimabwiese nasionale elektrisiteitsvoorsieningsliggaam, was ook teenwoordig om gemoedere te probeer kalmeer. Die twee kragsentrales kan nie behoorlik funksioneer nie omdat daar nie genoeg steenkool is nie.
Drie kunsmisfabrieke moes verlede maand sluit omdat ekonomiese toestande in die land so agteruitgegaan het. Vóór 2000 het Zimbabwe mielies na Zambië en Malawi uitgevoer. Mugabe hou egter vol dat droogte verantwoordelik is vir die haglike omstandighede.
Organiseerders het Dinsdag probeer om optimisties te bly, teen alle waarskynlikheid en getuienis in, en aan die media gesê dat Zimbabwe nie op die rand van ‘n ineenstorting is nie en dat die landbouskou ‘n yslike sukses gaan wees.
Die dringende hofaansoek wat vanmôre deur verskillende Pro-Pretoriagroepe, onder andere die Vryheidsfront Plus in die Pretoriase Hooggeregshof gebring is, het geslaag en die stadsraad mag geen verdere naamborde verander totdat uitsluitsel in die naamstryd verkry is nie.
Die verrigtinge vooraf is gekenmerk deur spanning tussen pro- en anti-Pretoriabetogers. Terwyl die anti-Pretoria-faksie getoitoi het en liedjies soos "Ons gaan Tshwane toe" gesing het, het die ander groep spontaan Die Stem en Die Lied van Jong Suid-Afrika begin sing.
Dr. Dan Roodt van PRAAG is so byna-byna deur ‘n groep van veertig swart betogers aangerand toe hy aan die burgemeesteres van die Tshwane-munisipaliteit, Gwen Ramakgopa geskree het: "Maar tans vedruk u ons met u naamsveranderings!" Dit was in reaksie op Ramakgopa se toespraak vanaf ‘n bakkie in Vermeulenstraat waartydens sy gesê het dat die naam van Pretoria sál verander omdat dit die stad is waarvandaan swartes in die vorige bedeling "verdruk" is.
Van die ANC-betogers het ook aan dr. Roodt geskree: "Gaan terug Europa toe." Volgens die burgemeesteres van die Tshwanestruktuur is Afrikaners "slegs in die land welkom indien hulle die ANC respekteer".
‘n Irakese immigrant wat Saterdagaand by ‘n bushalte in Magdeburg in die ooste van Duitsland gestaan en wag het, is deur ‘n onbekende aangerand. Dié voorval kom slegs ‘n week nadat ‘n soortgelyke insident in Mügeln plaasgevind het en politici die toename in "vreemdelinghaat" sterk veroordeel het. In ‘n ander voorval in Guntersblum naby Mainz is ‘n Egiptenaar en Soedanees aangeval.
Die ses-en-dertigjarige Irakeër is volgens ‘n polisiewoordvoerder eers deur ‘n plaaslike inwoner uitgeskel omdat hy kwansuis nie tuis hoort in Duitsland nie, waarna die inwoner weer omgedraai het. Kort daarna het die inwoner egter teruggekeer met sy hond wat hy op die man losgelaat het, asook ‘n bofbalkolf. Die inwoner het die immigrant met kolf bygedam en kopwonde toegedien. ‘n Ooggetuie het die toneel gadegeslaan en die polisie ontbied.
By die wynfees in Guntersblum oor die naweek het etlike Duitsers op die twee immigrante toegesak en albei is beseer. In Mügeln het daar Saterdagaand net 200 mense aan ‘n vredesmars deelgeneem om kerse voor die Pizzeria waar die Indiërs skuiling gaan soek het, te plaas. Die Indiërs is deur 50 Duitsers aangerand en agtervolg tot in die eetplek.
Die linkse SPD-voorsitter wil graag die regse NPD-party laat verbied om vreemdelinghaat te bekamp, maar Kanselier Merkel en CSU-voorsitter Stoiber is nie entoesiasties oor die voorstel nie. Die Hessiese minister vir interne aangeleenthede, Volker Bouffier (CDU), het gesê dat die NPD met argumente bestry behoort te word. Probleme sal nie, meen lede van die regering, met ‘n verbod opgelos word nie.
‘n Emnid-meningspeiling het onlangs bevind dat soveel as 14% van stemgeregtigde vroue vir ‘n party regs van die huidige regering sal stem. Dit is ‘n verrassing volgens navorsers omdat vroue geneig is om nie so sterk na regs oor te hel nie. Van mans het net 9% gedink dat hulle sou regser kon stem.
Die owerhede in Swede het ‘n klag van ‘n Sweedse burger wat in die Kongo gebore is om "Kuifie in die Kongo" te verbied, van die hand gewys. Jean-Dadou Monya, wat sedert 1992 in Swede woon, het verlede Donderdag die Sweedse uitgewer, Bonnier Carlsen, voor die hof gedaag om te eis dat die verkope van die strokiesverhaal gestaak word en dat dit uit biblioteke verwyder word.
Die man wat die laaste persoon was wat ’n jong swart seun twee weke gelede gesien het, net voor hy wreedaardig vermink is, is die pas afgelope naweek dood aangetref in die dorpie Phela, in Noordwes. Dit is nog nie bekend wie hom vermoor het nie. Sy liggaam is sowat 500 meter gevind van die veekraal waar hy die dertienjarige seun die laaste keer gesien het.
Die seun, Bahumi Mogorosi, is op 5 Augustus naby Rustenburg aangeval. Hy was besig om sy pa se vee op te pas toe hy oorval is. Sy aanvallers het sy tong, geslagsdele en lippe uitgesny. Sy regterarm is by die elmboog afgekap. Ná die aanval het hy sowat 150 meter gekruip om hulp te kry. Hy verkeer tans in ’n ernstige toestand in die hospitaal.
Toordokters glo dat ’n afgesnyde hand wat onder ’n winkeldeur begrawe word, vir die winkeleienaar goeie geluk en flinke sake kan beteken. Die hand wink naamlik klante en geld nader.
Volgens dr Gerard Laubschagne, wat aan die hoof staan van ’n polisie-eenheid wat moetiemoorde- en aanvalle ondersoek, kom sulke aanvalle nog gereeld voor. Hierdie moorde word egter dikwels nie by die polisie aangemeld nie. Alhoewel amptelike statistiek nie beskikbaar is nie, glo hy dat tot 300 sulke moorde jaarliks plaasvind. Polisielede hanteer sulke gevalle dikwels soos gewone moorde, wat beteken dat Labuschagne en sy eenheid nie daarby betrek word nie.
Die meeste tradisionele genesers beperk hulle tot die gebruik van kruie, boombas en dele van dierkarkasse, maar die geloof bestaan dat menslike ledemate oor geweldige krag beskik en die konkoksie wat verkoop word dus baie duurder maak. Volgens Labuschagne is dit moeilik om sulke gevalle op te los, aangesien verskillende partye betrokke is. Die geneser sal aan die moordenaar beskryf watter liggaamsdele hy benodig.
Dit moet verwyder word terwyl die slagoffer nog leef. Testikels is gewild vir viriliteitsresepte, tonge word verwyder om mans te help om vroue met hulle woorde te bekoor en vet van die maag of borste word gebruik om geluk te bring. Indien die moordenaar gevang word, wil hy dikwels nie die naam van die geneser verklap nie, omdat hy vrees dat hy getoor kan word.
Labuschagne het geen illusies dat sy eenheid hierdie praktyk gaan beëindig nie. “Die praktyk gaan al vir eeue lank aan, dit is niks nuuts nie. Ek dink nie enigiemand glo dat ons moetiemoorde gaan verhoed nie, net so min soos mens kan beweer dat prostitusie beëindig kan word.“
Generaal Alireza Afshar gaan die raadgewer van die Iranse president Ahmadinejad, Mosjtaba Samareh Hasjemi vervang. Die Staatstelevisie het Sondag die aankondiging gemaak. Die nominasie dui daarop dat die invloed van die ideologiese toesighouers, naamlik die Rewolusionêre Wag, toegeneem het. Die Wag was onlangs in die nuus nadat die VSA bekend gemaak het dat hulle dit oorweeg om die Wag op hul lys van terreurorganisasies in te sluit.
Afshar word as die éminence grise onder Iran se besluitnemers gereken. Dit word as ‘n sleutelpos in die regering beskou omdat hy daarvoor verantwoordelik sal wees om die komense verkiesing te reël. Die parlementêre verkiesings vind in 2008 plaas.
Die generaal sal ook gedeeltelik verantwoordelik wees vir die 30 provinsies se goewerneurs en hy staan aan die hoof van die liggaam wat lisensies aan nie-regeringsorganisasies asook poltieke partye uitreik. Hy is een van die president se vertrouelinge.
Die Rewolusionêre Wag, oftewel die die Pasdaran – die Farsi-woord vir "wag" – is die grootste vertakking van die Islamitiese republiek se weermag. Afshar het die beste deel van sy loopbaan aan die Pasdaran gewy en hy het tot onlangs as adjunk van die bevelvoerder van die weermag gedien. Hy was gemoeid met kultuursake in daardie hoedanigheid.
President Ahmadinejad, wat sedert 2005 die regering lei, was ook voorheen ‘n lid van die Pasdaran. Afshar het ook tussen 2003 en 2005 as Ahmadinejad se raadgewer opgetree toe hy as burgemeester van Teheran gedien het. Die twee here was saam op universiteit. Afshar het tydens die Iran-Irak konflik (1980 – 1988) as woordvoerder vir die Iranse weermag opgetree.
Hy is daarna as hoof van die Immam Hossein-universiteit aangestel. Dié universiteit is hoofsaaklik gemoeid met die opleiding van Pasdaran-leiers.
Die burgemeester het naamlik in Julie ‘n chemiese produk aangekoop wat bedelaars en dakloses uit die dorp sal hou. Die werknemers van die munisipaliteit is aangesê om die produk oral in die middedorp aan te wend waar ongewensdes aanwesig is. Die produk staan bekend as Malodore, wat min of meer as slegruik beteken.
Nadat die munisipale werkers egter die aanwysings op die kartonverpakking gelees het, het hulle besluit om die opdrag nie uit te voer nie. Daar staan "dat die produk toksies is en ‘n irritant en dat ‘n mens dit nie moet inasem nie," sê die anonieme werknemer. Werknemers "sal graag van rotte ontslae raak, maar nie dakloses nie", het die persoon bygevoeg.
Uiteindelik is die produk direk aan die skoonmakers oorhandig wat dit op "probleemareas" aangewend het. Volgens die vervaardiger, Firchim, is dit nie "gevaarlik" nie. Die konsentraat moet eers verdun word en dan aangespuit word. Dit veroorsaak naarheid en die behandelde areas is vir ten minste ‘n paar weke ontoeganklik.
Sedert 2005 stel die burgemeester van Argenteuil maatreëls vas sodat bedelaars nie die middedorp binnekom nie. Die owerhede het in 2005 egter so ‘n maatreël geskrap wat verwys het na die "abnormale olfaktiewe steuring" wat daklose mense veroorsaak.
Hy het bygevoeg dat dit algemeen is vir sekere media-instellings in Suid-Afrika om oneties op te tree en nuus en inligting uit hul duime te suig en vir die waarheid aan te bied. Die koerant het blykbaar ‘n verdeeldheid tussen lidstate voorgehou en ‘n verlamming onder leiers om Zimbabwe aan te spreek waargeneem tydens ‘n vergadering wat nooit plaasgevind het nie.
"Die vyandige aanklag dat ons lande roekeloos hul oë weggedraai het van die probleme van Zimbabwe omrede hulle solidariteit wou aanmoedig, was nog altyd ‘n stuk propaganda wat alle denkende mense as sulks sal herken." Hy het ook gesê dat Zimbabwe se probleme Suid-Afrika se probleme is, maar dat Zimbabwe ongekwalifiseerde respek vir sy onafhanklikheid en die reg van sy mense om oor hul lot te besluit, verdien
Suid-Afrika en die Gemeenskap sal onder geen omstandighede soos ‘n supermag optree nie en sal nie die reg tot selfbeskikking van die mense van Zimbabwe wegneem soos "imperiale Brittanje" gedoen het nie, het hy voortgegaan.
Deon Maas loods in die Naspers-bylaag, BY, ‘n striemende aanval op Afrikaners. Hy beskuldig pro-Afrikaanse organisasies en partye van ‘rassisme’ wat Afrikaans as ‘n ‘dekmantel’ sou gebruik vir hul ‘rassisme’.
By rassiste is daar g’n teken van verantwoordelikheid of selfbeheer nie – ’n bietjie soos alkoholisme. Alkoholisme kan natuurlik behandel en onder beheer gebring word. Miskien is dit tyd dat ons rehabilitasiesentrums vir rassiste begin sodat dié armsalige, siek siele ook soos die res van ons ’n lewe vry van haat, venyn en wanpersepsie kan hê.
Ons weet mense wat die hele tyd so kwaad is, sal aan kanker doodgaan.
Een van rassiste se grootste probleme is die chroniese gelieg, vir hulself en hul vriende. Om hul gedrag te regverdig word stories vererger, verdraai en versin. Hulle staaf hul argumente met urban legends, verwronge feite en halfgebakte waarhede – soos die susterkerke in die apartheidstyd.
As jy my nie glo nie, kyk op die internet waar daar, spelfoute en al, verkondig word daar word daagliks 250 wit kinders in Suid-Afrika verkrag. Die webwerf noem nie of hulle almal blond met blou oë is nie. Daar is ook konstante verwysings na Jahweh se wil en ’n klomp glo die rede hoekom ons nog nie die Krugermiljoene ontdek het nie, is dat ons nog nie die “revolusie” gewen het nie.
Ons sal volgens hulle die Krugermiljoene kry nadat ons weer ons “regmatige” plek as leiers van die land teruggevat het en God se wil só uitvoer. Die Krugermiljoene sal dan dien as ’n kick-start om weer ons land aan die gang te kry en van swart invloede te suiwer.
Klink vir my na die nuwe Israel . . .
’n Deel van hierdie klomp laat die Suidlanders soos Kinderkrans lyk.
As jy my steeds nie glo nie, kom maak een oggend ’n draai en kyk in my inbox.
RASSISME is die kruuste vorm van menswees. Dis gewoonlik diegene met ’n IK net noord van wortelsop wat hulle die skuldigste hieraan maak.
Die deursnee-rassis se mening is gewoonlik nie juis belangrik nie, omdat hy nie eintlik in ’n posisie is wat deur die res van die samelewing belangrik geag word nie. Die meeste rassiste is egter so groot dat jy hulle nie in een sessie kan opeet nie.
En hier praat ek nie van mense wat terme soos “native”, “die volk” en “boy” gebruik nie – húlle is maar net sad.
Die Bybel, wat so graag deur rassiste misbruik word, sê duidelik daar was net een Adam en een Eva. Dit beteken ons kom almal van dieselfde plek. Almal kom van Afrika. Almal het hier begin en oor duisende jare en in pogroms het ons die eie gewoontes en voorkoms ontwikkel wat vir ons werk en wat ons gehelp het om by ons omstandighede aan te pas. Niemand is reg of verkeerd nie; almal is net verskillend.
Die rassiste waarvoor ons versigtig moet wees, is die slimmes, dié met versteekte agendas wat goed opgevoed is en steeds hul verwronge filosofie propageer. Dis hulle wat in die Hitlers en Amins van hierdie eeu kan verander, wat hul posisie as intellektuele misbruik om diegene wat dommer as hulle is, tot geweld en haat op te sweep om hul eie politieke agenda te bevorder.
Ons sien wat in Irak, Soedan, Serwië en Nigerië gebeur. Dit beteken nie dat dit nie hier ook kan gebeur nie.
Dié soort rassiste skuil gewoonlik onder die dekmantel van nasionalisme, godsdiens en geld. Dis rassisme wat weggesteek word onder die voorwendsel van beskerming van die eie en die voortbestaan van Afrikaans, met die odd bruine wat as Uncle Tom bygesleep word vir ’n bietjie legitimiteit.
’n Bietjie soos ’n swart LP wat die DA verteenwoordig om sy kapitalistiese rassisme te regverdig. (Hoewel ’n mens jou hoed moet afhaal vir die leier van die amptelike opposisie in die parlement vir die uitrusting wat sy met die parlementsopening gedra het – dit getuig van ’n humorsin wat nie gewoonlik onder diesulkes bespeur word nie.)
In Suid-Afrika misbruik slim rassiste Afrikaans as ’n dekmantel vir hul vooroordele.
Die amptelike leier van so ’n groepie is dr. Pieter Mulder, wat al in sy dae as dosent sy politieke agenda onder beïnvloedbare studente bevorder het. Vandag, as hy nie oor alles kla nie, gebruik hy skynbaar sy vrye tyd om daarop aan te dring dat koerante “regstellings” plaas oor goed soos dié wat ek pas geskryf het.
Maar Pieter is oud en sonder fut. Die vuur is nie meer daar nie. Hy blaas nie eers meer vlamme nie; hy moet Blitz gebruik om die hout van sy idees aan die brand te kry.
IEMAND vir wie ’n mens baie versigtiger moet wees, is Dan Roodt. Daardie ridder op die wit perd wat die DA belangrik genoeg ag om sy jaarkongres as waarnemer by te woon en dan kommentaar lewer op hoe ’n anti-Afrikaanse filosofie daar heers. Wow, dis rêrig belangrik.
Roodt en sy Praag-tige organisasie gebruik die voorwendsel van “soldate vir Afrikaans” as ’n rookskerm vir rassisme. Hy hou daarvan om intellektuele snobisme in te span om sy standpunte en die idee dat een groep mense beter as ’n ander is, te regverdig.
Gelukkig het hy mettertyd so baie stroomop gepiepie dat sy mening nou net so belangrik is as ’n poep in ’n donderstorm. Sy belaglikhede is nou beperk tot ’n webwerf wat nie meer so baie verkeer kry nie.
Maar moenie dink omdat jy nie van hom hoor nie, hy nie besig is om onheil te saai nie. Die idee van die Afrikaner as uitverkorene word steeds aan “die volk” verkoop, aan dié wat intellektueel nie sterk genoeg is om hul eie mening te hê nie.
Ek dink dis tyd dat mense sien wie en wat Dan Roodt en sy cronies is. In die verlede het hy my mos al daarvan beskuldig dat ek ’n chromosoom-afwyking het, ’n moffie is en ligsinnige snert skryf.
Wel, Dan, kom ons kyk of jy rêrig balle van staal in die regte lewe het. Jy wat al konferensies bygewoon het met lyfwagte in die uniform van rassiste. Ek dink dis tyd vir ’n openbare debat sodat ons kan sien of jy rêrig ’n man is.
Die reëls is eenvoudig: geen vuurwapens (wat die grootste deel van jou volgelinge sal uitsluit), geen Saabs (oeps, daar gaan al jou Jan Cilliers- en Dainfern-maatjies) en geen poefter-haarstyle nie (of dink jy dit kan dalk jouself uitsluit?).
Hiermee daag ek Dan Roodt dus amptelik uit tot ’n openbare debat: Dan the Man teen Deon die Darling.
Helpers uit die kryt, ronde nommer een . . .
Lede van PRAAG-jeug woon vandag ‘n beraad by wat jongmense vanuit ‘n breë spektrum van Afrikaanse organisasies byeenbring. Die beraad vind by Afrikaanse Hoër Seunskool in Pretoria plaas en Solidariteitjeug tree as sameroepers op.
Die tema van die jeugberaad is: Die behoud van Afrikaans as onderrigtaal.
Tydens ‘n voorbereidende gesprek tussen PRAAG-jeuglede is die standpunt ingeneem dat Afrikaans net tot sy reg as onderrigtaal kan kom indien eentalige Afrikaanse instellings onafhanklik van anderstalige instellings kan bestaan. Die voorbeeld van België waar die drie taalgemeenskappe elkeen oor ‘n eie onderwysministerie met ‘n eie minister beskik, is genoem as ‘n moontlike oplossing vir die krisis wat as gevolg van die amptelike verengelsingsbeleid in Suid-Afrika ontstaan het.
Guinee het die Franse regering amptelik om verskoning gevra nadat ses Franse polisielede deur Guineërs aangerand is toe hulle van die vliegtuig in Konakry afgeklim het. Die Franse polisie het onwettige immigrante na hul tuiste van oorsprong vergesel tydens ‘n operasie genaamd "Verwydering" toe die insident op 16 Augustus plaasgevind het.
Terwyl Guinee Donderdag hul spyt oor die gebeure beken het, het die Franse aangedring op ‘n verduideliking asook ‘n versekering dat so iets nie herhaal sal word nie. Polisievakbonde het ook gevra dat hul lede beter beskerming moet geniet in delikate operasies, volgens die minister van binnelandse sake, Michèle Alliot-Marie. Sy het bygevoeg dat sulke optrede van Guinese burgers "heeltemal onaanvaarbaar" is.
Die ses polisielede wat deel vorm van grensbewaking is met hul aankoms in Konakry deur passasiers en voornemende reisigers aangerand. Alhoewel hulle nie ernstig beseer is nie, is die lede almal getraumatiseer deur die aanvalle. Die twee Guineërs wat deur die Franse teruggeneem is na hul land van herkoms het losgekom en was deelagtig aan die rebellie.
Volgens die ses Franse het die Guinese polisie in Konakry hulle ingewag en ook deelgeneem in die aanval. Die twee onwettige immigrante was klaarblyklik uit die staanspoor "aggressief" en het begin gil en skree om passasiers "vir hul saak op te sweep". Verskeie passasiers het die grenspolisie van "onmenslikheid" beskuldig nog voor die vliegtuig opgestyg het en die "verwelkomingspartytjie" wat vir die ses polisielede gereed gestaan het is dmv selfone vooraf vanuit Parys gereël.
Die Guinese regering ontken dat hul polisie aan die aanrandings deelgeneem het. Die twee onwettige immigrante was deel van die groepie hongerstakers wat al ‘n paar weke lank in Lille protesteer. ‘n Woordvoerder van ‘n Franse organisasie wat vir onwettige burgers omgee, Comité des sans-papiers du Nord, sê die Franse regering se optrede is ‘n skandaal. Hy meen onwettige immigrante word soos "ondermense" behandel.
