‘Mense voel baie veiliger nou as onder apartheid’

Bewerings deur emeritus-aartsbiskop Desmond Tutu dat Suid-Afrika een van die gewelddadigste samelewings is, is Saterdag deur Phumla Williams, waarnemende woordvoerder vir die kabinet, verwerp.

“Navorsing het bevestig dat die mense van Suid-Afrika nou veiliger voel as gedurende die apartheidsdae,” het Williams in ‘n verklaring gesê.

“Dit is ‘n direkte gevolg van die implementering van die beleid en strategieë van die Suid-Afrikaanse Polisiediens. Dit sluit hoë polisiesigbaarheid en vinnige reaksie op kriminele aktiwiteite in.”

Tutu het Donderdag gesê Suid-Afrika het sy sin van selfwaarde verloor.

“Ons is daarvan bewus dat ons, baie eenvoudig, een van die mees gewelddadige samelewings geword het. Dis nie wat ons was nie, selfs nie onder apartheid nie,” het hy Donderdag by ‘n seremonie gesê.

Williams het gesê polisiestatistieke dui daarop dat vlakke van geweldsmisdaad in die land aansienlik gedaal het.

“Aartsbiskop Tutu behoort die vooruitgang te erken wat die regering gemaak het sedert die begin van demokrasie, en godsdienstige leiers en ander belanghebbendes aan te moedig om met die regering saam te werk om misdaad te beveg,” het sy gesê.

VSA dryf homoseksuele agenda, sê aartsbiskop

Die Katolieke Aartsbiskop van Durban, Wilfred Napier, het dié week Amerikaanse voorwaardes vir hulp aan ontwikkelende lande, insluitend die verspreiding van kondome en die bevordering van die regte van homoseksuele mense, veroordeel.

Napier was vroeër in die spervuur, nadat hy pedofiele as siek mense beskryf het en nie misdadigers nie.

Hy het Amerikaanse inmenging as ‘n nuwe vorm van slawerny bestempel.

Hy het ook ontken dat hy homofobies is, deur te sê dit is onmoontlik aangesien hy geen homoseksuele mense ken nie.

Gerugte wil dit hê dat ‘n nuwe Pous gekies is omdat die vorige Katolieke kerkleier nie kans gesien het vir die groeiende skandaal oor kindermolestering in sy gemeentes wêreldwyd nie.

Napier was een van die 115 kardinale wat Pous Franciscus in Maart as die nuwe hoof van die Katolieke kerk verkies het.

Hy sê Suid-Afrika is besig om Amerika se agenda uit te voer met betrekking tot huwelike tussen mense van dieselfde geslag.

Sy opmerkings het woede uitgelok, slegs weke nadat hy moes verskoning vra omdat hy gesê het pedofilie is ‘n siekte en nie ‘n misdaad nie.

Vermeende kinderwelsyndief kry bevordering

‘n Vrou wat na bewering R3,8 miljoen van Kinderwelsyn SA gesteel het, sal Vrydag in die Kimberley-landdroshof verskyn.

Die 57-jarige vrou het na bewering tussen 2009 en 2011 altesaam R3,8 miljoen van dié organisasie in Kimberley gesteel.

Sy het volgens die Valke maatskaplike toelaes na haar persoonlike rekening oorbetaal.

Die verdagte is in Februarie in hegtenis geneem en sal teregstaan op 158 aanklagte van bedrog en korrupsie.

Sy is onlangs as ‘n senior bestuurder in die provinsie se onderwysdepartement aangestel.

Dubbele standaarde vir Derby-Lewis, Walus en APLA-terroriste, Shaik

“Twintig jaar het verstryk sedert Chris Hani deur Janus Walus doodgeskiet is en Walus, asook Clive Derby-Lewis, lewenslange gevangenisstraf weens die moord opgelê is.

Geheues het vervaag en ANC-propaganda oordonder feite en die harde werklikhede. In belang van reg en geregtigheid is dit noodsaaklik dat die werklike feite blootgele en die saak in perspektief gestel word.”

Só sê die Stigting vir gelykheid voor die reg waarvan die voorsitter, mnr. Johan Botha ‘n verklaring uitgereik het. Hier is die res van die verklaring:

Al die politieke partye by die onderhandelinge vir die huidige Grondwet het ooreengekom dat die grondslag vir die Grondwet onder meer sal berus op die volgende bepalings, soos dit in die slotgedeelte van die Tussentydse Grondwet uiteengesit is:

Die aanvaarding van hierdie Grondwet le die vaste fondament vir die mense van Suid-Afrika om die verdelings en tweespalt van die verlede, wat gelei het tot growwe skendings van menseregte, die verbreking van menslikheidsbeginsels in gewelddadige konflik en ‘n nalatenskap van haat, vrees, skuld en wraak, te oorbrug.

Die geleentheid is daar om dit nou reg te stel op die grondslag dat daar ‘n behoefte bestaan aan begrip en nie wraaksug nie, ‘n behoefte aan herstel en nie vergelding nie, ‘n behoefte aan medemenslikheid en nie viktimisering nie.

Ten einde die versoening en herstrukturering te bevorder, moet amnestic verleen word met betrekking tot dade, versuime en misdrywe wat met politieke oogmerke in verband staan en wat in die loop van die konflik van die verlede begaan is….

Hierdie beginsels is deur die huidige Grondwet bekragtig. Al die politieke leiers by die onderhandelinge, met uitsondering van die ANC, sal ook bevestig dat die bedoeling van hierdie bepalings was dat “politieke oogmerke” die gewone betekenis sou he, soos dit deur die gewone redelike mens verstaan word.

Die Wet op die Bevordering van Nasionale Eenheid en versoening wat aan hierdie bepalings moes uitdrukking gee, het egter die gees en die wese van hierdie bepalings verontagsaam, en is so saamgestel dat dit tot onder meer die volgende absurde gevolge gelei het:

Op 25 Julie 1993 het lede van Apia, die militere vleuel van die PAC, die St. James-Kerk in Kenilworth, Kaapstad, binnegestorm en weerlose kerkgangers, onder wie vroue en kinders, met AK-47-gewere en handgranate aangeval. Elf kerkgangers is gedood en 58 ernstig gewond. Al die lede van APIA het amnestie gekry. Die leier van die PAC, mnr. Letlapa Mphaphlela, wat die bevel vir die aanval gegee het, het in die openbaar verklaar dat hy weier om amnestie daarvoor te vra.

Hy is aanvanklik weens moord verhoor, maar die saak is van tyd tot tyd uitgestel en het uiteindelik van die rol verdwyn. Hy is tans ‘n lid van die parlement.

Janus Walus het Chris Hani op 10 April 1993 doodgeskiet. Hani was ‘n lid van Umkhonto weSizwe, ‘n geharde kommunis, wat terreuraanvalle en halssnoermoorde op onder ander weerlose vroue en kinders goedgekeur het. Walus en dive Derby-Lewis is weens die moord tot lewenslange gevangenisstraf gevonnis. Albei is amnestie geweier.

Na aanleiding van Clive Derby-Lewis se aansoek om parool het mnr. Ngconde Balfour, destydse Minister van Korrektiewe Dienste, hom soos volg uitgelaat:

“I will tell you [you] will not go out [of prison] Clive Derby-Lewis … you can go to hell”.

Clive Derby-Lewis, 77 jaar, het reeds bykans 20 jaar van sy gevangenisstraf uitgedien en het kanker in ‘n gevorderde stadium. Hy het reeds twee keer aansoek gedoen om mediese parool, wat geweier is. Schabir Shaik wat weens bedrog tot 15 jaar gevangenisstraf gevonnis is, is nadat hy 2 jaar en 4 maande van sy straf uitgedien het, op mediese parool vrygelaat. Die vrylating is allerwee veroordeel, maar die betrokke minister het hom hoegenaamd nie daaraan gesteur nie. Shaik is nog steeds op vrye voet.

Dat die weiering van mediese parool aan Clive Derby-Lewis uit blote wraaksug en vergelding geskied, sal geen redelike mens kan betwis nie.

Gautengers gaan vir e-tol moet opdok

Die ongewilde e-tolstelsel sal binne die volgende twee maande op Gautengse paaie in werking gestel word, het Sanral Donderdag gesê.

“Ons wag nou dat die parlementêre proses voltooi word, met die helfte reeds afgehandel,” het Vusi Mona, woordvoerder vir Sanral, in ‘n verklaring gesê.

Wetgewing moet afgehandel word, waarna die minister van vervoer, Ben Martins, die finale tariewe bekend sal maak.

“Daardie hele proses sal sowat twee maande neem om te voltooi. Daarna sal die e-tolstelsel begin,” het Mona gesê.

“Ons het ‘n verantwoordelikheid om saam hierdie land te bou en ons is dankbaar dat daar individue en groepe is wat die waarde van hierdie projek sien en wat bereid is om hulle rol in daardie opsig te speel.”

Die DA-parlementslid Jack Bloom het in reaksie gesê die regering moet selfs in hierdie laat stadium sy besluit heroorweeg want toenemende openbare teenstand kan die projek ontspoor.

“Dis die regering teen die mense van Gauteng noudat Sanral aangekondig het… dat die e-tolstelsel… oor twee maande gaan begin,” het hy in ‘n verklaring gesê.

“Die DA ondersteun Gautengse motoriste wat hulle vrye wil uitoefen deur nie ‘n e-skyfie te koop nie.”

Sowat 600 000 mense het al e-skyfies gekoop.

Zuma, Manuel stem saam oor apartheid

Uitsprake oor apartheid se nalatenskap in Suid-Afrika deur pres. Jacob Zuma en Trevor Manuel, minister in die presidensie, weerspreek mekaar nié, het die presidensie Donderdag gesê.

“Om te sê apartheid se nalatenskap en impak bestaan steeds en sal vir ‘n lang ruk nog met ons wees, beteken nie die president sê staatsamptenare moet dit gebruik as verskoning vir luiheid en onbevoegdheid nie,” het Mac Maharaj, woordvoerder, gesê.

“Die punt wat pres. Zuma gemaak het is dat dit onmoontlik is om die nalatenskap van apartheid in slegs 20 jaar om te keer.”

Pres. Jacob Zuma het Woensdag tydens ‘n toespraak om Chris Hani se dood te herdenk, gesê dis onmoontlik om in 20 jaar ware verandering te bring. Hy het gesê die land sal nog lank gebuk gaan onder die impak van apartheid.

“Om te sê ons kan apartheid nie blameer vir wat nou in ons land aangaan nie, dink ek is ‘n fout,” het pres. Zuma gesê.

“Ons kan nie ophou om die mense wat vir apartheid verantwoordelik was, te blameer nie.”

Manuel het op sy beurt verlede week volgens berigte gesê dis tyd vir die regering om self verantwoordelikheid vir sy aksies te aanvaar.

“Ons [die regering] behoort nie meer te sê dis apartheid se skuld nie. Ons moet elke oggend opstaan en besef ons is verantwoordelik. Die Botha-regime is nie meer daar om oor ons skouer te loer nie, ons is self verantwoordelik.”

Intussen het Jeremy Cronin, onderleier van die SAKP, volgens SABC Radio gesê Manuel se kommentaar is uit konteks geneem en deur die media misbruik.

“Kom ons kyk wat die kameraad eintlik gesê het, party van die ander goed wat nie op die nuusplakkate was nie – ons het ‘n sterk en doeltreffende regering nodig; ons sal nie die impak van apartheid op die geleenthede wat aan alle Suid-Afrikaners beskikbaar is, kan omkeer nie,” het Cronin Woensdagaand in Kaapstad gesê.

Manuel se uitlating was daarop gemik om staatsamptenare aan te moedig om meer pro-aktief te wees oor dienslewering, het Cronin gesê.

Polisie slaan op penis-pamflette toe

Die Johannesburgse Metropolisie het Donderdag op ‘n onderneming wat pamflette vir penisvergrotings met eksplisiete foto’s daarop in die stad versprei, toegeslaan

Twee mans wat die pamflette in Breestraat versprei het, het beamptes na ‘n kantoor in 220 Jeppestraat gelei, waar plakkate en pamflette vir die penisvergrotings gedruk word, het hoofsupt. Wayne Minnaar, polisiewoordvoerder, gesê.

Beamptes het op ongeveer 30 000 pamflette beslag gelê, asook op vervalste Nike- en Puma-T-hemde wat ook op die perseel vervaardig is.

Die polisie probeer die eienaar van die onderneming opspoor. Hy sal daarvan aangekla word dat hy onder andere die Wet op Seksuele Oortredings verontagsaam het, weens die eksplisiete foto’s op die pamflette.

Marikana-advokaat aangeval, gesteek

Dit is nog nie seker of adv. Dali Mpofu sy werk by die Marikana-ondersoekkommissie sal kan hervat nadat hy naby ‘n strand in Oos-Londen aangeval is nie.

Hy verteenwoordig mynwerkers by die Marikana kommisie van ondersoek.

Die ANC het die aanval op advokaat Dali Mpofu skerp veroordeel en sê so ‘n daad van boewery behoort nie geduld te word nie.

Mpofu, wat ook ‘n gewese bestuurshoof van die SAUK is, is gister omstreeks drie-uur die middag naby ‘n strand in Oos-Londen aangeval. Hy word in ‘n Oos-Londense hospitaal vir steekwonde in die bo-en onderlyf behandel.

Niemand is nog in verband met die voorval in hegtenis geneem nie.

Sapa het berig dat hy teen Donderdagaand in ‘n ernstige maar stabiele toestand was ná hy naby Oos-Londen se Oostelike Strand beroof en gesteek is.

Twee mense het hom Donderdag na bewering ongeveer 15:00 aangeval, het kol. Sibongile Soci, ‘n polisiewoordvoerder, gesê.

Volgens die polisie het twee mans persoonlike besittings soos sy selfoon geneem en hom met ‘n mes in sy bo- en onderlyf gesteek.

“Hierdie daad van boewery moet nie geduld word nie want dit ondermyn openbare veiligheid en is ‘n bedreiging vir lewens,” het Jackson Mthembu, woordvoerder vir die ANC, gesê.

Agang sal anti-man wees

Politici word nie genoeg vir hulle dade verantwoordelik gehou nie as gevolg van die land se sterk “manlike politieke kultuur,” het Mamphela Ramphele, leier van Agang SA, Donderdag gesê.

“Die kern van die probleem in ons land is ‘n politieke kultuur wat onder alle politieke partye gesien kan word, wat mans bevoordeel ten koste van ander sosiale groepe en wat politieke partye bevoordeel ten koste van individue,” het Ramphele gesê.

“In ons manlik gedomineerde en politiek-georiënteerde demokrasie is die verbintenis tussen politieke partye en burgers uiters swak en in sommige gevalle bestaan dit nie.”

Ramphele het gepraat tydens ‘n seminaar oor die hervorming van die kiesstelsel by die Universiteit van Suid-Afrika (Unisa).

Ramphele het met die bekendstelling van haar politieke platform in Februarie gevra vir ‘n nuwe stelsel waarin kiesers in geografiese kiesafdelings hul LP’s direk kan kies. Partyleiers kies tans self LP’s.

“Politieke lojaliteit oorheers individuele menseregte.

“Die lojaliteit-faktor word gekompliseer deur faktore soos ras, etnisiteit en geloof,” het sy gesê.

“Eers wanneer daar ‘n fundamentele verandering in Suid-Afrika se politieke kultuur kom, sal die land daartoe in staat kan wees om ‘n betekenisvolle verantwoordbaarheid in sy politieke stelsel te bou,” het Ramphele gesê.

“Die verandering van die verkiesingsklousule van ons grondwet moes al lankal plaasgevind het.

Geen data oor SEB bestaan nie sê VF+

Adv. Anton Alberts, die Vryheidsfront Plus se woordvoerder oor handel en nywerheid, sê geen behoorlike data bestaan wat aandui of swart ekonomiese bemagtiging in effek wel swart mense bemagtig het nie.

“Daar is onlangs ook in die parlementêre portefeuljekomitee oor handel en nywerheid vasgestel dat geen behoorlike data bestaan wat aandui of swart ekonomiese bemagtiging in effek wel swart mense bemagtig het nie.

“Dit beteken dat die ANC diskrimineer teen wittes sonder dat hy weet of sy beleid breed gesproke inderdaad swartmense ophef terwyl dit moontlik in die proses nuwe slagoffers skep. Dit maak die beleid in wese ongrondwetlik.

Alberts sê die ANC het byna twintig jaar gehad om te regeer en het byna net so lank ‘n twee derde-meerderheid gehad. Nou pak hy steeds die skuld vir die probleme in die land op apartheid.

Volgens adv. Alberts kon die regering in dié tyd sinvolle veranderinge, gebaseer op bewese vryemark-beleidsopsies, in die land aangebring het om mense op te hef indien hy waarlik erns daarmee gehad het.

Ten spyte daarvan het die ANC ‘n beleid ingestel wat net ‘n klein groepie ANC-kaders bevoordeel en verryk het sonder dat die land ekonomies gegroei het. Die ANC-beleid het eerder die gevolg gehad dat nuwe slagoffers deur transformasie geskep is.

“Indien die ANC in hierdie tyd behoorlike ekonomiese programme toegepas het, sou Suid-Afrika se ongelykheid nou reeds baie minder gewees het.

“Die ongelykhede het egter gegroei onder die ANC-bewind en het ‘n nuwe karakter aangeneem waar ongelykhede onder alle groepe, insluitend tussen swart mense, vergroot het.

“Zuma sê die ANC kan nie ophou om diegene wat vir apartheid verantwoordelik was aan te hou blameer nie.

“Indien dit inderdaad sy standpunt is, is die vraag waarom dan gediskrimineer word teen ‘n nuwe geslag witmense wat geen aandeel in apartheid gehad het nie?

“Die VF Plus gaan die saak verder neem in die betrokke komitee om te sorg dat die diskriminerende angel in die wet teen wittes verwyder word.

“Zuma en die ANC doen net lippediens aan sosiale kohesie. Dit is tyd dat die ANC en sy rassistiese ingesteldheid geëlimineer word ten einde ‘n regverdige samelewing te skep,” sê Alberts.