Skrywer: Dan Roodt
Kloutjie by die oor
Pas is wysigings aan uitkomsgebaseerde onderrig aangekondig, of 19 skole in Noordwes word weens betogings oor dienslewering gesluit. Dit volg nadat van ‘n vyfde skool in enkele weke in dié provinsie vuurgemaak is.
Op aktualiteitsprogramme meld dosente gereeld dat Suid-Afrikaanse studente ‘n agterstand het teen studente wat uit lande soos Zimbabwe en Namibië kom. Reuse-oorbruggingsprogramme verhinder nie grootskaalse druipelinge nie.
Dat wysigings, en selfs die skrapping van uitkomsgerigte onderrig nodig was, is waarskynlik so, maar ‘n groot deel van die kern van die probleem bly skynbaar werksetiek. Daar is goeie en toegewyde onderwysers, maar daar is ander wat skynbaar meen om onderrig te gee behels basies net om elke maand salaris te ontvang.
Die wyse waarop protes aangeteken word, skep egter ‘n bose kringloop. Met volgende jaar se landswye plaaslike regeringsverkiesings onderweg, is daar ‘n traagheid tot ferm optrede, met moontlik die uitsondering gedurende die afgelope wêreldbekertoernooi, skynbaar onder bykans diktatoriale druk van Fifa. Hierdie eietydse besetting is nou iets van die verlede, en die regering moet self sake bestuur.
Presies hoe groot dié uitdaging is, blyk uit die bykans R4 miljard wat dienstegebruikers in die Vrystaat aan hul munisipaliteite skuld. Dié nuus kom te midde van die onthullings dat verskeie Vrystaatse munisipaliteite finale aanmanings van Eskom ontvang het om hul rekenings aan dié kragvoorsiener te betaal.
Dit is voorspelbaar buite die kwessie dat hierdie munisipaliteite basies op die vooraand van die landswye verkiesings nou wanbetalers vir die uitstaande rekenings sal wurg. Wurg sal waarskynlik min oplewer, omdat armoede en die hoë werkloosheidskoers eenvoudig nie sulke bedrae kan oplewer nie.
Die vraag is dus hoe dit moontlik is dat sulke agterstande in die eerste plek kon ontstaan nie. Munisipaliteite word immers uit die staatskas vergoed vir gratis dienste wat aan armlastiges voorsien word. Dit lyk dus of die agterstande ontstaan uit die geledere van mense wat wel die nodige inkomste verdien om te kan betaal. Baie mense maak reeds van voorafbetaalde koepons gebruik. En inwoners wat bloot vergeet om betyds te betaal, sit die volgende dag reeds sonder krag…
Is daar dan ‘n begunstiging? Dat sommige gemeenskappe nie met sanksie getref word nie?
Boonop ruk elektrisiteitsdiefstal deur onder meer onwettige aansluitings veral in Soweto ‘n groot gat in begrotings.
Dit lyk egter of minstens ‘n deel van die probleem aan grypsug toegeskryf kan word. Vanoggend berig Volksblad ook dat die 50 topamptenare van die Mangaung-munisipaliteit saam R50 miljoen aan salarisse verdien. Mangaung word volgende jaar ‘n metro, en dan word die Motheo-distriksmunisipaliteit met sy eie stel hoogsbesoldigde amptenare en amspdraers ingesluit. Boonop was die einste munisipaliteit in die nuus vir rojale kaartjie-aankope vir die pas-afgelope sokker, en ‘n nou reeds berugte ekskursie van senior amptenare na die halfeindstryde en die eindstryd. Dat die sokkerverwante fiasko slegs ‘n druppel aan die emmer teen die groter omvang van die probleem is, is kwalik ter sprake.
Hierdie rojale omgaan met andermansgeld word deur almal, ook die armes wat nie kan betaal nie, asook die wat betaaltraag is of moet boomskraap om op te dok, gesien, en dit stel ‘n baie slegte voorbeeld.
Kunstenaar skok met Auschwitz-video
‘n Kunstenaar het ‘n opskudding veroorsaak nadat sy haar pa van 89, ‘n oorlewende van die brandoffer, by Auschwitz verfilm het terwyl hy sing en dans op die maat van die Gloria Gaynor-treffer I Will Survive.
Jane Korman, ‘n Joodse kunstenaar van Australië, het drie generasies van haar familie verfilm terwyl hulle ‘n lomp danspassie in die bekende konsentrasiekamp in Pole opvoer op maat van die treffer.
Die groepie probeer tevergeefs tyd hou onder die konsentrasiekampingang waaroor geskryf staan “Arbeit Macht Frei”.
Korman sê die video, wat al meer as 200 000 keer op YouTube gekyk is, is ‘n “viering van die lewe en oorlewing.”
Oorlewendes van die brandoffer is glo erg onthuts deur die video. Hulle beswaar is dat dit nie die miljoene Jode wat gely het, respekteer nie.
‘Ons gaan julle f***en wittes doodmaak,’ sê polisieman
‘n Blanke motoris van Durbanville naby Kaapstad is deur ‘n groep polisiemanne aangerand wat ook aan hom gesê het: “Jy dink jy is spesiaal omdat jy wit is. Ons gaan al julle f***en wittes doodmaak.”
Die blanke, mnr. Stewart Robinson, is van die pad afgedwing deur ‘n groep polisiemanne. Hulle het hom in die gesig geslaan en sodoende sy bril gebreek.
Robinson is die eggenoot van Denise Robinson, ‘n DA-LP en woordvoerder oor vroue, jeug, kinders en mense met gestremdhede.
Volgens Robinson het hy Maandag in Durbanville gery teen die spoedgrens van 60 kpu, al langs Wedrenbaanweg.
‘n Polisievoertuig het agter hom stelling ingeneem en hom oor ‘n soliede wit streep probeer verbysteek.
“Daar was geen harde skouer waarop ek kon aftrek nie. Hulle het vlak agter my begin ry en gepoog om my te dwing om stil te hou.”
Robinson het by die Total Durbanville-vulstasie ingetrek en sy motor tot stilstand gebring. “Hulle het my uit my motor gesleep, sonder enige verduideliking. Hulle het my in die gesig geslaan en my bril gebreek.” Robinson moes agterna ‘n kliniek besoek om deur ‘n dokter ondersoek te word.
Blykbaar was die polisiemanne “kwaad” omdat hy nie onmiddellik stilgehou het nie.
Robinson het gesê: “Daar was ‘n halfdosyn getuies. Toe die polisie besef wat hulle gedoen het, het hulle weggery.”
Robinson kon nie hul naamplaatjies of die voertuig se registrasienommer lees nadat sy bril gebreek is nie. Onmiddellik ná die insident het jy ‘n klag van aanranding by die Durbanville-polisiestasie gaan lê.
Cobus Mostert, die eienaar van Total Durbanville, was binne sy vulstasie se kantoor toe hy van ‘n onderonsie buite bewus raak. “Toe ek buite gekom het, was die polisie besig om te vertrek,” het hy gesê. “Daar was vyf of ses van hulle in ‘n Mercedes-minibussie. Ek het die man gehelp. Hy het in die gesig gebloei. Hulle het sy bril afgeruk en hy kon nie behoorlik sien nie. Ek het gehelp om hom na die Durbanville-polisiestasie te neem.”
Volgens Mostert het hy die aanvallers gevra om nie die vulstasie te verlaat nie en ‘n offisier was onbeskof met hom voordat hulle vertrek het.
“Ons het daarin geslaag om die registrasienommer van die voertuig neer te skryf. Hulle was almal in polisie-uniform geklee.”
Mostert meen dat ‘n hele aantal mense die voorval gadegeslaan het en agterna “bang” was om die polisiemanne te oortuig om die aanranding te staak. “Almal was baie bang. Hulle was baie aggressief. Hulle het geweet daar was ‘n klomp getuies.”
Die voorval is egter nie op geslotebaantelevisie by die vulstasie opgeneem nie omdat die kamera deur ‘n afleweringsvoertuig verberg is.
Nog ‘n inwoner van Durbanville, Johan Smit, het die aanranding gesien en het probeer inmeng toe die groep Robinson uit sy voertuig gesleep het.
“Ek het by die vulstasie stilgehou en hy (Robinson) het agter my stilgehou. Agter hom het die polisievoertuig stilgehou. Ek het gesien hoe hulle die sleutels uit sy motor neem en die man begin slaan.” Dit was toe dat ‘n polisieman gesê het: “Jy dink jy is spesiaal omdat jy wit is. Ons gaan al julle f***en wittes doodmaak.”
Smit het gesê hy het aan Mostert gesê om die polisie te bel waarna die polisiemanne in hul voertuig gespring en weggery het.
Die woordvoerder van die polisie in Durbanville, Bernice Laas-Bezuidenhout, het nie gister haar selfoon beantwoord nie.
‘n Beampte by die polisiestasie het bevestig dat ‘n klag gelê is. Die provinsiale polisiewoordvoerder Frederick van Wyk het die voorval bevestig en het gesê dat ‘n polisieondersoek tans aan die gang is.
WB-onttrekkingsimptome
Geïrriteerd? Hartseer? Voel jy leeg en alleen? Jy mag dalk Wêreldbeker-onttrekkingsimptome hê.
Volgens FIFA het Suid-Afrika sy aanbieding van die Wêreldbekersokkertoernooi summa cum laude geslaag met ‘n byna perfekte nege uit 10 vir die land se pogings.
Maar nou sukkel sommige Suid-Afrikaners glo met die vraag: “Hoe kry ek my lewe terug?”
“Die Wêreldbeker-toernooi het ‘n fantastiese, natuurlike impak op die gemoed tot gevolg gehad,” meen Helgo Schomer, ‘n sielkundige in Kaapstad.
“Nou moet ons iets kry om dit te vervang. Want na slegs 31 dae en ‘n paar wedstryde was die Suid-Afrikaners verslaaf aan hierdie euforie.” Volgens Schomer is hierdie tipe verskynsel uiters skaars.
Suid-Afrika het die kans aangegryp om die wêreld te verwelkom as ‘n oënskynlike swart land, alhoewel die bestuur van FIFA, wat die toernooi gereël het, nie swart is nie.
“Ons is sosiale diere. Ons moet erken dat hierdie ervaring nie met enigiets anders vervang kan word nie,” het hy gesê.
“Die Wêreldbeker het gehelp dat ons van al ons alledaagse probleme vergeet vir ‘n oomblik.”
Volgens Charl Davids, van die sielkunde departement aan die Universiteit van die Wes-Kaap, sal mense nou ietwat depressief voel omdat alles na normaal terugkeer.
Suid-Afrika het jare lank reeds uitgesien na een van die grootste sportbyeenkomste in die wêreld en nou is dit skielik verby.
“Hierdie is normaal ná so ‘n groot byeenkoms,” het Davids gesê.
Suid-Afrikaners word aangemoedig om die gees, wat tydens die toernooi geheers het, te laat voortleef.
“Dit gaan ‘n tydjie neem, maar ons sal gou weer begin beter voel,” het Schomer gesê.
Waterwese laat 1miljard verdwyn
Gebrekkige tenderprosedures by die departement van waterwese het gelei tot die wanbesteding van meer as ‘n miljard rand.
Die bevindings is in ‘n verslag wat deur die ouditeur-generaal, Terrence Nombembe aan die Parlement voorgelê is, vervat.
Nombembe het verlede jaar ‘n ondersoek geloods nadat die minister van waterwese, Buyelwa Sonjica ‘n dokument aan hom oorhandig het met bewerings van wanbestuur.
In een kontrak vir rekenaardienste is die kontrak herhaaldelik verleng, wat die koste met sowat 600 persent opgestoot het.
Die departement kon daarbenewens ook nie ‘n ondertekende kontrak met die diensverskaffer verskaf nie.
Volgens Nombembe het die destydse direkteur-generaal belange by ‘n suksesvolle bieër. Nombembe het swak leierskap vir die beweerde diefstal verantwoordelik gehou.
Petrolprys af
Die prys van petrol het om middernag met tussen 15 en 18 sent per liter gedaal.
Die daling is verlede week reeds deur die departement van energie aangekondig.
Die prys van 93 oktaan loodvrye petrol en LRP sal 15 sent per liter minder wees, terwyl 95 oktaan loodvrye petrol se kleinhandelsprys met 18 sent gedaal het.
Die groothandelsprys van diesel het met tussen 15 en 16 sent per liter gedaal.
‘n Liter 95 oktaan loodvrye petrol in Gauteng sal voortaan agt-rand-27 kos.
Vyfde skool afgebrand, 19 gesluit
Negentien skole in Noordwes is vir ‘n onbepaalde tyd gesluit, nadat ‘n vyfde skool deur inwoners van Tlakgameng buite Vryburg aan die brand gesteek is.
Cosatu asook opposisiepartye in Noordwes het die onbepaalde sluiting van 19 skole noord van Vryburg in die provinsie veroordeel.
Inwoners het drie klaskamers, ‘n personeelkamer en stoorkamer by die Sebitlwane-hoërskool tydens ‘n betoging oor dienslewering aan die brand gesteek.
Vier skole is in Mei vanjaar afgebrand toe inwoners begin oproer maak het oor ‘n teerpad. Die gemeenskap eis dat die grondpad wat hulle dorp met Ganyesa verbind, geteer word.
Die LUR vir Onderwys, Johannes Tselapedi, het die skole gesluit en aangevoer dat die situasie nie bevordelik is vir onderrig nie.
Cosatu se provinsiale sekretaris, Solly Phetoe, sê die besluit benadeel die beeld van die plaaslike gemeenskap. Die provinsale leier van COPE, Nikiwe Num, sê die sluiting van die skole is onverantwoordelik, en die regering behoort eerder in gesprek te tree met die inwoners van Tlaakgameng.
Webblad vir plaasmoorde
Die Rustenburgse boer wat die ANC-jeugleier, Julius Malema, by die internasionale strafhof in Den Haag van volksmoord en misdade teen die mensdom gaan verkla het, het ‘n webblad geskep om plaasmoorde in Suid-Afrika te monitor.
Die man, wie se naam nie bekendgemaak is nie, het gevra dat enigiemand met inligting aangaande plaasaanvalle, dié besonderhede vir hom stuur sodat hy weekliks hierdie inligting na ‘n aanklaer van die internasionale strafhof kan aanstuur.
“Die idee vir die weeklikse aanstuur van statistieke aangaande plaasaanvalle aan die aanklaer het sy oorsprong in onvoldoende en onbetroubare statistiek wat deur ons regering verskaf word,” het Fanie van der Walt, die man se regsverteenwoordiger, in ‘n verklaring gesê.
Dié webblad, www.stopafrikanergenocide.co.za, sal ook gebruik word om mense in te lig van verwikkelinge tydens die hofsaak.
Bob gaan diamantreserwes van die hand sit
Zimbabwe se president het Dinsdag gesê dat die land sy reuse-diamantreserwes sal verkoop, ten spyte daarvan dat hulle nie goedkeuring van die wêreld se diamant-beheerliggaam ontvang het nie.
‘n Uitdagende president Robert Mugabe het aan wetgewers gesê dat diamantverkope “groot potensiaal” het om die verpletterde ekonomie nuwe lewe te gee.
Hy het bygevoeg dat Zimbabwe ‘n kwart van die wêreld se diamantvoorraad het.
Die Kimberley-proses sertifiseringskema het nie goedkeuring vir internasionale verkope gegee nie, te midde van aantygings van moorde, menseregteskendings en korrupsie in die reusagtige diamantvelde wat in 2006 in die ooste van Zimbabwe ontdek is.
“Niemand moet ons besluit om ons diamante te verkoop betwyfel nie,” het Mugabe aan wetgewers by die opening van die parlement in Harare gesê.