DA skarrel om Moslems tevrede te stel

Universiteite regoor die land herdenk “Israeliese Apartheidweek” hierdie week. Organiseerders sê dit is ‘n geleentheid om aandag te vestig op die menseregteskendings wat endemies is aan die konflik in die Midde-Ooste.

In Durban, egter, het die Demokratiese Alliansie geskarrel om aan die regte kant van die debat te bly.

“Daar sal geen poging wees om die muurskildery verwyder te kry nie, en die DA ondersteun vryheid van spraak. [Die] raadslid ondersteun hierdie vryheid,” het die Demokratiese Alliansie-leier, Helen Zille Maandag haastig verklaar, nadat aktiviste in Durban met woede gereageer het op ‘n DA-raadslid se verklaarde teenkanting teen graffiti oor Israel.

Die raadslid, Avrille Coen, het die graffiti in Durban as aanstootlik beskryf.

“Watter bewys het hulle dat Israel ‘n Apartheidstaat is?

“Hierdie muurskildery vertel die helfte van die storie van wat gebeur in die Midde-Ooste.”

Sy het gesê verlede jaar het dieselfde illustrasie vir soortgelyke omstredenheid gesorg en moes dit deur die munisipaliteit verwyder word.

“Ons kan nie ‘n skildery in ‘n openbare ruimte soos ‘n strand hê wat so aanstootlik vir mense van Joodse afkoms is nie.

“Dit is haatspraak om ‘n demokratiese land soos Israel, wat Palestynse in die parlement het, ‘n Apartheidstaat te noem.

“Die skildery moet verwyder word,” het sy gesê. Coen se kennis oor Suid-Afrika se sogenaamde apartheidstaat het haar klaarblyklik ook in die steek gelaat waar ander rasse ook in die Parlement gesit het.

Coen het haar opmerkings in die park gemaak, in die teenwoordigheid van joernaliste.

Die DA in Kwazulu-Natal het probeer om die party te distansieer van die raadslid se opmerkings.

“As Demokratiese Alliansie, sal ons nie betrokke raak in hierdie saak nie en sal nie enige aksie neem nie,” het Hanif Hoosen, die DA se voorsitter in Kwazulu-Natal, gesê in ‘n brief aan die Suid-Afrikaanse Moslem Netwerk (Samnet).

En Dinsdagmiddag is die muur oorgeverf. Die muurskildery het verdwyn onder ‘n dik laag swart verf.

By navraag het Coen gesê sy weet “nie ‘n ding” daarvan nie.

Israelse Apartheidweek is die eerste keer in 2005 in Toronto gehou en is sedertdien by akademiese instellings regoor die wêreld gehou.

Dr Salim Vally, direkteur van die Sentrum vir Onderwys en Transformasie aan die Universiteit van Johannesburg, en ‘n prominente Palestynse Solidariteit-aktivis, is Dinsdag toegang tot die Wesoewer deur die Israelse veiligheidsmagte geweier.

Vally is uitgenooi deur die Friedrich Ebert Stiftung, ‘n Duitse stigting, om ‘n reeks lesings in die Wesoewer aan te bied wat fokus op die reg om te onderrig en kurrikulumontwikkeling te lewer.

“Die mees pynlike ding oor die hele episode,” sê Vally in ‘n verklaring wat vrygestel is, “was die wyse waarop die Palestyne wat terugkeer na hul huise – baie ouer as my ouers – mishandel, geteister en verneder word deur tieners jonk genoeg om hul kleinkinders te wees. Selfs as ek wou, kan ek nie verhoed dat herinneringe van die Apartheid dae my oorweldig met wraak nie.”

Joodse Raad kla Fransman aan

Die Suid-Afrikaanse Joodse Raad van Afgevaardigdes het ‘n klagte by die Suid-Afrikaanse Menseregtekommissie oor die Wes-Kaapse ANC-leier, Marius Fransman se “verdelende retoriek” oor die radio gelê.

Maar Fransman, wat ‘n adjunk-minister van internasionale betrekkinge en samewerking is, het gesê die raad is selektief in sy woede.

Op ‘n gemeenskapsradiostasie twee weke gelede, het Fransman die DA-beheerde Kaapstad veroordeel dat hulle boukontrakte eerder aan “Joodse sakemanne” in teenstelling met Moslems gee.

“Die stof en konteks van hierdie kommentaar het duidelik te kenne gegee dat, volgens mnr Fransman en sy party, die Joodse gemeenskap in Kaapstad onbillik ekonomies baat ten koste van die Moslem-gemeenskap,” sê die raad se nasionale voorsitter, Mary Kluk.

Fransman het die kommentaar gemaak om politieke steun te kry van Kaapstad se Moslem-gemeenskap, het Kluk gesê.

Maar Fransman het skerp gereageer, en sê die raad moet meer “patrioties” raak en hulleself afvra of hulle Suid-Afrikaanse Jode of die Israeliese regering verteenwoordig.

“Hulle is baie aggressief wanneer die regering dit wat gebeur teen die Palestyne as ‘n misdaad teen die mensdom beskou, maar hulle moet ontsteld raak oor die lot van die armes en die plaaswerkers.”

Cosatu ‘aktief vernietig’

Cosatu is op ‘n gevaarlike, afdraande pad, het Gwede Mantashe, sekretaris-generaal van die ANC, Dinsdag gesê.

“Die vakbonde is onder beleg weens… ‘n gebrek aan ervaring onder organiseerders en beamptes wat nie opgewasse is om hierdie uitdagings te hanteer nie,” het Mantashe in Boksburg, oos van Johannesburg, aan nasionale ampsdraers van dié vakverbond gesê.

“Werkers gaan begin om na alternatiewe te soek. Wanneer werkers na alternatiewe soek, hoor hulle ons nie en voel hulle ons nie.”

Mantashe het gesê onenigheid heers in Cosatu. Hy het gewaarsku dat daar verdeeldheid is onder die leierskap.

“Julle gaan dit [Cosatu] aktief vernietig. In ‘n jaar se tyd sal daar geen Cosatu meer wees nie…. Alle ander veldtogte gaan plat val as daar nie organisering is nie.

“Bou die organisasie nóú… sodat julle ‘n impak kan maak.”

SA, Angola, DRK gaan ingrypingsmag op die been bring

Die presidente van Suid-Afrika, Angola en die DRK het hulle gewig ingegooi agter ‘n plan om vrede na die DRK se onbestendige Noord-Kivugebied te bring.

President Jacob Zuma, Jose Eduardo dos Santos en Joseph Kabila, het hulle steun toegesê aan ‘n plan wat deur elf state onderteken is en die weg gebaan het vir ‘n ingrypingsmag van 2 500 soldate.

Dos Santos het op ‘n nuuskonferensie in Luanda gesê die drie lande sal help om te verseker dat die ooreenkoms doeltreffend is.

Op die oomblik veg ‘n VN-sending van 17 000 lede na jare van onrus teen die rebelle. Suid-Afrika het soldate in die DRK as deel van die VN-sending MONUSCO.

Arbeidsonrus brei uit na steenkoolmyne

Werkers het by Anglo American se Kleinkopje-steenkoolmyn begin staak terwyl die arbeidsonrus in die sektor uitbrei.

Dit volg na onwettige stakings by vyf myne wat aan die mynreus Exxaro behoort. Beleggers is bekommerd dat dit ‘n herhaling is van betogings wat die ekonomie verlede jaar geskud het.

‘n Woordvoerder van Anglo American, Moeketsi Mofokeng, sê die maatskappy is in gesprek met die NUM om die geskil op te los. ‘n Langdurige onderbreking by Anglo en Exxaro se myne kan die reeds wankelende kragverskaffing in die land verder knou.

Die rand het tot R8.18 teenoor die dollar teruggesak terwyl die nuus oor die stakings beleggers verder ontstel het.

Die rand het ook tot sy laagste vlak in vier jaar teen die dollar gedaal nadat data getoon het dat daar ‘n groter as verwagte tekort in die lopende rekening is, wat druk uitoefen op Suid-Afrika om meer beleggings te trek.

Die tekort op die lopende rekening het verlede jaar tot ‘n rekord R197 miljard opgeskiet.

Agang sal ‘fragmentering verminder’

Die stigter van die politieke forum Agang, Mamphela Ramphele sê die doel van die organisasie is om fragmentering in opposisiegeledere te verminder en die politieke landskap te herskik.

Ramphele het gister haar tuisdorp naby Polokwane besoek. Sy sê sy sal samesprekings voer met ander partye oor kwessies van gemeenskaplike belang.

Sy sê dis nie koalisievorming as sodanig nie, omdat daar verskeie maniere van samewerking uit gesprekke kan voortvloei. Ramphele sê gesprekke kan nie met vooropgestelde idees gevoer word nie.

Polisie skiet meisie in oproer

‘n Sestien-jarige meisie is tydens ‘n gewelddadige oproer op Mayflower naby Ermelo in Mpumalanga deur die polisie raakgeskiet.

Die oproermakers het die kantore van die Albert Luthuli munisipaliteit aan die brand gesteek, die munisipale bestuurder as gyselaar aangehou en sy motor aan die brand gesteek.

Volgens die Departement van Gemeenskapsveiligheid is die meisie getref toe hulle die woedende betogers uiteen gejaag het. Die LUR, Vusi Shongwe het die geweld veroordeel.

Betogers het Maandag in die noordweste van Johannesburg klippe na motoriste gegooi op die R114, tussen Malibongwe-rylaan en Cedarweg.

Volgens die Johannesburgse metropolisie is dit nie veilig om daar te ry nie en word verkeer herlei.

Vroeër is die N14 en in Malibongwe-rylaan vir verkeer gesluit weens die oproer en later weer vir verkeer oopgestel.

Hoofsupt. Wayne Minnaar het Maandagoggend gesê daar was ‘n groep oproermakers op Malibongwe-rylaan naby Cosmo City en nog ‘n groep op die N14 naby Diepsloot.

“Die rede vir die protesoptrede is nie in hierdie stadium bekend nie,” het Minnaar gesê.

Metropolisiebeamptes is ontplooi om die situasie te monitor.

Media24 se politieke verslaggewer skielik oorlede

Voormalige Mail & Guardian-joernalis Mandy Rossouw is op die ouderdom van 33 jaar in haar woonstel in Bryanston, Johannesburg oorlede.

Volgens Beeld is Rossouw in die hospitaal opgeneem oor die naweek met pyn op die bors, maar is ‘n paar uur later ontslaan.

‘n Kennis het haar liggaam gevind by haar woonstel toe sy versuim het om ‘n ete-afspraak na te kom. Die oorsaak van haar dood is nog onbekend.

Redakteur Nic Dawes het gesê: “Mandy was ‘n buitengewone teenwoordigheid in ons nuuskantoor en op ons bladsye, lewendig, gefokus, en vasbeslote om die storie te breek Ons gedagtes is met haar familie, haar Media24-kollegas en haar baie vriende oor die wêreld van die joernalistiek, politiek en diplomasie heen.”

Rossouw was die internasionale korrespondent vir die Media24-groep, politieke verslaggewer vir die City Press en was ook ‘n verslaggewer vir Eyewitness News.

Sy het voorheen gewerk as ‘n politieke joernalis vir Beeld en die Mail & Guardian.

Verlede jaar het sy haar boek Kings en Kingmakers voor die ANC se nasionale konferensie in Mangaung in die Vrystaat vrygestel.

“Haar dood is ‘n groot verlies vir ons,” sê Tim du Plessis, hoof van Afrikaanse koerante by Media24.

Landdroste se staking kan howe ontwrig

Landdroshowe oor die land heen kan heeltemal tot stilstand kom ná landdroste gedreig het om te staak as hulle salarisse nie binnekort aangepas word nie, het die Dispatch Online Maandag berig.

Die nasionale uitvoerende raad van die Vereniging van Regterlike Beamptes van Suid-Afrika (Joasa) het die naweek ná ‘n vergadering in Port Elizabeth bevestig dat hulle sal staak indien daar nie aan hulle salariseise gehoor gegee word nie, het die koerant berig.

Landdroste het die voorgestelde verhoging van 5% wat deur die onafhanklike vergoedingskommissie gemaak is, verwerp, en gesê die kommissie het nie die knelpunte wat uitgewys is, opgelos nie.

Die staking sal na verwagting op 18 Maart begin.

Die optrese kan ernstige gevolge vir die land se strafregstelsel inhou. Landdroste moet byvoorbeeld verhoorafwagtende gevangenes se J7-vorms teken sodat hulle in aanhouding kan bly. Sonder die nodige handtekening, kan verhoorafwagtendes huis toe gestuur word.

Mthunzi Mhaga, woordvoerder vir die departement van justisie, het egter aan die Dispatch Online gesê die departement verwag dat samesprekings met landdroste tot oplossings sal lei.

Gauteng spog met vinnigste breëband

Slegs nege areas in Suid-Afrika het ‘n internetspoed hoër as die nasionale gemiddeld, volgens ‘n berig.

Beeld het Maandag berig Ookla se Net Index het aangedui dat die gemiddelde nasionale spoed vir breëband-internet 3,82 megagrepe per sekonde (Mbps) is.

Randfontein het die vinnigste breëbandttoegang in Suid-Afrika, met ‘n aflaaispoed van 11,3 mbps, gevolg deur Bryanston, Midrand en Randburg.

Die spoed is vasgestel met die hulp van plaaslike internetgebruikers, wat Ookla se webwerf en toepassing gebruik het om hulle internetspoed te toets.

Ookla het 1,7 miljoen breëbandgebruikers se spoed tussen 6 Februarie en verlede Donderdag altesaam 5,05 miljoen keer getoets. Altesaam 451 47 van die toetse is gebruik om die indeks saam te stel.

Slegs twee van die gebiede in die land met ‘n buitengewoon hoë aflaaispoed val buite Gauteng – Secunda in Mpumalanga (5,72 Mbps) en Worcester in die Wes-Kaap (3,84 Mbps).

Dié spoed is egter nog heelwat stadiger as wat in baie ander lande beskikbaar is. Vilnius in Litoue spog byvoorbeeld met ‘n spoed van 49 Mbps, terwyl HongKong ‘n spoed van 45,43 Mbps meet.