Die Britte raak meer ongeskik. Dit is nou volgens 'n meningspeiling wat gister die lig gesien het waarin aangetoon word dat byna 'n driekwart van die bevolking glo dat goeie maniere weer op skool aangeleer moet word. 'n Derde dink dat slegte maniere ant-sosiale gedrag bevorder.
Meer as 90% van die respondente glo dat ouers nie meer hulle telge opvoed met goeie maniere nie en dat bekende persoonlikhede 'n slegte voorbeeld stel as rolmodelle.
Spoeg en swets is as die ergste gebreke uitgewys, terwyl om toustaan te fnuik en die afwesigheid van dankie en asseblief ook genoem is.
Die Sentrum vir ontwikkeling en onderneming, ʼn Johannesburgse liberale dinkskrum, meen dat grondhervorming mag veroorsaak dat Suid-Afrika nie meer mededingend op landbougebied sal kan produseer nie. Groot gebiede produktiewe landbougrond sal vir jare nie bewerk word nie, want ten minste vyftig persent van suikerrietland is onderhewig aan grondeise en so ook groot bosbouplantasies wat deur papiervervaardigers besit word.
Volgens die sentrum se direkteur, Ann Bernstein, “word die ekonomiese lewensvatbaarheid van vele plattelandse gebiede bedreig, wat tot negatiewe gevolge vir die breër ekonomie en maatskappy kan lei”.
“Dit alles geskied te midde van ʼn globale styging in voedsel- en kommoditeitepryse. Suid-Afrika loop nie net belangrike nuwe geleenthede mis nie, maar die land is ook besig om sy eie mededingendheid en vermoë op landbougebied te ondermyn,” lui Bernstein se verklaring.
Van 2004 tot 2007 het die staat se grondherverspreidingsprogram met slegs ʼn halwe persent toegeneem van 4,3% tot 4,7%. Intussen het die staat vir homself die teiken gestel om teen 2014 tot 30% van landbougrond in blanke hande aan swartes oor te dra.
Die laaste fase van grondrestitusie wat landelike eise behels, het groot dele produktiewe grond “effektiewelik vir jare wat kom, bevries”. Die sentrum het statistiek van die SA Suikerrietboerevereniging aangehaal wat toon dat 50% van alle suikergrond onder grondeise verkeer, met slegs 4% wat reeds oorgedra is. Byna die helfte van die papiermaatskappy Mondi se aangeplante woude staan onder grondeise terwyl ten minste 17,5% van Sappi se grond in dieselfde situasie verkeer.
Volgens die sentrum kan Suid-Afrika uitsien na twee toekomspaaie: “niemand wen nie” en “almal verloor. Geen van dié twee is wenslik nie en albei bedreig landbouproduksie, beleggersvertroue, rasseverhoudinge en die vooruitsigte van Suid-Afrika se landelike armes.”
'n Topamptenaar van die departement van landbou is in die Transvaalse Hooggeregshof in Pretoria aan moord skuldig bevind. David Linley Sonkosi het sy vrou Pumla Mkatali doodgeslaan ná 'n beweerde verhouding met 'n ander man deur haar kop en lyf herhaaldelik teen die vloer te stamp en deur haar met 'n leergordel te slaan.
Sonkosi is 'n direkteur in die Landboudepartement. Nada thy sy vrou doodgemaak het, het hy op die telefoon gespog dat Pumla nie meer met ons is nie en daaroor gelag.
Waarnemende regter Tholi Vilakazi het Sonkosi skuldig bevind en nie sy bewerings aanvaar dat hy sy vrou net een keer gestoot het sodat sy haar kop teen die muur gestamp het nie.
'n Patoloog het getuig dat haar beserings nie per ongeluk deur 'n enkele stamp teen die kop veroorsaak kon gewees het nie maar die gevolg was van aanhoudende aanranding met herhaalde slae teen die kop en lyf.
Nie eens Thabo Mbeki se ampswoning is veilig teen Suid-Afrika se alomteenwoordige metaaldiewe nie. Aluminiumkabels wat R30 000 werd is, is van die dak van die presidensiële woning, voorheen bekend as Libertas, in Goewernementslaan, Pretoria, gesteel. Die aluminiumkabels is drie weke gelede geïnstalleer as 'n vorm van weerligafleiding om elektriese toebehore te beskerm.
Die kontrakteur het intussen sy personeel van die Bryntirionlandgoed waar die huis geleë is, verwyder omdat hulle onveilig gevoel het en dat hulle voorraad en toerusting dalk gesteel kon word.
Hoewel daar 'n polisiekantoor op die perseel is, is die kontrakteur, mnr. Kevin Bredenkamp, aangesê om die diefstal by die Sunnyside-polisiestasie aan te gee.
Wagte by die hek kontroleer blykbaar net inkomende voertuie vir verdagte stowwe of voorwerpe en nie uitgaande voertuie nie.
Vyf mense is deur veiligheidsmagte gedood in die hoofstad van Somalië, Mogadisjoe, tydens 'n hongeropstand. Die opstand het uitgebreek as gevolg van stygende voedselpryse en rekordinflasie.
Die polisie het inbeweeg om te keer dat die opstand heeltemal buite beheer raak.
Opstandelinge glo dat die dollar verantwoordelik is vir al hulle probleme.
VN-monitors sê graanpryse het tussen 110% en 375% gestyg die afgelope jaar.
Die hoof van die internetmaatskappy Yahoo!, Jerry Yang, het nou 'n toeskietliker houding jeens Microsoft ingeneem, nadat die programmatuurreus oor die naweek sy aanbod vir Yahoo! teruggetrek het.
Yahoo! se aandeelprys het gister met vyftien persent gedaal en sommige aandeelhouers is onsteld hieroor. Twee van die grootste aandeelhouers het onlangs aan die New York Times gesê dat Microsoft se prys van $33 per aandeel min of meer reg was en dat hulle bereid was om te verkoop, maar dat die raad van Yahoo! die aanbod verwerp het.
Sommige ontleders meen dat Microsoft tog uiteindelik daarin sal slaag om die internetmaatskappy te koop aangesien hy nodig het om 'n internetstrategie teen die heersende speler op die web, Google, te ontwikkel. Die mark vir internetadvertensies is besig om snel te groei en Yahoo! se kliëntebasis op die net verteenwoordig 'n aanloklike manier vir Microsoft om daaruit munt te slaan.
Ten minste 15 000 mense is gedood in die Mianmar-sikloon en die dodetal sou waarskynlik verder styg soos wat amptenare kontak maak met die gebiede wat die ergste getref is, het die militêre regering se buitelandse minister gister gesê.
Die sikloon is die ergste om Asië te tref sedert 1991, toe 143 000 mense in Bangladesj gesterf het.
Volgens die minister van buitelandse sake, Nian Win, is 10 000 mense net in een dorp, Bogalai, dood.
Die Verenigde Nasies, sowel as Mianmar, die voormalige Birma, se bure val tans oormekaar om kos, skoon water en skuiling aan oorlewendes te verskaf. Honderde duisende mense is dakloos gelaat deur die sikloon wat winde van 190 km per uur en golwe so hoog as 3,5 meter geproduseer het.
Volgens die Vrystaatse polisie het drie gewapende mans gister 'n bank in Winburg van 'n onbekende hoeveelheid geld beroof.
'n Polisiewoordvoerder, sersant Mmako Mophiring, sê die drie mans het teen 9.30 by die tak ingestorm en 'n vroulike werknemer gedwing om 'n onbekende bedrag geld aan hulle te oorhandig waarna hulle gevlug het.
Mophiring het voorts verklaar dat die rowers deur 'n ander man opgelaai is in 'n voertuig wat later agtergelaat is. Dieselfde voertuig is voorheen as gesteel in Bainsvlei, Bloemfontein, aangemeld.
Munisipale werkers het gister die Pretoriase middestad met rommel bestrooi deur vullishouers om te keer. Omtrent drieduisend permanente en kontrakwerkers het die strate ingevaar, verkeer ontwrig en algemene chaos veroorsaak.
Die vakbond Samwu het 'n memorandum aan die Tshwane-metroraad oorhandig waarin hul eise vervat is. Werkers hou nie van die alternatiewe dienstruktuur van die raad nie en beweer dat dit 'n paar mense verryk terwyl dienslewering agteruitgaan.
Samwu wil ook alle tydelike kontrakpersoneel permanent aangestel sien.
'n Bende wat aangekla is van twee moorde en drie-en-dertig rooftogte het gister uit die Johannesburgse Landdroshof ontsnap. Die vier mans, wat ongewapen was, het hul bewakers oorrompel, hul voetboeie losgemaak en daarna uit die hof gehardloop.
'n Hofbeampte het die toneel "soos iets uit Rambo of James Bond beskryf toe die mans oor die beskuldigdebank gespring het. Voordat hy uit die hof gehardloop het, het een van die aangeklaagdes die ondersoekbeampte met sy losgemaakte voetboeie oor die kop geslaan.
Volgens kaptein Julia Claassen van die Gautengpolisie is die omstandighede rondom die ontsnapping nog nie duidelik nie, maar hulle is besig met 'n intensiewe ondersoek.
