Senior onderwysbeamptes het na bewering ten minste twee onderwysers aangesê om matriekuitslae te verhoog, het die DA Dinsdag gesê.
Die party is genader deur twee mense wat beweer het dat sommige matriekpunte opsetlik verhoog is, het woordvoerder Desirée van der Walt in 'n verklaring gesê.
Hulle beweer dat die verhogings uitgevoer is in opdrag van beamptes van die departement van onderwys.
Een van die klaers wat geïdentifiseer is as 'n DA-raadslid en oud-onderwyser, het beweer dat kollegas wat wiskunde- en wetenskapvraestelle gemerk het, aangesê is om die punte van swakker matriekkandidate te verhoog.
Die anonieme voormalige onderwyser het gesê kollegas het gekla dat hulle aangesê is om die punte van swakker kandidate te verhoog, soos byvoorbeeld 20% wat opgestoot kan word na 30% wat 'n slaagpunt is.
Die ander klaer, 'n onderwyser wat betrokke was by die merk van geskiedenisvraestelle, het ook bewer dat die departement opdrag gegee het aan die onderwysers dat geen leerling nul uit 30 mag kry vir 'n opstel nie.
Die onderwyser het verder gesê dat hulle opdrag gekry het, dat indien die leerling net een feit kan weergee, hulle 9 uit 30 moes gee – amper 'n slaagpunt. Die punte in elkeen van die onderwysers se vraestelle is later almal na bewering deur die hoofmoderator verhoog.
"Dit verhoog die kommer wat wyd uitgespreek word omtrent die versiersuiker op vanjaar se matriekuitslae," het van der Walt gesê.
Die DA het aan die minister van onderwys, Naledi Pandor, geskryf en gevra vir 'n onafhanklike ondersoek na die eksamens.
Die woordvoerder vir die departement van onderwys, Lunga Mgqengelele, het gesê uMalusi, die kwaliteitsbeheerder vir die nasionale kwalifikasieraamwerk, 'n geakkrediteerde en onafhanklike organisasie was.
"Voordat ons enige uitslae bekendmaak, word dit deur uMalusi nagegaan… wat 'n verslag sal opstel indien enige ongerymdhede vermoed word."
Die departement was steeds besig om sy eie assessering van die matriek uitslae te doen, wat na verwagting teen die einde van Januarie voltooi sal wees.
"Die voltooide assessering behoort aan te dui indien daar enige waarheid is in die onderwysers se bewerings," het Mgqengelele gesê.
Hy het ook 'n beroep gedoen op enige iemand wat ongerymdhede vermoed om dit by uMalusi of by die departement aan te meld.
Leon Panetta, 'n voormalige lid van die kongres en die Withuis se stafhoof is deur Barack Obama gekies om die nuwe hoof van die CIA te wees. Die keuse, wat Maandag bekend gemaak is, het onmiddellik divisie in die party ontbloot nadat twee senior mense gevra het hoekom Obama 'n kandidaat nomineer wat baie beperkte ervaring het van intelligensie aangeleenthede.
Israel het Dinsdag vir die vierde dag voortgegaan met sy grondoffensief in die Gaza strook, ten spyte van nuwe internasionale oproepe vir 'n skietstilstand in 'n konflik waarin meer as 540 Palestyne reeds dood is.
Ten minste 445 karre is aan die brand gesteek oor Nuwejaarsnag in Frankryk. Dit is 'n styging van 20% teenoor verlede jaar, maar daar was relatief min botsings met die polisie, het die ministerie van binnelandse sake en polisie Dinsdag gesê.
Een van die Kongo se hoof rebelle militêre leiers het laat Maandag ontken dat Laurent Nkunda, die hoof van die Nasionale Kongres vir die Verdediging van die Mense (NKVM) deur 'n ontevrede groep uit sy posisie verwyder is.