Drie mans is gister geskiet toe 'n ANC-vergadering in Lusikisiki in geweld ontaard het.
Die klipgooiery is glo met geweerskote beantwoord. 'n Veertigjarige man is in die kop gewond en die ander twee in die bene.
Die man met die kopwond verkeer in 'n kritieke toestand in die hospitaal, maar die ander twee is reeds ontslaan.
Alhoewel die polisie die saak ondersoek kon hulle nog geeneen vastrek in verband met die voorval nie.
President Mbeki het Maandag met ’n dringende aansoek om appèl in die konstitusionele hof gebring teen die hofuitspraak in Pietermaritzburg wat in Zuma se guns beslis is. Daarmee het die afgedankte president sy voornemens om Jacob Zuma die stryd aan te sê, duidelik gemaak.
Mbeki hoop om met die appèl regter Chris Nicholson se kommentaar oor sy ondersteuners se politieke en onbehoorlike inmenging in regspleging tersyde te laat stel. Nicholson het sy verbasing in sy uitspraak te kenne gegee dat Bulelani Ngcuka, voormalige nasionale direkteur van die nasionale vervolgingsgesag, openlik vir Penuell Maduna by 'n perskonferensie vir sy ondersteuning kon bedank, terwyl die instansie veronderstel is om onafhanklik te funksioneer.
16:27:51 Die Vryheidsfront Plus het gesê dat die plaaslike ANC totaal geisoleerd is in sy pogings om 27 histories belangrike straatname in Pretoria te
verander. Volgens die VF Plus bestaan daar breë konsensus dat straatname met historiese waarde behoue moet bly.
Dit kom nadat die Inkatha Vryheidsparty (IVP), asook 40 Afrikaanse organisasies, hul teenkanting teen die beplande naamveranderings uitgespreek het. Die 40 Afrikaanse organisasies sluit in Afriforum, die FAK, die ATKV, TLU SA en die Afrikanerbond.
Die IVP se Pretoria-streeksbestuur het gesê dat die beplande naamveranderings nie in die belang van Pretoria se inwoners is nie. Die IVP het bygevoeg dat strate soos Paul Krugerstraat en Pretoriusstraat spesiale historiese waarde het vir ‘n groot deel van Pretoria se inwoners.
Volgens mnr. Conrad Beyers, VF Plus- raadslid en lid van die Tshwane Metroraad se plek-en-straatnamekomitee, is dit verblydend om van die IVP se standpunt te verneem. Beyers sê dit bevestig dat dit nie slegs “wit” groeperinge is wat die naamsveranderinge teenstaan nie.
Die VF Plus het tegelykertyd die DA veroordeel vir sy flou en ambivalente standpunte rakende die straatnaamveranderinge en het die DA daarvan beskuldig dat hy die naamveranderings in beginsel ondersteun.
“Die VF Plus stem saam met TLU SA se standpunt dat die naamsveranderinge op kulturele onteiening neerkom. Net soos wat die kontroversiële onteieningswet gekelder is vanweë kragtige openbare teenkanting, kan hierdie nuwe kulturele onteieningsplan ook sneuwel,” het Beyers bygevoeg.
12:27:13 Die adjunk-leier van die regerende ANC, Kgalema Motlanthe, sal volgens partybronne vandag as president aangewys word.
Frankryk het dié naweek die VSA soos Brittanje gesteun met 'n nuwe oproep om verdere sanksies teen Iran in te stel. Aan die ander kant was Rusland, China en Duitsland onwillig om die VSA te volg en het gesê hulle verkies onderhandeling.
Ná afloop van die vergadering het die VSA nietemin 'n verklaring uitgereik wat lui dat "al ses lande betrokke [die vyf permanente Veiligheidsraadlidlande en Duitsland] die moontlikheid van verdere sanksies sal ondersoek".
Die vergadering wat Vrydag plaasgevind het was daarop gemik om die weg vir die komende byeenkoms tussen die betrokke staatshoofde voor te berei.
Die IAEA in Wene het aangedui dat Iran nie hulle uraanverrykingsaktiwiteite gestaak het soos die VN versoek het nie. Die IAEA beweer dat Teheran in die verlede planne op die tafel gehad het om 'n kernkop te vervaardig.
Drie stelle VN-sanksies is reeds van krag op Iran omdat hulle nie verryking gestaak het nie. Die IAEA het oor die naweek dokumente en foto's aan hul lede gewys om Iran se beoogde aanpassing van hulle Sjahab-3 missiel om kernkoppe te dra, aan te toon.
Iran beweer dat die dokumente en foto's vervals is om Iran in 'n slegte lig te plaas en om hulle te dwing om staatsgeheime bekend te maak.
Die Franse eerste minister François Fillon was die naweek 'n gas van die Russe in Sotsji en het aan die einde van sy kuier gesê die Franse en Russe is op mekaar aangewese. Hy het gesê daar is geen alternatief as goeie verhoudinge tussen die twee lande nie.
Die Tsjeggiese ambassadeur was een van die slagoffers van die reuse ontploffing by die Marriott Hotel in Pakistan oor die naweek. Ongeveer 60 mense, waaronder heelparty Westerlinge, is dood en meer as 250 beseer. Die hotel sal onbepaald gesluit bly. Konsulêre personeel van die Britse missie is beseer in die ontploffing.
Geen groep het nog verantwoordelikheid aanvaar vir die ontploffing nie. Kenners meen dit was ook 'n waarskuwing aan die nuwe regering in Pakistan om nie met die VSA saam te werk nie.
Joesoef Raza Gilani, Pakistan se nuwe eerste minister, sê die bom het by die hotel afgegaan omdat die terroriste nie vanweë goeie sekuriteit by die Parlement en die die eerste minister se kantoor kom uitkom nie.
Goldman Sachs en Morgan Stanley, die twee grootste beleggingsbanke op Wallstraat, wil hulleself transformeer na bankbeheermaatskappye wat onderworpe sal wees aan groter regulering. Dit word beskou as 'n duidelike erkenning dat die model waarop hulle sake voorheen geskoei was nou te riskant geraak het.
In wese verteenwoordig dit 'n terugkeer na die wyse waarop Wallstraat gestruktureer was voordat die Kongres gedurende die Groot Depressie beleggingsbanke en kommersiële banke se bedrywighede van mekaar geskei het met 'n wet bekend as die Glass-Steagall-wet. Die beleggingsbanke se risikoaptyt is aansienlik verminder omdat beleggers hulle vertroue in dié instellings verloor het.
Die stap sal beleggingsbanke nou in staat stel om ook toegang te hê tot die Federale Resewe se uitleenfasiliteite. Morgan en Goldman sal ook sodoende afslag kan bekom op lenings van die sentrale bank. Die nuwe koers sal 'n paar maande neem om behoorlik op dreef te kom met allerlei aanpassings wat die instellings asook die reguleerders sal moet maak.
Mugabe se toegewing was dat hy vir die meeste van sy pligte voortaan sal werk met die advies van die Kabinet of Tsvangirai. Maar die feit bly dat hy hom nie hoef te steur aan hulle raad nie.
Mugabe bly die voorsitter van die Nasionale Veiligheidsraad, het nog steeds volle beheer oor die weermag en behou die reg om vonnisse en opgeskorte vonnisse te verander of op te hef. Die reg van die media om vryelik te berig oor die toestand in die land is nie deur die ooreenkoms gedek nie en bly onveranderd en onderworpe aan die staat se voorkeure.
Hy mag ook die Parlement ontbind as hy daarna voel. Die enigste voorwaarde is "konsultasie" met die Eerste Minister. Tsvangirai het ook, behalwe dat hy 'n enorme werkslas op homself geneem het met 'n bankrot en korrupte staat wat bestuur moet word, die voortgesette mislukking daarvan as verantwoordelikheid aanvaar.
Tsvangirai het hierdie week aangedui dat hy nie ten gunste van die teruggee van grond aan wit boere is nie. Dit sal ongelukkigheid veroorsaak by die 400 000 sogenaamde veterane en hulle gesinne wat die wit grond oorgeneem het.
Al mylpaal wat die voormalige opposisieleier bereik het is blykbaar die grootskaalse inbring van vroueregte. Hulle het gelyke reg tot grondbesit en verteenwoordiging in die Kabinet. Of dit die lot van mense in Zimbabwe hoegenaamd gaan verander, is egter nie seker nie.
Die ANC gaan vandag die land se tussentydse leier (of leidster) benoem wat by Thabo Mbeki die presidentskap sal oorneem. Mbeki het
gisteraand tydens 'n televisie-uitsending sy bereidheid om te bedank verklaar.
Die ANC het Mbeki gevra om te bedank, agt dae nadat regter Chris Nicholson die korrupsiesaak teen Jacob Zuma uitgesmyt het en gesuggereer het dat daar hoëvlakinmenging in die saak was.
Die politieke krisis mag beleggers beïnvloed. Die rand het oornag in elektroniese verhandeling verswak en is tans 1,66% laer op R8,04.
Mbeki, wat in 1999 by Nelson Mandela oorgeneem het, het gesê dat hy 'n lojale ANC-lid bly en het die party se besluit gerespekteer, maar het herhaal dat hy nie die vervoling van sy aartsmededinger, Zuma, beïnvloed het nie.
Die ANC se tesourier-generaal Mathews Phosa het in tydens 'n televisiedebat Sondag gesê dat die party beplan om vandag 'n waarnemende president te benoem.
Die parlementêre speaker Baleka Mbete sal na verwagting die pos aangebied word. Zuma, wat geen regeringspos beklee nie, sal waarskynlik nie so 'n tussentydse rol inneem nie maar sal feitlik seker staatshoof ná die verkiesings in 2009 word.
Phosa het gesê dat die ANC die huidige kabinet wil behou, ten einde die kommer van beleggers wat meen dat die vertrek van ervare, pro-Mbeki-ministers die land in 'n bestuurskrisis kan dompel.
"Ons wil hê dat die kabinet moet aanbly. Ons sal baie gelukkig wees as hulle bly en ons dinge saam doen," het Phosa gesê.
Die parlementêre koukus van die ANC sal vanmore om 9:00 in Kaapstad vergader terwyl Zuma teen 12:00 'n perskonferensie sal hou.
'n Derde van blanke Demokratiese kiesers in die VSA meen swartmense is onproduktief en geneig tot geweld, volgens 'n studie wat in die VSA gepubliseer is.
Die diepgewortelde rassisme van die AP-Yahoo-opname beklemtoon die probleme wat Barack Obama, die party se presidentskandidaat, gaan ondervind om genoeg stemme in sy eie party te trek.
Die opname het bevind dat veertig persent van alle blanke kiesers ten minste sekere bevooroordeelde sienings jeens swart Amerikaners koester.
Meer as 'n derde van alle blanke Demokrate en onafhanklikes – "besluitelose" kiesers wat die sleutel tot die volgende verkiesing mag verteenwoordig – het met ten minste een negatiewe beskrywing saamgestem.
Meer as 'n kwart van blanke Demokrate het saamgestem dat "indien swartes net harder sou probeer, kon hulle net so ryk soos blankes wees".
Onder onafhanklike kiesers was daar selfs meer vooroordeel. 'n Kwart van die besluitelose kiesers het byvoorbeeld gesê dat swartes "gewelddadig" is en 'n derde het hulle as "klakouse" beskryf.
Die meningsopname deur die universiteit van Kalifornië is aanlyn uitgevoer. Studies het getoon dat mense eerliker is as hulle vrae op 'n rekenaar beantwoord as wanneer hulle van aangesig tot aangesig met 'n navorser verkeer.
