Dan Roodt, Author at praag.co.za

‘Die neus’ verval in clichés, swak smaak

Die neus deur Deborah Steinmair. Uitgewer: Human & Rousseau. Prys: R180
Gratis as eboek uitneembaar deur alle PRAAG-lede hier.

Ek was aanvanklik heel opgewonde om Deborah Steinmair se jongste roman, Die neus, te begin lees. Die boek bevat ‘n aantal boheemse, selfs eksentrieke karakters wat die leser met hul aweregse gewoontes en uitsprake amuseer.

Op een stadium in die teks is drie van hulle, vergesel deur ‘n Labrador-gidshond en ‘n pou in ‘n outydse Volskwagen-kewer op pad Pretoria. Soos dit gestel word: “Op die ou end lyk hul deputasie na ’n rondreisende sirkus. Dit bestaan uit: Jesse, Aga, Rob die gidshond, Flaubert die pou en … Xun Wu.” Laasgenoemde is ‘n Chinese dwerg wat ‘n toenemend bose rol in die verhaal speel.

Die neus gee voor om ‘n soort postmoderne speurverhaal te wees waarin die hoofkarakter, Aga Gruber, haar eie herkoms probeer naspeur. Van haar familielede het op ‘n geheimsinnige manier gesterf. Sy word ook aanvanklik dopgehou deur ‘n buurman en die Chinese dwerg wat al hoe meer in haar lewe inmeng. Aga dra ‘n fedora en het ‘n besonder prominente reukorgaan, vandaar die boek se titel.

Die Duitse skrywer Patrick Suskind het natuurlik al ‘n literêre blitsverkoper genaamd Das Parfum in 1985 laat verskyn, dus is ‘n besinning oor reuk en neuse kwalik oorspronklik. Hier en daar filosofeer die verteller ook oor hoe reuk eintlik die bedekte oorsprong van ‘n sesde sintuig en voorgevoelens kan wees, iets waaroor Aga of Agathe (haar volle naam) Gruber in oormaat beskik. Sy weet dikwels presies waar om te kyk of waar om te grawe om foto’s, briewe of ander legkaartstukke te vind waarmee die duistere verlede van haar pa, ‘n geniale olfaktoriese wetenskaplike, ontrafel mag word.

Soos gesê, is ek aanvanklik deur die gegewe geboei. Ook kan Deborah Steinmair ‘n goeie Afrikaans skryf, wanneer sy nie haar karakters, soos veral die agterplaaswerktuigkundige Claude, ‘n oordrewe Engfrikaans laat praat nie. Ongelukkig is ‘n kennis van Afrikaans nie genoeg om as skrywer te kwalifiseer nie.

Want in die tweede helfte van die boek word die aanvanklike geheimsinnighede en belofte eenvoudig nie vervul nie. Die intellektuele uitdaging van haar gegewe blyk vir Steinmair op die duur te groot te wees. Al het sy hoeveel oor die rol van reuk by massasielkunde opgelees (agter in die boek verskyn ‘n lang lys internetskakels as ‘n soort bibliografie), kry sy dit nie reg om iets meer as ‘n ietwat eksentrieke verhaaltjie uit haar stof te tower nie.

Die Nazi’s is na hoeveel Hollywood-films, asook rekenaarspeletjies, ‘n onderwerp wat enige skrywer net met omsigtigheid kan benader omdat die gevaar dat ‘n mens in volslae clichés mag verval, so enorm is. Almal van ons het al die flieks gesien en miljoene tieners het oor die afgelope aantal jare een van die gewildste rekenaarspeletjies, Call of Duty World at War, asook die latere weergawe, Call of Duty Black Ops, gespeel waarin sogenaamde Nazi-zombies as vyande (en teikens) figureer. Een van die amateuragtige aanlynromans wat tans in Afrikaans te lees is – die skrywer erken rondborstig dat hy nie Afrikaans kan spel nie – Doodstraal, maak ook van ‘n Nazi-gegewe gebruik.

Pleks van ‘n “doodstraal” is reuk of die wetenskaplike manipulasie daarvan, die “geheime wapen” waaroor moorde in Die neus gepleeg word. Ook blyk Aga Gruber se moeder een van die berugte Lebensborn-baba’s uit die tweede wêreldoorlog te wees en haar pa, hoewel ‘n Nazi-hater en Sionis, was op die spoor van olfaktoriese metodes om massas mense te beheer of te manipuleer.

Deesdae en waarskynlik vanweë die Naspers-monopolie wat alle fasette van die Afrikaanse kultuur dooddruk, is daar lyk my nie meer goeie uitgewers of redakteurs by Human & Rousseau en ander NB-filiale in die Kaap oor nie. Eintlik is dit hartseer dat Steinmair se teks nie bietjie van sy gemeenplasighede en politieke korrektheid wat plek-plek deurslaan, gesuiwer is nie. Want die potensiaal was daar om ‘n ironiese, slim vermenging van literêre en speurverhaalkodes te pleeg. Dit kon so effens op die model van Umberto Eco of een van my gunsteling- Franse skrywers, Jean Echenoz, geskied het. In Les grandes blondes (Die lang blondines) bied Echenoz ‘n verhaal oor ‘n beeldskone model en sosiopaat wat mans na hartelus vermoor, met hope ironiese implikasies vir die eietydse verbruikersmaatskappy, asook ons obsessie met beeldskone, lang blondines. (Lees gerus ook die novelle deur Echenoz wat PRAAG as Een jaar uitgegee het.)

Pleks van ons op die duur te verveel en te irriteer, kon Steinmair ons dalk geamuseer en geprikkel het. Maar as die twee vriendinne, Aga en Jesse, uiteindelik blyk een of ander lesbiese aantrekkingskrag (nogal “magneties”) tussen mekaar begin voel, hoor ek al een of ander preek oor geslagslykheid en seksuele voorkeur. Net soos wat die Vodacom-advertensies ons ‘n tyd gelede oortuig het dat swartmense selfone baie beter as blankes verstaan, tower Steinmair ook ‘n aangenome jong swartman op, nogal met die Afrikaanse naam Theunis, hoewel hy ook blykbaar ‘n Thabo is, met ‘n hartstog vir Morse-kode en tegnologie.

By hierdie punt rafel die roman vir my heeltemal uit en word dit net nog ‘n sinnelose prul uit Kaapstad wat iewers in die hovaardige redaksiekantore van die Afrikanervyand in Heerengracht bewimpel is.

Elke oordeel oor ‘n boek is seker subjektief, maar uiteindelik onderskei alle groot skrywers hulle deur hul goeie smaak, of ‘n soort varsheid en oorspronklikheid wat uiteindelik die koring van die kaf skei. Die elemente van swak smaak wat in Die neus opstapel, raak op die duur net te veel. As Steinmair boonop Proust in Engels aanhaal – nogal die beroemde passasie oor die madeleine-koekie wat ek al iewers aanlyn in Afrikaans vertaal het, nogal op Litnet as ek reg onthou – dan gooi ‘n mens jou hande in die lug.

Is daar enigiets meer kitsch vir ‘n Afrikaanse skrywer as om Proust in Engels aan te haal? Toegegee, C.K. Scott Moncrieff en Terence Kilmartin het ‘n heel leesbare vertaling van Proust in Engels gemaak wat in ‘n aantreklike hardebanduitgawe in drie dele by Chatto & Windus verskyn het en waarvan ek insgelyks ‘n eksemplaar besit. Maar daar is sekere ongeskrewe reëls vir ‘n Afrikaanse skrywer en ek sou sê een daarvan is om nie Proust in die Rooitaal voor jou leser te smyt nie. Dis sooo… filistyns, so nouveau riche, so Naspers! Dis kort duskant die Sondag se bladsy drie. Dan kan jy maar net sowel vir Julius Malema of Kenny Kunene nooi om saam soesji van skamel geklede dames se lywe af te kom eet. Dit raak blote vertoon, smuk, ‘n bietjie kopieer-en-plak om “literêre gewig” aan jou middelmatige Nazi-storie te verleen.

Weereens, dit kon so anders gewees het. Want ek vermoed die probleem lê nie soseer by Steinmair nie, maar by die Umwelt waarvan daar ook in die boek sprake is. Ons omgewing en veral die media- en uitgewersmonopolie, is nie meer bevorderlik vir goeie of interessante letterkunde nie.

Die vernuftige, slim, ironiese, speelse postmoderne speurroman wat kodes vermeng bly daarom uit by Die neus. Pleks daarvan neem die kitsch en “kamp” situasies of karakters oor en daaragter skuil, wel, bloedweinig met substansie.

Nóg die leser wat op soek is na ‘n behoorlike speurverhaal of roman noir, nóg die literêre leser gaan deur Die neus bevredig word. Dis egter nie te lank nie, en hier en daar skryf Steinmair ‘n paar mooi sinne. Dus kan dit ‘n verveelde aandjie of middag vul.

Maar iewers moet daar beter boeke in Afrikaans versteek wees. Waar is hulle? wonder ‘n mens.

Neem hierdie boek gratis uit by PRAAG se ebiblioteek. Indien u nog nie lid is nie, sluit hier by Klub digiTAAL of by PRAAG aan.

VN vra boikot teen Amerikaanse, EU-maatskappye wat sake doen met Israel

‘n Verslag wat binnekort vrygestel sal word deur die Verenigde Nasies doen ‘n beroep vir ‘n internasionale veldtog teen Amerikaanse maatskappye wat sake doen in Israel, met inbegrip van Hewlett-Packard, Caterpillar Inc, en Motorola.

Die Menseregtekommissie (MRK) het die verslag uitgereik. President Barack Obama het aangesluit by die VN-groep nadat hy tot leier verkies is. Lede van die MRK sluit menseregteoortreders soos Saoedi-Arabië, Katar, Jordanië, Libië, China, en Kuba in.

‘n Spesiale Rapporteur oor die situasie van menseregte in die Palestynse gebiede, doen verslag aan die MRK. Die huidige rapporteur is die Amerikaanse professor Richard Falk. Falk is ook ‘n 9/11-skeptikus.

Die verslag wil ‘n veldtog van boikotte, sanksies, en regstappe teen ‘n aantal internasionale maatskappye loods wat sake doen in Israel. Bykomend tot die Amerikaanse maatskappye, word groot Europese maatskappye soos Veolia Environment, Group 4 Security, die Dexia Groep, asook die Volvo-groep ingesluit.

“Die koste aan maatskappye en besighede wat nie internasionale humanitêre reg respekteer nie is aansienlik,” het die verslag gewaarsku, “insluitend skade aan ‘n maatskappy se openbare beeld, impak op aandeelhouerbesluite en die aandeelprys en kan lei daartoe dat werknemers strafregtelik vir menseregteskendings aanspreeklik gehou kan word.”

Die verslag waarsku Amerikaanse werknemers van geteikende maatskappye dat hulle wetlike risiko’s in die gesig staar.

“Werknemers van maatskappye kan ondersoek en vervolging vir menseregtevergrype ongeag van waar die oortreding gepleeg is in die gesig staar.”

Die Obama-administrasie het in 2009 by die MRK by monde van VN-ambassadeur Susan Rice belowe, “Ons werk van binne, sodat ons die raad as ‘n meer effektiewe forum kan uitbou om menseregte te bevorder en te beskerm.”

Het die BBC eie pedofielring bedryf?

Britse polisiebeamptes ondersoek die beweerde seksuele misbruik van jong meisies deur die voormalige BBC-aanbieder Jimmy Savile. Hulle het gister gesê hulle het meer as 400 navrae wat sowat 300 slagoffers insluit.

“Dit is nogal onthutsend,” sê ondersoekleier kmd. Peter Spindler.

Hy het aan ‘n nuuskonferensie gesê dat byna al die potensiële slagoffers vroue was en dat die oorgrote meerderheid van beweerde oortredings Savile insluit, wat verlede jaar oorlede is.

Die publiek is verstom oor die aantal vermeende slagoffers en dat Savile se gedrag skynbaar nooit kritiek en vrae laat ontstaan het by die BBC nie.

Polisie het 130 slagoffers tot op datum ondersoek en 114 verslae van seksuele aanranding of ernstige seksuele aanranding, meestal teen Savile aangeteken. Geen arrestasies is tot dusver gemaak nie.

Spindler het gesê daar is geen bewyse van ‘n georganiseerde pedofielring nie – iets wat voorgestel is deur die slagoffers se prokureurs.

SA-reserviste dalk in Mali, DRK ontplooi

Burgerlikes wat militêre opleiding ondergaan het, kan binnekort vir aktiewe diens opgeroep word en potensieel in dodelike vredeshandhawingsoperasies ontplooi word.

Die Suid-Afrikaanse weermag – reeds deur vredehandhawingsontplooiings regoor die kontinent oorlaai – is besig om voor te berei vir die ontplooiing van honderde bykomende troepe, met inbegrip van burgerlike reserviste, vir vredemissies. Daar is sowat 15.000 leërreserviste.

Voor gister se aankondiging, het president Jacob Zuma gesê hy sal dit sterk oorweeg dat soldate in Mali in ‘n Afrika-Unie-vredesmag dien. As Zuma die groen lig gee, kan die ontplooiing reeds vroeg volgende jaar gebeur.

Weermaghoof, luitenant-generaal Amos Masondo, het gister bevestig dat dringende versoeke deur Mali en die Demokratiese Republiek van die Kongo gerig is.

“Ons wag om te hoor wat gedoen moet word,” het hy gesê.

Masondo het gesê die aanstelling van Nkosazana Dlamini-Zuma as AU-voorsitter sou lei tot verhoogde eise vir Suid-Afrikaanse magte in Afrika.

“Ongelukkig is ons deur ons getalle beperk. Indien die versoek goedgekeur word, sal die magte baie reserviste insluit.

“Ons het eenvoudig nie genoeg staandemaglede nie. Ons is reeds oorlaai in Afrika, met honderde van ons troepe ontplooi op ons grense.”

Masondo het gesê groot bedrae geld word tans spandeer op opleiding, en die opgradering van toerusting is ‘n prioriteit.

Mali se regering is tans gewikkel in ‘n gewelddadige konfrontasie met Islamistegroepe wat probeer om die staat omver te werp.

Die regering van die Demokratiese Republiek van die Kongo, saam met die VN, is tans betrokke in bloedige veldslae teen die rebellemagte wat met swaar artillerie en tenks gewapen is.

Die voorgestelde ontplooiing sal oorweeg word terwyl 3000 Suid-Afrikaanse soldate deelneem in ‘n oefening by die gevegsopleidingsentrum in die Noord-Kaap.

Фильчаков прокурор

SEB werk nie, sê Phosa

Die tesourier-generaal van die ANC, Matthews Phosa, het Donderdag gesê die Marikana-tragedie het die wanfunksionering van die bestaande model van swart ekonomiese bemagtiging (SEB) ontbloot.

Phosa het by die eerste Max Maisela-gedenklesing by die Monash-universiteit in Johannesburg ‘n toespraak gelewer.

“Marikana het ons geleer… ons model vir SEB is disfunksioneel, en dat ons kreatief moet wees wanneer ouer modelle van onderhandeling deur minderbevoorregte mense agtergelaat word,” het Phosa gesê.

Hy het ook gesê SEB-beleid het nie daarin geslaag om entrepreneurskap en welvaartskepping onder swart Suid-Afrikaners te bevorder nie.

Al wat gebeur het is dat ‘n klas van swart beleggers geskep is wat in bestaande maatskappye belê, het Phosa benadruk.

“Die eenvoudige feit is, of jy nou wit of swart is, daar is ‘n groot behoefte vir wyer deelname aan die rykdom van hierdie land op ‘n manier wat verskil van die huidige model,” het hy gesê.

Maatskaplike toelaes styg

Oor die volgende drie jaar sal nog ‘n miljoen Suid-Afrikaners op maatskaplike toelaes begin staatmaak vir ‘n inkomste, het Pravin Gordhan, die minister van finansies, gesê.

Gordhan het in sy mediumtermyn-begrotingsoorsig in die parlement gesê die aantal mense wat van maatskaplike toelaes afhanklik is, sal teen 2015/16 styg tot 17,3 miljoen. Tans ontvang 16,1 miljoen mense maatskaplike toelaes.

Toelaes vir kinderonderhoud sal volgens die minister se verslag die grootste styging toon en 12,2 miljoen ouers sal oor drie jaar op die staat se hulp aangewese wees om hulle kinders te ondersteun.

Die aantal pensioenarisse en oorlogsveterane, wat nou 2,8 miljoen mense is, sal tot net oor die 3 miljoen styg.

In dieselfde tydperk sal die aantal gestremdes wat van toelaes afhanklik is, tot 1,1 miljoen daal.

Gordhan het voor sy parlementsrede die media toegespreek en negatiewe kritiek veroordeel. Hy het gesê te veel mense, veral uit die buiteland, lewer kommentaar wat buite orde is en dra geen kennis oor ons situasie nie.

Gordhan sê Suid-Afrikaners en die internasionale beleggingsgemeenskap moet besef daar is nie ‘n “ramp op pad om ons te tref nie”.

“Ons het uitdagings maar daar is geen rede vir die oormatige pessimisme en negatiwiteit wat ons sien en hoor nie. Ons het al heelwat erger as dit oorleef.”

Landbou verseker stabiliteit

“‘n Sterk landbousektor is noodsaaklik vir ekonomiese en politieke stabiliteit in Suid-Afrika. In hierdie verband vra ons regeringsleiers vir politieke en eknomiese sekerheid, spesifiek ten opsigte van die landboubedryf. Ons het ‘n omgewing nodig wat bevorderlik is vir gesonde publieke-privaat vennootskappe en wat die lewensvatbaarheid van beleggins bevorder. Publieke-privaat samewerking is die enigste wyse waardeur ons sal slaag. Daarom – te midde van reusagtige onsekerhede en ekonomiese onrus, is die bou van die nuwe Sasol Nitro Kalksteenammoniumnitraat-aanleg beduidend positief,” het Dr. Pieter Mulder, adjunk-minister vir Landbou, Bosbou en Visserye vandag by die opening van die aanleg by Saso Nitro in Sekunda gesê.

In net twintig jaar van nou, sal die wêreld se boere 50 persent meer moet produseer van wat tans geproduseer word. Die vraag wat ons almal konfronteer – op ‘n globale skaal – is hoe ons landbouproduksie verhoog op minder grond? Verhoging van voedselproduksie op ‘n volhoubare basis is die sentrale oorheersende en definiërende kwessie in landbou vandag. Tegnologie en navorsing sal ons toerus om verhoogde produksie te lewer met dieselfde hoeveelheid of verminderde insette. Hierin speel kunsmis ‘n vername rol in die verbetering van landbou uitsette. Hierdie aanleg plaas Sasol Nitro daarom in ‘n baie beter posisie om die langtermyn-verskaffing van ‘n wêreldklas produk aan die Suid-Afrikaanse landbou industrie vol te hou.

“Ons is in die midde van geweldige onsekerheid en ekonomiese onrus, nie net in die wêreld nie, maar ook in Suid-Afrika. Vir ekonomiese groei en vir die geleentheid om baie van ons probleme aan te spreek, het ons ekonomiese en politieke stabiliteit nodig. Landbou vorm deel van ‘n kritieke deel van ons land se sosio-ekonomiese en sosio-politieke stabiliteit. Met groter sekerheid met betrekking tot hierdie sektor en verantwoordelike regering in hierdie verband, sal ons suksesvolle kommersiële boere bekom en daardeur sal ons effektiewe landelike ontwikkeling verseker terwyl ons die uitdagings van voedsel onsekerheid en werkloosheid oorkom,” het dr. Mulder gesê.

[Die nuwe aanleg het ‘n kapasiteit van 400 000 ton per jaar en is teen ‘n ksote van net meer as R1 miljard opgerig. Uit hierdie bedrag is net meer as R830 miljoen bestee aan plaaslike aankope en diensverskaffers. Meer as 3 000 Suid-Afrikaners is deur plaaslike kontrakteurs in diens geneem en het aan die projek gewerk gedurende die oprigting van die nuwe aaleg in die afgelope 2 jaar.]

Smelt Afrikaanse skole saam

“Indien die samesmelting van skole in sekere gevalle die toekoms van Afrikaanse skole kan verseker, moet dit as uitweg oorweeg word”, sê mnr Jaco Mulder, VF Plus LPW vir Gauteng en leier van die party in die provinsie.

Dit volg nadat drie Afrikaanse laerskole in die Germiston-omgewing deur die departement van onderwys in kennis gestel is dat, weens die groot aanvraag na Engelse onderrig in die gebied, hul sal moet sluit. Dit sluit in Laerskole Elsburg, Elspark en Delville. Die beheerliggame van Laerskool Elspark en Delville het aangedui dat die moontlikheid oorweeg word om die twee skole saam te smelt, terwyl Laerskool Elspark dan voortaan net in Engels sal onderrig.

“Dit is altyd hartseer dat ‘n skool met ‘n jarelange gevestigde tradisie en erfenis in die slag moet bly, soos in die geval van Laerskool Elsburg. Ons leef egter in buitengewone tye waar pro-aktiewe optrede soos in die geval van Vereeniging, waar twee Afrikaanse skole in 2013 gaan saamsmelt om een super skool te vestig. Indien só ‘n stap Afrikaans as onderrigtaal kan red, verwelkom die VF Plus die ondersoek na haalbaarheid daarvan”.

Volgens Mulder is die VF Plus voortdurend met die LUR vir onderwys, Barbara Creecy, in kontak om te verseker dat die taalregte van skole gehandhaaf word. “Ons lewer inspraak by die department en help bemiddel”.

Die VF Plus veg reeds sedert die negentiger-jare vir die behoud van Afrikaans in skole toe die Party betrokke was by die samesmelting van twee Afrikaanse skole in Newcastle, Natal. “Die VF Plus veg onbeskaamd vir die behoud van Afrikaans in skole. Ons sal die betrokke Afrikaanse skole in die Oosrand bystaan in die samesmeltingsproses”, sê Mulder.

Фільчаков прокурор

Visserye se patrolliebote nie een op see

Die minister van Verdediging en Militêre Veterane, me. Nosiviwe Mapisa-Nqakula, het erken dat nie een van die patrolliebote of navorsingskepe, wat aan die Departement van Landbou, Bosbou en Visserye behoort, en nou deur die SA Vloot bedryf word, operasioneel is nie. Sy het geantwoord op ‘n vraag van Pieter Groenewald van die Vryheidsfront Plus in die parlement.

Volgens die antwoord van die minister is drie van die vier patrolliebote nie operasioneel nie weens onderhoud wat op die bote gedoen word. Die ander patrollieboot (Ruth First) word tans gebruik vir opleiding van bemanningslede en is ook nie operasioneel nie. Van die drie navorsingskepe is twee (Africana & Ellen Khuzwayo) nie operasioneel nie, ook weens onderhoud. Een navorsingskip (Algoa) is oorhandig aan die Departement van Omgewingsake en Oseanografiese Opmetings.

“Weens die onvermoë en onbeholpenheid van die minister van Landbou, Bosbou en Visserye, me. Tina Joemat-Petterson, oor die kontrak van Smit Amandla Marine, wat hierdie bote bedryf en die patrollering van die kuswaters gedoen het, is dit nou duidelik dat ons kuswaters vanaf Maart 2012 nie gepatrolleer is nie. Stropery van ons marinebronne kon ongehinderd plaasvind. Dat onderhoud op al die bote en skepe terselfdertyd gedoen moet word, is bewys dat hulle in ‘n swak toestand was. Smit Amandla Marine is miljoene rande betaal om hierdie bote te bedryf en om die instandhouding daarvan te doen. Minister Joemat-Petterson se department het verseker nie behoorlike bestuur en beheer oor die kontrak aan Smit Amandla Marine uitgeoefen nie en getuig van onbevoegdheid,” sê mnr. Pieter Groenewald, die VF Plus se hoofwoordvoerder oor Verdediging en Militêre Veterane.

Die VF Plus sal verdere vrae aan die minister van Verdediging stel oor die aard en onkoste verbonde aan die onderhoud op die bote en minister Joemat-Petterson sal moet verduidelik waarom sy nie voortydig opgetree het om die staat teen addisionele uitgawes te beskerm nie.

Skoolkinders loop deur onder rowers

Nie net Kempies en Impala se leerlinge loop deur nie, maar ook dié van Sir Pierre en Rhodesfield. Skoolkinders word steeds elke week van selfone, geld en selfs fietse beroof.

Dit het aan die lig gekom nadat ‘n leerling (13) van Laerskool Impala verlede week Dinsdag deurgeloop het.

Die seun se ma sê haar seun was omstreeks 2nm alleen aan die voorkant van die skool in Van Riebeeckweg met sy tas en sportsak.

Terwyl hy ‘n BBM vir haar getik het, het ‘n man, skraal gebou en ongeveer 1,65m lank, die foon uit die kind se hande geruk en weggehardloop. Dit is later teruggevind.

Die kind is nie aangerand of seergemaak nie, maar is erg getraumatiseerd.

“Hy loop met baie angs en vrees rond en is ook benoud en op sy senuwees,” het sy gesê.

Mnr Theo Gouws, skoolhoof van Impala, het bevestig die seun was buite die skoolhek op pad na sy naskool-tannie, wat hom met enkele minute voor die skool gemis het.

Hy sê die skool het vir die veiligheid van kinders ‘n wag-‘n-bietjie veiligheidsarea aan die binnekant van die skoolterrein by die enigste hek wat na skool oop is, opgerig.

Hulle veiligheidswag sit daar totdat die kinders opgelaai word.

Mnr Roelof Burger, skoolhoof van Hoërskool Kemptonpark, sê kinders van sy skool word weekliks beroof, selfs as hulle in groepe loop. Hulle word meestal van selfone, geld en selfs fietse beroof.

Kaptein Jethro Mthali, woordvoerder van Kemptonpark SAPD, het gesê dit is nie net skoolkinders van hierdie twee skole wat beroof word nie. Rhodesfield en Sir Pierre se kinders loop veral deur in Pretoriaweg, want die rowers “verdwyn” na die stasies.

Mtshali het gesê die skoolkinders word amper altyd met messe aangehou. Die skuldiges is meestal jong mans wat agter die skoolkinders se “gadgets” en selfone aan is.
Tot dusver is die kinders net met messe gedreig en nie gesteek nie.

Mtshali het gewaarsku dat enigiemand wat in die straat loop, hul fone en kosbaarhede moet wegsteek.