Twee in Kaapstad geskiet

‘n Vyftienjarige seun is Sondagmiddag in Valhalla Park, Kaapstad in die kop geskiet. Hy is aan die besering dood.

Die Wes-Kaapse nooddienste het bekend gemaak dat die seun se liggaam in sy huis in Eleanor-pad gevind is terwyl hulle in die gebied was om ‘n ander noodgeval te hanteer.

Dis nie bekend wat die omstandighede van sy dood was nie.

In ‘n onverwante voorval is ‘n 25-jarige man in Tygerberg-hospitaal opgeneem met ‘n skietwond aan die kop.

Hy is in Ertjieboom-pad in Delft geskiet en dit wil voorkom of dit bendeverwant is. Hy verkeer in ‘n kritieke toestand.

Die anti-misdaadgroep Pagad het intussen ‘n beleid geformuleer vir bendegeteisterde buurte van die Kaapse Skiereiland in sy stryd teen dwelm- en bendebedrywighede.

Pagad se koördineerder, Moegamat Keraan, sê hulle het in Mitchells’s Plain met politieke partye vergader om die jongste misdaadstatistiek in die gebied te bespreek en oor die pad vorentoe te besin.

Hy sê dit is onaanvaarbaar dat plekke soos Nyanga en Mitchell’s Plain ingesluit word in die gebiede met die hoogste voorkoms van dwelmverwante misdade en moorde.

Keraan sê hulle sal met behulp van politieke partye toegang kry tot gebiede waar hulle nie voorheen kon ingaan nie.

Hy sê met die hulp van Azapo, die PAC en Cosatu kan hulle nou dié gemeenskappe help om van bendebedrywighede en dwelms ontslae te raak.

Minister kap korrupte geboorteregistrasie

Die Minister van Binnelandse Sake, Malusi Gigaba, het sekere kerkleiers en oneerlike tradisionele stamhoofde daarvan beskuldig dat hulle met korrupte staatsamptenare saamwerk om Suid-Afrikaanse geboortes te registreer vir mense wat nie hier gebore is nie.

Aansoeke vir geboortesertifikate het aansienlik gedaal sedert die begin van die regering se inisiatief om kinders binne 30 dae van geboorte te registreer, het Gigaba gesê.

Die vals registrasie van nie-Suid-Afrikaners tap die regering se welsynstoelaes en skep allerlei probleme omdat die Nasionale Bevolkingsregister nie die plaaslike inwonergetalle weergee nie.

Gigaba het egter kritiek ontvang oor die bekendstelling van ‘n visum vir Britse regeringsamptenare en diplomate in September. Die vereiste is in reaksie op die bekendstelling van visumvereistes vir alle Suid-Afrikaners deur die Verenigde Koninkryk.

Gigaba het aan verslaggewers in Pretoria gesê die Suid-Afrikaanse regering het probeer om die saak met die Verenigde Koninkryk op te los deur vrystelling vir Suid-Afrikaanse diplomate en amptenare te vra, maar “dié pogings was tevergeefs”.

“Maar gewone burgers van die Verenigde Koninkryk is vrygestel” het Gigaba gesê.

Die minister het ook bevestig dat aansoeke vir die Zimbabwe Spesiale Projek vanaf Oktober begin.

Die nuwe regime is ‘n uitbreiding vir Zimbabwiese burgers se status in SA onder die huidige spesiale verblyfstoegewings wat in Desember verval.

Hierdie Zimbabwiërs sal nou moet aansoek doen vir nuwe permitte wat in Desember 2017 eers sal verstryk. Na daardie datum sal die houers van die spesiale permit moet aansoek doen vir ‘n normale permit of visum vir hul verblyf.

Intussen het die Hooggeregshof beslis dat Gigaba se departement reëls oortree het oor deportasie na Botswana.

Suid-Afrika het ‘n moordverdagte na Botswana Suid-Afrika gestuur in weerwil daarvan dat die Wet van toepassing is op immigrante, het die Hooggeregshof in Pretoria verlede Dinsdag bevind.

Regter Eberhard Bertelsmann het Gigaba verwys na ‘n vorige Grondwethofbeslissing met betrekking tot die deportasies van twee Botswanase burgers.

Die hof het bevind dit was onwettig vir die departement om hulle te deporteer sonder die nodige versekering teen die doodstraf wat in Botswana steeds geld.

Watertekorte nog nie verby

Watertoevoer sukkel steeds in groot metropolitaanse gebiede, ten spyte van verklarings dat die probleem opgelos is.

Die Minister van Water en Sanitasie, Nomvula Mokonyane, sê water sal herlei word na elf Pretoriase voorstede.

Mokonyane sê die regering is bewus daarvan dat waterprobleme dringend aandag moet kry. Sy het gesê hulle het reeds begin om in infrastruktuur te belê.

Mokonyane het gesê daar moet verseker word dat geld wat geoormerk is vir instandhouding en bedryfskoste daarvoor aangewend moet word.

Rand Water het mense in Gauteng weer gevra om water spaarsaam te gebruik nadat hulle vroeër gesê het waterprobleme is opgelos.

Hulle het verlede week aangekondig dat die watertoevoer na Bedfordview en Germiston aan die Oos-Rand herstel is, maar inwoners kla steeds oor watertekorte.

Rand Water beweer nou dat die watervlakke in twee van die hoofopgaardamme in die gebied só gedaal het wat lei tot toevoerprobleme.

‘n Woordvoerder, Justice Mohale, sê ‘n hoë vraag na water en warm weer het veroorsaak dat watervlakke in die twee opgaardamme tot 30 persent gedaal het. Dit was Sondag nog op sowat 40 persent.

Mohale sê Rand Water is vol vertroue dat watertoevoer aan alle gebiede in Gauteng binne twee weke weer normaal sal wees.

Taxigeweld by Ellisras

Geweld het tussen twee taxiverenigings uitgebreek Donderdag in Marapong naby Ellisras (Lephalale), het die polisie in Limpopo gesê.

Vier mense wat in hegtenis geneem is nadat sewe voertuie, ‘n huis en drie spaza-winkels in Limpopo aan die brand gesteek is, sal vandag in die Lephalale landdroshof verskyn.

Die vier is glo deel van ‘n groep taxi-operateurs wat hulself tot geweld gewend het.

“Ons het vanoggend ’n oproep van ’n gemeenskapslid ontvang wat gesê het iemand word in Marapong aangerand,” het ao. Frans Mokoena, polisiewoordvoerder, Donderdag gesê.

“Die gevegte was tussen die plaaslike taxiverening en die nuut gevormde meter-taxigroep.”

Twee mense uit elk van die organisasies is in hegtenis geneem, het Mokoena gesê.

’n Beseerde taxibestuurder is in ’n hospitaal opgeneem nadat sy voertuig met klippe bestook is.

Die polisie het meter-taxi operateurs beveel om hul ritte tussen Lephalale en die Marapong township, sonder die nodige permitte, te staak.

Vroeër het ‘n woordvoerder van die departement van Vervoer, Veiligheid en Skakeling, Mafenya Lediga gesê hulle gaan met die betrokkenes praat om die kwessie van bedryfspermitte op te los.

Pastoor moedig lidmate aan om petrol te drink

Van gras eet na petrol sluk.

In Maart het past. Lesego Daniel van die Rabboni Centre Ministries in Garankuwa, noord van Pretoria, opslae gemaak toe hy sê sy gemeente moet gras eet.

Nou het hy dit verder gevat en gesê hulle moet petrol drink, nadat hy dit kamma in pynappelsap verander het.

Past. Lesego Daniel moedig sy gemeentelede die keer aan om petrol te drink nadat hy dit in “pynappelsap verander” het, het 702 gister berig.

In die video op YouTube, met ‘n waarskuwing om “dit nie te probeer as jy nie water in wyn kan verander nie”, wys hoe kerkgangers vloeistof uit ‘n bottel drink wat die pastoor beweer petrol is, en soos pynappelsap en Iron Brew proe.

Petrol is hoogs giftig en veroorsaak duiseligheid, erge moegheid, stuiptrekkings en bewusteloosheid – simptome wat sigbaar was by sommige van die mense op die video.

Zambiese president in NY-hospitaal

Volgens die New Yorkse polisie is president Michael Sata van Zambië Donderdag in ‘n hospitaal in New York opgeneem.

Sata het van Lusaka na New York gevlieg om die jaarlikse VN-byeenkoms van die Algemene Vergadering by te woon. Hy het egter nie sy toespraak Woensdag gelewer nie.

Volgens polisiehoof Kim Royster is hy Donderdag deur dokters van die Amerikaanse staatsdepartement behandel en daarna hospitaal toe geneem. Dis nog nie bekend om watter rede hy behandel word nie.

Die 77-jarige Sata het in 2011 Zambië se vyfde president geword.

Sata was in Junie in Israel om mediese behandeling te ondergaan.

Waterkrane drup weer

Rand Water is besig met die voortgesette monitering van reservoirs in Gauteng en sê geen waterrantsoenering word tans toegepas nie, het RSG berig.

Rand Water het vroeër gesê twee van sy pompstasies in Pretoria het weer water begin pomp. Die Eikenhof- en Palmiet-pompstasies was sedert verlede Maandag buite werking, na bewering weens vandalisme en kabeldiefstal.

Meer as 25 reservoirs in verskeie dele van die Tshwane Metro het ook drooggeloop, wat duisende inwoners in gebiede wes van Pretoria sonder water gelaat het.

Die Tshwane Metro het gister 17 watertenkwaens ontplooi in die gebiede wat deur watertekorte geraak is.

Intussen het hoogliggende gebiede in die Johannesburg-omgewing, soos Bedfordview en Primrose nog watertekorte omdat die waterdrukking tans nog laag is. Rand Water sê dit sal egter stelselmatig verbeter.

Meerderheid in SA wil moedertaalonderrig hê

Meer as twee derdes van Suid-Afrika se inwoners verkies moedertaalonderrig. Dié oorweldigende getuienis teen Engelse onderrig blyk uit ‘n meningspeiling van Ipsos-Markinor wat pas bekend gemaak is.

Onderrig in ‘n moedertaal op hoër- en basiese onderwysvlakke verbeter prestasie, het navorsing herhaaldelik bevestig. Dit is veral toepaslik in ‘n meertalige land wat reeds grootliks onderpresteer weens ‘n eentalige aandrang van owerhede.

Dit is dus duidelik dat die regering die verkeerde perd opgesaal het met slegs Engels, gegewe die swak skoolprestasie van leerlinge.

Luidens die Ipsos-Markinor-verklaring heers daar ‘n breë konsensus tussen verskillende taalgroepe oor moedertaalonderwys.

“Meer as twee derdes van alle Suid-Afrikaners is van mening dat hulle kinders die reg het om opgevoed te word in hul eie taal. Daar is ooreenstemmigheid hieroor onder al die onderskeie taalgroepe in die land.

“Die vraag hierna is die grootste onder Engels- en Afrikaanssprekendes, met ander Afrika-tale wat kort hierop volg.”

Die parlementêre portefeuljekomitee oor hoër onderwys, die Potchefstroomse studenteraad en Nehawu meen onderrig by die Noordwes-Universiteit moet alleen in Engels plaasvind en Afrikaans moet slegs getolk word in alle klasse.

Dié oproep is strydig met die internasionaal-erkende reg op moedertaalonderrig, wat tersiêre onderrig insluit. Daarbenewens ontken die oproep die meerderheid van belanghebbendes, naamlik ouers en leerlinge, se voorkeur vir hul eie tale.

In weerwil van kameraad Blade Nzimande, minister van hoër onderwys, se stelling dat eietalige instellings nie in Suid-Afrika geduld sal word nie, is dit duidelik dat skole, universiteite en ander hoër onderriginstellings die enigste aanvaarbare oplossing vir die land is.

Poskantoorstaking: Regering moet ingryp

Die kommunikasiewerkersvakbond, die CWU het ‘n beroep op die regering gedoen om in te gryp by die Poskantoorstaking. Die vakbond se adjunkpresident, Clyde Mervin sê die Poskantoor is in ‘n krisis, het RSG berig.

Hy het by die vakbond se nasionale kongres in Witrivier in Mpumalanga gesê die afdanking van die senior bestuurslede kan ‘n oplossing wees. Honderde poskantoorwerkers staak sedert verlede maand.

Hulle eis hoër salarisse en dat ‘n einde gemaak word aan wat hulle as uitbuiting bestempel. Aan die begin van die maand is 473 tydelike poskantoorwerkers afgedank wat onwettig gestaak het.

Poskantoorwerkers het ook in Januarie en Februarie gestaak wat tot groot oponthoude met posaflewering gelei het. Arbeidsoptrede by die Poskantoor het reeds vanjaar ‘n verlies van 71 miljoen rand tot gevolg gehad.

IMF dreig Zim oor skuld

Die Internasionale Monetêre Fonds het Zimbabwe dringend versoek om samesprekings met sy krediteure te voer om sy voorslepende skuldagterstand te probeer uitwis.

Die IMF is in die land om toe te sien dat die land sy ooreengekome ekonomiese hervormings uitgevoer het wat kan lei tot konsessies vir die terugbetaling van skuld.

In 2012 het die IMF egter Guinee se skuld afgeskryf. Harry Snoek, die IMF-verteenwoordiger het dié stap toe verwelkom vir die land wat besonder ryk is aan bauxite, goud, diamante en ystererts.

Die salarisrekening vir Zimbabwe se staatsamptenare is ‘n verleentheid en onvolhoubaar, het die Zimbabwiese minister van finansies Patrick Chinamasa toegegee na kritiek van die IMF.

Meer as ‘n driekwart van Zimbabwe se inkomste gaan aan die betaling van die salarisse van die meer as 250.000 staatsamptenare.

Die land se skuld het tot sowat R70 miljard toegeneem, wat dit moeilik maak om nuwe krediet te bekom.

Die yslike salarisrekening beteken dat Zimbabwe nie skuld kan afbetaal of die openbare infrastruktuur soos paaie, skole en hospitale kan onderhou nie.

“Ek is skaam dat ons salarisrekening ongeveer 76% is van die inkomste wat ons ontvang. Dit is nie goed nie, dit is nie volhoubaar nie,” het Patrick Chinamasa gesê aan sakeleiers.

President Robert Mugabe het salarisse vir staatsamptenare met 14% verhoog na beloftes wat hy gemaak het in die aanloop tot verlede jaar se verkiesing.

Die minister het egter daarop gewys dat die IFC (International Finance Corporation) se lenings aan die privaatsektor wel terugbetaal word.

“Die privaatsektor is nie onder sanksies geplaas nie, so ek verstaan ​​nie hoekom die IFC (deel van die Wêreldbank) nie kan help nie. Is dit ‘n strafmaatreël?

“Die IMF se verhouding met Zimbabwe moet een van geregtelike bestuurder en skuldeiser wees, nie dié van ‘n likwidateur nie. Die IMF moet nie toekyk hoe Zimbabwe ineenstort nie.”

Dominique Fanezzi het gesê die IMF is nie begaan oor die privaatsektor nie.

“Die IMF kan nie ondersteuning bied aan die privaatsektor nie. Ons leen aan regerings en sentrale banke. Ons is nie ‘n bank nie,” het hy gesê.

Fanezzi het dit duidelik gestel dat Zimbabwe se skuld aan lande in Europa, Amerika en China, nie afgeskryf sal word nie.

Industriële lande het egter in 2005 ‘n groot deel van Irak se skuld aan hulle verskuldig gekanselleer op aandrang van die VSA.

Irak het $40 miljard aan die Parys-klub, ‘n informele groepering van hoofsaaklik Westerse lande, geskuld. Die som het sowat ‘n derde van Irak se buitelandse skuld verteenwoordig. Die Parys-klub het uiteindelik 80 persent van die skuld aan al sy lede afgeskyf.

Volgens die Amerikaners moes Irak “gehelp” word want die skuld is “onder ‘n wrede diktatuur” aangegaan en “Irak verdien ‘n nuwe begin”.

In reaksie hierop het die Wêreldbank se President Wolfensohn toegegee dat skuldverligting vir Irak kan lei tot skuldverligting vir talle ander arm lande.

Prof Jeffrey Sachs van Columbia Universiteit, het vroeër gesê dit is “gewetenloos” vir die Parys-klub om groot bedrae skuld vir Irak af te skryf sonder die uitbreiding van die dieselfde verligting aan lande soos Nigerië, ‘n “ontluikende demokrasie” met baie skuld.

Baie van Nigerië se skuld is ook “onder diktatorskappe” aangegaan, terwyl ‘n groot deel van die bevolking in armoede leef.

Sachs het Afrika-lande aangemoedig om te weier om hul skuld af te betaal, as skuldeiserlande nie die skuld wil kanselleer nie. Sachs, is ‘n spesiale raadgewer van die VN se sekretaris-generaal oor Milleniumdoelwitte.