Suid-Afrikaanse nuus, d.w.s. sowel nuus uit Suid-Afrika én Suider-Afrika.
In die goeie ou dae was daar bankinstellings soos Volkskas waar ‘n mens jou kontantvloei met die bankbestuurder kon gaan bespreek en indien jy ‘n redelike reputasie by die bank gehad het was so ‘n bankbestuuder gewoonlik bereid om jou deur die krisis te help.
Met die nuwe moderne bankstelsels bestaan bankbestuurders nie meer nie, net korporatiewe geldwolwe. Dan word name genoem soos Nedbank, Sasfin Bank, Investec ! Skrikwekkend.
Lees verder.
Die polisie in Gauteng bied ‘n beloning van R50 000 aan enigiemand wat weet waar ‘n swart Jozi FM-platejoggie is.
Die platejoggie het Sondag na bewering sy meisie in Jabulani, Soweto, doodgesteek.
“Die beloning sal slegs aan iemand gegee word wat inligting kan verskaf wat sal lei tot die verdagte se inhegtenisneming,” het adjudant-offisier Kay Makhubela gesê.
Die platejoggie se meisie is Sondag herhaaldelik gesteek en sy is later dood in ‘n woonstel in Jabulani aangetref.
Hy het glo sy meisie se vriendin ná die moord gebel en aan haar erken dat hy die moord gepleeg het. Hy het sedertdien spoorloos verdwyn.
Jozi FM se bestuurder, Mpho Mhlongo, het Maandag gesê hulle weet nie waar hy is nie. Hy hoop die platejoggie gee hom so gou moontlik aan die polisie oor.
Die Wet op die Ontwikkeling van Infrastruktuur is deur President Jacob Zuma gepromulgeer.
Die doel van die wetgewing is om die instelling van die Regering se ontwikkelingsplan te versnel, het RSG berig.
Dit maak voorsiening vir die samestelling van die Presidensiële Infrastruktuur Koördineringskommissie en die magte en mandaat van die kommissie.
Dit gee Zuma ook die mag om lede van al drie vlakke van regering vir die kommissie te benoem.
Die minister van energie, Tina Joemat-Petterson het die insette van kenners versoek oor die ontwikkeling van ‘n meestersplan vir energie.
Die plan is voorgestel om die land se huidige energiekrisis aan te pak. Die kabinet het reeds vier jaar gelede so ‘n plan goedgekeur.
Hernubare energie en kernkrag is volgens die nasionale ontwikkelingsplan veronderstel om teen 2030 twee-derdes van die kragverbruik in Suid-Afrika uit te maak.
Joemat-Petterson sê daar is nie baie tyd om te redeneer oor hoe die einddoel bereik gaan word nie.
Kragtens ‘n hofbevel wat aan Eskom toegestaan is mag sy werkers wat lede van die metaalwerkersvakbond Numsa is, nie staak nie.
Meer as 200 000 werkers in die metaal- en ingenieursbedryf het Dinsdag begin staak.
Die Arbeidshof het beslis dat die werkers van Numsa nie by enige van Eskom se aanlegte aan ‘n staking mag deelneem nie, aangesien Eskom ‘n noodsaaklike diens verskaf.
Eskom, net soos hospitale, nooddienste en die polisie het die status van ‘n noodsaaklike diensverskaffer waar werkers nie mag staak nie.
Dit sal lede nie verhoed om aan betogings deel te neem nie, het Numsa egter gesê. Die vakbond sê sy lede sal nie deur Eskom geïntimideer word nie.
Numsa beoog om Woensdag te betoog voor Eskom se hoofkantoor in Megawatt-park Sunninghill, noord van Johannesburg.
Eskom het intussen gewaarsku dat dissiplinêre stappe teen Numsa-lede geneem sal word as hulle die hofbevel verontagsaam.
‘n Woordvoerder van Eskom, Andrew Etzinger, sê dit is in die belang van die land se ekonomie om te verseker dat daar nie kragonderbrekings is weens die staking nie.
Sowat 10 000 werkers by Eskom behoort tot die metaalwerkersvakbond wat vroeër aangedui het dat hulle ‘n onbeskermde staking oorweeg.
Die hoofsekretaris van die vakbond, Irvin Jim, sê lede sal by verskeie maatskappye betoog.
Jim is vol vertroue dat Numsa deur die staking genoeg druk op werkgewers sal plaas om hulle aanbod te verhoog na 12%.
Stakers in Gauteng eis egter vyftien persent.
’n Lid van die gemeenskapspolisiëringsforum in Geduld, Springs, staar ‘n moordklag in die gesig nadat hy ’n swart aanvaller in die been geskiet het.
Kapt. Johannes Ramphora, polisiewoordvoerder, het bevestig die GPF-lid gaan moontlik van poging tot moord aangekla word.
Hy het gesê die polisie ondersoek die voorval.
Dié man het Sondagaand op twee swart aanvallers losgebrand en een in die been gewond.
’n Klag van poging tot moord sal moontlik teen hom aanhangig gemaak word.
Die GPF is Sondagaand ontbied nadat aanvallers ‘n eiendom binnegedring het terwyl die inwoners tuis was.
Beeld berig dat die GPF-lede die swartes met hul buit gevang het, maar dat hulle weggehardloop het
Toe die aanvallers nie wou stop nie, het ’n GPF-lid na bewering op hulle geskiet.
Die twee misdadigers is tans in aanhouding en sal binnekort in die hof verskyn.
Ná ‘n klopjag Maandagaand by ‘n skrootwerf in Putfontein naby Benoni, is vier verdagtes deur die polisie in hegtenis geneem.
Die vier is ivm 18 mangatdeksels wat gevind is, vasgevat.
Gesteelde mangatdeksels veroorsaak dikwels dat onverwerkte riool wat in woongebiede opstoot, uitvloei.
“Al 18 mangatdeksels is geïdentifiseer as eiendom van die Ekurhuleni-munisipaliteit se departement van waterwese,” het die polisie se woordvoerder, Wilfred Kgasago, Dinsdag gesê.
Die mans sal binnekort in die landdroshof in Benoni verskyn op aanklagte van gesteelde eiendom.
Kader-ontplooiing in Suid-Afrika is wydverspreid en het gelei tot “die aanstelling van ‘n groot aantal onbekwame mense waarvoor hulle nóg die ervaring nóg die kwalifikasies beskik’.
Dit het tot baie ernstige probleme gelei, veral op die vlak van plaaslike regering, waar dienslewering gebrekkig is, met gepaardgaande politieke betogings en onrus waarvan sommige gewelddadig geraak het.
In ‘n ontleding van onlangse regspraak in die Natalse koerant The Mercury, erken die grondwetlike regskenner professor George Devenish dat die vul van ‘n beperkte aantal staatsdiensposte deur die regerende party – soos in ander demokrasieë gebeur – geregverdig is. Devenish bring dit egter onder die aandag dat die Hooggeregshof in die saak Vuyo Mlokoti v Amathole District Municipality bevind het dat kaderontplooiing inderdaad onwettig is.
Die hof het bevind dat die aanstelling van kaders “‘n ongemagtigde en ongeregverdigde ingryping in die sake van die distriksraad verteenwoordig. Dit is duidelik dat die raadslede van die ANC hul verantwoordelikheid om die pos van munisipale bestuurder met die beste en mees geskikte kandidaat te vul, gruwelik versaak het.”
Devenish skryf dat, in weerwil van artikels 9 (2), 195 en 217 van die Grondwet wat regstreeks vir regstellende aksie voorsiening maak, dit nie op so wyse toegepas moet word dat dit op onbillike diskriminasie neerkom nie. “Boonop moet irrasionele en onbillike regstellende aksie noodwendig tot ondoeltreffendheid lei en bydra tot negatiewe houdings teenoor lede van benadeelde groepe. Regstellende aksie behoort op ‘n sensitiewe en konstruktiewe wyse toegepas te word en nie neer te kom op blatante, verdoeselde rassediskriminasie nie.”
Vuyo Mlokoti v Amathole District Municipality and another (1428/2008)
Ekonome waarsku dat die beplande Numsa-staking die ekonomie ‘n groter knou kan toedien as die onlangse platinumstaking.
Die metaalwerkersvakbond sal Dinsdag begin staak, ten spyte van ‘n ontmoeting met die minister van Arbeid.
Meer as 10 000 vervaardigingsmaatskappye kan deur die staking in die metaal en ingenieursbedrywe geraak word.
Praag het intussen verneem dat werkers by staalbedrywe in Gauteng in vrees lewe te midde van openlike dreigemente en intimidasie indien hulle vir werk wil opdaag.
Sake-ondernemings in ander provinsies het ook hulle kommer gedeel oor die impak van die Numsa-staking.
Die uitvoerende hoof van die Nelson Mandela-baai Sakekamer, Kevin Hustler sê die staking gaan nie net spesifieke maatskappye raak nie, maar gaan ook werkskepping benadeel.
Die Johannesburgse Metropolisie het motoriste versoek om die middestad te vermy waar ‘n optog deur duisende Numsa-lede verwag word.
Vakbondlede drom reeds saam om memorandum met griewe aan die werkgewersorganisasies oorhandig is. Volgens ‘n woordvoerder van die Metropolisie, Edna Mamonyane sal ongeveer 12 000 lede aan die protesoptrede deelneem.
Twee Numsa-optogte word ook vir die Oos-Kaap beplan, waar die vakbond meer as 30 000 lede meesal in die motorbedryf het.
In Port Elizabeth sal stakers van die Nangoza Jebe-saal in New Brighton na die Vuyisile Mini-plein opruk, en in Oos-Londen van die North End-stadion na die departement van Arbeid.
Die minister van Arbeid, Mildred Oliphant het vroeër gesê sy is optimisties dat ‘n oplossing gevind kan word om die 220 000 Numsa-lede se staking vinnig tot ‘n einde te bring.
Oliphant het met die media gepraat ná ‘n marathon-vergadering tussen die metaalwerkersvakbond en werkgewers by die KVBA se hoofkantore in Johannesburg.
Die minister het na die vergadering gesê sy is hoopvol dat die partye binnekort ‘n konsensus sal bereik.
Die voertuigvervaardiger BMW moes kritiek verduur weens ‘n omstrede reklamebord waarin ‘n Mini Cooper verskyn, berig die Johannesburgse koerant The Times vandag.
Op die advertensie verskyn die buitelyne van ‘n Mini Cooper, met ‘n groot gat waar die motor behoort te wees. ‘n Banier oor die advertensie lui: “Ry hom asof hy gesteel is!”
Twee inwoners van Soweto het ‘n klag by die Owerheid vir Advertensiestandaarde aanhangig gemaak omdat die advertensie “die steel van motors bevorder en ophemel, asook spoedoortreding en roekelose bestuur”.
Die twee klaers, Macbeth Ngema en Candice Nene meen die reklamebord is veral in swak smaak omdat dit naby die plek verskyn waar die swart musikant Molemo “Jub Jub” Maarohanye en sy vriend Themba Tshabalala vier skoolkinders doodgery en twee ander ernstig beseer het terwyl hulle in 2010 met hul Mini Coopers op straat resies gejaag het. Hulle is in 2012 tot 25 jaar gevangenisstraf gevonnis. Verlede maand is die uitspraak voorbehou in hul appèl teen dié vonnis.
Maar in ‘n nuwe verwikkeling blyk dit dat die reklamebord van BMW self intussen gesteel is.
Ook het die motormaatskappy laat blyk dat hy op dié advertensie besluit het nadat sy vorige reklamebord met ‘n beeld van ‘n Mini Cooper insgelyks gesteel is. Die nuwe reklamebord was dus ‘n ironiese verwysing na daardie gesteelde reklamebord, sê BMW.
Verliese van koperdiefstal is op met 71% van ‘n jaar gelede, met maatskappye wat skade van R15.4 miljoen in Mei aangemeld het.
Syfers saamgestel deur die Suid-Afrikaanse Kamer van Koophandel en Nywerheid, wat data van lede – maar nie van munisipaliteite nie – insluit, wys 214 ton koper is verlede maand gesteel.
Dit kom neer op verliese vir die jaar van ten minste 824 ton ter waarde van R61 miljoen. Dit is byna 20% hoër as in dieselfde tydperk verlede jaar.
Verliese van koperdiefstal, insluitend verliese waar kragonderbrekings voorkom, is nog veel hoër as die data van nie-lede ook in berekening gebring word.
Uitvoere van koperskroot beloop byna R2 miljard in die eerste vier maande van die jaar, volgens statistiek van die Suid-Afrikaanse Inkomstediens.
Koperdraad is verantwoordelik vir slegs R51.5 miljoen, met allerlei ander items wat die grootste deel daarvan uitmaak.
Die meeste uitvoere is na China, Indië, Suid-Korea, die Midde-Ooste en Europa.
Omdat streng wette geld, moet handelaars gedetailleerde rekords van transaksies hou. Dit sluit in die registrasie van die identiteite van mense waarby materiaal aangekoop word en besonderhede van hoe die goedere verkry is.
Koperskroot haal tussen R53 en R62 per kilogram, afhangend van die graad.
