Kategorie: Nuus

BRICS kan G7 binnekort inhaal

Die BBP van die BRICS-lande kan dié van die G7 binne twee of drie jaar oortref, het die Doema se hoof van Buitelandse Betrekkinge, Aleksei Pusjkof gesê.

“In 2014, het die totale bruto binnelandse produk van BRICS-lande 30 persent bereik [van die BBP van die wêreld]. Dit is minder as dié van die G7, maar die verskil is sewe of agt persent. Die gekombineerde BBP van die BRICS-lande, volgens die Internasionale Monetêre Fonds is $32,5 triljoen [met koopkragpariteit bereken]. Die G7 s’n is $34,7 triljoen. Gegewe dat die BRICS-lede meestal veel hoër groeikoerse as die G7 toon, kan ons aanvaar dat in die volgende twee of drie jaar die totale BBP van die BRICS-lande meer as die G7 sal wees,” het Pusjkof aan verslaggewers by die eerste BRICS Parlementêre Forum in Moskou gesê.

Hy het verder gesê dat BRICS die Forum verkieslik jaarlikse moet hou, en as dit gebeur, sal dit help om die wêreld meer regverdig en multipolêr te maak, gebaseer nie op die superioriteit van een land oor die ander nie, maar op die balans van belange.

Die ekonomiese sentrum van die wêreld is aan die verander, en die ontwikkelde Weste sal sy invloed en gesag in die internasionale arena met spelers soos BRICS moet deel, het Pusjkof gesê.

Westerse lande het ten minste €40 miljard verloor weens Amerikaans-geleide sanksies teen Rusland.

Duitsland word veral belemmer om produktiewe samewerking uit te brei.

Die EU verloor ten minste €21 milard weens die sanksies volgens die Spaanse minister van buitelandse sake. Volgens skattings van Japanese ekonome kan die syfer tot soveel as €30 miljard wees.

Die sanksies is ingestel nadat die MH17-vlug bo die Oekraïene afgeskiet is en die VSA Rusland vir die tragedie blameer het.

Rusland het ontken dat hulle verantwoordelik is vir die ramp en dadelik inligting vrygestel wat hulle van blaam onthef. Die VSA weier steeds om inligting oor die gebeurtenis bekend te maak, maar hou steeds vol met sanksies.

Vavi voorspel nuwe vakbondfederasie vir SA

Die voormalige hoofsekretaris van Cosatu, Zwelenzima Vavi het ‘n nuwe vakbondfederasie vir Suid-Afrika voorspel.

Cosatu het die hofbeslissing verwelkom dat die metaalwerkersvakbond, Numsa nie aan die federasie se spesiale nasionale kongres aanstaande maand kan deelneem nie.

Vavi het met die media gepraat nadat Numsa se dringende aansoek om deel te neem aan Cosatu se spesiale nasionale kongres aanstaande maand in die Hooggeregshof in Johannesburg misluk het.

Twee kernkwessies in die saak tussen Cosatu en die metaalwerkersvakbond Numsa was of Numsa se aansoek om deel te neem aan Cosatu se spesiale nasionale kongres aanstaande maand dringend is.

Die ander kwessie was of Numsa by die spesiale kongres kan appelleer teen sy skorsing, en of die vakbond moet wag tot Cosatu se gewone kongres in September.

Waarnemende regter AJ Mbongwe het die dringendheid van Numsa se saak bevraagteken.

Die metaalwerkersvakbond se aansoek is met koste verwerp. Numsa sou tydens die spesiale kongres teen sy skorsing uit Cosatu appelleer.

Die hof het beslis dat die aansoek nie dringend is nie, aangesien Numsa ‘n aantal geleenthede gehad het om appél aan te teken teen sy skorsing.

Numsa se appèl teen sy skorsing uit Cosatu sal in November tydens die federasie se gewone kongres plaasvind.

Numsa sê egter dat daar nie meer kans is om weer deel van Cosatu te word nie.

Die vakbond se hoofsekretaris, Irvin Jim, sê hy is nie baie optimisties dat die appèl suksesvol sal wees nie.

Die Hooggeregshof in Johannesburg het Numsa se aansoek met koste verwerp.

Cosatu sê hy gaan voort met die reëlings vir die konferensie en gaan die week die akkreditasie van afgevaardigdes bevestig.

Die waarnemende hoofsekretaris van Cosatu, Bheki Nthalinthali sê die fokus van die konferensie is eenheid in die organisasie, al gaan sy grootste voormalige lid nie deelneem nie.

Goudmyne wat deur die Kamer van Mynwese verteenwoordig word, asook vier vakbonde, NUM, Amcu, Solidariteit en UASA het ingestem om op 22 Junie met loononderhandelings vir die sektor te begin.

Die onderhandelinge sal na verwagting drie dae duur. Die partye kon egter nie op ‘n voorsitter of plek vir die onderhandelinge ooreenkom nie.

Die Kamer van Mynwese het intussen gesê hulle verwag moeilike salarisonderhandelinge in die goudmynbedryf weens dalende kommoditeitspryse en toenemende wedywering tussen vakbonde.

Geheimediens skuif kameras na bomdreigement

‘n Bomdreigement by die Amerikaanse Withuis het veroorsaak dat ‘n mediakonferensie skielik onderbreek is.

‘n Agent van die Geheimediens het ingekom en almal opdrag gegee om die vertrek te ontruim. Sekuriteitspersoneel en snuffelhonde het die vertrek gefynkam en joernaliste is 20 minute later weer toegelaat sodat die sessie kon hervat.

Die voorval het in die James S. Brady-konferensiekamer plaasgevind nadat ‘n bomdreigement ingebel is na die plaaslike Washingtonse polisiestasie, het die Geheimediens gesê.

Dinsdag se voorval is ongehoord weens die feit dat dit plaasgevind het op kamera tydens ‘n lewendige uitsending.

Dit is die eerste so ‘n geval sedert die Withuis begin het met lewendige televisiedekking van media-inligtingsessies in die 1990’s.

‘n Woordvoerder vir die Geheimediens, Brian Leary het gesê die besluit om slegs die inligtingsessiekamer te ontruim, terwyl Withuisamptenare en die Obamas in ander dele van die gebou aangebly het, was “as gevolg van die spesifieke aard van die bedreiging,” hoewel hy nie kon uitwei nie.

Associated Press se joernaliste het opgemerk dat daar van hulle toerusting en ander items geskuif is, oënskynlik deur Geheimediensbeamptes op soek na potensiële sekuriteitdreigemente.

Baie TV-netwerke het permanente kameras wat in die Withuis se inligtingskamer geïnstalleer is.

Tydens die ontruiming is die kameras na die plafon gerig sodat die inligtingsessiekamer nie meer sigbaar was nie, en daarna heeltemal bedek.

Die Geheimediens wou geen onmiddellike kommentaar lewer oor waarom die kameras bedek is nie.

Inkomstediens gaan voormalige woordvoerder vervolg

Die Suid-Afrikaanse Inkomstediens gaan sy voormalige woordvoerder, Adrian Lackay strafregtelik laat vervolg.

Die SAID sê hy gaan Lackay ook vir twaalf miljoen rand dagvaar, het RSG berig.

Dit volg nadat Lackay vroeër vanjaar ‘n brief aan die parlement gestuur het waarin hy beweer dat die kommissaris van die SAID, Tom Moyane hom opdrag gegee het om die publiek verkeerdelik in te lig.

In die brief, het hy beweer dat British American Tobacco (BAT) die wet moontlik oortree het en dat die waarheid oor die beweerde geheime spioenasie eenheid nog nie onthul is nie.

“Sodra hulle vertroue in ons vermoë verloor om vertroulike inligting oor hulle hou en hulle besluit om nie belasting te betaal nie, wat miljarde rande kan beteken wat hom nie sal raak as persoon nie, maar dit sal skuld vir Suid-Afrika en die armes van hierdie land beteken,” het SAID gesê.

Lackay het bedank voordat hy die brief gestuur het. ‘n Uitvoerende lid van diensverhoudinge, Luther Lebelo sê Lackay se bewerings is versinsels om sommige SAID-werknemers te frustreer en te viktimiseer.

Hy sê Lackay het ‘n geleentheid gehad om verskoning te vra of bewyse te lewer, wat hy gekies het om nie te doen nie.

Rupert sê gaping tussen ryk en arm sal tot afguns, haat lei

Johann Rupert, een van Suid-Afrika se miljardêrs, sê die gaping tussen ryk en arm is besig om te vergroot en dit sal uiteindelik lei tot “afguns, haat en klassekonflik”.

Hy het rykes gemaan om bewus te wees van die komende probleem wat deur rekenaars en robotte versnel sal word.

Lees verder.

Liedjie oor tas vol drank gee aanstoot

’n Zambiese musikant is in hegtenis geneem oor ‘n liedjie wat hy geskryf het en waarin die spot gedryf word met dié land se president Edgar Lungu.

Die 31-jarige Chama Fumba is in Lusaka gearresteer omdat hy pres. Lungu daarvan beskuldig het dat hy te veel drink en onbekwaam vir sy pos is.

Fumba, ook bekend as Pilato, is in hegtenis geneem in Lusaka Maandag.

Hy sal aangekla word omdat sy gedrag waarskynlik ‘n oortreding van die vrede veroorsaak het, het sy prokureur aan verslaggewers gesê by die sentrale polisiekantoor in die hoofstad.

Fumba het gesing dat die president ‘n tas vol drank met hom saamdra.

Fumba kan ses maande tronkstraf of ‘n boete opgelê word as hy skuldig bevind word.

Chama het vroeër geweier om verskoning te vra en gesê hy is bloot besig om sy vryheid van uitdrukking uit te oefen. Die liedjie is verbied op Zambië se nasionale radiostasie.

Onafhanklike kragprodusente aangemoedig

Private belegging in hernubare energie het R193 miljard bereik, het die minister van Energie aangekondig.

Die name van 13 bykomende voorkeurbieërs in die hernubare energieverkrygingsprogram wat onafhanklike kragprodusente aanmoedig om krag te voorsien, is bekendgemaak.

Tina Joemat-Pettersson sê die program se bod Venster 4 sal ‘n bykomende 1084MW van elektrisiteit voorsien aan die nasionale netwerk. Sy het bygevoeg dat die departement van energie 92 hernubare energie-projekte goedgekeur het so ver, en dat die openbare-private vennootskappe in hernubare energie gelei het tot ‘n ekstra 6327MW van kapasiteit sedert 2011.
 
Sy het gesê dat R19.1 miljard is ook bewillig vir sosio-ekonomiese ontwikkeling, wat bestee sal word oor die 20 jaar wat die projekte sal duur, sowel as R6 miljard vir die ondernemingsontwikkelingsinisiatiewe wat sal bydra tot ekonomiese groei, werkskepping, energie-sekuriteit en die toenemende opwekking van skoon elektrisiteit.
 
Regering het sy verbintenis tot hernubare energie-oplossings herbevestig, en die gebruik van onafhanklike kragprodusente sal werkskepping stimuleer, terwyl groen elektrisiteit meer bekostigbaar sal word, het die departement gesê.

Die leiers van die G7 groep van nywerheidslande het intussen aangedui dat hulle beplan om die gebruik van fossielbrandstof in die huidige eeu te beëindig in ‘n poging om klimaatsverandering teen te werk.

Die leiers het in ‘n gesamentlike verklaring aan die einde van hulle spitsberaad in Duitsland gesê steenkoolverbruik moet in die mediumtermyn verminder word.

Hulle sê ook koolstofdioksieduitsette moet teen die middel van die eeu met tussen 40 en 70 persent globaal afneem.

Armer lande, veral in Afrika moet volgens die G7 bygestaan word om skoon tegnologie te ontwikkel en om by klimaatsverandering aan te pas.

Leeukamp sluit, leeu ontsnap uit Karoopark

Die bestuur by die Leeupark noord van Johannesburg het besluit om die leeukamp te sluit waar ‘n Amerikaanse toeris verlede week deur ‘n leeu doodgebyt is.

Die 29-jarige Katherine Chappell is deur die leeuwyfie aangeval toe sy foto’s by die Leeupark geneem het terwyl haar motorvenster wawyd oop was.

Die bestuurder, Andre La Kock, sê daar is besluit om die leeukamp te sluit omdat sommige mense hulle nie steur aan die park se veiligheidsreëls nie.

Intussen is ‘n grootskaalse soektog van stapel gestuur nadat ’n leeumannetjie vermoedelik Vrydag uit die Karoo Nasionale Park buiteBeaufort-Wes ontsnap het.

Volgens ‘n woordvoerder van Sanparke, Fayroush Ludick, het die drie jaar oue leeu deur ‘n gat onder ‘n heining uitgekom en is hy vermoedelik op een van die aangrensende plase.

Spoorsnyers het tekens van die leeu se spoor gevind, maar die soektog word deur die bergagtige terrein bemoeilik, terwyl ‘n soektog met ‘n helikopter ook nog niks opgelewer het nie.

Sanparke sê personeel van die Addo-olifantpark, asook die Bergsebra Nasionale Park, is ook gestuur om te help soek.

Sewe verhoorafwagtendes ontsnap

Die polisie in Gauteng is op soek na sewe verhoorafwagtende gevangenes wat Maandagmiddag polisiebeamptes oorval en uit die Lenasia landdroshof ontsnap het.

Ses van die sewe mans word van huisbraak en diefstal aangekla terwyl die sewende tereg staan op aanklag van roof met verswarende omstandighede.

‘n Interne ondersoek word deur die polisie ingestel om vas te stel of die ontsnapping van die gevangenes aan “nalatigheid” te wyte is.

Vermeende plaasmoordenaars was eers werkers

Die twee vermeende swart moordenaars, Frank Itumeleng (22) en Ben Thabo (19), wat teregstaan vir die moord op ‘n 64-jarige boer van Kuruman, Christo Kruger, het Maandag vlugtig in die landdroshof op Kuruman verskyn.

Kruger is op 28 Mei in sy plaashuis se agterdeur, omstreeks 20:00 doodgeskiet.

Hy en sy vrou, Vera, was alleen in die huis tydens die voorval.

Noord-Kaapse polisiewoordvoerder, Sergio Kock, sê die saak is uitgestel tot 15 Junie vir verdere ondersoek.

Hy sê die verdagtes het voorheen vir Kruger gewerk, maar nie ten tye van die voorval nie.