Internasionale nuus Archives - Page 445 of 464

British Council nekomgedraai

Die Russe het die British Council versoek om al hul streekskantore in Rusland te sluit. Die Russiese ministerie van buitelandse sake het in ‘n verklaring gesê dat dié instelling onwettig in Rusland werk en Russiese belasting- en ander wette en die Weense Konvensie van 1963 oortree. Die ministerie het die kantore in Ekaterinburg en St. Petersburg gesluit verklaar vanaf 1 Januarie 2008.

Die Britte het met uiterste verontwaardiging gereageer op die aankondiging en gesê die sluiting is verregaande. ‘n Segspersoon vir die Britse ambassade in Moskou het verklaar dat "die Council ‘n nie-politieke kultuurorganisasie is" wat "mense help" om Engels te leer. Hy het ook gewaarsku dat Rusland se optrede "in stryd is met internasionale reg". James Kennedy, direkteur van die British Council in Rusland, het beaam dat die besluit nie geregverdig kan word nie en dat die Council sedert 1994 in Rusland is danksy ‘n bilaterale kultuurooreenkoms tussen die twee lande.

Rusland volg die voorbeeld van Belarus wat in 2000 die laaste British Council kantoor in dié land gesluit het. Gemaskerde belastingpolisie, geklee in swart, het reeds drie jaar gelede op die Council se hoofkantoor in Moskou toegesak en betogings is verlede week voor die Britse ambassade gehou, terwyl die Britse ambassadeur, Tony Brenton, gereeld lastig geval word.

In Augustus verlede jaar het die Kremlin besluit om die BBC se FM-uitsaaifrekwensie op te skort vanweë anti-Russiese propaganda wat die diens klaarblyklik aanhoudend uitgesaai het. In die lig van die besluit om die British Council se aktiwiteite ook in te perk, is dit duidelik dat die aanstaande president, Dmitri Medvedev, nie beplan om gou ‘n einde te maak aan die gespanne verhoudinge wat tussen Rusland en Brittanje heers nie.

‘n Russiese woordvoerder van buitelandse sake het gesê dat die Council se werkswyse "abnormaal" is omdat dit vanuit Britse konsulate in Rusland bedryf word. Hy het bygevoeg dat dit in stryd is met die Weense Konvensie wat konsulêre bedrywighede reël. Denis MacShane, eertydse Britse minister vir Europa, het gesê dat die British Council nog lank ná die huidige Russiese politieke leiers se vertrek sal bly bestaan. Of dit só sal wees, sal net die toekoms leer aangesien al 15 streekskantore gesluit gaan word en selfs die Russiese personeel die trekpas gaan kry.

Zimbabwe noem Merkel ‘n ?Nazi?

Merkel – ‘n ‘Nazi-oorblyfsel’

Die Zimbabwiese regeringskoerant, die Herald, het na die Duitse kanselier, Angela Merkel, as ‘n “Nazi-oorblyfsel” verwys. Die Duitse regering het daarop gereageer en dit as “onaanvaarbaar” beskryf.

Dieselfde koerant het die inligtingsminister van Zimbabwe, Sikhanyiso Ndlovu, aangehaal waar hy vir Merkel van “rassisme van die eerste orde” beskuldig het. Dit alles was in reaksie op Merkel se kritiek jeens Zimbabwe tydens die EU-Afrikaspitsberaad toe sy gemeen het “Zimbabwe berokken die beeld van die nuwe Afrika skade”.

Volgens Ndlovu demonstreer Merkel se aanmerkings haar “fascistiese en rassistiese neigings”.

Hy het voortgegaan deur te sê: “Sy behoort haar mond te hou oor Zimbabwe of haarself te verskoon. President Mugabe is sonder twyfel ŉ onteensegbare ikoon van Afrika-nasionalisme, ŉ Pan-Afrikaan, ŉ revolusionêr en bevryder van Zimbabwe, tesame met wyle dr. Joshua Nkomo."

“Hy het die spitsberaad in eie reg as ŉ staatsman van hoogstaande reputasie bygewoon. By die spitsberaad het hy die kalklig gesteel deur sommige Europese staatshoofde en sy kritici, Angela Merkel, inkluis, soos dwerge te laat lyk.”

Volgens hom praat Duitsland uit sy beurt as hy Zimbabwe bespreek en behoort hom by die ooreengekome beginsel van die spitsberaad te beperk het.

“Zimbabwe is nie ŉ kolonie van Duitsland nie. Dit is rassisme van die eerste orde deur die Duitse staatshoof,” het Ndlovu voortgegaan.

Gister het die Duitse minister van buitelandse sake, Frank-Walter Steinmeier, die Zimbabwiese chargé d’affaires na die buitelandse ministerie in Berlyn ontbied. “Dit is baie duidelik aan hom gestel dat aanmerkings soos dié oor die kanselier op geen manier verdra kan word nie,” het ‘n regeringswoordvoerder gesê.

Mugabe het by sy terugkeer in Harare egter ongestoor voortgegaan met sy tirade teen Westerse lande, onder andere Brittanje. “Ons het Brittanje ŉ neerlaag toegedien, ons was die oorwinnaars oor die Britte. Wat is Brittanje na alles? Hulle dink die Britse Ryk is nog aan die gang,” het hy aan die Herald gesê.

раскрутка сайта

Mugabe stuur Merkel in haar peetjie

Lissabon – ŉ Uitdagende Robert Mugabe het die Europese leiers Sondag vertel dat hy geen lesse wil ontvang oor hoe om Zimbabwe te regeer nie, in antwoord op die Duitse kanselier, Angela Merkel, en ander EU-leiers se beskuldigings dat hy menseregte in sy land vertrap.

Mugabe het oudergewoonte sy vuis uitdagend in die lug gesteek en breed geglimlag toe hy gevra is watter boodskap hy vir Europa het op die tweede en laaste dag van die EU-Afrika-spitsberaad.

“Wat menseregte en goeie regering betref, bepaal Afrika sy eie beleid, uit eie vrye wil,” het Zimbabwe se omstrede president gesê, soos hy aangehaal is deur twee EU-diplomate wat na sy toespraak geluister het tydens die eerste Euro-Afrika-spitsberaad in sewe jaar.

Die Weste en menseregtegroepe het Mugabe beskuldig van wydverspreide menseregteskendings en dat hy sy land se ekonomie geruïneer het, maar hy word deur baie in Afrika as ŉ held beskou.

Die Suider-Afrikaanse Ontwikkelingsgemeenskap (SAOG) het gepoog om tussen die Zimbabwiese se regering en die opposisie te bemiddel.

Die eerste minister van Brittanje, Gordon Brown, het die vergadering uit protes teen Mugabe se deelname geboikot en die Duitse kanselier Angela Merkel het die spitsberaad Saterdag uitgedaag om die menseregtevergrype in Zimbabwe aan te spreek toe sy gesê het: “Die situasie in Zimbabwe rig skade aan die beeld van die nuwe Afrika aan.”

Maar Mugabe is soos volg deur EU-diplomate aangehaal: “Dink die Duitse kanselier en die ander pro-Gordon Brown-mense werklik hulle weet beter as SAOG en die Afrika-unie, ons moet hierdie vermetelheid beveg.”

Vorige pogings om ŉ spitsberaad tussen die wêreld se grootste handelsblok en sy armste kontinent te hou, het misluk omdat Brittanje en sekere EU-state geweier het om dit te by te woon indien Mugabe uitgenooi sou word, terwyl Afrikaleiers gesê het hulle sal nie kom as Mugabe weggewys word nie.

Volgens Mugabe is die EU se “arrogansie”, en nie Zimbabwe nie, te blameer vir die oponthoud in die reël van die spitsberaad.

“Diegene wat van gelykheid praat, het gepoog om hul eie wil op Afrika af te dwing en het saamgeflanste klagtes teen Zimbabwe gelê,” het Mugabe gesê.

“Ons ken ons verantwoordelikhede; ons hoef nie lesse oor vrede en veiligheid te ontvang nie,” het hy bygevoeg.

Die EU se hoof van buitelandse beleid, Javier Solana, het weereens nadat Mugabe gepraat het sy kommer oor dié kwessies uitgespreek. “Die EU is bekommerd oor die verslegting van die ekonomiese, humanitêre en politieke situasie in Zimbabwe,” het Solana aan die Europese en Afrikaleiers gesê. “Na ons mening, is die verslegting die gevolg van ŉ krisis wat goeie regering betref,” het hy gesê.

Die president van die Europese Kommissie, Jose Manuel Barroso, het aan ŉ nuuskonferensie aan die einde van die spitsberaad, verwysende na Mugabe, gesê dat hy nie kan verstaan waarom diegene wat vir die vryheid van hul land geveg het wel vryheid aan hul eie mense weier nie.

Mugabe het alle plase wat aan blankes behoort gekonfiskeer tydens sy “grondhervorming” en volgens die opposisieparty, die Beweging vir Demokratiese Verandering, verkiesingsbedrog in die vorige verkiesing gepleeg. Aanstaande jaar word daar weereens in Zimbabwe verkiesing gehou en Mugabe is reeds besig om die opposisiegroepe te onderdruk, luidens die BDV.

турецкая баня цена topcargo развод

EU wil Afrika as ‘gelyke’ behandel

Amado, gelas met buitelandse sake

Sewe jaar ná die eerste ontmoeting in Kaïro het Europeërs en Afrikane weer in Lissabon byeengekom vir die jongste EU-Afrikaspitsberaad om te probeer om verslegtende betrekkinge te heel en ‘n nuwe strategiese bondgenootskap te sluit. Alhoewel die EU steeds Afrika se grootste handelsvenoot is, het ‘n minder kieskeurige China, met aansienlike investering, na die derde plek opgeskuif.

Regerings in lande soos Angola, die DRK en Algerië baat reeds by Chinese geld. Sanusha Naidu en Martyn Davies het verlede jaar in die South African Journal of International Affairs laat blyk dat China in 2002 met Sinopec ‘n kontrak van $525m gesluit het om die Zarzaitine-olieveld in Algerië te ontwikkel. In Januarie 2005 het China se Eximbank ‘n lening van $1bn aan Angola verleng en later verdubbel.

Meer as 70 staatshoofde sal by die grootste diplomatieke samekoms ooit in Portugal teenwoordig wees. Brittanje sal nie deur Gordon Brown verteenwoordig word nie, maar het wel ‘n afvaardiging gestuur. Brown weier om aan dieselfde tafel as Mugabe te sit ten spyte daarvan dat Brittanje Mugabe oorspronklik aan bewind geplaas het.

Die reisverbod teen Zimbabwe se hoë amptenare wat die afgelope vyf jaar geld, is tydelik opgehef vir die beraad, maar die sanksies wat die EU ingestel het as straf teen Mugabe se regime se menseregteskendings, bly onveranderd. Mugabe het reeds Donderdagaand in Portugal aangekom, maar hy is deur ‘n sydeur weggelei om die talle joernaliste wat op sy aankoms gewag het, te vermy.

José Socrates, Portugal se premier, wil graag die post-koloniale verhouding agterlaat en ‘n werklik gelyke bongenootskap tussen Europa en Afrika tot stand sien kom. Hy get gesê dit sal nie "’n strategie vir Afrika wees nie, maar met Afrika." Talle betogings teen Mugabe se teenwoordigheid word beplan en nie net Zimbabwe nie maar die toestand in Darfoer wat nie op die agenda sal wees nie, is een van die strydpunte.

Minister Cravinho, belas met samewerking in Portugal, het egter benadruk dat die beraad nie oor eng kwessies gaan nie, maar dat die groter geheel belangrik is. Vrede en sekuriteit, demokrasie en menseregte, handel en nywerheid, klimaatsbestuur en energie, asook migrasie en arbeid, sal die vyf hooftemas wees wat bespreek sal word. ‘n Gemeenskaplike strategie sal Sondag aangekondig word tesame met ‘n plan van aksie wat oor die volgende drie jaar sal strek, tot en met die volgende beraad wat vir 2010 in Afrika beplan word.

Ongelukkigheid heers in sekere Afrikalande oor die wyse waarop die EU voorkeurhandelsbetrekkinge tydens voorbereidende ontmoetings probeer afdwing. Suid-Afrika en Namibië het onttrek aan samesprekinge en die hoof van Oxfam se EU-kantoor, Luis Morago, sê Afrikalande "verkeer onder geweldige druk om [ooreenkomste] te onderteken" wat nie in hulle guns sal wees nie. Die AU-voorsitter, Alpha Oumar Konare, het vroeër in Midrand te kenne gegee dat Afrika nie met voorskrifte tevrede sal wees nie.

Libië se leier het reeds Donderdagoggend (letterlik) sy tent opgeslaan in Lissabon om gaste daar te ontvang. Hy was die eerste gas om op te daag by die EU-Afrikaspitsberaad. Indien die EU nie ‘n beter alternatief as China vir Afrika bied nie, is Moeammar Khadaffi darem gereed vir enige gebeurlikheid.

Johan Botha, ‘n triomf in Wene

Johan Botha

Die Weense Staatsopera het pas begin met ’n grootse poging om Richard Wagner se Der Ring des Nibelungen oor ’n periode van twee jaar op te voer. Die première van Die Walküre het die afgelope naweek plaasgevind. Nog selde was daar soveel spanning en afwagting voor die première van ’n opera opvoering. Franz Welser-Möst was die dirigent en Sven-Eric Bechtolf verantwoordelik vir die regie. Johan Botha, wat die hoofrol van Siegfried gesing het, is Saterdagaand staande toegejuig.

Kanselier Gusenbauer en die Weense elite het almal Saterdag se opvoering bygewoon. Der Ring des Nibelungen is een van die grootste uitdagings wat ’n operahuis kan onderneem. Nina Stemme (Sieglinde), Eva Johansson (Brünnhilde) en Juha Uusitalo (Wotan) het saam met Botha gesing.

Saterdag se première het wonderlik begin. Johan Botha en Nina Stemme het hulleself in die eerste bedryf oortref en is albei tydens die eerste pouse minute lank staande toegejuig.

Daar was egter ook onverwagte drama toe Juha Uusitalo, wat die rol van Wotan gesing het, se stem in die tweede bedryf begin verdwyn het. Hy het al sagter gesing en die gehoor het hom begin uitjou. Voor die begin van die derde bedryf het Holender, direkteur van die Staatsoperahuis, en dirigent Welser-Möst op die verhoog verskyn en om verskoning gevra. Uusitalo se stemprobleme is aan ’n slegte verkoue toegeskryf. “Sangers, dokters – en ook operadirekteure – is maar net mense,” het Holender verskonend afgesluit.

Die opera het voortgegaan. Intussen is die Duitse sanger, Oskar Hillebrandt, wat besig was om ’n pizza elders in Wene te eet, inderhaas op sy selfoon gekontak en gevra om vir die stomme Uusitalo in te staan. Uusitalo was steeds op die toneel en het gemaak of hy sing, maar in die orkesruimte het Hillebrandt in sy aandpak die res van die aand al die sangwerk gedoen.

Volgens regisseur Bechtolff is die konflikte wat in Der Ring uitgebeeld word argetipiese menslike konflikte en dus nie ver verwyderd van ons kontemporêre wêreld nie. “Dit is die verhaal van die mensdom: wie is ons, hoe moet ons lewe en waarheen is ons op pad?”

Dit is die sesde keer dat die Weense Staatsoperahuis Wagner se hele Ring opvoer. Die Walküre is vir die eerste maal in 1877 daar opgevoer. In 1879 het hulle die siklus afgesluit met die Götterdämmerung.

Johan Botha, wat in 1965 in Rustenburg gebore is, het al op die ouderdom van 13 begin sing. Hy het in 1990 vir die eerste keer in die buiteland opgetree en het in Februarie 1996 sy debuut in die Weense Staatsoperahuis gemaak. In Junie 2003 het hy die jongste Kammersänger ooit geword. Hy tree oral in Europa en die VSA op. Hy beskik oor ’n geweldige repertoire en het al saam met die beroemdste dirigente in die wêreld opgetree.

смеси

Sarkozy wens Poetin geluk

Knapgedaan!

Nicolas Sarkozy het dit pas byna onmoontlik gemaak vir die oorblywende 27 lidlande van die EU om verder druk op Poetin te plaas om sogenaamde verkiesingsbedrog te ondersoek ná die Russiese president se wegholoorwinning. Duitsland en die VSA was besonder krities oor die wyse waarop die verkiesing gevoer is en volgens wat berig word was George Bush nie baie vriendelik met sy Russiese ampsgenoot toe hy hom telefonies gelukgewens het nie. Die Franse president het Poetin egter hartlik geprys vir die tweederdemeerderheid wat hy behaal het.

Sarkozy se vriendelike ondersteuning van Wladimir Poetin sal ‘n gemeenskaplike posisie deur die EU bemoeilik omdat dit in skrille kontras met die Duitse houding teenoor Poetin staan. Portugal, wat tans die roterende presidentskap van die EU hou, het in ‘n versigtig bewoorde verklaring gesê dat alles nie volgens internasionale norme feil was nie, maar Rusland het vrywillig erken dat daar enkele probleme kon gewees het.

Voorts het die Portugese verklaar dat die media, opposisiepartye en nie-regeringsorganisasies in sekere gevalle "ingebind" was voor die verkiesing. "Gemeet aan ons maatstawwe en standaarde was dit geen vrye, geen gelyke en geen demokratiese verkiesing gewees nie," het Thomas Steg, Duitse regeringswoordvoerder volgehou. Rusland is wat hom betref nie ‘n demokrasie nie. Dat talle Afrikalande soos die DRK en Namibië ook geen demokrasieë is nie, maar volle Duitse ondersteuning geniet, is nie oorweeg nie.

Bush het sy besorgdheid teenoor Poetin laat blyk tydens hul gesprek. Dit is ook bekend gemaak tydens die perskonferensie wat in Washington gehou is waarin die VSA besonder krities was oor die verloop van die Russiese stemming.

русские бани

Sarkozy se eierdans

‘n Delikate verhouding

Die Franse president is tans op ’n amptelike besoek in Algerië. Hy het gister in ’n toespraak voor Franse en Algerynse sakelui die koloniale stelsel van die verlede as “uiters onregverdig” bestempel. Hy het kolonialisme verder beskryf as ’n sisteem wat “in stryd staan” met die Franse beginsels van vryheid, gelykheid en broederskap.

Hy het egter beklemtoon dat daar binne hierdie stelsel vele Franse burgers was wat baie geheg was aan Algerië voor hulle die land moes verlaat. Die Algerynse onafhanklikheidsoorlog het “ontelbare slagoffers” aan beide kante meegebring. “En vandag wil ek, wat in 1962 sewe jaar oud was, al hierdie slagoffers gedenk,” het die president gesê.

Sarkozy het verder bevestig dat Frankryk vandag kontrakte ter waarde van meer as vyf biljoen Euro met Algerië sal onderteken. Sowat 100 Franse sakemanne vergesel die Franse president tydens hierdie staatsbesoek. Die kontrakte handel hoofsaaklik oor die oprigting van moderne infrastruktuur soos die bou van tremstelsels, werk aan die moltreinstelsel van Algiers, die bou van paaie en spoorweë, asook fabrieke, damme en kragsentrales. Daar sal verder ’n ooreenkoms geteken word ten opsigte van samewerking oor kernkrag.

Die Franse president het Algerië se stryd teen “barbaarse terrorisme” die afgelope paar jaar in hulle eie land geloof en gesê dat “elke vorm van rassisme, Islamhaat en anti-Semitisme" beveg moet word. Vir hom is Islamhaters en anti-Semiete ewe dom en haatdraend. “Die Algerynse regering se oorwinning oor terrorisme is ’n groot sukses vir ons almal, want ’n Taliban-regering in Algiers sou nie net ’n tragedie vir Algerië gewees het nie, maar ook ’n katastrofe vir al die lande rondom die Middellandse see,” het die Franse president vervolg.

Hierdie is Sarkozy se sewende besoek aan Algerië en reeds die tweede amptelike besoek sedert hy vroeër vanjaar president van Frankryk geword het. Verhoudinge tussen die twee lande was nog altyd delikaat, veral sedert onafhanklikheid in 1962. Kort voor Sarkozy se aankoms hierdie week het die Algerynse minister verantwoordelik vir die welsyn van oud-soldate, Mohammed Chérif Abbas, vir verleentheid gesorg toe hy na Sarkozy se Joodse herkoms verwys het.

Volgens hom was dit “die Joodse lobby” aan wie Sarkozy sy verkiesing as president te danke had. Hierdie uitspraak van die Algerynse minister het hewige reaksie in Frankryk uitgelok en organisasies soos die Bond van Menseregte het ’n beroep op Sarkozy gedoen om sy besoek aan Algerië af te stel. President Bouteflika het sy minister egter tereggewys en Sarkozy telefonies verseker dat Abbas se uitspraak “glad nie” die Algerynse standpunt verteenwoordig nie. Die Franse president het gevolglik besluit om met sy besoek voort te gaan.

Sedert oud-president Jacques Chirac in 2005 wetgewing ingevoer het wat “die positiewe rol van kolonialisme” sou uitlig (dit is sedertdien gekanselleer) het ’n groepie Algerynse politici aangehou om “verskonings” van Frankryk te eis.

Sarkozy sal later vandag Algerynse studente toespreek. Hy sal ook die Romeinse ruïnes van Tipaza besoek, sowat 70 km wes van Algiers. Die Franse skrywer Albert Camus was baie lief vir hierdie dorpie. Daarna sal hy ’n gedenksteen vir Algeryne, wat tydens die onafhanklikheidsoorlog van die vyftigerjare die lewe gelaat het, besoek. Sarkozy keer môre na Frankryk terug.

jackpot 6000 Фільчаков прокурор

Gesogte Duitse prys aan Tutu

‘Rooi Heidi’ en Nujoma

Nie alleen bevorder die Duitse minister wat bekend staan as "Rooi Heidi", Heidemarie Wieczorek-Zeul, grondhervorming in Namibië omdat die verspreiding van eienaarskap daar volgens haar "ongelyk" is nie, maar sy bevorder ook "wêreldvrede". Vir elkeen wat onderlê is in ou Koue Oorlog-terme, moet haar woorde bekend klink, so asof sy uit die ou Sowjetunie ontsnap het.

Wieczorek-Zeul beskou ook die Anglikaanse Tutu as "’n simbool vir vrede en geregtigheid in die wêreld". Die Zeit het pas aan Desmond Tutu ‘n gesogte Duitse prys oorhandig, naamlik die Marion Doenhoff-Prys vir Internasionale Versoening en Begrip. Doenhoff was ‘n bekende en gerespekteerde Duitse joernalis en mede-uitgewer van Die Zeit tot en met haar dood op 92-jarige ouderdom in 2002. Tutu het die prys Sondag in ontvangs geneem.

Maandag sal hy saam met FW de Klerk in Berlyn optree wanneer ‘n yslike granietblok uit Suid-Afrika onthul sal word ter bevordering van "wêreldvrede". Die toekenning aan Tutu is des te meer eienaardig omdat die rol van die Anglikaanse Kerk in die aanstigting van terreur teen wit teikens welbekend is, uit die St. Pauluskatedraal geloods is en in detail op ANC Today behandel word.

topcargo отзывы

Poetin wen oorweldigend

Poetin stem in Moskou

MOSKOU – Wladimir Poetin se Russiese Eenheidsparty het gister ŉ oorweldigende meerderheid in die parlementêre verkiesings behaal en sodoende die weg gebaan vir die Russiese leier om in beheer te bly, selfs na die beëindiging van sy presidentstermyn.

Die uitslag volg na ŉ Kremlinveldtog wat die president ferm ondersteun het. Poetin is veral bevoordeel deur Rusland se stygende olie-inkomste waardeur die land in ŉ stewiger internasionale posisie geplaas is.

“Die stem het die hoofidee bevestig: dat Wladimir Poetin die nasionale leier is, dat die volk sy beleid onderskryf en dat hierdie beleid sal aanhou,” het die partyleier en parlementêre speaker, Boris Grislof gesê nadat uitgangsopnames aangekondig is.

Verskeie opposisieleiers het die Kremlin van verkiesingsbedrog beskuldig en die Amerikaanse Bush-administrasie het vir ŉ ondersoek na verkiesingsongerymdhede gevra. Die leier van die Russiese Kommunistiese Party, Gennadi Zioeganof het die verkiesing bestempel as “die onverantwoordelikste en vuilste” in die post-Sowjettydvak.

Met stembriewe in 64,4 persent van die kiesafdelings wat getel is, loop die Russiese Eenheidsparty voor met 62,8 persent, gevolg deur die Kommuniste met 11,7 persent, het die Sentrale Verkiesingskommissie gesê.

Die Kremlin het die verkiesing as ŉ plebisiet oor Poetin se byna agt jaar as president voorgestel – met die belofte dat ŉ groot oorwinning hom op een of ander manier sal toelaat om as leier aan te bly as sy tweede termyn aanstaande jaar verstryk.

Poetin word grondwetlik verbied om vir ŉ derde agtereenvolgende termyn te staan, maar duidelik het hy ondersteuning om aan bewind te bly. ŉ Beweging het oor die afgelope paar weke ontstaan om hom aan te moedig om ŉ “nasionale leier” te word, maar dit is nog onduidelik watter pligte en magte dit sou behels.

Volgens die meningsopnames sal die Russiese Eenheidsparty oor ŉ oorweldigende meerderheid in die Staatsdoema of laer huis van 450 setels beskik. Die Kommuniste gaan 57 setels hê.

Die ander twee pro-Kremlinpartye – die nasionalistiese Liberaal-Demokratiese Party en populistiese Nét Rusland – lyk asof hulle ook die parlement gaan haal, met onderskeidelik 8,8 persent en 8 persent.

Een Liberaal-Demokratiese Party-afgevaardigde sal Andrei Loegowoi wees, ŉ voormalige KGB-beampte en die vernaamste verdagte in die vergiftiging van die Kremlinkritikus Alexander Litwinenko verlede jaar in Londen. Rusland het geweier om Litwinenko aan Brittanje te oorhandig en die Doemasetel verskaf aan hom immuniteit teen vervolging.

Dit is egter aan die lig gekom dat Litwinenko ‘n betaalde Britse agent was wat blykbaar 2000 pond per maand vir sy dienste ontvang het. Dié inligting is deur die Daily Mail in Brittanje bekend gemaak.

Geen ander partye kon die sewepersentdrempel om setels in die parlement te behaal, verbysteek nie. Beide liberale opposisiepartye is uitgesluit, aangesien voorspel word dat hulle elk nie meer as 2 of 3 persent van die stemme gaan ontvang nie.

Vele Russe het Sondag gekla dat hulle onder druk geplaas is om te gaan stem, met onderwysers, dokters en ander wat gesê het dat hulle deur hul base aangesê is om by hul werkplekke te gaan stem.

Volgens Alexander Kinef, ŉ politieke deskundige van die verkiesingsmonitorgroep Golos, is dosyne kiesers betaal om vir Poetin se Russiese Eenheidsparty te stem. In die dorp Pestowo in die westerse Nowgorod-streek, het kiesers gekla dat hulle stembriewe ontvang het wat reeds aan die Russiese Eenheidsparty uitgemaak was.

In Tsjetsjnië, waar die stempersentasie meer as 99 persent was, het getuies verslag gedoen oor verkiesingsbeamptes wat stembriewe ingevul en in busse geplaas het in die streekshoofstad Grozni.

Daar was ŉ gespanne, gedempte atmosfeer by sommige stemlokale. Jelena, ŉ 32-jarige bestuurder van St. Petersburg, het geweier om haar van te verskaf uit vrees vir politieke weerwraak omdat sy vir die liberale Jablonko-party gestem het.

“Ons leef in ŉ land waarin demokrasie en spraakvryheid afwesig is,” het sy gesê.

Vele kiesers was huiwerig om hul stem te bespreek, wat ŉ verskuiwing sedert die laat tagtigerjare verteenwoordig toe die Russe luidkeels oor hul regering gekla het. Een bejaarde dame, ŉ veteraan van die verdedigingsnavorsingsinstituut, het geweier om haar naam te verskaf en het net erken dat sy vir Jablonko gestem het omdat niemand anders wil luister nie.

Die owerhede, het sy gesê, sal nie toelaat dat Jablonko enige setels verwerf nie.

“Dis waarom ons omtrent 300 gekke, spyt dit my om te sê, in ons Doema het,” het sy gesê. “En ek glo nie vir Poetin nie: Hy is ŉ gewone man, ons moet hom nie absolute mag gee nie.”

Poetin, wat verantwoordelik gehou word vir die herstel van Rusland na die armoede en onsekerheid van die negentigerjare, geniet egter steun van vele Russe, ten spyte van die kritiek.

“Vandag is alles helder en stabiel in die lewe. Die president se woorde kom altyd ooreen met wat hy doen. Wat die ander kandidate betref, weet ons nog nie waarheen hulle ons wil neem nie,” het Raisa Tretijakowa, ŉ 61-jarige pensioenaris in St. Petersburg gesê.

In die VSA het die Bush-administrasie Sondag ŉ beroep op Rusland gedoen om bewerings dat die stem gemanipuleer is, te ondersoek.

“In die aanloop tot verkiesingsdag, het ons ons kommer uitgespreek oor die gebruik van staatsadministratiewe hulpbronne ter ondersteuning van die Russiese Eenheidsparty, die vooroordeel van media in staatsbesit of onder staatsinvloed, intimidasie van die politieke opposisie en die gebrek aan gelyke geleenthede wat deur opposisiekandidate en –partye ervaar is,” het Gordon Johndroe, segsman vir die Amerikaanse Nasionale Veiligheidsraad gesê.

Die stempersentasie was omtrent 62 persent Sondag, volgens die Sentrale Verkiesingskommissie, teenoor 56 persent in die vorige parlementêre verkiesing vier jaar gelede.

Alle setels sal toegeken word volgens die persentasie stemme wat elke party ontvang het; in vorige verkiesings is die helfte van die setels toegeken aan kandidate wat in spesifieke kiesafdelings gestaan het, wat enkele grapmakers toegelaat het om verkies te word. Ongeveer 109 miljoen mense is stemgeregtig.

Die Organisasie vir Veiligheid en Samewerking in Europa, wat beskou word as die Weste se mees gesaghebbende verkiesingsmonitor, het planne om waarnemers te stuur gekanselleer.

Poetin beweer die kansellasie is deur die Verenigde State bewimpel om die verkiesing in ŉ slegte lig te probeer stel. Maar die OVSE sê Rusland het die toestaan van visums so lank vertraag dat die organisasie nie in staat sou gewees het om die verkiesingsvoorbereidings sinvol te beoordeel nie.

Kies my of chaos

Wladimir Poetin

Die Russiese president Wladimir Poetin het Donderdag ’n beroep op die Russe gedoen om Sondag tydens die algemene verkiesing in die land te kies tussen sy party of ’n terugkeer na “die vernedering” en “die disintegrasie” van die verlede.

Gari Kasparof, voormalige wêreldskaakkampioen, het op dieselfde dag ná sy vrylating uit die tronk gesê Poetin maak hom skuldig aan “diktatoriale” optrede en het belowe “om die stryd verder te voer.” Kasparof is vir vyf dae opgesluit omdat hy aan ’n onwettige betoging deelgeneem het.

Poetin het tydens ’n toespraak wat op televisie uitgesaai is sy landgenote aangespoor om vir sy Verenigde Rusland-party te gaan stem. Hy het dit verder duidelik gemaak dat hy nie gaan poog om ná 2008 as staatshoof aan te bly nie. Hy het nie laat blyk wie hom moontlik kan opvolg of hoe sy eie toekoms daar gaan uitsien nie. Tans is daar oproepe vir hom om in ’n hoedanigheid as “nasionale leier” aan te bly. Na afloop van Sondag se verkiesing sal Poetin besluit of hy tot 2008 president gaan bly en of hy dalk gaan uittree om ’n gewone parlementslid te word. Ander voorstelle doen ook tans die rondte oor hoe Poetin moontlik die grondwet, wat hom verbied om vir ’n derde termyn as president aan te bly, kan omseil. Hy kan dalk eerste minister word of voorsitter van Verenigde Rusland, die party wat tans oor 60% van kiesers se steun beskik.

Poetin het in sy toespraak gewaarsku teen magsoorname deur die liberale, wat in die negentigerjare die septer onder Boris Jeltsin geswaai het. Volgens hom sal dit die gebied verder destabiliseer. Hy het die afgelope paar dae dikwels gewaarsku teen Russe wat die Weste slaafs navolg en bereid is om Rusland te verkoop, in die naam van ekonomiese opheffing. Die kanse is egter maar skraal dat die liberale Sondag skoonskip maak. Die liberale partye gaan na verwagting slegs tussen 1% en 2% van die stemme kry. Poetin het mense verder herinner aan die ekonomiese stabiliteit wat onder sy bewind ingetree het en hoeveel hy in die stryd teen terrorisme en korrupsie reggekry het.

’n Paar uur later is Kasparof, wat ook ’n kandidaat in die verkiesing is, vrygelaat. “Dit gaan nie net hier oor my nie,” het hy gesê. “Die regering het ’n gevaarlike fase betree wat al meer na ’n diktatuur begin lyk.” Gorbatsjof het op sy beurt Kasparof se inhegtenisname veroordeel en die regerende party gekritiseer.