Skrywer: Dan Roodt

Geen data oor SEB bestaan nie sê VF+

Adv. Anton Alberts, die Vryheidsfront Plus se woordvoerder oor handel en nywerheid, sê geen behoorlike data bestaan wat aandui of swart ekonomiese bemagtiging in effek wel swart mense bemagtig het nie.

“Daar is onlangs ook in die parlementêre portefeuljekomitee oor handel en nywerheid vasgestel dat geen behoorlike data bestaan wat aandui of swart ekonomiese bemagtiging in effek wel swart mense bemagtig het nie.

“Dit beteken dat die ANC diskrimineer teen wittes sonder dat hy weet of sy beleid breed gesproke inderdaad swartmense ophef terwyl dit moontlik in die proses nuwe slagoffers skep. Dit maak die beleid in wese ongrondwetlik.

Alberts sê die ANC het byna twintig jaar gehad om te regeer en het byna net so lank ‘n twee derde-meerderheid gehad. Nou pak hy steeds die skuld vir die probleme in die land op apartheid.

Volgens adv. Alberts kon die regering in dié tyd sinvolle veranderinge, gebaseer op bewese vryemark-beleidsopsies, in die land aangebring het om mense op te hef indien hy waarlik erns daarmee gehad het.

Ten spyte daarvan het die ANC ‘n beleid ingestel wat net ‘n klein groepie ANC-kaders bevoordeel en verryk het sonder dat die land ekonomies gegroei het. Die ANC-beleid het eerder die gevolg gehad dat nuwe slagoffers deur transformasie geskep is.

“Indien die ANC in hierdie tyd behoorlike ekonomiese programme toegepas het, sou Suid-Afrika se ongelykheid nou reeds baie minder gewees het.

“Die ongelykhede het egter gegroei onder die ANC-bewind en het ‘n nuwe karakter aangeneem waar ongelykhede onder alle groepe, insluitend tussen swart mense, vergroot het.

“Zuma sê die ANC kan nie ophou om diegene wat vir apartheid verantwoordelik was aan te hou blameer nie.

“Indien dit inderdaad sy standpunt is, is die vraag waarom dan gediskrimineer word teen ‘n nuwe geslag witmense wat geen aandeel in apartheid gehad het nie?

“Die VF Plus gaan die saak verder neem in die betrokke komitee om te sorg dat die diskriminerende angel in die wet teen wittes verwyder word.

“Zuma en die ANC doen net lippediens aan sosiale kohesie. Dit is tyd dat die ANC en sy rassistiese ingesteldheid geëlimineer word ten einde ‘n regverdige samelewing te skep,” sê Alberts.

Greyling se aantygings oor PW grotesk

Dis ironies dat Ferdi Greyling hom op demokrasie beroep in sy kritiek op pres. Jacob Zuma.

Anders as oudpres. Nelson Mandela, byvoorbeeld, is sy “handelsmerk” nie deur Britse politici en popsterre opgebou nie, maar deur hom en sy ondersteuners. Hy kom uit landelike KwaZulu-Natal, waar die meeste Zoeloes woon.

Zuma se paleisrevolusie teen Mbeki was by uitstek demokraties en hy is steeds die gewildste politikus in die land. Daarom begryp ek moeilik Greyling se beswaar teen die president wat blykbaar na die Grondwet moet gaan kyk om demokrasie te verstaan.

Die Grondwet stel hom in staat om vir twee termyne tot in 2019 te regeer, wat waarskynlik gaan gebeur. Agterna sal hy as éminence grise van die SA politiek steeds invloed uitoefen.

Wat die SANW se optrede in die Sentraal-Afrikaanse Republiek betref, het Mbeki in 2007 die ooreenkoms aangegaan om opleiding aldaar te verskaf. Soos vele militêre en ander kommentators die afgelope week of twee berig het, was daar geen maklike manier om te ontkom aan die verpligtinge wat daardie ooreenkoms opgelê het nie, veral toe die rebelle ‘n direkte aanval gedoen het.

Dis ‘n hebbelikheid van sommige Britse media om Suid-Afrika voor 1994 as ‘n wettelose diktatuur voor te stel waar swart mense genadeloos onderdruk is en boonop geen onderwys ontvang het nie. Tot dusver het die Afrikaanse koerante nog nie heeltemal die geskiedenis so drasties “herskryf” nie.

Greyling se insinuasie dat oudpres. PW Botha nie aan enige grondwet gebonde was nie en dat hy daarom “oorlog buite ons grense (kon) maak soos hy lus het”, is egter grotesk – iets uit Fleet Street. Om die ingewikkelde geostrategiese en ideologiese oorlog in Angola boonop aan ‘n soort gier van Botha toe te skryf, spreek van kwade wil. Daarmee ontken Greyling ook die rol wat die VSA, Frankryk en ander Westerse lande agter die skerms gespeel het om Suid-Afrika en Unita te onderskraag.

Onlangs is daar op sosiale media die woord “libverkrampte” as vertaling van die Engelse “libtard” geskep. Volgens libverkramptes moes ons al in 1960 aan die ANC oorgegee en toe ‘n soort Sowjetstelsel aanvaar het. Dalk sou ons nog kunsterade met wonderlike Russiese balletinstrukteurs gehad en almal Kubaanse sigare gerook het, maar ekonomies sou ons ná ‘n Marxistiese revolusie geëindig het waar Mosambiek onder Samora Machel was: die armste land ter wêreld.

‘n Mens verstaan egter dat oorgawe vandag as ‘n soort panasee voorgehou word, want selfs die verraaiers van die Anglo-Boereoorlog word as die ­ware helde gesien.

Wit bejaarde by pensioenuitkering verneder

Die Vryheidsfront Plus gaan ‘n klag by die Suid-Afrikaanse Menseregtekommissie (MRK) indien na die voorval waarin ‘n 84-jarige vrou van Newcastle, mev. Ria van Straaten, gedwing is om te sing voordat amptenare haar ouderdomspensioen aan haar uitbetaal het.

Die party eis ook die onmiddellike afdanking van al die personeel wat by die voorval betrokke was en dring daarop aan dat die betrokke persone deur die MRK beveel word om mev. Van Straaten te vergoed vir die trauma en vernedering wat sy deurgegaan het.

Adv. Anton Alberts, die VF Plus se woordvoerder oor maatskaplike aangeleenthede, sê mev. Van Straaten is steeds so getraumatiseerd en vernederd dat sy nie oor die voorval wil praat nie.

“Ons gaan ‘n klag by die Menseregtekommissie en die Staatsdienskommissie indien teen die personeel en bestuurder van die betrokke kantoor.

“Die Staatsdienskommissie moet dit ondersoek en ons dring daarop aan dat die skuldiges nooit weer in enige pos in die staatsdiens aangestel word nie.

“Dit is ‘n skande dat ‘n bejaarde vrou wat net haar pensioen wou gaan haal, so verneder is. Dit is ‘n bewys daarvan dat die regering net lippediens lewer wanneer dit by die gelyke behandeling van minderhede kom,” sê adv. Alberts.

Afrikaanse regter pleit vir Engels

‘n Afrikaanssprekende regter wil Engels as enigste hoftaal in Suid-Afrika hoor.

Regter Cynthia Pretorius, van die hooggeregshof in Pretoria, het gesê sy dink nie Afrikaans moet ‘n besondere plek hê nie.

“Ek dink die hoftaal moet Engels wees,” het sy gesê en bygevoeg dat die meeste hofgeskrifte in Engels is en die meeste mense Engels magtig is.

Pretorius hoop kennelik dat die Regterlike Dienskommissie (RDK) haar as een van drie kandidate vir die pos van adjunk-regter-president van Noord-Gauteng sal oorweeg as sy haarself teen Afrikaans uitspreek.

Madala Masuku, Mpumalanga se LUR vir finansies, het haar uitgevra oor ‘n versoek dat sy onttrek aan ‘n onlangse saak omdat sy Afrikaans is en aan die Universiteit van Pretoria gestudeer het.

“Ek dink nie die feit dat ek Afrikaanssprekend is, kan teen my gehou word nie. Dit is hoe ek gebore is. Ek dink nie dit kan teen my gehou word dat ek ‘n wit Afrikaanse vrou is nie,” het sy gesê.

Masuku het gevra hoe sy haar verbintenis tot Afrikaans gaan hanteer. Pretorius het dit baie duidelik gemaak dat sy ‘n hele minderheidsgemeenskap se reg om in hul taal verdedig te word, sal opoffer vir haar ambisie.

“Ek dink ‘n moeilike politieke besluit moet geneem word om Engels die hoftaal te maak,” het sy verklaar. Sy het ook gesê baie Afrikaanse mense hou nie van haar nie omdat sy “liberaal” is.

Regters Audrey Ledwaba en Lettie Molopa-Sethosa is saam met Pretorius kandidate vir die pos.

Pretorius se gunstige uitspraak in die dronkbestuursaak teen Robert McBride, het onlangs wenkbroue laat lig.

SA-wapensmous in SAR vasgekeer

Dit is onthul dat die Suid-Afrikaanse wapensmous Paramount die Sentraal-Afrikaanse Republikeinse hoofstad, Bangui, besoek het om ‘n wapentransaksie met François Bozizé op die vooraand van die staatsgreep te bespreek.

Paramount se werknemers, Miles Chambers en Clement Salanga, het in die land se hoofstad aangekom op Vrydag 22 Maart om die Fransman Emmanuel Rutman uit Parys te ontmoet, het timeslive.co.za berig.

Op 23 Maart, oppad om die president te ontmoet, is die Paramount-span egter naby Bozizé se paleis vir vyf uur lank aangehou.

Terwyl rebelle in ‘n geveg met Suid-Afrikaanse troepe op die buitewyke van die stad die middag gewikkel was, het Bozizé se soldate gevlug. Die Paramount-span het na ‘n diplomaat se huis gehardloop en weggekruip vir twee dae lank voordat hulle deur Franse troepe gered is en terug na Suid-Afrika gevlieg is in ‘n Paramount-jet.

“Ons het hul Suid-Afrikaanse paspoorte in die tuin weggesteek,” het die diplomaat gesê. “Ons was bang die Seleka ouens sou kom en ons doodmaak.”

Paramount behoort aan Ivor Ichikowitz, uitvoerende hoof, en hy is ‘n goeie vriend van die oud-NP-minister Pik Botha. Hy het sy fortuin gemaak daaruit om die vorige bedeling se weermagtoerusting in Afrika en die Midde-Ooste te gaan verkoop deur Botha se bemiddeling, het die M&G vroeër berig.

Dieselfde Ichikowitz is ook daarvoor verantwoordelik dat Suid-Afrikaanse verbruikers hopeloos te veel vir Apple-produkte betaal.

“Daar was geen [wapen]handelsooreenkoms nie. Daar was ‘n formele brief van uitnodiging van die president om ‘n aanbieding te maak, maar dit was so ver onder in die voedselketting, ek was nie eens daarvan bewus nie.” het Ichikowitz by navraag gesê.

Gerugte dat die Franse verantwoordelik was vir die snelle opmars van die Seleka-rebelle na die hoofstad Bangui, is intussen bevestig deur die militêre kenner Helmut Römer-Heitmann in sy boek The Battle of Bangui: The untold inside story.

Die VN se top-amptenaar in die Sentraal Afrikaanse Republiek sê sy is nie in ‘n posisie om te verduidelik watter rol Suid-Afrikaanse soldate in die land gespeel het nie.

Margaret Vogt sê sy kan ook nie lig werp op hoekom hulle in die kruisvuur beland het toe Seleka-rebelle verlede maand die hoofstad Bangui oorgeneem het nie. Sy het met joernaliste gepraat na ‘n geslote inligtingsessie van die VN Veiligheidsraad.

Sy sê sy kan nie bevestig hoeveel Suid-Afrikaners dood is nie. Volgens Vogt het sy nooit Suid-Afrikaanse soldate raakgeloop op besoeke aan die presidensiële paleis van die voormalige president Francois Bozize nie en daarmee gerugte dat Suid-Afrika die president opgepas het, die nek ingeslaan.

Vogt sê die veiligheid situasie in die SAR is baie gespanne, en die onttrekking van die Suid-Afrikaanse soldate los ‘n verdere leemte.

Dit sal waarskynlik verdere menseregteskendings – soos die werwing van kindersoldate deur die Seleka-rebelle – lei.

 

Twee van Misdaadintelligensie voor vir korrupsie

Twee polisiebeamptes wat daarvan beskuldig word dat hulle geld van misdaadintelligensie gesteel het, sal Donderdag in die Pretoria-landdroshof verskyn.

Maj.genl. Solly Lazarus, geskorste finansiële hoof van die misdaadintelligensie-eenheid, en kol. Hein Barnard, logistieke hoof, staan tereg op aanklagte van diefstal, bedrog en korrupsie van sowat R1,1 miljoen.

Hulle is verlede jaar Desember op borgtog van R10 000 elk vrygelaat, en is uit die polisie geskors.

“Die beskuldigdes het gedurende die periode van 2006 tot Desember 2011 naby Pretoria… verkeerdelik en wederegtelik, direk of indirek betalings ter waarde van R1 144 086 ontvang, of daartoe ingestem,” luidens die klagstaat, het City Press berig.

Pasgebore baba doodgeskop

‘n Pasgebore baba is in Mqanduli naby Mthatha doodgeskop, het die polisie in die Oos-Kaap Woensdag gesê.

Maj. Zamukulungisa Jozana, polisiewoordvoerder, het gesê ‘n vrou het Sondag na haar bure se huis gegaan toe sy begin kraam.

“Met haar aankoms by die bure se huis is die baba gebore.

“Kort daarna het die eienaar van die huis ingekom en die kind, wat in ‘n baadjie toegedraai was, begin skop. Die kind het onmiddellik gesterf.”

Volgens die polisie het die man weggehardloop toe hy besef die kind is dood. Die motief vir die voorval is nie bekend nie en niemand is in hegtenis geneem nie.

‘Die heks is dood’ topverkoper op Amazon

“Ding Dong! The Witch is Dead,” soos vertolk deur Judy Garland in The Wizard of Oz, was Dinsdag die gewildste liedjie op Amazon se aanlynverkope in Brittanje.

Dié lied het op topverkopers gehaal ‘n dag na die dood van die voormalige premier, Margaret Thatcher.

‘n Ander weergawe van die liedjie, gesing deur die jazz-legende Ella Fitzgerald, is die vierde meeste afgelaai, en is ook die meeste op iTunes in Brittanje afgelaai.

Dié lied word as ‘n draakstekery oor die afsterwe van die 87-jarige Thatcher gesien.

Thatcher, die eerste vroulike premier van Brittanje, wat destyds ‘n hoogs omstrede figuur was, is Maandag aan ‘n beroerte oorlede.

DA prys Hani se stryd teen apartheid

Chris Hani, die SAKP-leier, het gelewe en gesterf vir dit waarin hy glo, het die DA Woensdag gesê.

Mmusi Maimane, woordvoerder van die Demokratiese Alliansie, het by die 20ste herdenking van Hani se dood gesê hy was ‘n inspirerende persoon.

“Ongeag sy ideologiese neigings kan ons almal erken dat hy ‘n beginselvaste en vasbeslote leier was,” het Maimane gesê.

“Hy het geleef en gesterf vir dit waarin hy glo en het ‘n groot bydrae gemaak in die geveg teen apartheid. Hiervoor verdien hy om geprys te word.”

“Ons kan net hoop dat die volle waarheid oor sy sluipmoord uiteindelik sal uitkom in die belang van versoening,” het Maimane gesê.

Hani is op 10 April 1993 buite sy huis in Boksburg deur die Poolse immigrant Janusz Walus doodgeskiet met ‘n vuurwapen wat deur Clive Derby-Lewis verskaf is.

Die land kan dankbaarheid betoon deur ‘n verbintenis tot die gemeenskap, het pres. Jacob Zuma tydens ‘n kransleggingseremonie ter herdenking van Hani se dood by die Thomas Titus Nkobi-gedenkpark in Elspark, oos van Johannesburg, gesê.

“Ons moet vinnig werk om die soort samelewing te skep waarvoor kameraad Chris gelewe en gesterf het,” het Zuma gesê.

“Ons moet kameraad Chris se nagedagtenis herdenk deur ‘n beter lewe vir almal te skep, waarin hy geglo het.”

Zuma het gesê dis onmoontlik om in slegs 20 jaar algehele verandering te bring.

Die skade wat deur apartheid veroorsaak is, sal nog lank in die land sigbaar wees, het hy gesê.

“Ek dink dis ‘n fout om te sê ons kan nie apartheid blameer vir wat nou in die land gebeur nie, om die minste te sê.

“Ons hoef nie te sê presies wat apartheid gedoen het nie. Die feit is die land is twee in een; jy gaan na enige stad en daar is ‘n pragtige deel, en plakkers aan die ander kant. Dit is nie die begin van ‘n demokrasie nie, en ons kan nie ophou om die mense wat dit veroorsaak het, te blameer nie,” het Zuma gesê.