Kategorie: Suider-Afrika

In die jongste  plaasaanval by Sterkstroom, naby Ventersdorp is ‘n boer dood geslaan en sy vrou erg beseer nadat sy met ‘n bofbalkolf geslaan is, berig Beeld.

Cora Stighlingh (63) het met ‘n gebreekte arm na ‘n buurplaas bestuur om hulp te ontbied. Haar man, Johan (65), is doodgeslaan in dieselfde aanval.

Die Stighlinghs wou kerk toe gaan toe twee swart mans hulle net ná 09:00 op hul plaas, oorval het, sê hul skoonseun, Deon Vosloo.

Cora is in die Wilmedpark-hospitaal in Klerksdorp waar haar arm geopereer is. Sy het ook kop- en rugbeserings opgedoen.

Die aanvallers het met twee selfone en vermoedelik nog items, waaronder wapens, gevlug.

Brig. Thulani Ngubane, kommunikasiehoof van die polisie in Noordwes, het gesê die polisie ondersoek ‘n saak van moord, poging tot moord en huisroof. Niemand is nog in hegtenis geneem nie.

Winnie Madikizela-Mandela is glo geskok oor aanmerkings van die Nasionale Vervolgingsgesag (NVG) dat sy moontlik vir die moord op twee mans vervolg gaan word.

Die voormalige presidentsvrou se prokureur, Pops Templeton Mageza, het in ‘n verklaring gesê dat sover sy kliënt se kennis strek, is hierdie saak reeds ten tyde van uitgesaaide openbare verhore van die Waarheid- en Versoeningskommissie afgehandel.

Jerry Richardson is destyds vir die moorde gevonnis en lewenslank tronkstraf opgelê. Hy is intussen in die gevangenis dood.

Richardson se bewerings dat hy deur Madikizela-Mandela genader is om die mans te vermoor, kon nie bewys word nie.

Mageza het gesê hy kan nie dink dat nuwe bewyse na vore gekom het nie.

Die NVG se departement vir vermistes het gewaarsku dat dit maande kan neem voordat die twee lyke wat vroeër die week opgegrawe is, geïdentifiseer kan word.

Die oorskot is na bewering dié van twee jong aktiviste, Corlett “Lolo” Sono en Siboniso Anthony Shabalala. Hulle het onder die vorige bewind  as koeriers vir die ANC se militêre vleuel, Umkhonto we Sizwe, gedien.

Madikizela-Mandela het hulle na bewering in 1988 daarvan verdink dat hulle inligting aan die polisie gelek het. Hulle het dieselfde jaar spoorloos verdwyn.

Die Waarheid- en Versoeningskommissie het later in ‘n verslag bevind Madikizela-Mandela en haar omstrede Mandela United Football Club, was die laaste om Sono en Shabalala lewend te sien.

Die brand waarin twee mense gesterf het en meer as 4 000 mense in Kayamandi, Stellenbosch, dakloos gelaat is, is die Demokratiese Alliansie se skuld, volgens die ANC.

“Die DA moet volle verantwoordelikheid neem vir hierdie ramp asook sy patetiese pogings om inwoners ná die brand by te staan,” het Marius Fransman, Wes-Kaapse voorsitter van die regerende party, gesê.

Hy sê dié tragedie kon vermy gewees het as die opposisieparty se provinsiale regering toegespits was om dienste behoorlik te lewer en armes van huise te voorsien.

“Die realiteit is dat hierdie regering van wit bevoorregting min, indien enigiets vir hierdie inwoners voel…”

Mmusi Maimane, ‘n woordvoerder van die DA, het die uitlatings as “goedkoop politiekery” afgemaak.

“Dit is walglik dat hy hierdie tragedie wil verpolitiseer…”

Maimane sê die Stad Kaapstad, die stadsraad en die provinsie se departement van sosiale ontwikkeling het reeds omvattende ondersteuning verskaf.

Hy sê 200 tydelike strukture is reeds gebou om die brandslagoffers skuiling te bied.

Luidens die jongste verslag is 1 250 wonings afgebrand en die totale aantal dakloses is 4 500.

Korrupte dokters, aptekers, fisioterapeute, radioloë en patoloë tap R22 miljard ‘n jaar van mediese fondse sodat lede duisende rande meer in premies moet betaal.

Die kommerwekkende toename in bedrog het ‘n nagmerrie geword het vir die byna 100 mediese skemas en het daartoe gelei dat die Board of Healthcare Funders ‘n twee-dag-konferensie in Johannesburg byeen geroep het om die probleem te hanteer.

Op die eerste dag van die konferensie het ondersoekers sommige van die taktieke van mediese beroepslui uitgewys.

In een geval, het die Polmed skema ‘n fisioterapeut uitgevang wat in een dag vir 93 pasiënte geëis het. Sy het ‘n ander skema vir meer as 100 besoeke op dieselfde dag gefaktureer.

‘n Dokter het ‘n skema vir 107 besoeke in ‘n dag gefaktureer wat elk twee uur geduur het, wat sou beteken hy het 214 ure in ‘n dag ingepas.

In sommige gevalle het dokters vermoedelik pasiënte in Durban, Bloemfontein en Pretoria op dieselfde dag behandel.

Die internasionale hoof van die inligtingsanalise maatskappy SAS, Chris McAuley, het gesê die maatskappy het byna twee-en-‘n-half jaar van ‘n mediese fonds data ontleed.

Dit word beraam dat elke lid van ‘n mediese skema in Suid-Afrika betaal tussen R2500 en R2800 per jaar om bedrieglike en onreëlmatige uitgawes te dek.

Die syfer van R22 miljard se bedrog was “nie ‘n duimsuig” nie, maar gebaseer op die ontleding van mediese fonds data, het hy gesê.

Polmed mediese skema se ondersoeker Jaco Makkink het gesê sommige dokters faktureer drie keer vir ‘n prosedure, en kruip agter die ingewikkelde faktuurkodes weg, of sweer saam met pasiënte om afsprake te fabriseer wat nie plaasvind nie.

Daar is selfs gevalle van mans wat ‘n histerektomie ondergaan of vroue ‘n besnydenis en waar skemas uitbetaal.

Hy het gekla dat anti-mededingende wetgewing verhoed dat mediese skemas inligting kan deel wat samespanning sal hokslaan. Dit het dit makliker gemaak om te eis vir ‘n oormatige aantal besoeke aan verskeie mediese skemas tegelyk.

On Digital Media (ODM), eienaar van TopTV, se aansoek om pornografie-kanale voltyds te beeldsend sal Donderdag aangehoor word.

ODM sal tydens ‘n openbare verhoor voor die Onafhanklike Kommunikasie-owerheid van Suid-Afrika (Okosa) verskyn.

TopTV beplan glo om 24 uur per dag pornografie uit te saai en nie net buite spitskyktye nie, het Channel24 berig.

In ‘n skriftelike aansoek aan Okosa vra TopTV om pornografiel voltyds uit te saai, en nie net tussen 20:00 en 05:00 nie.

TopTV, wat tans aansoek doen om drie pornografiese kanale in Suid-Afrika te vertoon, wil 24 uur ‘n dag pornografie uitsaai, asook op Saterdae en Sondae.

TopTV sê ‘n ouderdomsperk van 18 jaar sal geld en dat slegs volwassenes sal toegang verkry deur ‘n kombinasie van pinkodes.

‘n Saak is nog nie aanhangig gemaak nadat adv. Jaap Cilliers SC buite die Pretoriase hooggeregshof aangeval is nie, het die polisie Donderdag gesê.

Ao. Ann Poortman van die Pretoria-polisiekantoor het gesê sy het nie veel inligting oor die aanval nie, omdat ‘n aanklag nog nie formeel aanhangig gemaak is nie.

“Die saak is nie aangemeld nie. Ons verneem hy [Cilliers] is in die hospitaal. Dalk sal die aanklag later ingedien word,” het Poortman gesê.

“Vir die polisie om ‘n ondersoek te begin, moet ‘n aanklag aanhangig gemaak word.”

Cilliers, wat onder andere dr. Wouter Basson, Jackie Selebi en die Waterkloof-vier verdedig het, is met ‘n onbekende middel buite die Pretoriase hooggeregshof ingespuit, het Beeld berig.

Hy het Woensdagmiddag ná ‘n siviele saak uit die hof gestap toe iemand het hom van agter bestorm en hy het skielik iets soos ‘n inspuiting in sy boud gevoel.

Cilliers is na ‘n dokter geneem wat bevestig het dat hy met ‘n onbekende middel ingespuit is.

Hy is toe vir bloedtoetse na ‘n hospitaal in Pretoria geneem waar hy van lighoofdigheid en naarheid gekla het.

Die motief vir die aanval is nie bekend nie.

‘n Onreëlmatige manipulasie van interne beheerstelsels by PetroSA het aan die lig gekom, het RSG Donderdag berig.

Die departement van energie het gesê die ondersoekspan het ‘n voorlopige verslag bekendgemaak.

Die departement het die verslag aangevra om te verseker dat daar gehou word by goeie korporatiewe regering en deursigtigheid by PetroSA, wat ‘n volfiliaal van die Sentrale Energiefonds (SEF) is.

Ernstige aantygings word glo ook teen huidige en voormalige senior amptenare in dié verslag gemaak.

Dit word tans deur die Energiefonds bestudeer.

Die voorsitter van die SEF-groep, Sankie Mthembi-Mahanyele, het gesê regstellende stappe sal volg wanneer die finale verslag uitgereik is.

Die groep bestuur energiebelange namens die regering en bevorder ook die ontwikkeling van energiebronne met spesiale klem op hernubare en skoner alternatiewe energiebronne.

Minstens 28% van skoolmeisies in Suid-Afrika het MIV terwyl slegs 4% van skoolseuns met dié virus besmet is, het die Sowetan Donderdag berig.

Die minister van gesondheid, Aaron Motsoaledi, het die syfers by Woensdag by ‘n vergadering van die Nasionale Raad van Provinsies in Carolina, Mpumalanga, vrygestel.

“Dit is duidelik dat dit nie jong seuns is wat met hierdie meisies slaap nie. Dit is ouer mans. Ons moet standpunt inneem teen vroetelpappies [sugar daddies] want dit is hulle wat ons kinders verwoes,” het Motsoaledi gesê.

Hy het bygevoeg dat 94 000 skoolmeisies in 2011 swanger was.

“Sowat 77 000 meisies het aborsies by openbare fasiliteite gehad. Ons kan nie meer so lewe nie. Dit moet einde kry.”

Sommige van die meisies wat swanger geword het – en positief getoets het vir MIV – was tussen die ouderdom van 10 en 14 jaar oud.

Adv. Jaap Cilliers, wat onder andere dr. Wouter Basson, Jackie Selebi en die Waterkloof-vier verdedig het, is met ‘n onbekende middel buite die Pretoriase hooggeregshof ingespuit, is Donderdag berig.

Cilliers het Woensdagmiddag ná ‘n siviele saak uit die hof gestap, het Beeld berig.

Iemand het hom van agter bestorm en hy het skielik iets soos ‘n inspuiting in sy boud gevoel.

Cilliers is na ‘n dokter geneem wat bevestig het dat hy met ‘n onbekende middel ingespuit is.

Hy is toe vir bloedtoetse na ‘n hospitaal in Pretoria geneem waar hy van lighoofdigheid en naarheid gekla het.

Die motief vir die aanval is nie bekend nie.

Betogers het gister in Pretoria gedreig om Gautrein-waens aan die brand te steek as die Metrorail-diens in die hoofstad nie dadelik opgekap word nie.

Albert Mokoena, ‘n woordvoerder van die oproermakers, het gesê hulle eise moet voor 28 Maart aangespreek word.

“Ons het almal besluit dat dit nie vir ons goed is om ons eie treine (Metrorail-treine) aan die brand te steek nie.

“Ons gaan die Gautrein brand,” het hy buite die Bosmanstraat-stasie gesê.

Hy het ‘n memorandum aan Maria du Toit, adjunk-direkteur-generaal van vervoer, oorhandig.

Hy het aan haar gesê hulle beplan drastiese stappe.

“Ek weet ek is op rekord en ek doen dit met opset. Dit is nutteloos om ons eiendom te verbrand. Maar daardie Gautrein is nie vir ons nie; dis die ryk mense se trein.”

Omstanders het Mokoena, streeksekretaris van die PAC se Tshwane-tak, met luide toegejuig begroet.

Hy sê die departement net nie behoorlike navorsing gedoen oor die behoeftes van Suid-Afrikaners met die bou van die Gautrein nie. Die Gautrein bedien volgens hom nie die meerderheid mense nie.

“Daardie beleggings in die Gautrein help ons nie. Dis nie  dreigemente nie, ek gebruik politieke taal. Ons sal daardie mooi treine verbrand wat Engels binne praat.”

Metrorail-treine is volgens pendelaars stampvol, onveilig en vuil.

Du Toit het onderneem om “die uitdagings in die memorandum persoonlik te ondersoek” en om dit onder die minister (Ben Martins) se aandag te bring.

“Ek wil nie enige treine sien brand nie. Nie van Metrorail of Gautrein nie,” het sy gesê.