Skrywer: Dan Roodt

SA-sending in SAR loop ‘verskriklik’ verkeerd

Minstens nege Suid-Afrikaanse soldate is gedood in die Sentraal-Afrikaanse Republiek in die botsings met die rebelle.

‘n Suid-Afrikaanse militêre kenner het gesê “niemand kon dink dat die operasie só verskriklik sou skeefloop nie”.

Rebelle het Sondag die hoofstad Bangui ingeneem en die bewind van President Francois Bozize omvergewerp, het ‘n ooggetuie aan Reuters gesê.

Hy het eers ses lyke en later drie liggame van Suid-Afrikaanse soldat by die uitgebrande voertuie gesien.

“Ek het die liggame van ses Suid-Afrikaanse soldate gesien. Hulle is almal geskiet. Hul voertuie is ook vernietig. Ander Suid-Afrikaanse soldate het gekom om die liggame te kom haal,” het een ooggetuie gesê.

Sowat 600 Suid-Afrikaanse soldate is sonder lugsteun in die land ontplooi. SANW het intussen bevestig dat van sy soldate dood en gewond is, maar kon nie besonderhede oor die aantal dooies en gewondes verstrek nie.

Volgens gerugte kan daar tot 40 gewondes wees. Dit is nie seker of van die soldate vermis of gevange geneem is nie.

Twee Suid-Afrikaanse Hercules C-130-vragvliegtuie is na Entebbe, Uganda, onderweg om die gewondes en dooies na Suid-Afrika terug te bring.

Die SAR is ‘n mineraalryke land met neerslae van uraan, goud en diamante

Frankryk het aansienlike ekonomiese belange in die onstuimige land. Die Franse kernreus Areva het sy Bakouma uraanprojek vir twee jaar in 2011 egter opgeskort as gevolg van ‘n daling in uraanpryse na die Fukushima-ramp.

Die aanval op die Suid-Afrikaners is ‘n terugslag vir die land se pogings om deur vredesendings groter invloed op die kontinent te verkry. Frankryk het 250 soldate reeds in die SAR en het inderhaas 300 uit Gaboen ingevlieg.

Die AU het die aanval veroordeel.

“Die plundery is sleg. Beide die bevolking en Seleka [die rebelle-alliansie] is betrokke,” sê ‘n senior VN-amptenaar in die hoofstad Bangui. “Ons is nie seker wie in beheer is nie, ek dink nie dit is al duidelik nie.”

Medupi: Arbeidsonrus smeul

Vergeet wat Eskom, die regering en die media sê: Hier volg ‘n verslag deureen van die wit kontrakteurs by Medupi, uit Ellisras.

Ek werk op Medupi kragstasie projek nou al vir 2 jaar. Ons het nou al die perseel ‘n allemintige 11 keer in hierdie laaste 2 jaar ontruim! As die klomp werkers ongelukkig is oor iets, staak hulle, gooi klippe en brand af. Soos ek nou hier sit en tik, sit ons buite die Medupi-perseel omdat daar weer omtrent 2000 van die ontevredenes staan en dans, almal met stokke en konstruksiepype wat hulle rondswaai.

Einde verlede jaar is heelwat skade aangerig. Hierdie jaar is daar “net” ‘n hele spul voertuie se ruite uitgegooi. Vandat ons in Januarie oopgemaak het, was daar nog nie een dag se produksie gelewer nie. Ons moes al twee keer die jaarlikse induksie doen. Elke keer wat ons op die punt staan om te begin werk, gooi die blikslaers klip en dan moet ons hardloop. Die media berig dat als in orde is en dat produksie weer op koers is. Dit is een groot leuen.

Ons staan al amper einde Maart se kant toe, en hier was nog absoluut niks gedoen aan die kragstasie nie. Hulle kry elke week ‘n nuwe rede om te staak. Dit wissel van bonusse wat hulle glo nie reg was nie, die Project Labour Agreement wat hulle wil uit hê, alle waarskuwings wat moet verval, ens, ens.

Verlede week het die polisie rubberkoeëls geskiet, en een van die werkers wat getref is, is ‘n paar dae gelede oorlede. Nou staak hulle weer want hulle soek 10 af om te “rou”. Elke week is daar ‘n ander rede. En Eskom sit terug en maak asof niks gebeur nie. Hulle het sekuriteitsheinings om hulle kantore gespan en ‘n hele klomp sekuriteitspersoneel en tegnologie wat hulle beskerm. Maar die kontrakteurs is aan hulle eie lot oorgelaat. Ons is die ape wat elke keer moet hardloop as die geweld opvlam.

Disqus en verandering op die PRAAG-blad

Oor die afgelope week of wat het heelwat lesers seker gewonder waarom ons skielik die Disqus-kommentaarfasiliteit afgeskakel het. Let wel: Disqus is bloot afgeskakel en kan te eniger tyd geheraktiveer word met dieselfde inhoud wat steeds op Disqus.com beskikbaar is. Met u huidige gebruikersnaam en wagwoord kan u wel toegang tot u inhoud by Disqus verkry.

Omdat daar soveel ander interaktiewe forums soos Twitter en Facebook beskikbaar is, is die kommentaarfunksie op PRAAG nie van wesentlike belang vir wat ons wil bereik nie. Om die kommentare te modereer, het ons twee PRAAG-medewerkers gehad wat konstant alles gelees het en van die meer lasterlike of kwetsende stof verwyder het. Op die ou end kos dit ons geld en moeite om ‘n gespreksforum aan die gang te hou wat deur ‘n klein groepie moedswilliges misbruik word om óf aanvalle op PRAAG en die redaksie te loods óf om aartsreaksionêre kommentaar te lewer wat elders op byvoorbeeld Naspers se kommentaarafdelings nie geduld sal word nie.

Ook het van ons vyande sommige uitsprake op die kommentaarafdeling begin gebruik om dit aan PRAAG self toe te dig. Ons wil ‘n voortreflike Afrikaanse webwerf met aktuele, maar ook intellektuele artikels aan die gang hou wat ons met trots aan enigiemand kan toon en kan daarom nie bekostig om met skrywes van die Israelvisie-tipe of ander sektariese rigtings geassosieer te word nie.

Dis soveel te meer belangrik omdat ons juis, benewens ons daaglikse aktuele artikels en kommentaar, meer navorsingsartikels wil publiseer. PRAAG beskik oor ‘n belangrike groep lesers onder joernaliste, meningsvormers en akademici en ons wil graag die intellektuele onderbou met spesialisartikels versterk sonder om die algemene inhoud aan te tas.

Ons het reeds die slagspreuk van ons Engelse blad by praag.org na “journal for cultural studies” verander. Die Afrikaanse webblad sal binnekort van die subtitel “kwj” voorsien word, wat vir “kultuurwetenskapsjoernaal” sal staan.

Daar is ‘n groot behoefte aan die volgende:

– meer diepgaande ontledings van (en kritiek op) die multikulturele samelewing;

– die hersiening van die Suid-Afrikaanse en Afrikanergeskiedenis om huidige weergawes wat hoofsaaklik vanuit ‘n Britse of Marxistiese oogpunt geskryf is, teë te werk;

– ontledings van die media en globale kultuur;

– die beredenering van kulturele outonomie en selfbeskikking vir Afrikaners, maar ook ander volkere;

– indringende artikels oor geweld, sadisme en ander patologiese verskynsels in Suid-Afrika, vanuit ‘n sielkundige, sosiomaatskaplike en kriminologiese perspektief;

– ontledings van internasionale verhoudinge en geopolitiek;

– oor die opwindende verwikkelinge in die Afrikaanse letterkunde, musiek, teater en films waar daar al hoe meer sprake is van versetsliteratuur en -kuns, asook “distopiese” voorstellings van die multikulturele samelewing.

Vir die meer intellektuele, akademiese afdeling van die blad (wat tans onder “opstelle” gehuisves word, maar binnekort vernuwe sal word), is ons besig om ‘n redaksionele adviesraad te werf wat uit ‘n verskeidenheid plaaslike en buitelandse akademici sal bestaan. Van ons voorwaardes is dat die persone oor nagraadse kwalifikasies, verkieslik PhD’s, moet beskik, maar ook Afrikaans moet kan lees. Benewens diaspora-Afrikaners, is daar heelwat Amerikaners, Russe en natuurlik Vlaminge en Nederlanders wat Afrikaans magtig is en wat ons navorsingsafdeling ‘n ware internasionale aanskyn sal gee.

Op die duur wil ons aan internasionale debatte deelneem en sorg dat die Suid-Afrikaanse problematiek deel van die globale gesprek oor kultuur en samelewing word.

Hierdie nuwe fokus op navorsingsartikels behoort nie afbreuk te doen aan die lewendige aktuele inhoud en nuusartikels op die blad nie. Inteendeel, ons bou voort op die bestaande platform en sorg dat daar ‘n verdieping in die inhoud kom sodat ons ‘n baie breë spektrum van algemene en spesialislesers kan tevrede stel.

Lesers kan steeds deelneem deur briewe aan die redaksie te skryf, wat ons so vinnig moontlik sal plaas. Verder kan u die PRAAG-blad op Facebook gebruik om ‘n interaktiewe gesprek te voer. Ons sien uit na u reaksies of selfs kritiek in dié verband.

Gaan Zuma koloniale voete soen?

President Zuma het aangedui dat hy gretig is om ‘n oplossing te soek vir die burgeroorlog in Sirië.

Bouthaina Shabaan, ‘n adviseur van die Siriese president Bashar al-Assad, het Suid-Afrika Saterdag besoek om ‘n beroep te doen op die Brics-lande om in te gryp en die konflik in sy land te beëindig.

Die Brics-blok van ontluikende lande – bestaande uit Brasilië, Rusland, Indië, China en Suid-Afrika – sal volgende week in Durban byeenkom met Zuma in die voorsitterstoel.

Assad pleit vir ingryping deur die Brics-groep om die geweld in sy land tot ‘n einde te bring en dialoog te bevorder.

Shabaan het aangedui dat Zuma baie positief gereageer het.

Sommige ontleders sien ‘n herhaling van gebeure in Libië, toe Zuma pogings deur die Afrika-unie (AU) gelei het om tussenbeide te tree in die oorlog daar met voorstelle vir vredesgesprekke tussen die beleërde leier Moeammar Gaddafi en rebelle wat deur die buiteland gesteun en befonds is.

Zuma het in 2011 ‘n komitee van AU-presidente gelei wat probeer het om Gaddafi en die rebelle te oortuig om vredesgesprekke te voer. Gaddafi het gesê hy is gereed om dit te doen, maar die rebelle het gesê hulle sal slegs onderhandel as Ghaddafi uitgetree. Hy het geweier en is uiteindelik omver gewerp en vermoor.

Zuma was egter hewig ontsteld dat NAVO geweier het om die vliegspergebied oor Tripoli te lig sodat hy en sy AU-eweknieë kon terugkeer na Libië om die vredestrategie te laat realiseer.

Die belangrike verskil tussen Libië en Sirië is dat NAVO en sekere Westerse moondhede tot dusver geweier het om militêr betrokke te raak in Sirië.

Frankryk en die Verenigde Koninkryk probeer egter om druk te plaas op sulke lande. Op ‘n Europese Unie-beraad in Brussel verlede week, het die twee probeer om die EU te oorreed om die wapenembargo teen Sirië te lig sodat die rebelle toegang tot wapens kan bekom om die Siriese weermag uit die kussings te lig.

Hulle het misluk omdat EU-leiers vrees dat die rebelle die konflik sodoende sal uitbrei, wat sal lei tot nog groter lewensverlies en onstabiliteit elders in die reeds wankelrige Midde-Ooste.

‘n Dekade na die oorlog in Irak, het ‘n Britse YouGov-peiling getoon dat meer as die helfte van die Britte enige militêre ingryping deur hul regering teenstaan.

‘n Meningspeiling deur YouGov vir Channel 4 Nuus het bevind dat die helfte van die Britte nie defensiewe militêre voorrade soos lugafweer-kanonne aan anti-Assad troepe wil verskaf nie.

Vier-en-sestig persent was teen die verskaffing van militêre toerusting soos tenks en swaar artillerie. Die Franse publiek is ook gekant daarteen. Byna die helfte is gekant teen enige vorm van bewapening van die opposisie.

Die opname beklemtoon die ongewildheid van dieper betrokkenheid in die konflik, selfs al agiteer die Britse regering vir verdere intervensie.

Dit is reeds algemeen bekend dat Westerse wapens oor die Libiese grens gespoel het om die opstand in Mali te voed.

Die Islamitiese jihadiste in die breë koalisie van rebellemagte wat probeer om Assad omver te werp, sluit Al-Kaida in. Brittanje en Frankryk wil dus die bendes bewapen wat hulle reeds gebrandmerk het as internasionale terroriste.

Duitse kanselier Angela Merkel het opgemerk dat die EU reeds sy posisie aangepas het deur toe te laat dat nie-dodelike militêre toerusting die rebelle bereik.

Frankryk en Brittanje glo dat Zuma die Russiese president Vladimir Poetin, wat sy sentiment oor buitelandse inmenging in Sirië deel, nietemin direk sal teenstaan by die komende Brics-beraad in Durban.

BHP Billiton melk SA-verbruiker

Eskom verkoop 9% van sy totale krag onder kosprys aan BHP Billiton se twee aluminiumsmelters terwyl gewone verbruikers onder peperduur tariewe gebuk gaan, het Beeld berig.

BHP Billiton sal egter na ‘n hofbeslissing dié tot nog toe geheime tariewe moet bekend te maak.

Terwyl gewone mense sowat R1,40 per kilowatt-uur betaal, betaal BHP Billiton by sy Hillside-smelter by Richardsbaai net 22,65c per kilowatt-uur.

Die hoogs geheime formule wat Billiton by Hillside betaal vir twee derdes van die 1 200 megawatt wat dié smelter verbruik, is reeds in 1992 gesluit toe Eskom ‘n surplus elektrisiteit gehad het. Die kontrak strek tot 2028.

Die voorkeurtariewe vir Hillside en Billiton se tweede smelter, Mozal in Maputo, wys hoe die twee verliesmakende smelters aan die gang gehou word met die hoë elektrisiteitstariewe wat die res van die land se verbruikers – huishoudelike en nywerheidsverbruikers – vir krag betaal.

Lees hier verder.

 

Is sommige van ons Afrikaners agterlik?

Om hierdie vraag tenvolle te beantwoord is nie ‘n geringe taak nie egter ook eintlik baie maklik gesien in die lig van ons volkstigting.

Kaap de Goede Hoop was n uitkoms vir Westerse mense wat nie onder onbillikke wette, reels en regulasies wou leef nie dit was ook n uitdaging vir avontuurlistiges en dapperes met deursettingsvermoë wat op hulle skip geklim het en na die onbekende Kaap van Goeie Hoop gereis het, om daar n nuwe lewe te begin.

Ten spyte van vele onberinge het hierdie groepie mense die Britse aanslag oorleef en in n skrale 360 jaar ‘n eerstewêreldland gebou vanuit niks behalwe die rou aarde. Hierdie eerstewêreldland kon nie ontstaan en gebou word met swakkelinge en dom en lui mense nie. Dus kan daar met trots gesê en bewys word dat ons nie agterlik is nie.

Dit is so dat daar heelwat Engelse agtergebly het wat hulle kultuur en DNS uitgebou het. So ook die Nederlanders, die Franse Hugenote, die Duitsers, Portugese, Italianers, Iere en so meer. Die gemene deler egter is dat uit hierdie groepie mense ‘n Afrikanervolk ontwikkel het wat sy eie taal, kultuur en standaarde daargestel het.

Ons is so ‘n briljante volk dat nie eens sanksies van die hele wêreld teen ons, ons kon kelder nie. Ons het met elke sanksie ons tot uitnemendheid uitgestyg en gepresteer.

Wie egter is teen verraad bestand?

Ten spyte van die verraad wat teen ons Afrikanervolk gepleeg is en ons van alles wat ons bereik het ontneem het, is ek oortuig dat ons weer sal opstaan en weer kom waar ons was en verder omdat dit in ons gene by die grondstigting van ons volk vasgelê is.

 

Chinese vorder ver met eugenetika

China is tans besig om genetiese ingenieurswese te ondersoek, en is baie verder as die Weste gevorder daarmee.

By BGI Shenzhen, het wetenskaplikes DNS-monsters versamel van 2000 van die wêreld se slimste mense in ‘n poging om die boustene van menslike intelligensie te identifiseer. Blykbaar het hulle reeds ver gevorder daarmee, en binnekort sal embrio-sifting meebring dat ouers hul beste sigoot kan uitkies en potensieel elke generasie se intelligensie met vyf tot 15 IK-punte sal kan opstoot.

Geoffrey Miller, ‘n evolusionêre sielkundige en dosent by NYU, is een van die 2000 slimkoppe wat hul DNS geskenk het.

China het ‘n geskiedenis van eugenetika want nadat Deng Xiaoping oorgeneem het in die laat 70s, het hy die hele fokus van die Chinese regering van ekonomiese bestuur na menslike kwaliteits- en kwantiteitsbestuur verander. In die 90s, het hulle begin met wydverspreide voorgeboortelike toetse om geboortedefekte uit te skakel en meer onlangs, het hulle ‘n klomp geld spandeer op navorsing oor menslike genetika om uit te vind watter gene mense slimmer maak.

BGI Shenzhen is die grootste genetiese navorsingsentrum in China, asook in die wêreld. Hulle is ook besig met plantgenetika, dieregenetika, en enigiets wat ekonomies relevant is of wetenskaplik interessant.

Hulle is veral geïnteresseerd in mense van Chinese en Europese afkoms.

Die embrio-analise sal binnekort gereed wees om op ‘n groot skaal geïmplementeer te word. Enige ander eienskap as intelligensie sal selfs makliker wees om te selekteer, omdat intelligensie van baie gene afhang, terwyl fisiese eienskappe soos hare of oëkleur net van ‘n paar gene  afhang.

Dinge soos liggaamsvorm is bietjie makliker as fisiese aantreklikheid om te selekteer. En persoonlikheidseienskappe is weer ‘n bietjie makliker as intelligensie: Hoe hardwerkend iemand is, hoe impulsief, hoe polities liberaal of konserwatief asook hoe religieus, kan beïnvloed word deur gene tot ‘n sekere mate.

Westerse navorsing is redelik ver agter. Ons het dieselfde tegniese vermoëns asook dieselfde statistiese vermoëns om die data te analiseer, maar Westerlinge het ‘n stel ideologiese en godsdienstige vooroordele wat hulle verhoed om sulke doelwitte na te streef.

ANC-bewind moet beëindig word

Die Vryheidsfront Plus het gisteraand reeds afgeskop met sy veldtog in aanloop tot die algemene verkiesing aanstaande jaar met ‘n vergadering by die Jan Krielskool op Kuilsrivier.

Dr. Corné Mulder, hoofsweep en provinsiale leier van die VF Plus in die Wes-Kaap en mnr. André Fourie, raadslid en onderleier in die provinsie, het die vergadering toegespreek waarna ‘n nuwe tak vir die Oostenberg-subraad gestig is.

Mnr. Piet Batt is aangewys as voorsitter van die tak, en mnr. Jean Yslie as sekretaris.

Dr. Mulder het in sy toespraak onder meer gevra of daar ‘n toekoms vir die Afrikaner en sy kinders in Suid-Afrika is en het aktuele sake soos regstellende aksie, onregverdige tersiêre toelatingsvereistes, plaasaanvalle, die aanslag op Afrikaans en grondherverdeling bespreek.

Hy het gesê die ANC wil die land transformer tot sy denke, terwyl staatsdepartemente al minder in staat is om basiese dienste te lewer.

“Dis nie in Suid-Afrika se belang dat die ANC aan bewind bly nie. Hy het wel groot steun, behalwe in die Wes-Kaap, maar net ‘n elite groepie mense trek hieruit voordeel. Die meeste swart mense sit steeds werkloos in hul plakkershutte,” het hy gesê.

Die proporsionele kiesstelsel is ook weer verduidelik en dr. Mulder het dit duidelik gestel dat elke wegblystem van moedelose kiesers in werklikheid ‘n stem vir die ANC beteken aangesien dit sy meerderheidspersentasie verhoog.

Hy het gewys op die belangrikheid vir opposisiepartye met dieselfde doelwitte om saam te werk sonder om ‘n eie identiteit prys te gee.

“Die ANC gee homself voor as ‘n groot, demokratiese beweging, maar sy werklike toets oor demokrasie sal kom die dag as hy uiteindelik mag verloor. Ons bly optimisties, daardie dag kom. Ek sal nooit aanvaar ons het in 1652 na die land gekom net om te verdwyn nie,” het dr. Mulder gesê.

Mnr. André Fourie, VF Plus-raadslid, het onder meer oor die situasie in die Stad Kaapstad gepraat en het na metrorade as ‘n ‘monster’ verwys wat swak dienslewering aan die hand werk.

“Munisipale waardasies is chaoties. Eiendomsbelasting het in die laaste sewe jaar met 73% gestyg en elektrisiteit met 224%. Die stad is besig om ons mense uit hul huise te belas,” het mnr. Fourie gesê.

Groenteboere in Wes-Kaap trek noustrop

Die Wes-Kaapse regering in samewerking met die privaatsektor soek glo na maniere om 45 groenteboere te ondersteun, maar die boere bly skepties oor die belofte nadat die McCain-fabriek hul sluiting in George aangekondig het.

Philip Terblanche, voorsitter van die Outeniqua-boerevereniging, het  aan Sake 24 gesê die sluiting van die groentefabriek in George gaan verskaffers van kunsmis, saad en vervoer raak, asook ongeveer 500 seisoenale werkers.

McCain sluit eerder die fabriek as om dit te verkoop omdat hy nie ‘n mededinger wil hê nie, sê boere.

Groenteboere wat aan die George-fabriek lewer, het gediversifiseer, maar hulle gaan die knyp voel. “As ons regering enigsins iets vir landbou voel, kan hulle regtigwaar kyk hoe McCain gehelp kan word deur minstens die invoer van bevrore groente te beperk, sê een vooraanstaande boer.

Mededinging van goedkoop ingevoerde bevrore groente, veral uit China, het oor die afgelope drie jaar toegeneem. Daar was ook ‘n skerp toename in die invoer van bevrore groente uit Wes-Europa.

“Wes-Europese boere kry landbou-subsidies en boonop is die klimaat vir die verbouing van groente, danksy die nodige konstante reënval, daar beter as in Suid-Afrika. Die meeste van ons produsente se groente, veral bone, word besproei wat gepaardgaande water- en elektrisiteitskoste meebring,” sê Louis Wolthers, besturende direkteur van McCain Foods SA.

Hy het gesê dat mededinging deur ingevoerde groente die rede is vir die sluiting van die fabriek. Gebiede in Limpopo en op die Hoëveld onder besproeiing voorsien voorts aan die behoefte.

Wolthers sê elektrisiteit is ‘n groot koste want die verkoelingsaanleg moet teen volle krag werk, al is dit nie vol nie. Vervoerkoste speel ook ‘n rol weens lang afstande tussen produsente en die ­George-verwerkingsaanleg.

Apteker afgedank na ‘rassisme’

‘n Apteker van Limpopo het sy werk verloor nadat hy ‘n rassistiese aanmerking teenoor ‘n kollega gemaak het, is Woensdag berig.

Stuart Muller is verlede Dinsdag skuldig bevind en afgedank by die Clinix-privaathospitaal – dieselfde dag wat die voorval plaasgevind het, berig die Sowetan.

Marinda Bouwer, hospitaalbestuurder, het gesê die bestuur het inligting ontvang oor wat gebeur het en ná ‘n ondersoek bevind dat dit waar is.

Volgens die koerant het Muller ook op ‘n stuk papier geskryf en na Mokati as ‘n “boy” verwys.

“Onmiddellik nadat ons die inligting oor die voorval ontvang het, is ‘n interne ondersoek begin,” het Bouwer gesê.

Muller is genader vir kommentaar en het gesê: “Ek dink nie dit is reg om die saak met jou te bespreek nie”.