Zuma kanselleer Mosambiek-besoek

Pres. Jacob Zuma het sy beplande besoek aan Mosambiek gekanselleer, het die presidensie Woensdag gesê.

Zuma het oudpres. Nelson Mandela Woensdag omstreeks 22:00 in die hospitaal in Pretoria besoek waar hy behandel word, en het by monde van sy woordvoerder, Mac Maharaj, gesê sy toestand is steeds kritiek.

“Pres. Zuma is deur dokters ingelig en hulle doen steeds alles wat hulle kan om sy [Mandela se] welstand te verseker.

“Pres. Zuma het besluit om sy besoek aan Maputo, Mosambiek vir môre, 27 Junie, te kanselleer, waar hy ‘n beraad van die Suider-Afrikaanse Ontwikkelingsgemeenskap oor streeks-infrastruktuurbeleggings moes bywoon.”

Mandela, 94, is op 8 Junie in die Mediclinic-harthospitaal in Pretoria opgeneem.

ANC erken erns van kubermisdaad na polisiedatabasis uitlek

Die staat het op geskrewe vrae van die Vryheidsfront Plus erken dat ‘n kuberkraker wat toegang tot die polisie-databasis verkry het, die name van tot 17 000 polisie-informante of ‘fluitjie-blasers’ in die proses bekom het en dat geen verdagtes nog hieroor geïdentifiseer is nie.

Dit blyk ook dat persone wie se name gelek is, tans nog geen beskerming van die staat ontvang nie.

Adv. Anton Alberts, die VF Plus se parlementêre woordvoerder oor kommunikasie, het gesê dit bevestig vermoedens dat die aangeleentheid veel meer omvangryk is as wat die polisie tot dusver wou erken en dat die inligting wat op die wyse bekom is, ‘uiters sensitief en betroubaar’ is.

Luidens mediaberigte het die polisie by monde van sy nasionale woordvoerder, brig. Phuti Setati, tot dusver ontken dat ‘enige geklassifiseerde inligting’ op die manier uitgelek het.

Volgens adv. Alberts is hierdie aangeleentheid ‘n reuse verleentheid vir die staat en die polisie, al is die erns daarvan tot nou toe ontken.

“Dit is ‘n groot terugslag vir die polisie se stryd teen misdaad aangesien mense met inligting nou bang sal wees om na vore te kom.

“Hierdie is agterlosigheid op ‘n groot skaal en dui op onbevoegdheid in die staat se inligtingstegnologie-agentskap (SITA) wat die polisie se webwerf bedryf. Die publiek se vertroue in die polisie sal gewis hierdeur geknou word,” sê adv. Alberts.

Adv. Alberts het vrae aan die ministers van polisie en van staatsdiens en administrasie gerig. Aan die minister van polisie is onder meer gevra om inligting bekend te maak oor wie se name gelek is, of verdagtes in die misdaad al geïdentifiseer is, of die persone wie se name gelek is in gevaar verkeer en wat gedoen word om hulle te beskerm.

Die antwoord daarop is onder meer dat geen persone wat deel is van die polisie se getuiebeskermingsprogram, se name gelek is nie.

Intussen word steeds ondersoek gedoen om te assesseer wat die ‘aard van die bedreiging’ is teen mense wie se name genoem is, en beskerming sal aan die hand hiervan verleen word sodra die ondersoek voltooi is.

Die minister van staatsdiens en administrasie het in haar antwoord bevestig dat inligting bekom is van tot 17 000 mense wat inligting oor misdaad aan die polisie verskaf het.

Om die stelsel te beveilig is veiligheidsmaatreël rondom die rekenaarstelsel verskerp en sagteware wat hierdie tipe inbraak voorkom, is onder meer op datum gebring.

Luidens die antwoord is die webwerf in 2004/2005 ontwikkel en word dit onderhou deur SITA. Daar is geen eksterne kontrakteur wat betrokke is by die instandhouding van die webwerf nie. Die onderhoud van die stelsel word gedoen ingevolge ‘n diensvlakooreenkoms tussen SITA en die SAPD.

Daar word ook ‘voortdurend’ ondersoek ingestel na nuwe metodes om kuberkraking te voorkom aangesien kuber-misdadigers tegnologies voortdurend nuwe maniere vind om veiligheidstelsels te omseil.

Na die voorval het die polisie ‘n span kundiges saamgestel wat ‘n assessering van die bestaande stelsel gedoen het. ‘n Gedetailleerde implementeringsplan is reeds in plek gestel om al die sekuriteitsvereistes rondom die stelsel op te knap, lui die antwoord.

Mandela: Bedrywig in Pretoria, Qunu

Dit was vroeg Woensdagoggend stil by Mandela se huis in Houghton, en polisiemotors het nou en dan in die straat patrollie gedoen. Dinsdag was egter bedrywig by die hospitaal in Pretoria.

Thabo Makgoba, die aartsbiskop van Kaapstad, is Dinsdagmiddag by die hospitaal waar oudpres. Nelson Mandela steeds in ‘n kritieke toestand lê, opgemerk.

Makgoba het die Medi-Clinic-harthospitaal se Parkstraat-ingang in ‘n donker Audi-sportnutsvoertuig verlaat.

Intussen het talle mense boodskappe met goeie wense by die hospitaal gelaat.

Een plakkaat wat teen ‘n heining by die hospitaal staangemaak is, lui: “Ons [hartjie] jou, Mandela”. Dis langs ‘n plakkaat neergesit met een van die bekendste Madiba-aanhalings op: “Dit lyk net onmoontlik tot dit gedoen is — Nelson Mandela”.

Die plakkate is gemaak deur Heleen Donnolly, eienaar van ‘n maatskappy wat plakkers vervaardig.

“Ons wil hom net bedank omdat hy daar was vir die land,” het Donnolly verduidelik.

Die bekende sakeman Kenny Kunene het by die Celliersstraat-ingang blomme neergesit en met die media gepraat. Meer metropolisiebeamptes het ná Kunene se besoek by die ingang opgedaag.

Hulle het Celliersstraat by die kruising met Parkstraat gesluit.

Kgosientso Ramokgopa, burgemeester van Tshwane, was ook te sien, en het vertrek ná ‘n gesprek met die polisiebeamptes.

Die presidensie het vroeër Dinsdag bevestig dat Mandela se toestand steeds kritiek is, en het gesê dokters doen steeds alles in hulle vermoë om te verseker dat hy gemaklik is.

Polisierekrute het ook vroeër die dag by die hospitaal opgedaag om blomme af te lewer en om hulle boodskappe met goeie wense vir die president agter te laat. Hulle het in ‘n bus hul opwagting gemaak.

Die sakeman Calvern Hugo het ongeveer 60 wit duiwe naby die Celliersstraat-ingang vrygelaat om Mandela se bydrae tot vryheid in die land te simboliseer.

“Dit was ‘n paar minute uit ons besige skedules wat ons opgeoffer het om dankie te sê vir die opofferings wat hy gemaak het vir die hele nasie,” het Hugo gesê.

Mandela se eksvrou, Winnie Madikizela-Mandela, het kort ná 12:30 weer saam met haar dogter, Zindzi Mandela-Motlhajwa, by die hospitaal aangekom.

Brandende kerse, bosse pienk en rooi blomme, plakkate en honderde boodskappe van ondersteuning was Woensdagoggend te sien by die ingang na die hospitaal in Pretoria waar oudpres. Nelson Mandela behandel word.

Die wêreldbekende ikoon is op 8 Junie in die hospitaal opgeneem weens ‘n herhalende longinfeksie, maar sy gesondheid het intussen verswak en die presidensie het Dinsdagmiddag bevestig dat sy toestand steeds kritiek is.

‘n Groot aantal boodskappe en kaartjies is op die naambord van die hospitaal op Celliersstraat aangebring.

Veiligheidspersoneel en polisielede bewaak die perseel steeds.

Polisiebeamptes het weer na 05:00 Woensdagoggend alle voertuie deursoek wat by die perseel aankom.

Talle plaaslike en internasionale joernaliste het ook weer buite die hospitaal saamgedrom.

Dit was Woensdagoggend stil by Mandela se huis in Houghton, en polisiemotors het nou en dan in die straat patrollie gedoen.

Drie motors en een bussie van die Johannesburgse metropolisie het omstreeks 01:10 in die straat ingedraai waar Mandela se huis is.

Die bussie, wat agter gery het, het sy noodligte aangeskakel, en het in die straat voor die hek stilgehou. Die bestuurder het die ligte geflits.

Ongeveer agt polisiebeamptes het uit die drie voertuie geklim. Hulle het ongeveer 10 minute lank voor die hek ‘n gesprek gevoer, waarna hulle terug in hulle motors geklim het en stadig weggery het.

Lede van die publiek het Woensdagoggend begin aankom by die hospitaal Mandela behandel word vir ‘n longinfeksie. Baie mense bring steeds kaartjies na die ingang van die hospitaal.

Intussen is bedrywighede aan die toeneem by Mandela se huis op Qunu in die Oos-Kaap met groter polisiesigbaarheid en meer media wat in die gebied begin aankom.

Mandela se kleinkinders, die Minister van die Staatsdiens en Administrasie, Lindiwe Sisulu en die UDM-leier, Bantu Holomisa, het dit ook bygewoon.

Die familie het ook die Mandela-begraafplaas besoek waar ‘n groep werkers besig was.

Sommige mediaberigte lui dat Madiba se kleinseun, Mandla Mandela na bewering uit die vergadering gestap het omdat sensitiewe familiesake bespreek is voor mense wat nie familie is nie.

‘n Kenner van Afrika-kultuur, Nokuzola Mndende sê sulke vergaderings vind slegs plaas wanneer die hoof van ‘n familie baie siek is.

Mandela-kinders baklei oor grafte

Gautengse koerante het Woensdag berig dat oudpres. Nelson Mandela se kleinseun, Mandla Mandela, uit ‘n familievergadering in Qunu geloop het na ‘n meningsverskil in die familie.

Drie bronne het aan The Star gesê daar is ‘n stryd tussen Mandla Mandela – wat wil hê Mandela moet by sy geboorteplek in Mvezo begrawe word – en die res, wat voel daar moet gehoor gegee word aan sy wens om langs sy kinders begrawe te word.

The Star het berig dat “belangrike” familiesake Dinsdag by die Mandela-familie se vergadering in Qunu bespreek is.

Die vergadering is bygewoon deur die familie, die UDM-leier Bantu Holomisa, en Lindiwe Sisulu, minister van die staatsdiens en administrasie.

The Times het berig dat ‘n groep familielede beplan om na Gauteng te vlieg vir ‘n besoek aan Mandela, wat in ‘n kritieke toestand is, waarna hulle sal besluit wat om te doen.

Die vergadering Dinsdag het volgens berigte gefokus op Mandela se gesondheidstoestand, en oor die verskuiwing van die familiegrafte van Qunu na Mvezo in 2011. Die grafte is deur Mandla Mandela verskuif.

The Times het berig die familie wil hê die grafte van drie van Mandela se kinders – sy seuns Makgatho en Thembekile, en sy dogter, Makaziwe – moet in Qunu wees.

Die koerant het berig dat ‘n ontstoke Mandla Mandela, wat die grafte geskuif het sonder om die familie te raadpleeg, uit die vergadering gestorm het.

Mandla Mandela kon nie vir kommentaar bereik word nie.

Zuma verdedig Angie se ywer

President Jacob Zuma het die minister van basiese onderwys, Angie Motshekga verdedig en gesê sy werk hard om die land se onderwys op koers te kry.

Motshekga is reeds ‘n geruime tyd in die spervuur weens haar departement se onvermoë om skoolhandboeke in Limpopo te laat aflewer.

Die onderwysersvakbond, Sadou het ook haar kop ge-eis nadat haar departement nie ‘n ooreenkoms met die vakbond gestand gedoen het nie.

Meer onlangs ervaar sy ook druk van die organisasie, Equal Education oor die publikasie van die minimum norme en standaarde vir skool-infrastruktuur. Motshekga se man, Mathole is verlede week as ANC hoofsweep afgedank.

Bizos sal Mandela nie besoek nie

Oudpres. Nelson Mandela se goeie vriend, George Bizos, het besluit om hom nie by die hospitaal in Pretoria te besoek waar hy behandel word nie, het The Star Dinsdag berig.

Bizos het aan die koerant gesê hy het Saterdag ‘n oproep van Mandela se vrou, Graca Machel, ontvang.

“Sy het vir my gesê hy doen nie goed nie, en ek aanvaar dit so,” het hy gesê.

Bizos het gesê hy het besluit om die 94-jarige Mandela liewer nie te besoek nie.

“Ek het die dokter se versoek om nie te veel besoekers in te laat nie, gerespekteer,” het hy gesê.

“Nie een van ons leef vir ewig nie. Ons moet hom laat leef so lank as moontlik.”

Mandela is op 8 Junie in die Medi-Clinic-harthospitaal in Pretoria opgeneem. Mac Maharaj, woordvoerder vir die presidensie, het Sondagaand gesê die voormalige staatshoof se toestand het kritiek geword.

Bizos het aan The Star gesê hy het Mandela ongeveer ‘n maand gelede gesien.

“Hy het redelik goed gedoen. Hy het my herken en ons het oor die ou dae gesels.”

Mandela se kinders het begin met ‘n hofgeding om George Bizos te verwyder as direkteur van twee van die oud-staatshoof se maatskappye.

ANC-lede ondersteun Malema glo

Julius Malema beweer dat senior leiers in die ANC hulle gewig by sy nuwe party ingegooi het, het EWN berig. Malema het Sondag op Radio 702/567 CapeTalk se Talk at Nine gesê senior lede van die ANC help hom.

Malema het glo gesê dié leiers sal na vore tree wanneer die tyd reg is. Hy het vroeër die maand bevestig dat hy sy eie politieke party, die Economic Freedom Fighters, wil stig.

Sy beweging sal onder meer vra vir die onteiening van grond sonder vergoeding, asook die nasionalisering van myne.

“Party van hulle gebruik tans die strategie om ons te beledig sodat hulle beskerm kan word en sodat dit lyk of hulle nie deel is van ons nie.”

Hy het gesê dié lede sal later openlik oor hulle besluit praat.

“Aan die einde, wanneer alles afgehandel is, kan hulle uitkom en openlik sê hierdie is wie hulle ondersteun.”

‘Mandela het nog nie gevra om te gaan nie’

Verskeie familielede van oudpres. Nelson Mandela het hom Maandag by die hospitaal in Pretoria besoek waar hy in ‘n kritieke toestand verkeer.

Sy eksvrou, Winnie Madikizela-Mandela, en sy dogter, Zindzi Mandela-Motlhajwa, het in ‘n goudkleurige BMW met blou polisieligte by die Harthospitaal in Pretoria aangekom.

Een van sy ander dogters, Zenani Mandela-Dlamini, het vroeër in ‘n swart Mercedes-Benz opgedaag.

Plaaslike en internasionale joernaliste wag ook nog geduldig buite die hospitaal.

Joernaliste het bespiegel dat pres. Jacob Zuma die voormalige staatshoof gou weer sal besoek.

Ook die minister van verdediging en militêre veterane, Nosiviwe Mapisa-Nqakula, het vroeër by die hospitaal aangekom.

Bantu Holomisa, leier van die UDM en ‘n vriend van die familie, het in ‘n BMW X5 sy opwagting gemaak.

Pres. Jacob Zuma het Maandagoggend tydens ‘n mediakonferensie in Parktown, Johannesburg bevestig dat Mandela se toestand steeds kritiek is.
 
“Die dokters doen alles in hulle vermoë om sy welstand en gemak te verseker,” het hy gesê.

“Ek dink nie ek is in ‘n posisie om verdere besonderhede te gee nie.”

Mandela se oudste dogter, Makaziwe, het in ‘n onderhoud met die nuuskanaal CNN gesê haar familie is nog nie heeltemal gereed om van hom afskeid te neem nie.

Sy het gesê die familie vind sommige berigte oor Mandela ontstellend en die media behoort terug te staan en die gesin te respekteer.

Sy het ook gepraat oor haar pa se mediese behandeling en dat die Thembu-kultuur vereis dat die sterwende vra om verlos te word. “My pa het dit nog nie vir ons gesê nie,” het sy verduidelik.

Breë front in SA teen Obama-besoek

Die Amerikaanse president Barack Obama se komende besoek aan Suid-Afrika is Sondag deur vakbonde, politieke partye, en burgerlike organisasies veroordeel.

“Ons stel dit kategories dat die besoek van die Amerikaanse president na Suid-Afrika is ‘n onwelkome besoek is, wat teengestaan moet word deur alle geregtigheids- en vredeliewende mense van hierdie land,” het die organisasies het in ‘n gesamentlike verklaring Sondag gesê.

“Vriendskap met Suid-Afrika moet gebaseer wees op waardes van geregtigheid, vryheid en gelykheid, en dié van die VSA gee aanstoot, ondermyn en bespot weens sy optrede op die globale front,” het hulle gesê.

Die verklaring is uitgereik deur die Nasionale Unies van Metaalwerkers van SA, die SA Kommunistiese Party, die Jong Kommunistiese Liga van SA, die SA Studentekongres, die Moslem Studentevereniging, die Nasionale Onderwys, Gesondheid en Verwante Werkersunie, Cosatu, die Vriende van Kuba, Boikot en Sanksies teen Israel en die Wêreldfederasie van Vakbonde.

“Ons verwerp die VSA se arrogante, selfsugtige en onderdrukkende buitelandse beleid, sy behandeling van werkers en internasionale handelverhoudings wat gestalte vind in oorlogsug, neo-liberale super-uitbuiting, koloniale rassisme en die miskenning en vernietiging van die omgewing, en sodoende die verwesenliking van ‘n regverdige en vreedsame wêreld onmoontlik maak,” het hulle gesê.

Obama se besoek later hierdie maand sal sy eerste na Suid-Afrika wees sedert hy verkies is as hoof van die staat.

“Die VSA, onder sy leiding, het sy aanslag op menseregte, militarisering van internasionale betrekkinge en voortgesette uitbuiting van die wêreld se hulpbronne teen die absolute koste van die omgewing en onderdrukte mense van die wêreld laat toeneem,” het die organisasies gesê.

Kwessies soos die VSA se gebruik van die wêreld se hulpbronne, die rol van die handhawing van die onderontwikkeling van die Afrika-kontinent, en sy bydrae tot aardverwarming sal uitgelig word in die protes.

Die publiek is genooi om deel te neem in ‘n nasionale dag van aksie op 28 Junie, waar ‘n protesoptog van die Uniegebou in Pretoria na die Amerikaanse ambassade om 10:00 sal loop.

Daar sal ook ‘n betoging op 29 Junie wees teen die Universiteit van Johannesburg se besluit om aan Obama ‘n eredoktorsgraad toe te ken. Dit sal gehou word by die universiteit se Soweto-kampus by 11:00.

Obama se strategie vir Agang ingespan

Die maatskappy was die president van die VSA asook reuse maatskappye soos Pfizer, Verizon, Tampax en JPMorgan Chase onder sy korporatiewe kliënte tel, wil Agang help.

Die nuwe politieke party wil dieselfde groep in sy politieke veldtog gebruik wat die Amerikaanse president Barack Obama gehelp het om sy land se verkiesing in 2008 te wen.

Agang se direkteur vir partybeleid, Mills Soko, het aan City Press gesê hulle het die maatskappy Benenson Strategy Group aangestel om Agang met verkiesingstrategie te help “omdat hulle die beste was wat ons kon opspoor.”

Benenson het al soortgelyke verkiesingswerk in Nigerië gedoen, en het pres. Umaru Yar’Adua gehelp om die verkiesing daar te wen.

Gie groep het reeds werk in Jamaika, Roemenië en Kroasië gedoen.

Soko het nie kommentaar gelewer op die feit dat Obama tans baie vrot vaar in meningspeilings nie. Die NSA-meeluisterskandaal wat onlangs deur Ed Snowden onthul is, aanvalle op burgerlikes deur Amerikaanse onbemande tuie en die mislukkings in Irak en Afghanistan, het Obama se gewildheid laat tuimel.