“Afrikaners het telkens in die verlede sukses bereik waar hulle op militêre, politieke en kulturele terrein hulle strategieë by nuwe omstandighede aangepas het. Daarteenoor het mislukkings gevolg waar ou metodes op nuwe omstandighede toegepas is,” volgens dr. Pieter Mulder, VF Plus-leier en adjunkminister van Landbou, Bosbou en Visserye.
Dr. Mulder het die naweek by Spioenkop gepraat tydens ’n herdenkingsgeleentheid vir die veldslag wat hier tydens die Anglo-Boereoorlog plaasgevind het. Die Slag van Spioenkop het presies 110 jaar gelede op 24 en 25 Januarie 1900 naby Ladysmith in die destydse Natal plaasgevind. Dit was die grootste veldslag van die oorlog waarin tot 2500 Britse soldate omgekom het.
Dr. Mulder het die Boere se oorwinning daaraan toegeskryf dat hulle in die hitte van die geveg vinnig van strategie kon verwissel terwyl die groot Britse mag van 24 000 soldate dit nie kon doen nie.
“Suid-Afrika lyk vandag baie anders as in 1900 of as in 1948 toe die Nasionale Party die regering oorgeneem het. Om sinvol te oorleef en ons doelwitte te bereik is dit nodig om nuut te dink en gereeld ons huidige strategieë in heroorweging te neem,” het dr. Mulder gesê.
Verskeie organisasie het kranse by die Burgermonument bo-op Spioenkop gelê terwyl ’n trompetspeler die laaste taptoe en Reveille gespeel het.
Dr. Mulder het afgesluit deur aan te toon dat daar ’n vraagteken hang oor die toekoms van enige volk wat net skaam is oor sy verlede en sy helde nie meer eer vir die opofferings wat hulle gemaak het nie.
“‘n Memorandum wat die Jong Kommuniste Liga van Suid-Afrika Vrydag (22/01/10) in Christiana aan die Provinsiale Onderwysdepartement oorhandig het, getuig van rassehaat en onkunde oor die Grondwet van Suid-Afrika. Om in die memorandum te vra dat Afrikaans in alle openbare skole verbied moet word en dat Engels die onderrigtaal moet wees, is ‘n miskenning van die reg op moedertaalonderrig soos vervat in die Grondwet. Hierdeur misken die Jong Kommuniste Liga al die ander inheemse tale en bevorder die taal van kolonialisme. Die Jong Kommuniste is net besig om rassehaat aan te blaas en skep polariserings soos Cosatu in Noordwes,” sê mnr. Pieter Groenewald (LP), provinsiale leier in Noordwes en hoofwoordvoerder oor Polisie van die Vryheidsfront Plus.