’n Ondersteuner van Manchester United in Nigerië het die dood van vier mense veroorsaak toe hy in sy minibus in ’n groep Barcelona-ondersteuners ingejaag het nadat sy sokkerspan die Kampioeneliga-eindstryd verloor het, het die polisie gister gesê.
Die groep in die dorp Ogbo het Barcelona se oorwinning gevier ná Woensdagaand se wedstryd toe die minibus in hulle ingejaag het.
’n Woordvoerder van die polisie het gesê tien mense is beseer en die bestuurder is in hegtenis geneem.
“Die bestuurder het verby die groep gery en toe ’n U-draai gemaak en in hulle ingejaag,” het sy gesê.
Barcelona het Manchester United met 2-0 geklop in wat as ’n “droom-eindstryd” bestempel is tussen twee van Europa se beste spanne.