Die Europese Unie het Woensdag een van die hoogste boetes ooit opgelê vir kartelaktiwiteite, op wat hulle noem ‘n “paraffienmafia” wat daarvan beskuldig word dat hulle pryse en markte gemanipuleer het.
‘n Groep maatskappye wat paraffien-was maak, is beveel om boetes ter waarde van amper €700 miljoen te betaal. Dit is amper $1 mijard of R8 miljard.
Neelie Kroes van die Europese Kommissie het die groep van nege maatskappye, wat deur Sasol gelei is, ‘n paraffienmafia genoem, wat amper elke Europese verbruiker geraak het.
15:21:48 Die globale finansiële krisis kan Suid-Afrika se ekonomiese probleme vererger, het Sanlam se groepekonoom, Jac Laubser, Woensdag gesê. Hy het verder gesê dat die onsekerheid kan voortduur en dat versigtigheid belangrik is.
Volgens hom is die plaaslike ekonomie op ‘n afdraande pad wat nog nie sy laagtepunt bereik het nie.
Ekonomiese groei het tot onder 2% gedaal in die derde kwartaal, vergeleke met 4,9% in die tweede kwartaal.
Volgens Laubser het die globale ekonomiese krisis verskeie kanale oopgemaak waardeur die afwaartse swaai in die ekonomie vererger kan word.
Uitvoervolumes en -waardes kan onder verdere druk kom, met ‘n gevolglike negatiewe impak op die lopende rekening.
Suid-Afrika se handelsvoorwaardes kan onder druk kom en kapitale invloei kan gevolglik afneem.
Indien uitgawes op infrastruktuur sou aanhou, kan dit die ekonomie help dra, maar dit kan nie totaal kompenseer vir al die ander negatiewe invloede nie.
Laubser sê dat Suid-Afrikaanse maatskappye net soos globale maatskappye, ook druk gaan op hulle winste gaan ervaar.
Ten spyte van waardasies wat wissel van goedkoop tot middelmatige pryse, gaan plaaslike aandele sukkel om mee te ding in ‘n globale beermark.
15:24:17 ‘n 26-jarige man van Pretoria is gearresteer nadat hy beweer het dat hy ‘n bom in sy bagasie het net voordat hy op ‘n vliegtuig by die Port Elizabeth-lughawe sou klim.
Die man wat in Port Elizabeth was vir sake, was op die punt om op ‘n vlug te klim na O.R.Tambo (Jan Smuts)-lughawe, het segsman Dumile Gwavu gesê.
Die man het na bewering dreigemente gemaak dat hy ‘n bom en twee vuurwapens in sy bagasie gehad het.
Die polisie se honde-eenheid en bomeenheid is na die toneel geroep, maar het vasgestel dat die man nie die items gehad het nie.
Die man is op die toneel gearresteer vir oortreding van die Burgerlikelugvaartwet.
FW de Klerk het Dinsdag die gladde oorgang van president Thabo Mbeki se regering na president Kgalema Motlanthe se bewind geprys.
Hy het egter gewaarsku dat die suksesse wat die afgelope veertien jaar behaal is, nie vergeet moet word nie.
De Klerk was gister in Umkomaas die spreker by die amptelike opening van Sappi Saiccor se nuwe aanleg ter waarde van R3.4 miljard. Volgens hom onderskat te veel Suid-Afrikaners die magte “wat ons saambind” en spandeer hulle te veel tyd en energie aan die faktore wat hulle verdeel.
“Daar is geen twyfel dat ons deur ‘n periode van onsekerheid gaan nie ná die ANC se Pietersburg-konferensie en die onlangse bedanking van president Thabo Mbeki,” het De Klerk voorts gesê. Hierdie negatiewe situasie bevat egter ook positiewe elemente, aangesien die hele proses binne die raamwerk van die grondwet plaasgevind het. Daar is min lande in die wêreld waar ‘n leierskapsverandering met soveel orde en waardigheid sou plaasvind, aldus die voormalige staatspresident.
“Ek glo dat die proses, so kontroversieel as wat dit sekerlik was, ‘n weerspieëling is van die groeiende volwassenheid van ons jong demokrasie.” De Klerk het verder verwys na die probleme rondom die beskuldigings teenoor Jacob Zuma, persvryheid, die onafhanklikheid van die regbank en die ontbinding van die Skerpioene, wat mens nie mag ignoreer nie. Dan is daar ook vigs, armoede, werkloosheid, misdaad, die gebrek aan vaardighede en die noodsaak vir ‘n gebalanseerde transformasieproses. Hy bly egter hoopvol. “Ons Suid-Afrikaners ken die resep vir sukses: ons weet hoe om die magte wat ons saambind te versterk; ons beskik oor die vermoë om die eerste Afrikaland te word wat by die geledere van Eerste Wêreldlande aansluit,” het De Klerk gesê.
'n Brief waarin die Reserwebankgoewerneur Tito Mboweni gevra word om om verskoning te vra omdat hy 'n aandeelhouer daarvan
beskuldig het dat hy op 'n rassistiese manier gepraat het by die bank se algemene vergadering is aan sy persoonlike prokureurs gestuur om te hanteer, het die woordvoerder Dinsdag gesê.
"Ons het die brief aan mnr. Mboweni se prokureurs (Werksmans) gestuur en hulle hanteer dit nou," het die woordvoerder vir die kantoor van die goewerneur Samantha Henkeman gesê en bygevoeg dat dit nie die bank se prokureurs was nie maar Mboweni s'n.
Die brief – van 'n aandeelhouer se prokureur – is Vrydag aan die bank gestuur ná 'n opmerking wat Mboweni aan Mario Pretorius by die jaarvergadering van 19 September gemaak het.
Volgens die brief het Pretorius Mboweni by die jaarvergadering gevra om die vergadering tot orde te roep waarna die goewerneur geweier het en Pretorius met die woord "skokkend" gereageer het.
Dit het verdere reaksie van die goewerneur ontlok wat gesê het dat Pretorius nie met hom moet praat soos blankes met swartes tydens die apartheidtyd gepraat het nie.
"Ek sal jou nie toelaat om met my te praat soos wat blankes destyds met swartes gepraat het nie," het Mboweni na bewering gesê.
Pretorius, deur sy prokureur, Johan van Huyssteens, het 'n openbare verskoning gevra vir die aantyging dat hy met die goewerneur op 'n rassistiese manier gepraat het.
Die brief eis dat Mboweni sy verklaring moet terugtrek en onvoorwaardelik om verskoning moet vra deur middel van 'n brief en 'n openbare verklaring in die media.
Indien Mboweni nie sy verklaring terugtrek en onverwoorwaardelik per brief en in die media om verskoning vra nie, het Van Huyssteens gesê dat Pretorius 'n eis teen hom en die SARB van R1-miljoen gaan instel.
Mboweni kan verdere eise om skadevergoeding van Pretorius in die gesig staar, het die brief gelui.
"Indien u ongevraagde etikettering van ons kliënt as 'n rassis sy sake negatief beïnvloed, behou hy vanselfsprekend die reg voor om verdere skadevergoeding van u (Mboweni) en die SARB te eis," het die brief verklaar.
Mboweni se regsverteenwoordigers kon nie onmiddellik vir kommentaar bereik word nie.
06:01:07 Die tyd is nou ryp vir President Kgalema Motlanthe om die verslag van die Donen-kommissie van ondersoek wat reeds in Desember 2006 aan oud-president Thabo Mbeki oorhandig is, bekend te maak.
Die VF Plus se woordvoerder oor Minerale en Energie, mnr Willie Spies, het in ‘n brief aan die president gevra dat hy nou die bevindinge van die Donen-kommissie van ondersoek bekend moet maak nadat oud-president Thabo Mbeki vir 21 maande geweier het om dit te doen. "Noudat Motlanthe die president is, kan hy die lug suiwer oor sy eie rol in die omstrede olie-vir-voedselskandaal, deur die verslag van adv Michael Donen, SC bekend te maak."
Die Donen-kommissie is destyds deur Mbeki aangestel om beweringe te ondersoek dat prominente Suid-Afrikaners betrokke was by die Irakese Olie-vir-voedselskandaal. Nege getuies is destyds deur die kommissie gedagvaar om te getuig oor die skandaal en die moontlike betrokkenheid van Suid-Afrikaanse maatskappye en individue by die internasionale skandaal. Die getuies het ingesluit: mnre Tokyo Sexwale, Sandi Majali en Kgalema Motlanthe.
Die weekblad Mail & Guardian het in 2006 onthul dat die omstrede Majali sy Irakese olie-ontrakte nagejaag het met die rugsteun van top-ANC-amptenare Motlanthe (toe nog sekretarisgeneraal), Mendi Msimang (toe nog tesouriergeneraal). Gerugte wat destyds die rondte gedoen het was dat Majali se oliekontrakte aangeknoop is om die ANC te help finansier.
Majali was ook berug vir sy rol in die kanalisering van nagenoeg R15-miljoenstaatsgeld deur die staatsoliemaatskappy PetroSA na die ANC voor die 2004-verkiesing.
17:51:20 Die 35 000 mense wat in die eerste ses maande van 2008 in Kaapstad sonder geldige rybewyse gevang is, is net die ore van die seekoei. Onder die verskonings wat die ANC vir die toestande aanvoer, is die lang wagperiode vir aspirant-bestuurders om afsprake vir toetse te kry.
ANC-raadslid Werner Scwhella sê hy is uiters bekommerd oor die groot getalle mense wat sonder lisensies bestuur. Hy sê die vraag is of mense bloot die reg verontagsaam en of hulle die kans waag om sonder lisensie te bestuur weens die lang wagperiode. Kroll Background Screening-bestuurshoof Ina van der Merwe sê terwyl dit waar is dat daar lang wagperiodes by toetsentrums is, verskoon dit nie opportunistiese bestuurders wat kortpad kies en lisensies van korrupte beamptes koop nie. Sy sê baie werkplekke vereis dat 'n werknemer moet reis.
Baie werknemers verkies om sonder lisensie te bestuur as om hulle werk te verloor. In gevalle waar 'n bestuurslisensie 'n voorvereiste vir indiensneming is, verkies die werknemer om eerder 'n vals lisensie te koop as om die risiko te loop om nie die werk te kry nie. Van der Merwe sê werkloosheid is baie hoog en mense is desperaat.
Volgens die Metropolisie se kwartaalverslag het Kaapstad se verkeersafdeling gedurende April, Mei en Junie vanjaar 19 234 ongelisensieerde bestuurders en net minder as 11 000 ongelisensieerde voertuie hanteer. Waarnemende veiligheids- en sekuriteitsdirekteur Heathcliff Thomas sê die wagperiode vir 'n nuwe lisensie is landswyd nege maande maar Kaapstad het die wagtyd na 'n gemiddeld van ses maande verminder.
Willie Meyer, hoof van van die Spesiale-ondersoekeenheid sê sy ondersoekers het 350 lisensiekantore besoek en 1,4 miljoen lêers deurgewerk. Uit dié ondersoek was dit duidelik dat 91 596 bestuurders se lisensies ongeldig was. Hy sê die huidige situasie maak die lewe vir keuringsmaatskappye baie moeilik.
Hulle word verplig om 'n lisensie geldig te verklaar totdat dit deur die departement van vervoer gekanselleer is. Kroll Background Screening, die grootste maatskappy van sy soort in Suid-Afrika, prosesseer miljoene navrae oor die egtheid van bestuurslisensies, paspoorte, grade en diplomas.
Van der Merwe sê een van die grootste probleme wat hulle in die gesig staar, is dat die houers van vals lisensies dalk in beheer van busse is, wat 'n risiko op die lewe van duisende pendelaars plaas. Van der Merwe het 'n beroep op die departement gedoen om die probleem ernstig aan te spreek en vals lisensies uit sirkulasie te kry. Sy sê dit is net so belangrik dat lisensiekantore wat baie van dié vals lisensies uitreik, gesluit moet word.
16:55:24 Rebelle in die oorlog-geteisterde Darfoer-streek het bewerings verwerp dat hulle 'n helikopter wat deur die Verenigde Nasies se vredesmag gekontrakteer is, afgeskiet het. Vier bemanningslede is in die voorval dood.
Soedan se polisie beskuldig Darfoer-rebelle daarvan dat hulle die helikopter wat Maandag neergestort het naby die uitgestrekte Kalma-kamp vir ontwortelde mense afgeskiet het. Kartoem sê die kamp is 'n vesting vir insurgente. Maar rebelle van Soedan se Bevrydingsleër het die bewerings verwerp en sê die beraamde 80 000 inwoners is burgerlikes en nie soldate nie.
Mahgoub Hussein, die Londen-gebaseerde woordvoerder van die SBL-eenheidsfaksie sê die misdaad was 'n terroriste-aksie en hulle het niks daarmee te doen nie. Hulle veroordeel die aanval en ontken enige betrokkenheid. Die SBL-eenheid is een van die rebellegroepe met die meeste ondersteuners in die Kalma-kamp.
Die helikopter is die privaat eiendom van 'n Soedanese maatskappy maar is deur die gesamentlike Afrika Unie- Verenigde Nasies-vredesmag in Darfur gekontrakteer. Soos dit die gebruik vir alle VN-vliegtuie is, was dit wit geverf.
Die helikopter wat onderweg was om twee ton voorrade af te laai, het kort nadat dit van Suid-Darfoer se hoofstad Nyala opgestyg het, neergestort. AU-VN-woordvoerder Kemail Saiki sê hulle ondersoek die voorval maar kon nie gerugte bevestig of ontken dat die helikopter neergeskiet is nie.
Die Europese Unie het vroeër dié maand Soedan se militêre owerhede veroordeel vir die gebruik van wit vliegtuie in Darfoer. Die EU sê dit is 'n moedswillige poging om verwarring met VN-vliegtuie te skep. Soedan het die bewerings verwerp.
16:40:11 Die Azaniese Jeugorganisasie (AZAJO) het Dinsdag die herbenoeming van die Pretoriase akademiese hospitaal na Steve Biko-akademiese hospitaal verwelkom.
Die organisasie het die naamsverandering ten gunste van die vader van die swartbewussynsbeweging as 'n oorwinning beskou.
Maandag het die Gautengse LUR vir gesondheidsdienste, Brian Hlongwa, die herbenoeming van drie hospitale in Gauteng, onder andere die Pretoriase akademiese hospitaal aangekondig.
Die organisasie het gesê hulle hoop die regering erken ook ander mense, soos dr. Abu Bakar Asvat en Onkgopotse Tiro wat geweldig baie tot die vryheidsaak bygedra het.
Die organisasie het ook 'n beroep op die Ooskaapse regering gedoen om vinnig die openbare gesprekke aan die gang te kry om die naam van King William's Town na Steve Biko te verander.
Die organisasie het verder gesê dat hulle enige besware van die Demokratiese Alliansie en ander groepe verwerp. "Ons sal enige metode en wetgewing volg wat die name van ons gevalle helde erken," het die organisasie gesê.
15:03:17 Terwyl Wallstraat sidder ná die stormsee wat hom verpletter, blyk dit dat vele mense wat in die finansiële wêreld werk weer
terugkeer na die een ding wat vele as vertroosting beskou: geloof.
Geestelike leiers het opgemerk dat die besoekerstalle gedurende verlede se middagete dienste by 'n hele paar kerke van verskeie gelowe heelwat hoër was as in die verlede.
Daar is ook opgemerk dat daar heelwat meer mense in kantoordrag was, wat ‘n duidelike teken was dat die besoekers vanaf die Wallstraatdistrik was.
Eerwaarde Mark Bozzuti-Jones van die Trinity-kerk, Wallstraat, het verlede Vrydag se middagdiens gewy aan hoe om die finansiële krisis te hanteer.
Hy het opgemerk dat daar van die manne en vroue was wat net gesit het in gebed terwyl ander gehuil het ná hulle skielik hul werk kwyt was. Hy het verskeie versoeke gehad van mense wat skielik hulp nodig gehad het om huur vir hulle woonplekke te betaal. Volgens hom is daar duidelike tekens dat die mense totaal uitgeput was.
Die kerk beplan ook om in die volgende paar weke kursusse aan te bied, wat onde andere insluit “hoe om spanning te hanteer in onsekere tye” en “hoe om werksverandering te hanteer".
Net ‘n paar blokke weg was daar ‘n redelike verhoging van mense in sakepakke by die St Peters Kerk. Volgens Vader Peter Madigan was daar in die laaste paar dae hoë vlakke van benoudheid en angs te bespeur onder die mense wat die kerk besoek het. Volgens hom is geloof een van die dinge wat die mens wel kan dra in die baie onseker ekonomiese tye waarin ons vandag lewe.
Die Wallstraatsinagoge het van dié week af begin om saans ook oop te bly om die finansiële werkers tegemoet te kom. Rabbi Meyer Hagen sê dat daar nie soveel van ‘n verhoging wasin die getall wat die sinagoge besoek het nie, maar eerder ‘n verandering in die gereelde besoekers. Hy sê dat die tekens van spanning en kommer baie duidelik is op die gesigte van die mense wat by die groot banke werk.
Die sinagoge is in 1929 gestig, die jaar waarin Wallstraat sy groot ineenstorting beleef het.
