Ekonome waarsku dat die beplande Numsa-staking die ekonomie ‘n groter knou kan toedien as die onlangse platinumstaking.
Die metaalwerkersvakbond sal Dinsdag begin staak, ten spyte van ‘n ontmoeting met die minister van Arbeid.
Meer as 10 000 vervaardigingsmaatskappye kan deur die staking in die metaal en ingenieursbedrywe geraak word.
Praag het intussen verneem dat werkers by staalbedrywe in Gauteng in vrees lewe te midde van openlike dreigemente en intimidasie indien hulle vir werk wil opdaag.
Sake-ondernemings in ander provinsies het ook hulle kommer gedeel oor die impak van die Numsa-staking.
Die uitvoerende hoof van die Nelson Mandela-baai Sakekamer, Kevin Hustler sê die staking gaan nie net spesifieke maatskappye raak nie, maar gaan ook werkskepping benadeel.
Die Johannesburgse Metropolisie het motoriste versoek om die middestad te vermy waar ‘n optog deur duisende Numsa-lede verwag word.
Vakbondlede drom reeds saam om memorandum met griewe aan die werkgewersorganisasies oorhandig is. Volgens ‘n woordvoerder van die Metropolisie, Edna Mamonyane sal ongeveer 12 000 lede aan die protesoptrede deelneem.
Twee Numsa-optogte word ook vir die Oos-Kaap beplan, waar die vakbond meer as 30 000 lede meesal in die motorbedryf het.
In Port Elizabeth sal stakers van die Nangoza Jebe-saal in New Brighton na die Vuyisile Mini-plein opruk, en in Oos-Londen van die North End-stadion na die departement van Arbeid.
Die minister van Arbeid, Mildred Oliphant het vroeër gesê sy is optimisties dat ‘n oplossing gevind kan word om die 220 000 Numsa-lede se staking vinnig tot ‘n einde te bring.
Oliphant het met die media gepraat ná ‘n marathon-vergadering tussen die metaalwerkersvakbond en werkgewers by die KVBA se hoofkantore in Johannesburg.
Die minister het na die vergadering gesê sy is hoopvol dat die partye binnekort ‘n konsensus sal bereik.
Die algemene waarskuwing van die stakers by ons was dit gaan erger wees as Marikana. Vanmore glo almal gekeer by die Elandsfontein stasie om werk toe te gaan. Firmas het ons gebel en vertel “ons” stakers keer hulle werkers! As hulle so graag wil werk moet hulle maar vroeër kom! Ons het verlede jaar 6uur in die oggend al in die kantoor gesit want jy kon nie na 6 by die hekke in nie want dan het die bliksems ons gekeer deur voor die hek te lê! Dis te maklik om te sê jy kan nie kom nie want jy word voorgekeer!
Hulle wil nou die land op(F)staak.