Nuus Archives - Page 551 of 1583

Krejcir se Duitse vriend gearresteer

‘n Duitse man wat glo al vir die afgelope agt jaar onwettig in Suid-Afrika woon, is in hegtenis geneem by sy huis in Kibler Park, suid van Johannesburg, Dinsdag , het die departement van binnelandse sake gesê.

“Willi Breuer word tans aangehou by Lindela-repatriasiesentrum en wag vir deportasie,” het ‘n woordvoerder van die departement Thapelo Moeng in ‘n verklaring gesê.

Breuer, 61, is glo ‘n goeie vriend van die Tsjeggiese voortvlugtige Radovan Krejcir .

Volgens City Press, het Breuer president Zuma privaat in sy huis in Johannesburg in September verlede jaar ontmoet.

Hy het glo gespog tydens die vergadering en gesê dat hy en sy maatskappy Auxilium Africa miljarde gaan belê in Suid-Afrika om afvalbestuur veral in armer munisipaliteite te transformeer, het die koerant berig.

Die man is brandarm, het die departement van binnelandse sake Dinsdag gesê.

“By die [ laaste bekende ] adres wat ons vir hom gehad het, het hy nie die huur vir die afgelope twee jaar daar betaal nie en is uiteindelik uitgesit,” het die departement se immigrasie-inspektoraat se hoofdirekteur Modiri Matthews gesê.

“Hy het basies homself aangebied as ‘n belegger. Dit is hoe hy in staat was om ‘n indrukwekkende profiel te kry. Maar die waarheid is dat hy leef van aalmoese van sy mede-Duitsers [ wat in en rondom Johannesburg woon ].

“Ons het hom gevind in die kelder van sy vriend se huis. Hy het gesê hy het geen geld nie,” het Matthews gesê. – Sapa

Lyk van vrou wat glo verkrag is, gevind in George

Die lyk van ’n 25-jarige vrou is in die agterplaas van ’n huis in George in die Suid-Kaap gevind.

Kapt. Bernadine Steyn het gesê ’n vriend het op die 25-jarige Belinda Paulsen se liggaam in Versfeldstraat in die bruin woonbuurt Conville afgekom.

“Die liggaam was gedeeltelik geklee en het op ’n matras gelê in ’n hut in die agterplaas. Ons vermoed dat sy met ’n stomp voorwerp in haar gesig geslaan is,” het Steyn gesê.

Die lyk van Paulsen is in ‘n huthuis, slegs ‘n paar huise vanaf haar ouerhuis, gevind.

Die oorledene se onderlyf was na wat verneem word naak toe ‘n vriend op haar liggaam afkom.

Volgens polisiewoordvoerder van die Suid-Kaap, kaptein Bernadine Steyn, word daar vermoed dat die oorledene met ‘n stomp voorwerp in die gesig geslaan is.

“Die moontlikheid van verkragting word ook ondersoek,” het Steyn gesê.

Nog geen verdagtes is in verband met die voorval aangekeer nie en ‘n saak van moord is geopen. – Sapa-AFP

Frankryk stuur soldate om SAR-chaos te verhoed

Frankryk gaan soldate na die Sentraal-Afrikaanse Republiek (SAR) stuur om stygende chaos in die land te verhoed.

Die aankondiging deur die Franse minister van verdediging, Jean-Yves Le Drian, volg ‘n dag nadat ‘n amptenaar van die Verenigde Nasies (VN) gewaarsku het teen grootskaalse menseregteskendings asook die gevaar van ‘n moontlike burgeroorlog wat dreig in een van die wêreld se armste lande.

Sedert die Seleka-rebellegroep in Maart kragte saamgespan het om pres. François Bozizé uit die kussings te lig, het die krisis in die SAR handuit geruk.

Frankryk sal die aantal soldate in die Sentraal-Afrikaanse Republiek verdriedubbel tot 1200 ná maande van geweld.

Die mineraalryke, maar arm land van 4,6 miljoen mense verkeer in chaos met baie rebelle wat uit die naburige Tsjad en Soedan die land instroom.

Die Franse minister van buitelandse sake Laurent Fabius het gesê die versterkings sal opdaag nadat die Veiligheidsraad van die VN ‘n resolusie ingestem het.

“Frankryk het 410 soldate nou in Bangui en dit sal versterk word na 800, wat die aantal na 1200 verhoog.”

Die VSA skat dat byna 400.000 mense ontwortel is en 68.000 het na buurlande gevlug sedert Selekaleier en tussentydse president Michel Djotodia beheer oor sy los koalisie van krygshere verloor het.

Die konflik word deur Seleka se hoofsaaklik Moslemvegters teen die Christene gevoer. Christene maak die helfte van die bevolking uit en Moslems net sowat 15 persent.

Die rebelle word deur menseregtegroepe van moord, verkragting en die opleiding van kindersoldate beskuldig. – Reuters/Sapa/AP

Oproermakers waarsku Kapenaars om winkels Vrydag te sluit

‘n Groep oproeriges wat verlede maand op ‘n gewelddadige plundertog in die Kaapstadse middestad gegaan het, het sake-ondernemings gewaarsku om Vrydag hul deure te sluit.

Nóg ‘n opmars word vir Vrydag beplan en sowat 50 000 inwoners word verwag, berig die Cape Times.

Die Cape Town Informal Settlements Organisation beplan om na die Wes-Kaapse wetgewer op te ruk om ‘n griefskrif aan Helen Zille, premier, te oorhandig.

Die stad het die groep toestemming geweier vir die optog.

Sithembele Majoba, woordvoerder van die groep, het gesê dít sal hulle nie keer nie.
“Daar sal geen kansellasie wees nie. Of dit wettig is of nie, ons sal betoog.”

Die optog sal om 10:00 by die Kaapstadse Parade begin.

Twee Valke vas oor beweerde bande met Krejcir

Twee lede van die Valke is vanoggend in hegtenis geneem weens beweerde bande met die Tsjeggiese voortvlugtige, Radovan Krejcir.

Die woordvoerder vir die Valke, Paul Ramaloko sê hulle word verbind met dieselfde saak van ontvoering waarin Krejcir na bewering betrokke is.

Die polisiewoordvoerder, Solomon Makgale het nog nie die inhegtenisneming van ‘n tweede verdagte bevestig nie.

Makgale het vroeër gesê dat ‘n 41-jarige adjudant-offisier in hegtenis geneem is.

Die voorval ter sprake het in Junie vanjaar plaasgevind. Krejcir en ‘n vennoot, Desai Lupondo is Vrydag in verband met die saak in hegtenis geneem en het Maandag in die hof verskyn.

Intussen het die Valke berigte ontken dat die bevelvoerder van die georganiseerde misdaad-eenheid in Germiston, Kolonel Francois Steyn bedank het.

Steyn het na wat berig word ‘n lening van R408.000 aanvaar van ‘n maatskappy wat bande met Krejcir het.

Hy het blykbaar eers vyf maande later uitgevind dat die maatskappy in Krejcir se vrou, Katerina se naam geregistreer is.

Beeld berig dat Steyn wou bedank, maar dat die nasionale polisiekommissaris, Riah Phiyega dit nie wou aanvaar nie, hangende die uitslag van ‘n interne ondersoek teen hom.

Ramaloko sê egter hy is bloot met verlof en dat hy nooit aangebied het om sy pos te verlaat nie.

‘n Ondersoekbeampte wat nie gemoeid is met die saak nie, sê die Tsjeggiese voortvlugtige, Radovan Krejcir sal dalk probeer om te ontsnap.

Krejcir het sy hofsaak gewen om onder polisiebewaking in ‘n hospitaal opgeneem te word.

Krejcir het nie verwag om in hegtenis geneem te word nie omdat hy skynbaar planne beraam het om die naweek uit Suid-Afrika pad te gee. – RSG

Polisiebeampte in hof oor vrou hom teister

’n Kaapse metropolisiebeampte het hom tot die gelykheidshof gewend nadat ’n vroulike kollega hom na bewering herhaaldelik seksueel geteister het.

Die 39-jarige superintendent het die Stad Kaapstad daarvan beskuldig dat hy versuim het om hom van die beampte te beskerm. Die vrou het glo herhaaldelik seksueel uitlokkende opmerkings gemaak en sy bobeen gestreel, berig The Times.

Die man het gesê hy is raadop en het hom tot die hof gewend omdat sy bestuurders nie sy klagtes ernstig opgeneem het nie.

Luidens hofdokumente het die probleme in Januarie begin toe hy sy rekenaar moes verstel sodat hy haar nie kan sien nie.

Die vrou het glo ook gevra om op sy skoot te sit en voorgestel dat sy voor hom uittrek.

Hy het tydens ’n ander voorval met ’n stresbal in die kantoor gesit, waarna sy by die deur gaan staan het.
“Sy het haar bene oopgemaak en voorgestel dat ek die bal tussen haar bene boul.”

Die voorvalle het hom “emosionele en professionele probleme, vernedering en moeilikheid in my huwelik veroorsaak en ook my goeie naam in oneer gebring”. – Sapa

Droogte gaan tekort aan rooivleis beteken

Veeboere in groot dele van die land reeds gedwing het om “tot ’n derde” van hul veekuddes te slag weens droogte.

Dié uitdunning sal lei tot ’n ernstige tekort aan rooivleis, het Die Burger berig.

Die kwaai droogte wat veekuddes knou, kan met dié van 1933 vergelyk word, maar dit duur reeds langer en strek wyer.

James Faber, Noord-Kaapse voorsitter van die Rooivleisprodusente-organisasie (RPO) en veeboer in die distrik van Barkly-Wes, het gister gesê boere slag hul vee uit wat dragtig is. Koeie wat kalf, is alreeds so erg verswak, hulle bly net lê.

“Ons gaan tekorte aan rooivleis sien. Oor vyf maande gaan daar nie lammers op die mark wees nie. Die siklus vir beeste is anders . . . daar sal die tekorte oor ’n langer tydperk van so 18 maande intree,” het hy gesê.

Wankelrige groeisyfer vir SA verwag

Groeisyfers wat vandag deur Statistiek Suid-Afrika bekendgestel word, sal na verwagting aandui dat die stakings in die voertuig- en mynsektore hulle tol op die ekonomiese bedrywighede in die derde kwartaal van die jaar geëis het.

Die meeste ekonome verwag dat die ekonomie met slegs een-komma-twee persent gegroei het.

Die voorspelling is heelwat onder die vyf persent groei wat die regering nodig het om broodnodige werk in die land te skep.

Volgens ons ekonomiese redaksie het die Reserwebank ‘n paar dae gelede gewaarsku dat die binnelandse ekonomiese groeivooruitsigte baie wankelrig is.

Daar word ook verwag dat die syfers vir die vervaadigings-en mynsektor, wat verantwoordelik is vir bykans ‘n kwart van die land se BBP, die groeisyfers ernstig sal knou. – RSG

Marikana: Brigadier verdedig bevel om te skiet

Die Marikanakommissie van Ondersoek het gehoor dat die meerderheid van die polisielede wat betrokke was by die skietery op 16 Augustus by Marikana, daarna gespanne en getraumatiseerd was.

Dit was deel van die getuienis van brigadier Adriaan Calitz wat die bevelvoerder was wat regstreekse bevele aan die polisielede op die dag van die skietery gegee het.

Calitz is gevra om te verduidelik waarom hy die polisielede op die skouer geklop het, na die skietery.

Calitz het verduidelik dat hy die lede se gemoedstoestand moes lig, aangesien daar gerugte was dat van hulle hulle werk sou verloor het.

Hy het daarop gewys dat hy as ‘n operasionele bevelvoerder met sy mense gepraat het en hulle daarop gewys het dat hulle niks verkeerd gedoen het nie en dat daar ‘n ernstige plig op hulle skouers rus.

Calitz het ook gesê die lede het ‘n 110 persent met hom saamgewerk en bevele uitgevoer. – RSG

DA sal op benadeling van net een rassegroep fokus

Leiers van die Demokratiese Alliansie het Sondag na sy beleidskonferensie die noodsaaklikheid vir rasbeleid beklemtoon ten einde die “nalatenskap van apartheid” reg te stel.

By ‘n perskonferensie in Kaapstad, het die DA -leier, Helen Zille gesê die party erken dat daar “beduidende korrelasie tussen ras en benadeling” is, en dat haar party “onomwonde” die behoefte aan “regstelling” ondersteun.

Zille en ander partyleiers, het gesê die beleidskonferensie die naweek het beklemtoon dat “ras ‘n grondige rede” vir benadeling is. Dit beteken die ras van die benadeeldes – waarvan almal swart is – kan vrylik erken word.

Die party het voorgestel dat die groeiende rassedruk van binne die party duidelik geïdentifiseer word en verteenwoordig word in beleid. Maar Zille het ontken dat die debat “rasgedrewe” was.

“Daar was nie onmin of rassepolarisasie oor die kwessies nie,” het sy gesê. Daarmee het Zille te kenne gegee dat wit DA-leiers nie beswaar gemaak het teen die swart rassebeleid wat die party tans omhels nie.

Die DA het tradisioneel staatgemaak op ‘n rasblinde benadering tot ontwikkeling, waar die regering se doeltreffendheid en ‘n kultuur van vrye onderneming benadruk is, en sou lei tot die opheffing van armes.

Terwyl Zille die dramatiese ommeswaai in die party se beleidsrigting probeer onderspeel het, het die parlementêre leier, Lindiwe Mazibuko haar kans waargeneem om die belang daarvan te beklemtoon.

Sy het gesê die erkenning van “ras” as ‘n belangrike filter in die DA se benadering tot regstelling sal voortaan hul beleid bepaal.

“Ek dink die groot ding wat uit die Federale Raad gekom het het in terme van leierskap was die vraag of die DA ras as ‘n wettige plaasvervanger vir benadeling aanvaar … en die antwoord was ‘ja’.”

Daar was berigte in die aanloop tot die konferensie dat swart lede van die Swart Koukus ‘n rassebeleid voorstaan.

Dit is na dese nie meer duidelik waar die party se benadering verskil van die ANC s’n nie.

“Ons uitdaging is om die balans tussen die behoefte aan rasseregstelling en ons verbintenis tot nie-rassigheid te behou,” het Zille erken.