Kategorie: Nuus

Boer oorleef wrede plaasaanval

‘n Boer van die Paarl het ‘n wrede plaasaanval oorleef. Hy is aangeval toe hy op die erf ondersoek ingestel het.

Isak Kleinhans (49) het tydens ‘n inbraak Dinsdagaand ernstige beserings opgedoen nadat gewapende swartes ingebreek het op die plaas wat hy huur.

Sy verloofde en hyself is op die bed vasgebind en die aanvallers het hom met ’n metaalpyp geslaan. Hulle was met ’n panga en koevoet gewapen.

Die aanvallers het hulself uit die voete gemaak met gesteelde items waaronder ook Kleinhans se bankkaart en PIN-nommer.

Kleinhans is Woensdagaand uit die hospitaal ontslaan. Hy het beserings aan sy kop, rug en arms opgedoen.

Die polisie het bevestig ’n saak van huisbraak word ondersoek. Niemand is nog in hegtenis geneem nie.

Stappe teen 150 SABC-werkers wat mediese skema bedrieg

Dissiplinêre stappe gaan teen meer as 150 SABC-werknemers gedoen word wat na bewering met mediese praktisyns saamgewerk het om die korporasie se mediese skema te bedrieg, het RSG berig.

Die SABC sê hy het deur middel van fluitjieblasers en ander meganismes van die onwettige praktyke bewus geraak.

Die woordvoerder, Kaizer Kganyago, sê die SAUK het bewyse van die oortredings, maar gaan dit nie in die stadium bekend maak nie.

Hy sê hy hoop dit sal ‘n duidelike boodskap stuur dat die korporasie nie enige bedrog of korrupsie sal duld nie.

DA-leier in PE smeek ANC op sy knieë

Oproeriges moes met traanrook in die voorportaal uitgedryf word in die Nelson Mandelabaai-metro se vergadering waar die metro se begroting voorgelê is.

‘n Aantal oproermakers het die ou Wolraad-gebou in Sentraal voor middagete Donderdag binnegestorm. Hulle is deur veiligheidswagte voorgekeer, maar het aan die deure na die raadsaal gehamer.

Voorleggings is ontwrig toe die oproermakers al hoe luidrugtiger geraak het.

Retief Odendaal, DA-leier, het op sy knieë gegaan om te smeek om vergifnis nadat hy deur die ANC uitgejou is omdat hy nie “apartheid” verstaan nie. Odendaal wou aanvanklik nie die begroting ondersteun nie en het daarna buite stemming gebly.

Die betogers, lede van die Suid-Afrikaanse Munisipale Werkersunie (Samwu), het later aan Die Burger gesê hulle wil sekerheid hê dat ’n nasionale ingrypingspan nié hul werk gaan oorneem nie.

Gordhan sê dienslewering en werkskepping moet prioriteit geniet sodat die streek ekonomiese ontwikkeling kan geniet.

Hy sê hy is vol vertroue dat die nuwe burgemeesterspan probleme in die metro sal uitstryk.

Oproeriges het ook verkeer op die besige Addo-weg naby Motherwell in Port Elizabeth ontwrig weens griewe oor dienslewering.

Inwoners van Wells Estate beskuldig die Nelson Mandela-baai Metro daarvan dat ontwikkelingprojekte slegs op Fase Een fokus.

Hulle beweer dat die installering van geysers, herstelwerk aan gekraakte huise en die instandhouding van paaie nie na Fase Twee en Drie vorder nie.

‘n Inwoner sê die protesoptrede volg nadat hulle die munisipaliteit Woensdag 24 uur gegee het om op hulle griewe te reageer.

Intussen sê Pravin Gordhan die Nelson Mandelabaai-metro kan sy ekonomiese potensiaal slegs ontgin as korrupsie uitgeroei word.

Die minister van samewerkende regering het raadslede toegespreek tydens die metro se begroting in Port Elizabeth.

Cell C ontstoke oor Vodacom en Neotel se samesmelting

Cell C dreig om die telekommunikasie-beheerliggaam, OKOSA, hof toe te neem oor die samesmelting van Vodacom en Neotel.

Vodacom se teenstanders het die maatskappy se oorname van Neotel fel gekritiseer omdat dit Vodacom onregverdige voordeel sal gee as die land se grootste selfoonnetwerkverskaffer toegang tot Neotel se winsgewende radiofrekwensiespektrum sou kry.

Die transaksie sal die uitbreiding van Vodacom se veseloptiese kabelnetwerke ‘n hupstoot gee in woongebiede en besighede.

Daarbenewens sal toegang tot die spektrum, ‘n skaars hulpbron, die maatskappy in staat stel om ontplooiing van sy hoë-spoed draadlose netwerk te bespoedig.

OKOSA het Maandag bekendgemaak dat hy Vodacom se oorname van Neotel ten bedrae van sewe miljard rand goedgekeur het.

Geen redes vir die besluit is nog verskaf nie.

‘n Cell C-woordvoerder, Zolile Ntukwana sê die ooreenkoms sal beteken dat Vodacom die mark oorheers.

Charleston-skieter het geen skakel met SA nie

Die vermeende “Charleston-skieter” wat uitgebeeld word met die ou Suid-Afrikaanse vlag op sy baadjie, het nie enige skakels met die land nie.

News24 kon geen amptelike gegewens van ‘n individu met sy naam en geboortedatum in enige Suid-Afrikaanse rekord opspoor nie, na ‘n soektog Donderdagmiddag.
 
Die Facebook-profiel foto van ‘n nors 21-jarige Dylann Roof toon ook ‘n Rhodesiese vlag onder die “apartheid-era” Suid-Afrikaanse vlag.

Dit lyk asof die vlae later amateuragtig op die foto geplak is aangesien die twee blokke nie die kontoere van die baadjie volg nie.
 
Volgens Associated Press, het ‘n wit man Woensdagaand op swart kerkgangers losgebrand tydens ‘n biduur in ‘n historiese swart kerk in die middestad van Charleston, Suid-Carolina.

Nege mense is dood, insluitend die pastoor.
 
Die skieter se daad is voor sy arrestasie Donderdagoggend deur die owerhede beskryf as ‘n haatmisdaad.
 
‘n Groot gedeelte van sy 87 Facebookvriende is egter mense van kleur.

Pukke-raad sit glo oor rektor se termyn

Nuwe verwikkelinge rondom die termyn van die rektor van Noordwes-Universiteit (NWU) se Potchefstroom-kampus, Herman van Schalkwyk, is vandag na verwagting op ‘n raadsvergadering in Potchefstroom ter sprake.

Voorsitter van die raad, Johan Kruger, sê hy wil hom nie uitlaat oor wat bespreek gaan word nie.

Dit kom nadat die NWU-raad in Maart bekendgemaak het dat Van Schalkwyk se termyn as rektor van dié kampus op 31 Januarie 2016 sal verstryk.

Die raad het aangevoer die besluit is gemaak om die aangevraagde eksterne regsadvies wat aan hom voorgelê is, te aanvaar. Enige moontlike poging deur die raad om Van Schalkwyk se termyn te verleng sou onwettig wees.

Kruger sê geen finale besluite oor die NWU se vise-kanselier, Dan Kgwadi, en sy bestuurslui se strategiehersieningsproses en die moontlike verandering van die bestaande bestuursmodel gaan vandag geneem word nie.

Die raad het in Maart aanbeveel dat ‘n behoorlike ontleding deur die bestuur vandag oor die bestaande bestuursmodel se uitdagings asook die voorgestelde modelle self, gegee moet word.

Provinsie gryp in nadat Eskom krag afsny

Die Vrystaatse provinsiale regering moes noodgedwonge ingryp by die Mafube munisipaliteit – wat ondermeer Frankfort, Villiers en Cornelia insluit – nadat dié munisipaliteit se finansiële probleme amper daartoe gelei het dat Eskom sy kragtoevoer afsny.

Olly Mlamleli, die LUR vir samewerkende regering en tradisionele sake, sê haar departement en die provinsiale tesourie het die munisipaliteit gehelp om by die nasionale taakspan, wat saamgestel is om munisipaliteite by te staan, hulp te kry.

Mafube is een van 13 munisipalteite in die Vrystaat wat se staatstoelae deur nasionale tesourie weerhou is. Die munisipaliteit skuld Eskom ongeveer R40 miljoen en kon vir die afgelope drie maande nie sy amptenare betyds betaal nie.

Reuse optog vir 19 Augustus beplan

‘n Reuse protesoptog, sogenaamd teen korrupsie, die grootste in die land se geskiedenis, word vir 19 Augustus beplan om saam te val met die adhoc-komitee oor Nkandla se voorlegging aan die Nasionale Vergadering.

‘n Alliansie van burgerregte-organisasies en vakbonde reël die protesoptogte wat gelyktydig na die Uniegebou in Pretoria en die Parlementsgebou in Kaapstad sal lei.

Section27, wat teen Afrikaanse skole agiteer, het aangedui dat hulle die optog sal ondersteun.

Die vakbonde, insluitende Numsa, verreweg die land se grootste vakbond, gaan voor die einde van die week ’n kennisgewing by Nedlac indien.

Hulle sal toestemming van die owerhede vra om die maatskaplik-ekonomiese protesoptog te hou wat dit wetlik beskermde protesoptog sal maak.

Vigilantes eis geregtigheid in Noordwes

Ontstoke inwoners in Mothotlung naby Brits in Noordwes het die plaaslike polisiekantoor bestorm en geeis dat swart jeugdiges in hegtenis geneem word wat van ernstige misdade verdink word.

Die vermeende oortreders is glo aandadig aan die moord en verkragting van ‘n Graad 12 leerling van Pretoria.

Die verminkte liggaam van Reneilwe Seloadi is naby die plaaslike kerk aangetref terwyl haar vriend steeds in ‘n ernstige toestand verkeer.

Die inwoners is ontevrede oor die feit dat die verdagtes vrygelaat is.

Die polisie in Noordwes het intussen nog ‘n vigilante voorval by Marikana veroordeel waartydens twee vermeende moordenaars deur inwoners met klippe doodgegooi is.

Die twee swartes is gestenig nadat hulle glo ‘n 32-jarige man tydens ‘n rusie by ‘n drinkplek met ‘n mes doodgesteek het.

Niemand is in verband met die vigilante-voorval gearresteer nie.

Witte brand op swart kerkgangers los in VSA

Nege swartes is dood toe ‘n wit aanvaller in die geskiedkundige Charleston-kerk in die Amerikaanse staat Suid-Carolina op mense losgebrand het. Die swart kerk is 150 jaar oud.

Die polisie sê reeds dit was ‘n “haatmisdaad”, terwyl die aanvaller steeds op vrye voet is. Hy word beskryf as kort en blond.

Hulle het ook gesê hy is die “enigste verdagte”. Die FBI was ook dadelik op die toneel.

Die voorsitter van die NAACP in Charleston, Dot Scott sê die man het volgens ooggetuies eers ‘n rukkie in die kerk gesit en toe opgestaan en begin skiet.

Die voorval was omstreeks drie-uur vanoggend Suid-Afrikaanse tyd in die Emanuel African Methodiste Episkopale kerk.

Afro-Amerikane aanbid hoofsaaklik in die kerk. Die verdagte, wat as ‘n wit man beskryf word, word deur die owerhede gesoek.

Volgens ooggetuies het die man agt swart kerkgangers doodgeskiet en twee gewond. Een van die twee het later aan skietwonde beswyk. Daar word vermoed dat dit ‘n rassevoorval was.

‘n Senator en sy suster is na bewering onder die slagoffers. ‘n Bomdreigement is later ook naby die toneel van die skietery ontvang.

Die Charleston polisie soek na ‘n wit man in sy twintiger-jare. Die burgemeester van Charleston, Joe Riley, het dit as ‘n hartverskeurende tragedie bestempel.

Die kerk was een van die grootste en oudste swart gemeentes in die streek. Die kerkgebou is in 1891 gebou.