Eskom verklaar noodtoestand vir nywerhede

Eskom het Sondag ‘n kragnoodtoestand vir groot nywerheidskliënte verklaar.

“Eskom het ‘n kragnoodtoestand verklaar met groot industriële kliënte, en hulle versoek om dringend hul elektrisiteitsverbruik vandag tussen 15:00 tot 20:00 met 10 persent te verminder,” het Eskom in ‘n verklaring gesê.

“Die verklaring van ‘n kragnoodtoestand volg bykomend tot die implementering van fase twee beurtkrag vroeër vandag [Sondag].”

Volgens Eskom het die elektrisiteitsnetwerk ‘n toename in vraag ervaar weens die weerstoestande en verhoogde ladingsverliese as gevolg van verskeie opwekkingseenhede wat by die Majuba- en Matimba-kragstasies afgeskakel het.

“Eskom het ‘n totaal van 1700MW se opwekkingkapasiteit verloor.

“Eskom is nou besig om noodprotokol te volg in terme van sy noodtoestandprosedures om die kragstelsel te beveilig.” Weens die verlies van bykomende opwekkingskapasiteit, het Eskom om 12:00 Sondagmiddag met fase twee-beurtkrag begin en sal dit tot 22:00 Sondagaand voortduur.

“Die risiko van beurtkrag vir Maandag en Dinsdag is medium tot laag. Dit is weens die stadige vordering wat gemaak word in die proses om reserwes op te bou ten einde die moontlikheid van beurtkrag volgende week te probeer verminder,” het Eskom gesê.

“Eskom doen ‘n beroep op alle elektrisiteitsgebruikers om dringend hulle geisers, swembadpompe en alle nie-noodsaaklike toestelle af te skakel ten einde die kragstelsel toe te laat om te herstel.”

SABC se tegniese hoof waai oor kritiese verslag

Berigte dat Sipho Masinga, die openbare uitsaaier se groepshoof van tegnologie, geskors is, is glo waar. Die SABC wou egter nie uitbrei oor die redes vir sy skorsing nie.

“Die media gaan nie gebruik word as ‘n manier om ‘n dissiplinêre proses te hanteer nie,” het Kaizer Kganyago, woordvoerder van die SABC, aan Sapa gesê. Volgens Kganyago is Masinga meer as ‘n maand gelede al die deur gewys.

City Press het Sondag berig dat Masinga geskors is omdat hy onderbrekings in die diens op verouderde en gebrekkige infrastruktuur blameer het in ‘n verslag.

Radiostasies en TV-kanale was verlede maand glo weens tegniese probleme van die lug af. Kganyago het gesê die verslag is ‘n “interne dokument” wat nie in die openbaar bespreek behoort te word nie.

Volgens die City Press se berig het Masinga in sy verslag gesê dat talle van die probleme met die infrastruktuur “erger gemaak word deur die aanstelling van onbevoegde mense wat moratoriums plaas op instandhouding en belegging in nuwe tegnologie.”

Poskantoor dreig om stakers af te dank na ooreenkoms

Die Poskantoor het gedreig om werkers af te dank as hulle nie Maandag vir werk opdaag nie.

‘n Span is deur die minister van Pos- en Telekommunikasie, Siyabonga Cwele en die minister van Finansies, Nhlanhla Nene aangestel om die Poskantoorstaking by te lê.

Die hoof van die ingrypingspan, Simo Lushaba is deur die twee ministers aangewys om stakende werkers te oorreed om terug te keer werk toe.

Lushaba het die naweek gesê dat die diens reeds van sy werksaamhede hervat het.

Die Poskantoor het Vrydag ‘n salarisooreenkoms met twee vakbonde bereik nadat hulle tot ‘n verhoging van 6,5 persent ingestem het.

Die vakbond, CWU, wat 39 persent van die posdiens se werkers verteenwoordig, het die aanbod egter verwerp.

CWU eis ‘n verhoging van 7,5 persent.

Geen geregtigheid vir slagoffer sê Burry Stander se ma

Die saak oor die dood van die Olimpiese fietsryer Burry Stander is in die Port Shepstone landdroshof tot Maandag verdaag.

Die aangeklaagde het uitstel gevra sodat hy befondsing vir sy regsverteenwoordiger kan bekom, het RSG berig.

Die taxibestuurder Njabulo Nyawose se prokureur het versoek dat die verhoor vir twee maande uitgestel word sodat Nyawose finansiering kan bekom.

Stander se ma, Mandy het in trane uitgebars toe sy hoor die verdediging wil uitstel hê.

Sy sê dit voel asof die familie, as slagoffers, geen regte het nie.

Twee joernaliste by gevangenis gevang

Twee Indiër-joernaliste is oor die naweek by die Westville-gevangenis in Durban in hegtenis geneem nadat hulle hulself glo voorgedoen het as familielede.

Taschica Ramlackan en Suthentira Kaissri wou onder dié voorwendsel met een van die gevangenes ‘n onderhoud voer.

“Die joernaliste se name en publikasie vir wie hulle werk gaan nie in die stadium bekend gemaak word nie,” het die departement van korrektiewe dienste Donderdag in ʼn verklaring gesê. “Die twee het hulself as familielede van die gevangene voorgedoen en is betrap toe hulle besig was om ʼn onderhoud met die oortreder te voer.”

Hulle het na bewering Afdeling 122 van die Wet op Korrektiewe Dienste 111 van 1998 oortree.

Die wet verbied ondermeer ongemagtigde publikasie, valse voorstellings asook winsbejag uit die publikasie van misdade waarvoor oortreders vonnisse uitdien.

Hulle is aan die polisie oorgegee en het Maandag in die Pinetownse landdroshof verskyn waar hulle op R500 borg elk vrygelaat is.

Skikking vir orde in parlement verder onderhandel

Die verslag van die Parlement se Komitee oor Bevoegdhede en Voorregte wat strafmaatreëls teen 20 Parlementslede van die EFF aanbeveel, is amptelik deur die Nasionale Vergadering opgeskort.

Dit volg na bykans sewe uur se onderhandelinge tussen die opposisiepartye en die ANC.

Die ANC het vroeër weer die kwessie op die ordelys geplaas.

Die ANC het dié stap geneem nadat adjunkpresident Cyril Ramaphosa Dinsdag se ooreenkoms met die opposisie ná ‘n DA-mosie teen die President gekanselleer het.

Ramaphosa het die opposisie dié week verkwalik dat hulle ‘n skikking tussen verskillende partye verbreek het.

 

Een van die kwessies waaroor ooreengekom is, was om die verslag van die komitee op te skort totdat verdere gesprekke daaroor plaasgevind het.

Die ANC se hoofsweep, Stone Sizani, het die raad na die hervatting van sy werksaamhede intussen ingelig dat die verslag opgeskort sal word en dat die ooreenkoms met Ramaphosa en die opposisiepartye aanstaande week voortgesit sal word.

Zimbabwiërs moet teen jaareinde nuwe permitte vir SA hê

Volgens die minister van Binnelandse Sake, Malusi Gigaba is byna tweederdes van Zimbabwiërs se nuwe werkspermitte toegestaan.

Hy sê byna ‘n kwartmiljoen Zimbabwiërs moet teen die einde van die jaar aansoek doen vir dié permit.

Van die burgers van die buurland wat in Suid-Afrika werk en wat permitte as deel van ‘n vorige buitengewone bedeling toegestaan is, het reeds 64% aansoek gedoen om nuwe permitte.

Gigaba het ‘n sentrum in Kaapstad van sy departement besoek wat dié permitte uitreik.

Zimbabwiërs wat onwettig in die land woon het in 2009 die geleentheid gekry om wettig aan te bly deur deur die vorige permitaansoek.

Die nuwe permitte sal hulle toelaat om tot 2017 in die land te bly.

Die aansoeke word elektronies ingedien, en word by ‘n sentrum verwerk terwyl die aansoeker teenwoordig is. Net meer as 20 persent van aansoeke is tot dusver verwerk.

Gigaba sê hy is vol vertroue dat al die Zimbabwiërs hul aansoeke betyds sal indien.

Opod se administrasie knars tot stilstand onder McBride

Sedert Opod se uitvoerende direkteur, Robert McBride, se aanstelling, het die direktoraat se administrasie blykbaar tot stiltand gekom.

Die direktoraat ondersoek klagtes van wangedrag van die polisie en gee aanbevelings waaraan die SAPD moet voldoen binne 30 dae.

Wetgewing vereis dat die SAPD die minister die polisie in kennis moet stel en ‘n bewys moet indien dat die dissiplinêre kwessie afgehandel is.

Maar in minder as 5% van die gevalle waar aanbevelings verlede jaar gemaak is, is sulke bewyse ingedien. Dit beteken die indiening het met 10% vanaf 2012 verder afgeneem.

Die polisie se jaarverslag meld dat hulle 764 dissiplinêre aanbevelings van die direktoraat ontvang het , waarvan 645 binne 30 dae in werking gestel is. Volgens Opod het hulle 884 aanbevelings gedoen.

Maar die direktoraat se waarnemende hoofdirekteur vir ondersoeke, Matthews Sesoko, het gesê dokumentêre bewys van aanbevelings wat geïmplementeer is, bestaan feitlik nie. Hy het gesê Opod het slegs 38 volledige verslae van die polisie vir sy 2013/14 aanbevelings ontvang.

Die Adjunk-nasionale kommissaris vir Korporatiewe Dienste by die SAPD, luitenant-generaal Nobubele Mbekela, het gesê “dokumentêre bewyse was nog nooit ‘n vereiste nie”.

McBride se afwesigheid, blykbaar om ‘n strategiese beplanningsessie by te woon, het sy “minagting vir die proses” uitgelig, het opposisielede gesê.

Die aanstelling van McBride as hoof van die Onafhanklike Polisie-ondersoek Direktoraat (Opod), is voorheen met onthutsing begroet.

Opposisiepartye het gesê McBride is nie geskik vir die pos nie as gevolg van sy persoonlike regsprobleme in die verlede.

Maar, die minister van polisie, Nathi Mthethwa het lede vermaan en gesê dat McBride vrygespreek is van dronkbestuur aanklagte tydens sy termyn as Ekurhuleni Metro-polisiehoof.

Chaos in Gautengse wetgewer

Chaos het Dinsdag in die Gautengse wetgewer geheers, soortgelyk aan wat verlede week in die parlement afgespeel het, het The Star Woensdag berig.

Die dagblad berig dat lede van die ANC en EFF mekaar beledig en vulgêre uitlatings toegesnou het tydens ʼn amptelike sitting van die wetgewer.

Mandiso Mashego, EFF-lid, het na die ANC as die “African National Criminals” verwys en beskuldig die party daarvan dat hy daarvoor verantwoordelik is dat die publiek se beursie geplunder word.

Sy het ook Jacob Mamabolo, LUR vir samewerkende regering en tradisionele sake, daarvan beskuldig dat hy slegs tenders aan sy ANC-bondgenote toeken.

Mashego het ook beweer dat kontrakte om huise te bou en rioolstelsels op te gradeer, slegs aan ANC-lede toegeken word.

ANC-lede was ontstoke oor dié en ander bewerings.

Volgens die koerant het Sizakele Nkosi-Malobane, LUR vir gemeenskapsveiligheid, aan EFF-lede gesê het hulle is te familiêr met die ANC.

Nkosi-Malobane het ook geweier om die wetgewer te verlaat nadat speaker Ntobi Mekgwe hom versoek het om dit te doen.

Mashego het later haar uitlatings oor die ANC en beweringe teen Mamabolo teruggetrek.

Ramaphosa berispe DA oor parlementêre wanorde

Adjunk-President Cyril Ramaphosa sê die DA se besluit om met die mosie teen president Jacob Zuma voort te gaan, het die veelparty-ooreenkoms wat bereik is, geknou.

Hy sê die DA-besluit druis in teen die ooreenkoms wat Dinsdag met partyleiers bereik is.

Ramaphosa sê al die partye het ingestem om ‘n politieke oplossing vir die onuithoudbare toestand in die parlement te probeer vind.

Volgens hom druis die DA se mosie in teen die gees van die ooreenkoms.

Die parlement het intussen die DA se mosie om Zuma te berispe, verwerp.

Die DA-leier Mmusi Maimane, het die mosie ingedien omdat Zuma vrae in die Nasionale Vergadering skriftelik wou beantwoord.

Die mosie is met 217 stemme teen 78 verslaan met vier LP’s wat buite stemming gebly het.

Die ANC het talle onnodige mosies ingedien en die debat oor die DA-mosie met bykans vier uur vertraag.

Maimane het gesê die geloofwaardigheid van die Nasionale Vergadering kan net herstel word as Zuma die reëls van die Vergadering aanvaar.

Hy het gevra dat ‘n spesiale sitting van die parlement oorweeg moet word as Zuma bereid is om vrae te beantwoord.