Bankrot IDASA sluit deure

Idasa het “met leedwese”, die sluiting van hulle “gerespekteerde organisasie” aangekondig. Die raad het die “onvermydelikheid van die veranderende omstandighede” as rede aangevoer vir die sluiting. Die organisasie is bankrot.

‘n Aansoek sal op 2 April by die Noord Gauteng Hoërhof vir die likwidasie van Idasa aangehoor word. Dit sal gebeur tensy aansienlike onmiddellike bykomende finansiële steun gevind kan word.

Elke poging is gemaak oor die afgelope drie jaar om Idasa te hervorm om aan te pas by die huidige ekonomiese en sosio-politieke omstandighede, maar die organisasie wat die oorgawe van FW de Klerk geprys en help bestuur het, het nie meer die finansiële ondersteuning wat nodig is om sy werk voort te sit op ‘n volhoubare wyse of sy skulde te betaal nie.

In Idasa se bestaan van 27 jaar het heelwat Westerse lande en die diplomatieke en skenkergemeenskappe wat hul multikulturele visie van demokratiese samelewings in Afrika deel, bygedra tot die organisasie.

Idasa het ‘n kritieke rol gespeel in politieke gebeure van die afgelope twee dekades, om by te dra tot die sosio-ekonomiese ellende waarin talle kleiner groepe in Afrika verkeer met hul eensydige “verdieping van demokrasie” in Suid-Afrika en elders.

In 1992 het Ivor Jenkins vanuit IDASA die “Conservative Dialogue Programme” (CDP) geloods. Dit was die plan om te verhoed dat die NP en die ANC-SAKP se onderhandelingsproses in die wiele gery word deur ‘n sterk Afrikaner-opposisie.

In die loodskomitee was daar, naas regse figure, ook Jürgen Kögl en dr. F. Van Zyl Slabbert. Jenkins, Transvaalse direkteur van die Institute for Democratic Alternatives in SA (IDASA) en Van Zyl Slabbert, voormalige leier van die PFP, het die organisasie op die been gebring te midde van onderhandelinge met die ANC.

Prof. Abraham Viljoen, tweelingbroer van genl. Constand Viljoen, is deur IDASA aangestel as die koördineerder van die projek, wat rojaal deur die Nederlandse en die Kanadese regerings gefinansier is. Beide regerings is sterk aan die Britse regering verbind, deur sakebelange en die Gemenebes.

Viljoen was ‘n professor in Kerkgeskiedenis aan UNISA maar het bedank om PFP (later DP)- kandidaat in Waterkloof te word. Toe hy verslaan is, is hy by IDASA opgeneem, terwyl hy enersyds aktief in die DP-politiek gebly het en andersyds met Afrikaners in landbou-organisasies bly skakel het.

Brics beskuldig van neo-kolonialisme

China se Ontwikkelingsbank gaan sowat 45 miljard rand aan Transnet leen om Suid-Afrika se verouderende spoorweë op te gradeer.

Die nuusagentskap Reuters berig dat ‘n amptelike aankondiging oor die transaksie by die BRICS-beraad in Durban gedoen sal word.

Transnet vervoer produkte soos steenkool en ystererts vir uitvoer na die grootste hawens. Die maatskappy beplan om tot 300 miljard rand oor sewe jaar te belê om sy spoorweë en hawens uit te brei en uitvoere ‘n hupstoot te gee.

Die BRICS-lande is daarvan beskuldig dat hulle besig is om Afrika tussen hulle te verdeel. Dit was die boodskap van die meer as 200 afgevaardigdes van nie-regeringsorganisasies wat ‘n konferensie in Durban bywoon.

‘n Direkteur van GroundWork, Bobby Peek, sê die BRICS-lande doen niks anders as die voormalige koloniale magte nie.

EU lig sanksies teen ‘voorbeeldige’ Mugabe

Die Europese Unie (EU) het die meeste sanksies teen Zimbabwe opgehef as beloning vir die vreedsame referendum vroeër die maand.

Volgens RSG is pres. Robert Mugabe en sy vrou egter steeds op die sanksielys saam met amptenare van die land se weermag.

Die EU het gesê die opheffings dui op ‘n grootskaalse skuif in sy benadering tot Zimbabwe.

Mugabe het egter gesê slegs die algehele en onvoorwaardelike ophef van sanksies sal vir hom aanvaarbaar wees omdat dit tot die land se ekonomiese probleme gelei het.

Sanksies is in 2003 teen Zimbabwe weens menseregteskendings ingestel.

Mugabe is verantwoordelik vir die volksmoord waarin duisende Ndebeles omgekom het.

Indiese politieke leier sterf in sluipmoord

‘n Leier van ‘n politieke party is Dinsdag by sy huis in die Indiese hoofstad Nieu-Delhi doodgeskiet, het die polisie gesê.

Deepak Bhardwaj, van die Bahujan Samaj Party, ‘n groot party wat aktief is in die land se mees dig bevolkte staat, Uttar Pradesh, is by sy plaashuis deur drie ongeïdentifiseerde mans vermoor.

Die 61-jarige, wat verskeie hotelle en skole besit, is na ‘n nabygeleë hospitaal geneem waar hy dood verklaar is.

Bhardwaj het die nasionale verkiesing van 2009 betwis en was die rykste kandidaat, met bates wat ses miljard rupees (R1 miljard) werd was.

“Drie aanvallers het in ‘n motor opgedaag en aangedring op ‘n vergadering met Bhardwaj. Een van hulle het later twee keer op hom geskiet wat sy dood veroorsaak het,” het Neeraj Kumar, die polisiehoof in Delhi, gesê.

“Ons het kringtelevisie-beeldmateriaal van die motor, die verdagtes en verskeie wenke waaraan ons werk. Ek is seker ons sal hierdie saak binnekort oplos,” het hy bygevoeg.

Volgens polisiebeamptes kon die moord moontlik die gevolg gewees het van ‘n persoonlike vyandskap en die aanvallers was huurmoordenaars, het die plaaslike media berig.

Franse lei SA glo in ‘n lokval in SAR

Suid-Afrikaanse soldate wat betrokke was in die die stryd wat 13 ure geduur het in die Sentraal-Afrikaanse Republiek en waarin 13 van hulle gesneuwel het, sê hul missie het niks met “opleiding” te make gehad nie.

Daar word bespiegel dat die Franse weermag die Suid-Afrikaners gebruik het as lokaas om hul eie doelwitte in die SAR te bereik en dat die Suid-Afrikaners se betrokkenheid deur die Franse regering aangevra is om hule koloniale heerskappy te hervestig.

Blykbaar het die Franse reeds ‘n ander leier in die oog wat na hulle pype sal dans, en het hulle Suid-Afrika gebruik om Bozize uit die pad te kry.

Gedurende die skermutseling het die meeste Suid-Afrikaanse valskerm- en ander soldate se ammunisie opgeraak. Hulle sê hul verklaarde missie was “twak” en hulle was in werklikheid daar in ‘n “poging om president Francois Bozize in die kussings te hou”.

Dié nederlaag is die land se ergste militêre terugslag sedert 1994. Ten minste een soldaat word nog steeds vermis en gevegte in die hoofstad Bangui duur voort.

By die opening van die Brics-beraad in Durban, het President Jacob Zuma gesê Suid-Afrika het ingestem om die Sentraal-Afrikaanse Republiek se leër met infanterie, artillerie, spesiale magte, logistiek en bestuursopleiding toe te rus. Suid-Afrika het ingestem om te help met die opknapping van militêre infrastruktuur in Bouar en Bangui.

“Dit is ‘n grap,” sê een van die soldate wat nog steeds in Bangui is.

“Ons moes nooit hier gewees het in die eerste plek nie. Al wat ons doen, is om ‘n ander diktator te beskerm en te verseker dat hy vasklou aan mag maak nie saak wat nie.” Die ironie is dat Suid-Afrika tans ‘n wit koloniale mag in Afrika steun.

Die “opleiding”, het die soldaat gesê, was hoofsaaklik om Bozize te beskerm.

“Toe die papaja die waaier tref, het hy gevlug met ons hulp en ons word sonder enige beskerming gelaat,” het hy gesê.

Maar die SANW-hoof, luitenant-generaal Solly Shoke, het die sending as legitiem beskryf.

Nog ‘n soldaat het gesê die idee dat die Suid-Afrikaners militêre bates sou beskerm, is onsin.

“As ons regtig hier was om bates te beskerm en bekommerd was dat hulle in die hande van die vyand val, waarom nie die bevel uitreik om hulle te vernietig en dan ‘n taktiese onttrekking doen om weer later te veg wanneer ons versterkings het nie?

“Wat hier gebeur het, is baie verdag … die waarheid moet uitkom om diegene wat hier vermoor is te eerbiedig… om seker te maak dat ons vriende nie tevergeefs gesterf het nie,” het hy gesê.

Gevra oor moontlike onttrekkings, versterkings en of die troepe bereik kon word, het Shoke gesê dat die SANW op “politieke instruksies wag”.

In teenstelling met amptelike verslae, het een soldaat gesê 16 van sy kollegas is vermoor in ‘n geveg wat twee dae geduur het.

Bozize het in 2003 met ‘n staatsgreep die mag oorgeneem, soos ‘n ware Afrika-diktator.

Brics-spitsberaad skop in Durban af

President Jacob Zuma het die belangrikheid van Suid-Afrika se betrekkinge met China benadruk voor president Xi Jinping se besoek aan die Uniegebou in Pretoria.

Die nuutverkose Chinese staatshoof is in die land vir die BRICS-beraad wat vandag in Durban begin. Die twee leiers sal na verwagting verskeie ooreenkomste onderteken. Zuma sal vanmiddag ook president Vladimir Poetin van Rusland in Durban ontmoet.

Pres. Jacob Zuma het Maandag gesê ‘n spesiale forums sal ná die spitsberaad afgevaardigdes van Brasilië, Rusland, Indië, China, Suid-Afrika (Brics) en 15 staatshoofde van Afrika-lande byeenbring om ontwikkeling van infrastruktuur en industrialisering te bespreek.

‘n Brics-sake­forum sal tydens die spitsberaad bekend gestel word. Die ministers van finansies van die Brics-lande sal  hul ondersoek na die lewensvatbaarheid van ‘n Brics-ontwikkelingsbank openbaar maak.

Die internasionale klub, bestaande uit 125 afgevaardigdes van China, 125 van Rusland, 74 van Indië, 60 van Brasilië en 242 van Suid-Afrika, sal sake wat wissel van infrastruktuur, energie, finansiële dienste en mynbou asook die verwerking van mynbou- en landbouprodukte, onder die loep neem.

Aanbevelings en voorstelle van die afvaardigings sal na afloop van die spitsberaad voorgelê word aan die leiersforum van die Brics en Afrika-lande.

Druk op Zuma om soldate terug te bring

Versoeke is aan die toeneem dat die oorblywende Suid-Afrikaanse soldate in die Sentraal Afrikaanse Republiek na Suid-Afrika terugkeer. Die hoofsekretaris van Cosatu, Zwelinzima Vavi, sê soldate behoort ontplooi te word as deel van ‘n Afrika Unie-mandaat en hulle het ‘n president beskerm wat uit die land gevlug het.

Die Vryheidsfront Plus en die Suid-Afrikaanse Nasionale Weermagunie het saamgestem dat die soldate behoort terug te kom. President Jacob Zuma het in Januarie vanjaar die ontplooiing van soldate in die Sentraal Afrikaanse Republiek gemagtig as deel van ‘n militêre samewerkingsooreenkoms tussen die twee lande.

Slegs 200 van die soldate was ten tyde van die aanval in die land ontplooi. Hulle was in gevegte met tot tweeduisend rebelle betrokke waartydens 13 Suid-Afrikaners dood en 27 gewond is. Die Weermag sê die rebelle het egter groot lewensverliese gehad.

Intussen is onthul dat die afgesette president van die Sentraal Afrikaanse Republiek, Francois Bozize, Suid-Afrika om hulp gevra het nadat hy president Zuma verlede Vrydag ingelig het dat die rebelle hom gewaarsku het om die land te verlaat of ‘n militêre aanval te verwag.

Die Minister van Verdediging, Nosiviwe Mapisa-Nqakula, sê Bozize het Zuma ingelig dat die rebelle sy regering 72 uur tyd gegee het om die land te verlaat. Die nuus kom te midde van kritiek teen Suid-Afrika omdat hy nie sy soldate betyds aan die land onttrek het nie. Bozize bevind hom intussen in Kameroen.

Die DA het gevra dat die Speaker van die Nasionale Vergadering, Max Sisulu, ‘n veelparty adhoc-komitee op die been bring om die ontplooiing van Suid-Afrikaanse soldate in die Sentraal Afrikaanse Republiek te ondersoek.

Die DA-woordvoerder oor Verdediging, David Meynier, sê hy het ‘n brief aan Sisulu gestuur en gevra dat so ‘n komitee aangestel word. Maynier sê die Weermag moes nooit troepe na die Sentraal Afrikaanse Republiek gestuur het nie

SAR-rebelle vra om verskoning vir aanval op SA’ners

Al die Suid-Afrikaanse soldate wat in die Sentraal-Afrikaanse Republiek gewond is, is na die 1 Militêre Hospitaal in Pretoria geneem, het die Suid-Afrikaanse Nasionale Weermag gesê.

Die soldate wat slegs geringe beserings opgedoen het, is op die toneel behandel en kan aangaan met hul verpligtinge.

Die weermaghoof, genl. Solly Shoke, het gesê die res van die soldate ontvang die nodige ondersteuning wat hulle benodig.

“Ons soldate is steeds daar tot daar ‘n politieke ooreenkoms is. Ons sal in kennis gestel word. Ons regering sal besluit om te onttrek of nie. Om weg te hardloop is nie ‘n opsie nie.”

Ná die skietgeveg het rebelle ‘n wit vlag gehys en om ‘n skietstaking gevra.

“Die rebelle het met ‘n wit vlag gekom. As iemand ‘n wit vlag het mag jy nie skiet nie,” het Shoke gesê.

Shoke het gesê die skietstilstand word al vir die afgelope 24 uur gehandhaaf.

“Dit is die moeite werd om te noem dat die rebelle om verskoning gevra het vir die skietgeveg met lede van die SANW en het aangedui dat hulle spyt is oor wat gebeur het.”

Altesaam 13 soldate is dood en 27 is gewond in ‘n skietgeveg met die rebelle. Een soldaat word vermis.

Regering skuldig aan dood van soldate in die SAR

Die Suid-Afrikaanse regering moet volle verantwoordelik aanvaar vir die doodskiet van dertien van sy soldate in die Sentraal-Afrikaanse Republiek (SAR). Nog 27 soldate is gewond terwyl een vermis word.

Mnr. Pieter Groenewald, die Vryheidsfront Plus se woordvoerder oor verdediging, sê die regering het die SA Nasionale Weermag oor die afgelope dekade ‘toenemend verwaarloos’ deur nie genoeg fondse beskikbaar te stel wat nodig sou wees vir ‘n professionele en effektiewe weermag nie.

“Die situasie is weens ‘n tekort aan logistieke- en lugsteun wat nou blootgestel is, so benard dat ons glo alle soldate moet onmiddellik uit die gebied onttrek word om verdere lewensverlies te voorkom.

“Dit wil voorkom of pres. Jacob Zuma sonder behoorlike oorweging besluit het om weermaglede in die SAR te ontplooi sonder behoorlike logistieke- en lugsteun vir sulke operasies.

“Militêre kenners het lank reeds gewaarsku dat die weermag nie behoorlike vredesoperasies kan uitvoer sonder hierdie tipe ondersteuning nie.

“Dit is daarom nie verrassend dat die treurspel plaasgevind het nie en dit kan hom herhaal indien die regering nie drasties ingryp en die land se verdedigingsbegroting sodanig aanpas dat sy soldate hul plig behoorlik kan uitvoer nie,” sê mnr. Groenewald.

Hy sê daar word lank reeds gewaarsku dat daar nie voldoende fondse is vir die behoorlike opleiding van soldate en vlieëniers nie.

“Dit is wel strategies belangrik vir Suid-Afrika om betrokke te wees in die streek, maar dan moet ons oor die nodige kundigheid en vermoë beskik, anders word Suid-Afrika voor die hele wêreld in die verleentheid gestel en verneder soos nou gebeur het.

“Die VF Plus betreur die voorval en betuig sy diepgaande simpatie met familie en vriende van die gesneuwelde soldate,” sê mnr. Groenewald.

Agang mik vir wit boere

By die opening van die Land Divided 2013-konferensie by die Universiteit van Kaapstad (UK) Sondag, het Mamphela Ramphele gesê die land is armer want Suid-Afrika verloor kommerwekkend baie van sy kommersiële boere na lande na die noorde van ons.

Vyftien jaar gelede was daar 100 000 kommersiële boere in Suid-Afrika, vandag was daar 36 000.

“Dit is kommerwekkend dat Suid-Afrika sy kommersiële boere verloor aan ander lande na die noorde. Ons word vertel dat 50% van die kommersiële boere in Zambië Suid-Afrikaners is. Daar is 800 van hulle in Mosambiek.”

Kommersiële boere is wat nodig is om die opkoms van klein boere aan te moedig en te ondersteun, het Ramphele gesê.

Die vier-dag-konferensie is 100 jaar ná die aanvaarding van die 1913-segregasiewet gehou. Dié wet het swart eienaarskap van grond in Suid-Afrika omskryf.

Die konferensie-organiseerders – die Universiteit van Kaapstad, Stellenbosch en Wes-Kaap – sê dit bied ‘n groot geleentheid vir navorsers, die burgerlike samelewing en die staat om te besin oor die betekenis van “die grondvraag ‘in die Suid-Afrikaanse samelewing”.

Ramphele het gesê dat 19 jaar na demokrasie, die grondvraagstuk steeds “historiese, emosionele en simboliese betekenis” in Suid-Afrika inhou.

Sy het gesê dit beliggaam ‘n “verlore geleentheid”, wat gebruik kan word om die land se ekonomiese groei te verbeter.

“As ons regtig ‘n kreatiewe benadering tot grondhervorming volg, sal ons groei [ekonomies] met dubbelsyfers.”

Ramphele het gesê ongelykheid in Suid-Afrika is struktureel geskep, en daarom “moet dit struktureel reggestel word”.

Sy het ook kritiek gelewer op die ANC se verskansing van stamowerhede.

“Ons moet strukturele ekonomiese ongelykhede aanspreek […] en verseker dat landelike mense burgerregte geniet, eerder as … om onder die gebruiklike gesag van hoofmanne te staan.”

Onder die apartheidsregering, is mag oor grond gekonsentreer in die hande van hoofmanne.

“Die ANC-regering gaan voort om die outokratiese rol van die hoofmanne oor die grond te bestendig, en daardeur marginaliseer hulle gewone mense.”

“Ek kan nie glo dit word gedoen deur ons eie post-apartheid regering nie,” het Ramphele gesê.

Sy het haar gehoor vertel dat die gewillige koper, gewillige verkoper-model van die oordrag van grond aan swart eienaarskap nie gewerk het nie.