Afrikaanse nuus Archives - Page 98 of 166

Praag wens Parti Québecois geluk!

PRAAG het die Parti Québecois gelukgewens met sy uitstekende verkiesingsvertoning tydens provinsiale verkiesings in Kanada. In sy reaksie op Twitter vroeg vanoggend, het die leier van PRAAG, dr. Dan Roodt, gesê: “Ek ondersteun Québekaanse separatisme, wat die saak vir ‘n Afrikanervolkstaat kan versterk. Félicitations au Parti Québecois!”

Die Afrikaanse aksiegroep het al dikwels die ooreenkomste tussen nasionale minderhede wat deur groter volkere omring word beklemtoon, soos dié tussen Afrikaners, die Québecois, die Vlaminge en die Katalane.

Roodt sê: Ons beskou die oorwinning van madame Pauline Marois as nie net goed vir die Québekane nie, maar ook vir die wêreldwye beginsel van selfbeskikking. Afrikaners, nes die Québekane, word omring deur honderde miljoene onderdane van die Britse Statebond wat Engels op ons afdwing en ons ekonomiese en kulturele vryheid deur rassistiese en chauvinistiese wetgewing beperk. Dit wil egter nie sê dat ons Suid-Afrika se totalitêre houding jeens veeltalgigheid met die meer verligte Kanadese weergawe wil vergelyk nie, maar ‘n klein volk en ‘n klein kultuur kan net binne ‘n eie staat vry wees.”

Dr. Roodt het ook ‘n beroep op die Afrikaner-separatistiese party, die Vryheidsfront Plus, gedoen “om te leer uit die welslae van die Parti Québecois en sy oortuigende oorwinning oor liberalisme, ten einde die Afrikaner se bevryding uit die kettings van die Engelse Statebondstaat van 1910 te verhaas. Ons kan ook liberalisme verslaan, net soos die Parti Québecois gedoen het.”

Sowel die Quebekane as Afrikaners beskik oor ‘n lang geskiedenis van taalstryd. Ook was beide volkere by tye die voorwerpe van Angel-Saksiese hoon. Roodt meen dat daar “groter samewerking tussen Quebekane, Afrikaners, Vlaminge en Katalane behoort te wees omdat hulle soortgelyke ervarings van meerderheidsverdrukking deel”. Hy is besonder geraak deur ‘n Twitter-boodskap vanuit Québec, wat in hoofletters verklaar: “ON VEUT UN PAYS!”, ons wil ‘n land hê.

“Die hemel weet, ons wil ook ‘n land hê. On veut un pays.” het hy afgesluit.

PRAAG vra vir boikot van die ‘haatgroep’ Woolworths

Die Pro-Afrikaanse Aksiegroep doen ‘n beroep op alle verbruikers die kettingwinkel Woolworths, maar ook die maatskappy se Country Road-handelsmerk, te boikot. Woolworths het dit onlangs duidelik gemaak dat die groep nie blanke werkaansoekers in ag neem nie.

Dr. Dan Roodt, leier van PRAAG, verklaar: “Vir ‘n hele aantal jare reeds poog ons om met Woolworths oor hul anti-Afrikaanse beleid te praat, sonder enige welslae. Hierdie jongste uiting van antiblanke rassisme is die laaste strooi. Ons doen ‘n beroep op al ons lede en die algemene publiek, veral Afrikaners, maar ook alle blanke Suid-Afrikaners en nie-rassistiese mense onder ander bevolkingsgroepe om Woolworths te boikot.”

Die sanger Steve Hofmeyr en ander Afrikaanse openbare figure het hul reeds op Twitter ten gunste van ‘n boikot uitgespreek.

Gedurende ‘n noodvergadering van PRAAG se Menseregtekomitee is Woolworths as ‘n haatgroep geklassifiseer. “Dienooreenkomstig sal ons hierdie klassifikasie wêreldwyd aan menseregtegroepe kommunikeer, veral in lande met groot Europese bevolkings. Ons gaan insgelyks die Raad van Europa en die Europese Menseregtekommissie kontak en hulle versoek om Schengen-visums aan alle werknemers van Woolworths te weier. In dié opsig moet mnr. Simon Susman en sy medebestuurders dieselfde behandeling as Robert Mugabe en sy trawante ontvang. Indien Woolworths befondsing vanaf beleggers of banke ontvang, sal ons hulle ook teiken en versoek om beleggings in Woolworths te onttrek,” sê Roodt.

Hy is van mening dat Woolworths nie agter regeringswetgewing kan skuil nie. “Waar die regering wetgewing uitvaardig wat maatskappye verplig om suiwer op ‘n rassegrondslag teen blankes te diskrimineer, is dit strydig met die volkereg en behoort deur individue en privaatmaatskappye geïgnoreer te word. Suid-Afrika is ‘n ondertekenaar van die meeste internasionale menseregteverdrae wat sulke wette ongeldig maak.”

Die Pro-Afrikaanse Aksiegroep (PRAAG) is ‘n NRO in Suid-Afrika, wat in Februarie 2000 gestig is. Dit is ‘n beweging van Afrikanerintellektuele, professionele lui, boere, studente en ander wat ‘n veldtog vir die regte van Afrikaners en blanke Afrikane in die algemeen voer, asook vir gelykheid met swartes wat eiendomsreg, taal, toegang tot onderwys en die reg om handel te dryf, betref.

топкарго отзывы

Herstel Carnavon se Afrikaner-saal!

Carnarvon is ‘n klein Afrikaanse dorpie in die Noord-Kaap wat danksy die SKA-teleskoopprojek weer in die nuus is. ‘n Terrein naby Carnarvon is gekies vir die konstruksie van MeerKAT. Dis ‘n verskeidenheid van 50 of meer radioteleskope, ‘n loodsprojek vir die massiewe “Square Kilometre Array”-teleskoop.

Die dorpie is oorspronklik in 1860 gestig as die dorp van Harmsfontein, geleë binne die gebied van Schietfontein, wat die enigste bron van water in die gebied was.

‘n Rynse sendingstasie is in 1847 gestig deur die sendeling, ds Christian Wilhelm Alheit. Sommige van die oorspronklike geskiedkundige geboue is steeds in gebruik. Die naam is verander in 1874 ter ere van die Britse koloniale sekretaris, lord Carnarvon (1831-1890).

Die belangrikste landbou-aktiwiteite was tot dusver skaapboerdery. Die dorp praat uitsluitlik Afrikaans, alhoewel die meerderheid inwoners bruin is, ongeveer 90% van die amper 6 000 siele. Maar met hulle taaltrots het die inwoners ongelukkig nie ‘n saak nie.

Die pragtige ou Afrikaner-gedenksaal in Carnarvon se fondamente is nog stewig, maar staan in ‘n gehawende en geplunderde toestand.

Die gebou kan ‘n belangrike monument vir Afrikaans wees met talle buitelandse besoekers wat eersdaags die dorp sal besoek. As die inwoners hul taaltrots wil wys, sal hulle dadelik moet inspring om die mooi ou saal in ere te herstel.

FW wil sy geldsake geheim hou

Oudpresident FW de Klerk sal sy regstryd voortsit om besonderhede oor sy geldsake uit die openbare oog te hou, het Rapport Sondag berig.

Die voormalige staatshoof se skoondogter, Nicole Noordien, is besig om van De Klerk se seun, Willem, te skei.

Sy eis tans R33 000 per maand se onderhoud van De Klerk, snr., omdat sy seun nie die toelae gereeld betaal nie, het die koerant berig.

‘n Landdros in Randburg het beveel dat De Klerk teen Maandag besonderhede oor sy geldsake moet voorlê. Die Suid-Gautengse hooggeregshof het egter ‘n dringende aansoek deur De Klerk toegestaan waarin hy gevra het dat sy finansiële posisie nie openbaar gemaak word nie.

Die interdik is slegs toegestaan hangende die uitslag van ‘n hersieningsproses in dieselfde hooggeregshof.

De Klerk het in hofdokumente beweer hy ondersteun sy seun en twee kleindogters finansieel sedert die egskeiding. Die geld is afkomstig uit die Fredek-trust, wat vir sy kinders en kleinkinders opgerig is.

“Ek verwag my verskyning in die Randburg-hof sal wye publisiteit lok en die gepaardgaande kommentaar kan ‘n negatiewe impak op my privaatheid en reputasie hê,” het hy volgens Rapport in hofdokumente gesê.

Beide oudpresident De Klerk en sy seun sal Maandag weer in die Randburg-landdroshof verskyn.

прокурор Фильчаков

M&G, Die Burger fabriseer ‘voetewassery’ deur Dagbreekmanskoshuis

Die Mail & Guardian, asook die Kaapse Afrikanerhaatblad, Die Burger, het ‘n storie gefabriseer rondom die Dagbreekmanskoshuis aan Stellenbosch wat “vir apartheid om verskoning sou gevra het”.

Volgens ‘n inwoner wat op die Mail & Guardian en Die Burger se kommentaarafdelings geskryf het, is daar nooit ‘n stemming daaroor gehou nie en het die oudprimarius Pieter Nel so ‘n verklaring aan die media uitgereik sonder dat die inwoners in die saak geken is. Die Dagbreek-inwoner skryf:

“Ek is in Dagbreek en het nooit gestem oor hierdie saak nie. Dit is egter ons oudprimarius wat nou oorgee, wat agter ons rug gegaan het en die besluit self gemaak het. Hy het ons almal in die steek gelaat, nie om jammer te sê nie maar oor die feit dat hy nie die korrekte riglyne gevolg het om die res van die inwoners (400) eers in kennis te stel van die saak nie.

Dit is ‘n blatante leun om te sê Dagbreek vra om verskoning, dit is net nie waar nie, al was dit so deurgegee aan die pers.”

Pieter Nel en drie ander inwoners van die koshuis het aan die Mail & Guardian verklaar dat hulle “deur die optrede van die vorige veiligheidsminister, Adriaan Vlok, geïnspireer is nadat hulle hom verlede week ontmoet het toe hy ‘n toespraak rondom sy verskoning oor sy apartheidsrol gelewer het”.

Vlok het ‘n landwye opskudding veroorsaak toe hy enkele jare gelede die voete van eerwaarde Frank Chikane, ‘n radikale swart teoloog, gaan was het.

Dr. Roodt van PRAAG, wat vanoggend kritiese kommentaar op die beweerde “voetewassery” by Dagbreekkoshuis gelewer het, meen dat “indien dit die geval is dat die Mail & Guardian en Die Burger op loop gegaan het oor die studente se ‘apartheidsverskoning’ verteenwoordig dit ‘n blatante ootreding van die Perskode en behoort die huidige huiskomitee van Dagbreek ‘n klag by die Persombudsman te lê.”

PRAAG is reeds deur studente genader wat ontsteld is oor die jongste voorbeeld van vernederende politieke eise wat aan jongmense gestel word. Die aksiegroep is van plan om met studente en jongmense hieroor in gesprek te tree en hulle te oortuig om nie aan enige voetewassery in die Vlok-styl of sogenaamde verskonings vir apartheid betrokke te raak nie.

“Die Orwelliaanse heerskappy van die Leuen moet in Suid-Afrika uitgedaag word,” het dr. Dan Roodt gesê. “Sowel die koloniale mynmaatskappye in die land as linkse terroriste wat die moorddadige bewinde van Kuba, Oos-Duitsland en die voormalige U.S.S.R. gesteun het, het veel meer om oor verskoning te vra as Afrikaners of selfs die gemiddelde NP-kieser uit die verlede. Ons jongmense is ingelyks vandag die slagoffers van die rassisme en haat van die Nazi-agtige ANC-bewind. Van Die Burger verwag ‘n mens niks anders as leuens en propaganda nie, maar dis betreurenswaardig dat die Mail & Guardian hom aan so ‘n berig kan skuldig maak.”

Roodt het ‘n beroep op Afrikaanse studente gedoen om “weerstand teen propaganda en sielkundige aanvalle op die Afrikanerminderheid te bied”.

Oud-AWB wat vriend se vrou vermoor, gevonnis

‘n Voormalige AWB-lid, Abraham (Koper) Myburgh (39), is gister tot tien jaar tronkstraf gevonnis weens moord, wat sal saamloop met sy lewenslange vonnis vir bomontploffing-sterftes

Myburgh is lewenslank gevonnis nadat hy en ‘n mede-lid in 1996 net voor Kersfees twee bomme by ‘n supermark in Worcester geplant het wat die lewens van drie kinders en twee volwassenes geëis het. Nóg 67 mense is beseer in die ontploffing.

Hy het gister in die hof verskyn op aanklag van moord op Sanet de Wet (41), die vrou van Jan de Wet, ‘n mede AWB-lid.

De Wet is op 29 Augustus 1996 vermoor, terwyl haar man nie daar was nie. Myburgh en sy trawante was glo bang dat sy hulle sou verraai waar hulle vir die polisie geskuil het. Sy wou glo rook en het gekla dat sy nie sigarette in die hande kon kry nie.

Myburgh het De Wet se vrou vermoedelik met ‘n kussing in haar tent versmoor waar hulle op die plaas Erasmuskloof buite Hankey geskuil het nadat hulle aanvanklik uit die Diepkloof-gevangenis ontsnap het.

Hulle het aan haar man vertel dat sy aan haar hart oorlede is en sy is haastig in ‘n vlak graf op die plaas begrawe.

‘n Boer van die omgewing het vier maande later op haar lyk afgekom nadat vloedwaters die graf oopgespoel het.

Pretoria is bankrot

Die ouditeur-generaal (OG) het ‘n neerdrukkende verslag oor die Tshwane-metro se finansies ontvang. Die ANC ontken egter dat ‘n finansiële krisis in Pretoria dreig.

Die amptelike opposisie het in Junie vandeesjaar die ANC verhoed om langtermyneffekte van R1,5 miljard uit te reik, omdat dit glo onwettig sou wees om op dié manier agterstallige operasionele uitgawes te dek. Standard Bank, waar Tshwane bank, het voorheen gesê die uitreiking van die beoogde die effekte sal ‘n oortreding van die MFMA beteken.

‘n Langtermynlening van R1,5 miljard is egter ten spyte van die genoemde probleme onverwags in Junie goedgekeur.

Volgens die verslag het Tshwane se krediteureskuld in 2011-’12 met ‘n 1 900% toegeneem binne ‘n jaar.

Dié skuld was R132,5 miljoen in 2010-’11 en het tot R2,3 miljard gestyg vir 2011-’12.

Die skuld is gemiddeld ouer as 90 dae, wat ‘n oortreding van die Wet op Munisipale Finansiële Bestuur (MFMA) beteken. Tshwane se krediteure maak tans 18,94% van sy bedryfsbegroting uit.

Die syfers dui daarop dat die metro nie sy finansiële verpligtinge kan nakom nie en ook nie diensverskaffers kan betaal nie.

Tshwane het intussen aangekondig dat die stad miljoene gaan spandeer op ‘n gholftoernooi. Burgemeester Kgosientso Ramokgopa, Sam Hackner van Investec Property, en Selwyn Nathan, uitvoerende direkteur van die Sunshine Tour het onlangs die besluit van die metro gevier.

Tshwane se belastingbetalers sal die R132 miljoen moet voorsien om die Tshwane Open aan te bied.

Maar ontleders het gewaarsku dat dit ‘n vrugtelose verkwisting kan wees as dit nie behoorlik bestuur word nie.

Tshwane het ‘n drie-jaar kontrak vir die toernooi onderteken. Dit beteken dat die stad R44 miljoen elke jaar vir die volgende drie jaar sal moet opdok om die PGA-geleentheid aan te bied. Dit vorm deel van die Sunshine Tour.

Фильчаков

Twee skole smelt saam om Afrikaans te red

Die Vryheidsfront Plus verwelkom die besluit van twee hoërskole in die Vaaldriehoek in Gauteng om saam te smelt ter wille van die behoud en voortbestaan van Afrikaans.

Die beoogde samesmelting van die Hoër Tegniese Skool, Vereeniging en Hoërskool Vereeniging om die nuwe Vereeniging Gimnasium in 2013 te vorm, kan as voorbeeld dien van wat vermag kan word indien alle rolspelers pro-aktief optree, sê mnr Jaco Mulder, VF Plus LPW vir Gauteng.

Dit bly egter jammer dat tradisie as deel van kultuurerfenis, in die slag bly maar ons leef vandag in ‘n omgewing waar swak beplanning deur die departemente vir Onderwys en ook Infrastruktuur en Ontwikkeling, ‘n Afrikaanse skool met dalende getalle, met onderrig in Engels sal konfronteer en die taalstatus van die skool uiteindelik in die slag bly, het Mulder gesê.

Mulder het ‘n beroep op skole in Gauteng gedoen wat in soortgelyke omstandighede verkeer, om voortydig met konstruktiewe onderhandeling pro-aktiewe stappe te oorweeg om uiteindelik Afrikaans as onderrigtaal in elke gemeenskap te verseker.

Die VF Plus veg vir jare reeds onbeskaamd vir Afrikaans in die Gauteng Wetgewer en sal skole in dié verband bystaan.

Лобановский

Ope brief aan Kaapstad se burgemeester

Geagte Patricia de Lille,

Volgens Stadsraadsvergadering Agenda Volume 4 Item C 59/08/12 gaan u by die eerskomende vergadering op 29 Augustus 2012 aanbeveel dat daar volstaan word by die Naamgewingskomitee aanbeveling dat Coen Steytlerlaan verander word na Walter Sizululaan.

Hierdie aanbeveling is nie alleen ‘n bittere teleurstelling veral vir die Steytler familie nie maar ook ‘n beslissing wat inbraak maak op die erkenning van Kaapstad aan ‘n persoon wie ‘n besondere diens en bydrae gelewer het aan die stad se ontwikkeling met die suksesvolle herwinning van die 171.5 ha strandgebied van Roggebaai in die laat veertiger en vroeg vyftiger jare van die laaste eeu.

Vandag akkomodeer die Heerengracht onder andere die Stad se Burgersentrum, die Nico Malan teater-kompleks, Media24 se hoofgebou, die Internasionale Konferensiesentrum en sovele ander prag ekonomiese kern-geboue wat aansluit by die Waterfront – praat nie eers van die opgradeerde hawe, paaie en infrastruktuur nie, en kan dit daadwerklik genoem word die Poort van Kaapstad, Suid Afrika en Suidelike Afrika.

Indien hierdie aanbeveling Woensdag aanvaar word trek Kaapstad ‘n streep deur die geskiedkundige erkenning van die prestasie onder die leiding van Coen Steytler – in 1952 Voorsitter van die Strandherwinningskomitee, van wat toenderytyd bekend gestaan het as een van die mees ambisieuse grondherwinningsprojekte ter wereld.

Het ons polities so bevooroordeeld geraak, dat ons ongeag, hierdie Stad se geskiedenis hoogtepunte summier negeer en selfs ‘n non-politikus se nagedagtenis so minag.

Wat beteken die woorde van Premier Helen Zille in 2008 toe sy oa gese het: …names are focal points of symbolism, association and remembrance and …names provide opportunities either to promote community harmony or perpetuate hurt and division…

Vandag klink dit na hol woorde as ‘n mens die simboliek, die assosiasie en die herrinnering aan Coen Steytler met sy prestasie in ag neem.

Verder vra jy jouself af: Is ons hiermee besig om gemeenskaps-harmonie te promofeer of perpetueer ons seer en verdeling?

My versoek: Daar is tyd tot Woensdag. Herbesin en herstel die respek en erkenning aan Coen Steytler. Identifiseer ‘n alternatiewe neutrale hoofroete om Walter Sizulu te vernoem – maar moenie ‘n eerbare man soos Coen Steytler die etiket van kontroversieel, aanstootlik, onsensitief en skadelik (volgens Stads-beleidsriglyne) omhang nie – hy verdien dit nie.

Ek vertrou op u begrip en simpatieke oorweging.

André Fourie.

Zille vir laster gedagvaar

DA-leier, Helen Zille word tans vir laster gedagvaar deur Midvaal fluitjieblasers Cornelius Pypers en Jacobus Hoffman. Media24 swyg in alle tale oor die lastereis.

Die span het wat hulle glo wanadministrasie in die Midvaal-munisipaliteit was, by die Openbare Beskermer gerapporteer.

Zille beskryf Pypers en Hoffman egter as “onderduimse fluitjieblasers van Midvaal” in haar artikel in ‘n elektroniese nuusbrief, South Africa Today.

Zille het geskryf: “Mnr Hofmann se kort reis van die VF + na die ANC is nie moeilik om te peil nie – na alles, is hierdie partye twee kante van dieselfde munt. Cornelius Pypers en Kobus Hoffman beide het ‘n eier te lê. En albei het ‘n smaak ontwikkel vir die misbruik van openbare geld – selfs wanneer hulle ander beskuldig daarvan. As iemand in Midvaal korrup is, is dit die twee van hulle.”

Die DA-leier het ook gesê in haar artikel dat Pypers homself voorgestel het as ‘n heldhaftige fluitjieblaser, maar in werklikheid, “het hy iemand nodig om die fluitjie te blaas oor sy eie optrede”.

Sy het gesê dit het onder haar aandag gekom dat: “Eksterne ouditeure wat gekontrakteer is deur die raad het bevind dat Pypers sy tuinier gebruik het as ‘n SEB-maatskappyfront in die hoop dat hy munisipale tenders sal kan wen (korrupsie in enige iemand se taal)”

Die artikel is gepubliseer op 11 November 2011. Hierdie week het Pypers en Hoffman gesê in regsdokumente dat Zille se bewerings “is vals en lasterlik en word as sodanig verstaan”.

Die klag teen Zille lui dat “die woorde en innuendo onregmatig en lasterlik is en veroorsaak skade aan ons kliënte en hul reputasie”.

“U word hiermee versoek om hierdie kommentaar onmiddellik te verwyder van die nuusbrief en om te staak met die verspreiding van sulke valse en lasterlike gerugte en om formeel ‘n verskoning te publiseer aan ons kliënte, by gebreke waarvan, dit ons opdrag is om regstappe te neem teen u en u party en skadevergoeding van uself en u party te eis.”

Pierre-Charl du Preez, woordvoerder in die DA-leier se kantoor het gesê die party sal die regsaksie teenstaan.

топкарго