Etiket: Internasionale nuus

Libië het Maandag aangedui dat hulle beplan om 'n mediamaatskappy te nasionaliseer wat deur die seun van die land se leier, Moeammar Ghadaffi, besit word. Dit sal die pers weer onder 'n staatsbeheerde monopolie bring.

Die regering sal beheer neem van satellietkanale, radio en koerante, asook 'n drukpers wat deur Al-Ghad bestuur word en wat twee jaar gelede deur Seif al-Islam, begin is, het die kabinet in 'n verklaring bekend gemaak.

Seif al-Islam, wat deur vele as 'n hervormer beskou word, het by verskeie geleenthede 'n oproep om persvryheid en die media se onafhanklikheid in Libië gedoen

In 2007, het Al-Ghad twee baanbrekerkoerante die lig laat sien wat in die eerste maande van hulle verskynig 'n hele reeks taboes gebreek het deur kritiek teen senioramptenare te publiseer. 'n Privaatsatellietkanaal is ook opgerig.

Die verdwyning van die Air France straler wat van Rio de Janeiro na Parys onderweg was, bly steeds 'n raaisel. Die vliegtuig het oor die Atlantiese Oseaan naby die Brasiliaanse eiland Fernando de Noronha, vermis geraak sonder dat die loodse 'n noodroep kon uitstuur.

Die seine wat kort voor die verdwyning ontvang is, was outomatiese seine van die onderhoudstelsel en is nie deur die lugbeheerpersoneel gelees totdat hulle ure later eers besef het dat die loodse nie betyds, soos geskeduleer, ingeradio het nie.

Die Airbus A330-200, met 228 passasiers aanboord, het vermoedelik in 'n donderstorm verdwyn. Volgens een van die outomatiese seine het die vliegtuig kajuitdruk verloor. Geen teken van 'n bom, kaping of sabotasie word nog vermoed nie.

Die swart kassie waarop die vliegtuig se laaste minute opgneem is, sal ook nooit die geheimsinnige verdwyning kan opklaar nie, aangesien dit waarskynlik op die bodem van die Atlantiese Oseaan lê. Dit is ook nog nie seker of die vlug deur satelliete of ander vliegtuie se radar geregistreer is nie.

Die vliegtuig was reeds te ver van land om op Brasilië en Senegal se radar te verskyn soos algemeen met trans-Atlantiese vlugte die geval is.

Die vlug AF 447, was veronderstel om 11:10 op Charles de Gaulle by Terminaal 2D aan te kom. 'n Priester in 'n swart gewaad het die wagtende familielede en kennisse egter tegemoet gegaan.

Pierre-Henri Gourgeon, uitvoerende hoof van Air France-KLM, het aan die hordes joernaliste en fotograwe gesê hulle is erg ontsteld en het belowe om die slagoffers se naasbestaandes by te staan.

Daar was 32 nasionaliteite aanboord wat 58 Brasiliane, 61 Franse en 2 Amerikaners insluit. Die vliegtuig het vermis geraak naby die Kaap Verdiese Eilande waar die trope soms kwaai en onvoorspelbare donderstorms veroorsaak wat tot 55 000 voet kan styg, hoër as wat kommersiële vliegtuie kan vlieg.

Die loods was ervare en het reeds 11 000 vliegure agter die rug gehad, wat 1 100 ure op Airbus se 330 stralers insluit. Gourgeon het aan die Franse LCI nuusdiens gesê dit kon nie aleen weerlig of turbulensie wees nie, maar eerder 'n samekoms van verskeie faktore wat die

Hans Weber, hoof van Tecoplugvaartkonsultante in San Diego, meen foutiewe outomatiese seine wat deur die Airbus 330 se vlerkflappe gestuur word, verhoed die loods om beheer te neem en kan veroorsaak dat foutiewe inligting ook deurgestuur word.

Twee Quantasstralers het byna uit die lug geval omdat die loodse, ná hulle foutiewe seine ontvang het, maneuvers toegepas het wat die vliegtuie verlede jaar neus eerste grondwaarts gerig het.

Weber sê indien die inersiesensor aangedui het dat die vliegtuig vinnig spoed verloor en dus noodgedwone moet duik om lugspoed op te tel en daar terselftertyd 'n afwaartse trek vanweë turbulensie uitgeoefen word, is dit fataal. "Dit sal moeilik wees om van te herstel," het hy gesê.

Barack Obama het vandeesweek die druk op Israel verskerp om hulle vestigingsbeleid te staak en die besoekende Palestynse leier, Mahmoed Abbas, verseker dat Amerika ’n Palestynse staat steun.

Obama se samesprekings met Abbas kom tien dae nadat hy die Israelse premier, Benyamin Netanyahu, ontvang het.

Israel het die Amerikaanse regering se jongste pleidooi dat die Joodse staat die bou van nedersettings staak, verwerp. Netanyahu en die Amerikaanse regering sit steeds vas oor ’n strategie vir vrede.

In ’n poging om die vredesproses weer aan die gang te kry, het Obama dit duidelik gemaak dat hy sal aanhou om druk op Netanyahu te plaas vir die algehele staking van die oprigting van Joodse nedersettings in die besette Wesoewergebied en dat hy die totstandkoming van ’n Palestynse staat nastreef.

“Ons kan nie meer talm nie . . . Ons moet hierdie ding weer op dreef kry,” het Obama Donderdag aan verslaggewers gesê terwyl Abbas, ’n Westers-gesteunde gematigde wat verswak word deur die meer onversetlike Hamas se beheer van die Gasastrook, langs hom in die Ovaalkantoor gesit het.

Obama het benadruk Israel se verpligtinge ingevolge die “padkaart” vir Midde-Oosterse vrede sluit die staking van Isreali vestings in, asook om te verseker dat daar ’n lewensvatbare Palestynse staat kom. Hy het gesê Palestyne moet meer doen om hul veiligheidsmagte te versterk en die anti-Israelse “opsweping” wat hy meen soms in skole en moskees voorkom, te bekamp.

Met sy eerste besoek aan Washington sedert Obama in Januarie aan die bewind gekom het, sou Abbas na verwagting redes aanvoer waarom die VSA ’n strenger houding teenoor Netanyahu moet inneem. Die Israelse premier lei ’n regsgesinde koalisie met kernpartye wat ten gunste van die setlaars is.

Netanyahu se regering het Donderdag Hillary Clinton, die Amerikaanse minister van buitelandse sake, se reguit opmerking dat alle nedersetting moet ophou, verwerp.

Beleidsverskille het seldsame onenigheid tussen die VSA en Israel aan die lig gebring, maar dit bly onduidelik hoe hard Obama bereid is om die Joodse staat te druk om toegewings te maak terwyl sy administrasie sy Midde-Oosterse strategie finaliseer.

Goewerneur-generaal Michaelle Jean, Brittanje se koningin Elizabeth II se verteenwoordiger as staatshoof in Kanada, het dié week 'n stuk robhart uitgesny en dit rou geeët. Jean, 'n bruin vrou, se gebaar is deur die EU-woordvoerder as "te eienaardig om te noem" beskryf.

Die goewerneur-generaal wou Maandag haar ondersteunig vir Kanada se robjagters toon nadat die EU vroeër die maand gestem het om 'n verbod op robprodukte in te stel omdat dit so wreed is.

Toe sy Dinsdag gevra is of sy dit as 'n boodskap aan Europa bedoel het, het sy geantwoord dat 'n mens "daarvan kan maak wat jy wil".

Honderde lede van die inheemse gemeenskap was byeen vir 'n fees waar Jean gekniel het by 'n paar robkarkasse. Sy het daarna 'n tradisionele oeloelem gebruik om die vleis mee te sny. Nadat sy die vleis gesny het, het sy aan die vrou neffens haar gevra of sy die hart kan eet.

Sy het 'n stuk heel ingesluk en daarna verklaar dat dit soos soesji smaak en bygevoeg dat dit ryk is aan proteïen.

Rebecca Aldworth, direkteur van die Internasionale Menslikheidsvereniging in Kanada, sê Jean se optrede was misleidend omdat die inheemse bevolking reeds deur wetgewing beskerm word.

'n Robbejagter van Newfoundland het die gebaar geniet en gesê dit sal omgewingsbewustes skok, maar glo dat Jean sterk genoeg is vir om kritiek te weerstaan.

Indië se top diplomaat in Australië het Vrydag verklarings van die polisie verwerp dat rassisme nie 'n faktor in 'n golf van geweld teen studente van die subkontinent is nie.

Die Indiese hoëkommissaris in Australië Sujatha Singh het na afloop van 'n ontmoeting met die Australiese polisie gesê daar sal meer patrollies in konflikareas in Melboerne wees om aanvalle teen Indiërs die hoof te bied. Die reeks aanvalle het 'n uitbarsting in Indië veroorsaak.

Die skuif kom na ongekende druk van Nieu-Delhi. Minister van buitelandse sake S.M. Krishna het geëis dat Indiese studente deur Australiese owerhede opgepas word in dié land se stweede grootste stad.

Die aanvalle kom reeds vir meer as 'n jaar lank voor, maar die onlangse aanval op 'n student, Sravan Kumar Theerthala, wie se lewe aan 'n draadjie hang nadat hy met 'n skroewedraaier by 'n partytjie gesteek is, was die lasste strooi.

Die Australiese polisie het deurentyd ontken dat ras 'n rol in die aanvalle speel, en gesê dit is toeval dat Indiese studente eenvoudig dikwels hulleself op die verkeerde tyd en plek bevind. Hulle reis dikwels laat in nag en dra items soos selfone en iPods met hulle saam.

Singh het die verklarings verwerp na haar ontmoeting met senioroffisiere, en gesê Indiese studente word geteiken vanweë rassisme.

"Daar is 'n rassitiese element berokke by sommige aanvalle, alhoewel baie aanvalle opportunisties is," het sy gesê. Sy het gesê sy sal polisieoptrede fyn dophou en het studente aangemoedig om haar te kontak indien die ondersoeke nie bevredigend verloop nie sodat sy hulle stryd kan ondersteun.

Nog 'n student Jayasanka Bagpelli, wat ook by die partytjie was waar Theerthala getseek is, het die polisieverklaring dat ras geen rol speel nie, verwerp.

Hy sê Indiërs is aangesê om die partytjie te verlaat, voordat die skroewedraaier gaan haal is. Theerthala is in die kop gesteek en is tans in die intensiewe eenheid van die Melbourne Royal-hospitaal.

Eerste minister Kevin Rudd het gesê hy het geloof dat die polisie hulle werk na die beste van hulle vermoë sal doen.

Wanneer dit kom by die kies van 'n lewensmaat, is dit klaarblyklik waar dat teenoorgesteldes mekaar aantrek.

Wetenskaplikes het in ’n Brasiliaanse studie bevind dat mense onbewustelik meer geneig is om ’n lewensmaat te kies wie se genetiese samestelling van hul eie verskil.

Daar is bewyse dat egpare ’n groter waarskynlikheid het om genetiese verskille te hê in die MHC-streek, ’n DNS-streek wat die immuunstelsel beheer, as paartjies wat lukraak met mekaar vergelyk is.

“Dié verskynsel is waarskynlik ’n evolusionêre strategie om gesonde voortplanting te verseker, aangesien genetiese verskeidenheid voordelig vir babas is,” het dr. Maria da Gra?Bicalho en haar kollegas van die Universiteit van Parana in Brasilië gesê.

“Hoewel ons graag wil glo mense kies mekaar oor ooreenkomste, dui ons navorsing dit is eerder die verskille wat suksesvolle voortplanting verseker.

“Dit dui verder die onbewustelike strewe na gesonde kinders is ’n belangrike faktor in die uitkies van ’n lewensmaat.”

Wetenskaplikes het gesê dit is nog onduidelik watter seine jou liggaam uitstuur om mense wat geneties van jou verskil na jou toe aan te trek, maar liggaamsreuk of selfs gesigstruktuur kan moontlik ’n rol speel.

Bicalho, wat haar bevindinge Maandag by ’n konferensie van die Europese Gemeenskap van Menslike Genetika in Wene sal voorlê, het gesê haar span het genetiese data van 90 egpare met dié van 152 lukraak-gegenereerde kontrolepaartjies vergelyk.

Hulle het bevind egpare het beduidend meer verskille in die MHC-streek getoon.

Suid-Koreaanse magte het hule gereedheidsgrondslag Donderdag tot die hoogste vlak opgeskuif sedert 2006 nadat Noord-Korea aangekondig het hulle alle vaartuie wat hulle skepe wil onderskep, sal aanval.

In antwoord het Suid-Korea aangekondig dat hulle by die 90 lande wat aangebied het om vaartuie te inspekteer omdat hulle moontlik verbode wapens dra, sal aansluit.

Noord-Korea het aangedui dat die Suide se deelname aan die VSA se Proliferasie Veiligheidsinisiatief, 'n prelude is tot 'n seeblokkade en dat dit die vooruitsig van 'n seegeveg in sy westelike waters sal verhoog.

Die Noorde het Woensdag aangekondig dat hulle die wapenstilstand van 1953, die einde van die Koreaanse Oorlog, sal ophef. Die amptelike media het Donderdag laat blyk dat hulle voorberei op 'n Amerikaanse aanval.

Die VSA ontken dat hulle 'n militêre aanval beplan. Die Rodong Sinmun-koerant, die hoof nuusbron in die Noorde, het in 'n hoofberig gesê dat 'n toevallige skermutseling tot 'n kernoorlog kan lei.

Die twee Koreas verkeer tegnies steeds in 'n staat van oorlog aangesien die wapenstilstand nooit deur 'n vredesverdrag opgevolg is nie.

Daar is tans 28 500 Amerikaanse troepe in Suid-Korea en 50 000 in Japan. Hulle is binne bereik van Noord-Korea se missiele. 'n Woordvoerder van die Suid-Koreaanse magte, wat anoniem gebly het soos regeringsriglyne vereis, het gesê hulle het lugafweermissiele en artillerie opgeskerp by basisse naby die westelike seegrens met Noord-Korea.

'n Torpedojaer is ook ontplooi volgens die JoongAng Ilbokoerant, die grootste nuusbron in die Suide. Die Suide het aangedui dat hulle streng teen die Noorde se provokasie sal optree en het gesê tesame met die VSA sal hulle 'n aanval kan afweer.

Noord-Korea het in 2003 en 2006 ook die wapenstilstand opgehef. Die wapenstilstand dek egter nie die westelike kus nie en Noord-Korea het in 1999 en 2002 die maritieme dispuut gebruik om twee dodelike seeaanvalle uit te lok.

Hillary Rodham Clinton het reeds gewaarsku dat daar "gevolge" sal wees maar dit is steeds onduidelik watter optrede die Veiligheidsraad beplan. Die vyf permanente Veiligheidsraadlidlande asook Japan en Suid-Korea het Dinsdag moontlike sanksies en stappe bespreek vir 'n nuwe Veiligheidsraadresolusie.

'n Diplomaat wat by die gesprekke betrokke is maar wat anoniem wou bly, het aangedui dat Rusland en China dit eens is dat stappe geneem sal moet word.

Japan se eerste minister Taro Aso het gesê Japan mag dalk hulle eie sanksies instel, maar sal wag om te sien wat die inhoud van die VN se voorstelle is.

Die Chinese regering is bekommerd oor China se afhanklikheid van ingevoerde ruolie en het brandstofbesparingstandaarde aangekondig wat selfs meer streng is as dië wat president Obama verlede week bekend gemaak het.

Onder die nuwe plan sal Chinese motorvervaardigers brandstofverbruik met 18% moet verbeter teen 2015 het 'n hoofbeplanner van China se brandstofbesparingsmaatreëls aangedui. Die plan sal vroeg volgende jaar bekend gestel word.

Die gemiddelde brandstofverbruik van gesinsmotors is aansienlik laer as in die VSA, omdat belastings wat op inhoudsmaat gehef word, veroorsaak dat mense kleiner voertuie aanskaf.

Klein motortjies betaal tans slegs 1% aan verkoopsbelasting, terwyl viertrekmotors 40% moet opdok.

Talle besluitnemers in China sien 'n strategiese en geopolitieke behoefte om China se olie-invoere te beperk. Verhoogde aanvraag beteken reeds dat China drie-vyfdes van hulle olie moet invoer, waar die land tot 1995 selfvoorsienend was.

Die olie word daarbenewens langs seeroetes vervoer wat deur die VSA se vloot beheer word en is afkomstig uit lande wat polities onstabiel is. Dan is daar ook die kwessie van besoedeling en dat China moet help om aardverwarming te beheer met behulp van strenger brandstofbesparingsmaatreëls.

Die details van China se nuwe plan gaan Chinese motorvervaardigers bevoordeel bo multinasionale vervaardigers, sê kenners. In die segmente waar multinasionale vervaardigers teenwoordig is, naamlik in die middelslag en klein sektor, gaan die nuwe bepalings tot 26% se brandstofbesparing vereis. In die heel klein voertuigmark waar China uitblink, gaan net 9% vereis word aan besparing.

Kenners meen Japannese, Koreaanse en Duitse motorvervaardigers gaan waarskynlik oorweeg om die heel klein mark te betree indien hulle sukkel om aan die nuwe standaarde te voldoen.

Etniese profilering, is heeltemal nutteloos om terreurverdagtes uit te snuffel, het 'n nuwe studie aangetoon. Dit het nog tot op hede na geen veroordeling in Europa gelei nie.

Die studie wat onderneem is deur die Open Society Institute wat deur sakemanbiljoenêr George Soros befonds word, argumenteer dat rasprofilering hoofsaaklik 'n openbare betrekkinge oefening is.

Dit laat mense glo veiliger voel om Moslems uit te sonder na 'n terreuraanval soos die een in 2006 waarin Londen se ondergrondse treinstelsel en busse geteiken is.

Die studie getiteld "Ethnic Profiling in the European Union", wys daarop dat profilering teenproduktief is omdat dit nog tot "geen inhegtenisnames gelei het nie".

 

Voorts vervreem die optrede spesifieke gemeenskappe wat lei tot 'n "stygende gevoel van marginalisering van 'n minderheid en immigrantegemeenskappe".

Ironies genoeg het rasprofilering die afgelope paar jaar afgeneem volgens die navorsers. Hulle meens omdat stereotipes 'n belangrike faktor bly in besluitneming, word onskuldige minderhede nietemin dikwels lastig geval.

Die Wêreld Sakespitsberaad se konferensie oor aardverwarming wat onlangs in Kopenhagen gehou is, se deelnemers het klaarblyklik warmer sake as die klimaat hanteer. In die aande het die sakemanne, politici en regeringsamptenare naamlik die stad se prostitute gaan opsoek.

Volgens 'n sekswerker wat haarself 'Mejuffrou Dina' noem, was hulle buitengewoon besig tydens die konferensie. "Politici moet ook ontspan na 'n lang dag," het sy gesê.

'n Deense koerant het verskeie gesellinagenstskappe en prostitute geskakel om te verneem of hulle besiger as gewoonlik was gedurende die aardverwarmingskonferensie en almal het saamgestem dat konferensies in Kopenhagen goed is vir die ekonomie.

Dorit Otzen, van Reden International sê groot byeenkomste in Kopenhagen lok meer sekswerkers. "'n Klomp mans op een plek beteken meer werk vir prostitute. Terselftertyd het ons 'n regering wat nie prostitusie wil verbied nie, dus gaan besoekers gebruik maak van prostitute," het Otzen gesê.

Egipte se minister van kultuur Faroek Hosni, is een van die groot gunstelinge om UNESCO te lei. Joodse groepe in Duitsland, Frankryk en Israel beskou hom egter as 'n teenstander van Israel en 'n kultuuroorlog woed tussen sy voorstanders en die Duitse Kultuurraad vanweë sy anti-Semitiese uitsprake.

Olaf Zimmermann, voorsitter van die Kultuurraad het gesê dit sal 'n fout wees om Hosni te kies. Zimmermann het gesê hy glo nie dat Hosni kultuurdiversiteit, een van UNESCO se ideale, sal bevorder nie

Hosni is 'n kunstenaar van beroep en is sedert 1987 Egipte se kultuurminister. Hy is 'n liberale stem in Egiptiese politiek en is bekend daavoor dat hy gekant is teen hoofbedekkings vir Egiptiese vroue. Hy het verlede jaar verklaar dat Israeliboeke in Egiptiese biblioteke verbrand behoort te word.

Charlotte Knobloch, hoof van die Joodse Raad in Duitsland, het in 'n radio-onderhoud gesê Hosni is duidelik anti-Semities en anti-Joods en moet "gediskwalifiseer"word vir die posisie.

Die kwessie het egter gekompliseerd geraak nadat die Israelse koerant Haaretz nuus gelek het wat daarop dui dat Isreal se konserwatiewe eerste minister Benjamin Netanyahu ingestem het om Hosni se kandidaatskap te ondersteun in 'n geheime ooreenkoms met die Egiptiese president Hosni Moebarak.

Honderde duisende Pakistanse burgerlikes wat in Swat vasgevang is in ’n offensief teen die Taliban staar ’n katastrofe in die gesig, het ’n menseregtegroep Dinsdag gesê terwyl gevegte in dié oorloggeteisterde streek opgevlam het.

Die operasie in die Talibanvesting Swat, sowat 120 km noordwes van Islamabad, is die leër se grootste poging om die Taliban-insurgensie terug te stoot. Die insurgensie het vrae laat ontstaan oor die toekoms van dié kernmoondheid.

Die offensief het volgens die provinsiale regering gelei tot ’n uittog van 2,3 miljoen mense, maar sowat 200 000 inwoners is glo steeds in die vallei.

Erge tekorte aan kos, water en medisyne dra by tot ’n reuse- humanitêre krisis vir die burgerlikes wat vasgekeer is, het die Amerikaanse groep Human Rights Watch gesê.

“Mense wat in die Swat-konfliksone vasgekeer is, word deur ’n humanitêre katastrofe in die gesig gestaar, tensy die Pakistanse leër die aandklokreël ophef,” het mnr. Brad Adams, die groep se direkteur in Asië, gesê.

Intussen is ses soldate in die streek Suid-Waziristan aan die Afgaanse grens dood in gevegte met die Taliban.

 

'n Kragtige bom het  Woensdagoggend in Lahore geboue uitmekaar geruk en talle leweloos gelaat.

 

Die bom het in die kantore van die noodpolisiediens ontplof en Pakistan se hoofintelligensieagentskap se gebou is ook erg beskadig.