Kategorie: Nuus

SA by kruispad, waarsku Gordhan

Suid-Afrika is by ‘n kruispad weens die hernieude arbeidsonrus in die mynbousektor, het Pravin Gordhan, minister van finansies, Dinsdag gewaarsku.

Gordhan het in die parlement gesê werkers, die regering en ondernemings moet saamwerk om verdere werksverliese te bekamp.

Gordhan het ook gewaarsku dat ondernemings kan sluit en dat beleggers vertroue in die ekonomie kan verloor.

“Die huidige onsekerheid op die gebied van arbeidsverhoudinge in die mynbou en ander sektore vereis daadwerklike optrede deur die georganiseerde arbeidsektor, ondernemings, burgerlike leiers, en die regering,” het Gordhan gesê.

“Ons is almal saam in die situasie. As ons nie ons arbeidgeskille oplos nie, is ons almal verloorders.”

Gordhan het gesê sinvolle oplossings kan tot die voordeel van alle partye strek.

“As ons ‘n gebalanseerde, regverdige, verantwoordelike oplossing kry en as ons almal saamstaan sal ons meer belegging, hoër indiensneming, en verbeterings in lewensomstandighede sien.”

“Dit is die keuse wat voor ons lê.”

Zuma kry steun van De Klerk

Pres. Jacob Zuma het Dinsdag onverwagte steun gekry toe FW De Klerk uitgevaar het teen “doemprofete” wat die ondergang van die land voorspel.

De Klerk het gesê “afro-pessimiste” erken nie die vooruitgang wat wel in Suid-Afrika en Afrika gemaak word nie.

De Klerk het erken dat Suid-Afrika “ernstige internasionale beeldprobleme” het, maar hy het gesê die land het 18 jaar van bykans ononderbroke ekonomiese vooruitgang beleef.

Hy het bygevoeg dat aansienlike vooruitgang gemaak is in die stryd teen armoede, die verbetering van toegang tot behuising, water en elektrisiteit.

Sy uitlatings sluit aan by dié van Zuma en die ANC, wat onder skerp kritiek deurloop oor korrupsie, arbeidsonrus en werkloosheid.

De Klerk het egter nie net goeie woorde vir die regering gehad nie.

“Ons vaar swak in daardie areas van nasionale aktiwiteit wat die verantwoordelikheid van die regering is,” het hy gesê.

“Ons is in die onderste 20% met betrekking tot die gehalte van onderwys, die sakekoste van misdaad; die voorkoms van MIV; en die doeltreffendheid van die arbeidsmark.”

Hy het egter gesê die regering is bewus van dié probleme, en werk daaraan om dit op te los.

“Afrika en Suid-Afrika is op pad vorentoe,” het hy gesê.

Obama sal SA eersdaags besoek

Die Amerikaanse president, Barack Obama, gaan Suid-Afrika volgende maand besoek as deel van sy toer deur Afrika.

Die Withuis het Maandag gesê Obama sal vanaf 26 Junie tot 3 Julie Senegal, Suid-Afrika en Tanzanië besoek.

Die Amerikaanse Nasionale Veiligheidsraad het die aankondiging op sy Twitter-blad bekend gemaak.

Obama se vrou, Michelle, wat suidelike Afrika in Junie 2011 besoek het, sal hom vergesel op die toer.

Dit sal Obama se tweede ampsbesoek aan Afrika wees. Hy het Ghana in Julie 2009 besoek.

Obama is onder kwaai druk tuis, nadat dit aan die lig gekom het dat die Amerikaanse belastingdiens, die IRS, opsetlik konserwatiewe Tea Party-lede uitgesonder het vir belastingondersoeke sedert die Demokraat aan bewind is.

Kort tevore het dit bekend geraak dat die Obama-administrasie mede-verantwoordelik is vir die dood van die Amerikaanse ambassadeur in Bengazi en die feite probeer toesmeer het met versinsels oor die gebeure wat tot Chris Stevens en drie ander Amerikaners se dood gelei het.

Die aanval in Bengazi is gelei deur Al Kaida-terroriste wat deur die VSA bewapen en befonds is om Sirië te destabiliseer.

Obama se besoek sal waarskynlik gemik wees teen die blanke minderheid in Suid-Afrika om steun vir die swart minderheid in die VSA te werf.

Nog een by Beitbrug met heroïen gevang

‘n Man wat heroïen met ‘n geraamde straatwaarde van R2,64 miljoen vanaf Zimbabwe na Suid-Afrika wou smokkel, is by die Beitbrug-grenspos in hegtenis geneem, het die polisie in Limpopo Maandag gesê.

Die dwelms is Sondag in ‘n geheime kompartement in sy sak gevind, het kol. Ronel Otto, polisiewoordvoerder, gesê.

Die 38-jarige Tanzaniër is aan die Zimbabwiese kant van die grens in hegtenis geneem.

Hy sal na verwagting binnekort in die Musina-landdroshof verskyn op aanklag van dwelmhandel en die besit van dwelms.

Saterdag is ‘n 36-jarige man in hegtenis geneem nadat hy probeer het om kokaïen met ‘n geraamde straatwaarde van R18 miljoen oor die grenspos te smokkel.

Dié man sal na verwagting Maandag in die Musina-landdroshof verskyn op aanklagte van dwelmhandel en die besit van dwelms.

Gay Metodisteleraar hof toe oor afdanking

‘n Eertydse predikant in die Metodistekerk wat afgedank is oor haar gay huwelik, gaan ‘n hof nader om haar afdanking te betwis, het die Cape Times Maandag berig.

Ecclesia de Lange (43) het in Desember 2009 die Metodistekerk van Suider-Afrika in kennis gestel van haar voorneme om met haar lewensmaat te trou.

Sy is in 2010 daarvan aangekla dat sy die kerk se reëls oortree het en is afgedank nadat haar appèl verwerp is.

Die kerk het haar in Augustus 2006 as ‘n predikant verorden en sy het in gemeentes in Brackenfell en Windsor Park gewerk.

De Lange het aan die koerant gesê die kerk het “geen beleid oor gay huwelike nie”.

Hoewel die kerk al jare lank beleid formuleer oor gay-huwelike, is ‘n finale besluit nog nie geneem nie, en dus het De Lange geen reëls oortree nie.

Die saak sal Dinsdag in die Wes-Kaapse hooggeregshof aangehoor word, wanneer De Lange sal vra dat die kerk se interne beslissing ter syde gestel word en dat sy as predikant heraangestel word.

Sere: Eerste groot windplaas

Die Nasionale Energiereguleerder van Suid-Afrika (Nersa) het ‘n lisensie vir Eskom se Sere-windplaas in die Wes-Kaap goedgekeur.

“Hierdie is ‘n opwindende mylpaal in Eskom se dryf na skoner energie-opwekking,” het Brian Dames, uitvoerende hoof van Eskom, Maandag in ‘n verklaring gesê.

“Sere is ons eerste, grootskaalse projek vir hernieubare energie. Dit is ‘n bewys van ons verbintenis tot die vermindering van ons koolstofvoetspoor en tot beleggings in ‘n toekoms van volhoubare energie.”

Die lisensie sal Eskom toelaat om te begin met konstruksiewerk vir die projek van R2,4 miljard, wat na verwagting al in die eerste helfte van 2014 sy eerste krag aan die nasionale netwerk kan lewer. Die aanleg sal teen die einde van 2014 ten volle operasioneel wees.

Sere is die Nama-woord vir “koel bries”.

Eskom het gesê die windplaas, wat naby Koekenaap geleë sal wees, sal tot 100 MW krag lewer vir die nasionale kragnetwerk, en kan oor 20 jaar die vrystelling van sowat 4,7 miljoen ton se koolstofdioksied verhoed.

Die projek het ‘n operasionele lewensduur van sowat 20 jaar, en kan jaarliks krag voorsien vir sowat 97 000 gemiddelde wonings.

Siriese president staan vas

Die Siriese president, Bashar al-Assad, het Sondag gesê hy gaan nie bedank voordat ‘n verkiesing gehou word nie.

Die president se uitlatings verwerp die opposisie se eis dat samesprekings om die burgeroorlog in die land te beëindig, tot sy bedanking sal lei.

Assad het se kommentaar aan die Argentynse koerant Clarin, was die eerste oor sy moontlike rol in enige politieke oorgang sedert die VSA en Rusland vroeër vandeesmaand ingestem het om die twee partye op ‘n internasionale konferensie bymekaar te bring. Dié vergadering sal na verwagting volgende maand gehou word, maar geen datum is nog vasgestel nie.

Nie Assad of die Siriese nasionale koalisie het aangedui dat hulle die vergadering sal bywoon nie.

Meer as 70 000 mense het reeds gesterf en miljoene ander is ontwortel sedert die opstand teen Assad in Maart 2011.

Assad het diegene wat hom wil ontsetel as “terroriste met buitelandse steun” bestempel.

In die onderhoud met die koerant het Assad homself vergelyk met die kaptein wat oor Sirië se onstuimige see vaar en sê “die land is in ‘n krisis en wanneer daar ‘n storm is, vlug die kaptein nie”.

“Die eerste ding wat hy gaan doen is om deur die storm te beweeg en die skip na veiligheid bring,” het Assad gesê.

“Ek is nie iemand wat van my verantwoordelikhede vlug nie.”

Die Siriese weermag het met ‘n offensief begin om beheer van die dorp Kuser in die weste van die land terug te wen. ‘n Lugaanval is geloods, en die regering sê hulle het reeds 70 rebelle-vegters gedood.

Die rebellemagte in die dorp is al vir ‘n paar weke omsingel en van die buitewêreld afgesny. Aktivisite het beeldmateriaal op die internet vrygestel wat wys dat die rebelle se veldklinieke oorval word met ongevalle, wat rebelle vegters en burgerlikes insluit.

Kuser is ‘n strategiese dorp omdat voorrade na en van Libanon, sowel as die Siriese kus daardeur gaan.

Dodelike newe-effekte

Tot en met die val van die muur, het Westerse farmaseutiese maatskappye menslike proefkonyne in Oos-Duitse hospitale aangehou. Meer as 50 000 pasiënte was betrokke, dikwels sonder hul medewete, en baie is dood daarvan.

Die eksperimente op mense is nog nie ten volle ondersoek nie. ten spyte van vars bewyse van oortredings.

Nicole Preiss was nege toe haar ma in 1986 oorlede is. Die vrou het velkanker gehad, wat nie kwaadaardig was nie. Hoekom op aarde het die dokters “medisyne uit die Berlynse Westapotheke [apteek]” vir haar voorgeskryf? En waarom het haar toestand aansienlik versleg daarna?

Preiss, nou 37, is steeds op soek na antwoorde om te verstaan ​​wat die Oos-Duitse dokters vir haar ma by ‘n hospitaal in die stad van Erfurt ingegee het.

Sy vermoed die dokters het ‘n nuwe middel van die Weste op hul pasiënt getoets. “My ma se geval was selfs aangebied in die lesingsaal,” sê Preiss. “Daar is te veel geheime wat verband hou met haar dood, op die ouderdom van slegs 30,” sê haar dogter, wat glo dat farmaseutiese maatskappye ‘n rol gespeel in haar ma se dood.

Preiss is nie die enigste een nie. Blykbaar het ten minste 50.000 mense in die Duitse Demokratiese Republiek (DDR), of Oos-Duitsland, gedien as proefkonyne vir die Weste se farmaseutiese bedryf, dikwels onwetend. Vervaardigers, veral van Wes-Duitsland, Switserland en die Verenigde State van Amerika, het die DDR se hospitale vir meer as 600 kliniese toetse gebruik, sommiges met noodlottige gevolge.

Die Oos-Duitse instellings wat deelgeneem het daaraan het ingesluit internasionaal bekende universiteitshospitale, soos die Charité-hospitaal in Oos-Berlyn, sowel as meer as 50 hospitale in die land, in stede soos Dresden, Erfurt, Halle, Jena en Rostock.

Feitlik elke groot naam in die farmaseutiese bedryf was betrokke, insluitend Bayer, Schering, Hoechst, Boehringer, Pfizer, Sandoz en Roche. Die maatskappye het alles wat in hul navorsingslaboratoriums was, getoets vir chemoterapie, antidepressante en hartmedikasie, sowel as ander stowwe vars uit die laboratorium, waarvan die gevolge nog grootliks onbekend was aan wetenskaplikes.

Dit is skokkend dat die VSA steun verleen het aan sulke eksperimente op mense, gegewe die feit dat die Weste na afloop van die Tweede Wêreldoorlog oënskynlik gekant was teen “Nazi-bedywighede”.

Die gebruik van menslike proefkonyne is onder die donkerder hoofstukke van die farmaseutiese bedryf se geskiedenis. Mediese vooruitgang het altyd beweerde slagoffers. Maar mediese navorsing word veral gevaarlik vir pasiënte wanneer vinnige winste die bedryf oorheers. Wanneer dit gebeur, het navorsers nog altyd begin om perke te oorskry.

Die swak toestand waarin die gesondheidsorg in Oos-Duitsland verkeer het, het die dokters daar ook gretig gemaak om saam te werk met die bedryf. Die omkopery met geskenke en lekkernye uit die Weste het hulle samewerking om van hulle eie pasiënte te vergiftig, net verder vererger.

R18 miljoen se kokaiën by Beitbrug gevat

‘n Man wat kokaïen met ‘n geraamde straatwaarde van R18 miljoen oor die Beitbrug-grenspos wou smokkel, is in hegtenis geneem, het die polisie in Limpopo Sondag gesê.

“Die dwelms is gevind toe die man se sakke deursoek is,” het kol. Ronel Otto, polisiewoordvoerder, in ‘n verklaring gesê.

Sy het gesê die polisie het rolle met gare in die man se sak gevind. Die rolle was “baie swaar” en ‘n snuffelhond is ingeroep.

“Die hond het positief gereageer.”

Die gare is van die rolle verwyder en plastieksakkies met kokaïen is toe uitgehaal.

“Die kokaïen wat gevind is, weeg ‘n totaal van 10,8 kg en het ‘n geraamde straatwaarde van R12 miljoen,” het Otto gesê.

Otto het gesê nóg kokaïen, wat 5,2 kg weeg en ‘n geraamde straatwaarde het van R6,4 miljoen, is in ‘n valse kompartement in die sak gevind.

Die 36-jarige man sal Maandag op aanklagte van dwelmhandel en die besit van dwelms in die Musina-landdroshof verskyn.

Zuma nie by Gupta-landing betrokke nie

Pres. Jacob Zuma en sy kabinet was nie betrokke by die besluit ivm die Gupta-landing by die Waterkloof-lugmagbasis nie, het Jeff Radebe, minister van justisie, Sondag gesê.

Radebe het gesê Bruce Koloane, hoof van staatsprotokol, wat op verpligte verlof geplaas is, het ‘n verklaring gegee van almal wat betrokke was by die toestemming vir die vliegtuig op 29 April om te land.

“Dit is hoekom ons sonder enige vrees van teenstrydigheid sê geen minister was betrokke in die saak nie. Die president was nie betrokke in die saak nie.

“Die president is nie betrokke in die goedkeuring van die landing of geen landing by ‘n lugmagbasis nie. Die besluit lê by die departement van verdediging, veral die lugmagbeheer daar.”

Die Guptas se privaatstraler het 270 trougaste vervoer.

Die gaste het die troue van Vega Gupta en Aakash Jahajgarhia bygewoon. Die landing van die vliegtuig het wydverspreide kritiek ontlok.

Die regering het gevra dat ‘n ondersoek gedoen na ‘n moontlike verontagsaming van diplomatieke protokol. Radebe het die voorlopige bevindings van dié ondersoek bekend gemaak.

Een van die bevindings was dat die landing van ‘n kommersiële vliegtuig ‘n direkte gevolg was van die manipulasie van prosesse en dat name “genoem” is deur die loop van die gebeure.

“Wie se naam is genoem? Dit was nie ‘n naam nie, dit was name. Die minister van verdediging [Nosiviwe Mapisa-Nqakula], die minister van vervoer [Ben Martins] en die naam van die president.”

Die ministers het hul direkteurs-generaal gevra om onmiddellik te reageer or die voorstelle van die verslag.

Die departemente wat geraak word moet so gou as moontlik hul eie ondersoeke doen om te verseker dat tugstappe, waar nodig, gedoen word.

Verskeie aanklagte is reeds by die Sun City-polisiekantoor in die Noordwes aanhangig gemaak.

Die aanklagte hou verband met ondermeer die oortreding van die Wet op Vuurwapenbeheer en die Wet op Nasionale Padverkeer.

‘n Saak van die oortreding van die wet op polisie is by die Lyttleton-polisiekantoor in Gauteng aanhangig gemaak.

‘n Volledige verslag sal volgende week bekend gemaak word.