18:52:07 Zanu-PF wil nie hê dat Thabo Mbeki weer moet ingryp om die dooiepunt op te los nadat die partye in Zimbabwe se magsdelingsgesprekke nie kon ooreenkom oor 'n Kabinet nie.
Die ooreenkoms wat op 15 September onderteken is en wat deur Mbeki se bemiddeling daargestel is, sukkel voort omdat Mugabe se party nie bereid is om sleutelposte te ontruim nie.
Patrick Chinamasa het aan AFP gesê enige verskille kan tussen die partye self opgelos word.
17:57:58 Die gaping tussen Barack Obama en sy opponent McCain is besig om te groei. In die deelstate Florida, Ohio en Pennsilvanië mag die swaai
na Obama 'n Demokratiese oorwinning vir 4 November verseker. Geen Amerikaanse kandidaat kon nog ooit sedert 1960 die Withuis sonder ten minste twee van die drie deelstate se steun betree nie.
Ondersoekers sê daar was nog nooit 'n onlangse magstryd waarin een kandidaat so dramaties, vinnig en meteories opgang gemaak het, so laat in die wedloop nie.
Peter Brown, assistent-direkteur van Quinnipiac sê in Pennsilvanië is Obama nou met 'n gapende 54% teenoor 39% van McCain, die voorloper ná die onlangse debat. In Florida is dit 51% teenoor 43%. Voorheen was dit, soos in Pennsilvanië, 49% en 43% onderskeidelik.
In Ohio, is Obama se gewildheid met agt punte op. Die deelstate kan die verkiesing swaai omdat hulle 'n geskiedenis het dat hulle kiesers nie net aan een spesifieke party getrou is nie. Die Pew Research Center toon aan dat Obama McCain met sewe punte voor is. Sy nasionale gewildheid staan op 49% teenoor 42% vir die Republikeine se kandidaat.
Die peiling wys dat meer as 84% van die kiesers hulle mening oor hulle gunstelingkandidaat verander het en tussen 13% en 17% dink dat Obama 'n beter president gaan wees. Palin se gewildheid het ook getuimel en Demokrate is beslis opgewonde oor die positiewe wending. Voorheen was hulle bekommerd dat Palin die blouboordjiestem kan trek.
17:35:59 FW de Klerk se verklaring dat Suid-Afrika hom op vele "suksesse" sedert 1994 kan roem, getuig van die wêreldvreemdheid wat dié politikus se bydrae tot die geskiedenis tot dusver gekenmerk het.
Watter "suksesse" sou dit wees? Die "sukses" van ongebreidelde geweldsmisdaad wat reeds die lewens van 500 000 mense geëis het? Of die "sukses" van omgekeerde rassisme in die vorm van transformasie en rassevoorkeure wat kundige blankes uit die land verdryf en ons jeug se kanse op universiteitsopleiding bederf?
Of verwys die voormalige president dalk na uitkomsgebaseerde onderwys en die algemene ineenstorting, veral in swart onderwys, waar linkse en polities korrekte figure soos Mamphele Ramphele en Wendy Luhabe reeds verklaar het dat die destydse Bantoe-onderwys hulle veel beter vir hul loopbane in die akademiese en sakewêrelde toegerus het?
Mnr. De Klerk het 'n eenpartystelsel nagelaat wat deur die radikale groep ballinge oorheers word aan wie hy holderstebolder oorgegee het. Na sy mening is dit seker ook 'n reuse-"sukses". Die huidige skommelinge in die regerende party kom neer op 'n kapteinskapsverwisseling aan boord van die Titanic.
Mnr. De Klerk se lafhartige oorgawe sonder om hoegenaamd enige van Suid-Afrika se politieke of historiese geskille op te los, het Suid-Afrika in die drukgang na 'n Zimbabwe geplaas. Hy het ook verraad teen sy eie mense gepleeg en ons hele toekoms in 'n kranksinnige waagstuk oor sy eie vermoëns om die 1994-verkiesing te wen, verwed.
Terwyl die Britse koerante wat oor sowel Lancaster-huis as Kemptonpark met sterre in hul oë oor "die koms van demokrasie na Suider-Afrika" berig het, deesdae die skrif aan die muur sien, is FW de Klerk nog besig om die Britse rympie van 1990 op te sê.
Indien die Afrikanervolk binne die volgende paar jaar finaal – soos die blanke Rhodesiërs – uit sy geboorteland verdryf word en daar as gevolg van die absurde grondhervorming hongersnood ontstaan, sal FW de Klerk persoonlik daaraan aandadig wees.
Het dit nie tyd geword dat De Klerk sy papegaairympies staak wat deesdae so anachronisties op die oor val nie?
Voordat hy hom roem op enige fiktiewe "suksesse" in die land, behoort hy sy eie – historiese en groteske – mislukking te erken.
16:50:23 Zimbabwe het amptelik verlede Vrydag begin om in buitelandse geldeenhede handel te dryf in wat beskou word as 'n erkenning van die ineenstorting van die Zimbabwiese dollar.
Die nuwe gegewe sal na verwagting die akute voedseltekort wat saamval met 'n rekord inflasiekoers en die ekonomiese ineenstorting, help verlig.
Die gelisensieerde winkels herinner aan Sowjet-era ondernemings in Oos-Europa wat net in harde geldeenhede handel gedryf het.
Met die ineenstorting van die toerismebedryf, landbou en vervaardigde goedere, kom die meeste buitelandse valuta die land binne van die miljoene Zimbabwiërs wat elders werk en geld huistoe stuur.
Die meeste geld word reeds op die onwettige swart mark verhandel. Navorsers by die Sentrale Bank sê Zimbabwiese burgers spandeer elke maand miljoene op inkopietogte na naburige lande om mieliemeel, kookolie en ander ware te koop. Dit sluit ook motoronderdele en elektroniese apparate in.
Met buitelandse valuta wat nou wettig verhandel word, sê sakebestuurders dat die winkelrakke eersdaags weer voorraad sal dra, alhoewel dit nie dadelik alle probleme sal oplos nie. Dit sal tyd neem om die finansiële detail uit te werk en om voorraad in te kry.
Winkels sal toegelaat word om in Zim dollar asook harde geldeenhede sake te doen. Ingevoerde artikels sal net te koop wees in 'n betroubare geldeenheid.
Die Reserwe Bank sê in 'n verklaring dat elke onderneming 20 000 Amerikaanse dollar vir só 'n lisensie sal moet betaal en die Bank sal ook 15% van die verkope in harde valuta invorder.
Amptenare by een landwye winkelkettinggroep sê hulle beplan om voortaan in harde geldeenhede sake te doen, maar hulle het nog nie die VS$600 000 fooi wat nodig sal wees om 30 supermarkte van lisensies te voorsien nie.
'n Forensiese laboratorium in Pretoria het opdrag om vas te stel watter soort gifstof die dood van 13 lede van 'n gesin in Kwazulu-Natal veroorsaak het.
'n Polisiewoordvoerder, kaptein Vincent Pandarum, het Woensdag gesê weefselmonsters is vir ontleding na die laboratorium gestuur.
Nadoodse ondersoeke is verlede Woensdag deur 'n patoloog van Port Shepstone, Dr. Ikram Ali, uitgevoer. Hy het bevind dat daar geen anatomiese beserings aan die liggame was nie. Pandarum sê as die uitslae eers vrygestel is en die naam van die gifstof bekendgemaak is, sal die polisie probeer om uit te vind waar dit vandaan kom. Die Mazubane-gesin is op 21 September dood aangetref in hulle huis op Dingleton aan die Suidkus nadat hulle 'n kruie-konkoksie gebruik het.
Twee lede van die gesin wat nie tuis was nie, het oorleef. 'n Buurman het die liggame in die sitkamer gevind met bloed wat uit hulle neuse stroom.
'n Baba van twee weke, vier seuns tussen 2 en 7 jaar, 'n 17-jarige seun, 'n 21-jarige man, vier vrouens in hulle dertigerjare en twee 55-jariges is dood aangetref. Dit was die grootouers, hulle kinders en kleinkinders. Daar word vermoed dat die 17-jarige seun, 'n leerlingtradisionelegeneser, die dodelike konkoksie tydens 'n jaarlikse seremonie van die gesin toegedien het.
Die broer van die leerlingtradisionelegeneser, David Mazubane, sê sy jonger broer het op 15-jarige ouderdom met sy opleiding as tradisionele geneser begin.
Dele van woon- en industriële gebiede oos van Johannesburg is vandag sonder krag terwyl tegnici werk om ‘n beskadigde substasie te herstel.
Die Ekurhuleni Metro aan die Oosrand het gesê dat Esterpark, Croydon, en Spartan-uitbreidings een, drie, sewe, tien en sestien vanaf negeuur vanoggend sonder krag was.
Hulle hoop om die beskadigde paneel in die Esterpark-substasie klaar herstel te hê voor drieuur vanmiddag.
Intussen word mense gewaarsku om alle elektriese punte as lewendig te beskou.
Die Metroraad het verskoning gevra vir die ongerief.
16:48:33 Spanje se polisie het 121 mense gearresteer tydens 'n landwye klopjag as deel van die grootste operasie wat nog in die land teen kinderpornografie op die internet uitgevoer is.
Die polisie sê in 'n verklaring afgesien van die arrestasies is 96 ander mense vir die besit en verspreiding van internetkinderpornografie aangekla.
Die polisie het 210 soektogte uitgevoer en beslag gelê op miljoene video’s en foto’s, sommige waarvan uiters growwe mishandeling van minderjariges uitbeeld.
Twee van die mense wat gearresteer is, het hulle eie pornografiese materiaal vervaardig. Die slagoffers sluit lede van hulle eie familie in.
Die teen-pedofiliese ondersoek het met die samewerking van Brasilië se polisie plaasgevind wat gehelp het om 'n netwerk van ruilhandel van materiaal met belangrike verbintenisse in sowat 75 lande bloot te lê.
Die polisie het 250 woohuise regoor Spanje geïdentifiseer waar die pornografiese lêers opgelaai en versprei is en beslag is gelê op 347 rekenaarhardeskywe, 1 186 CD's en DVD's en 36 skootrekenaars.
Spanje het die laaste paar jaar op pedofilie toegeslaan en byna honderd mense tydens operasies in April en Junie vanjaar gearresteer. Ondersoekbeamptes is gehelp deur programmatuur wat hulle in staat gestel het om die name en adresse van internetgebruikers wat op die pornografiese werwe inskakel, op te spoor.
15:55:56 Drie Islamitiese militantes wat na verwagting binnekort vir die Bali-bomontploffings in 2002 tereggestel gaan word, sê hulle het
geen berou nie. Amrozi, Ali Gufron en Imama Samudra en 'n paar honderd inwoners het gebede gehou op 'n veld buite die tronk op Nusakambangan in Indonesië om die Moslem-vakansiedag Eid al-Fitr te gedenk.
Hulle sê die aanvalle op die twee nagklubs op die eiland op 12 Oktober 2002 was daarop gemik om die Verenigde State en sy bondgenote te straf. Meeste van die mense wat in die bomaanvalle dood is, was buitelandse toeriste, veral Australiërs.
Samudra sê hy het geen, en sal nooit enige berou hê nie. Die ander het saamgestem en ander aanvalle insluitend dié op die Marriott-hotel in Islamabad, Pakistan deur militantes geprys. Minstens 54 mense is dood en honderde is in die aanval beseer. Brian Deegan van Adelaide, Australië, wie se seun Josh in die aanval dood is, sê die mans se optrede is afskuwelik, veragtelik en onbesonne.
Teregstellings in Indonesië geskied voor 'n vuurpeleton. Die militantes is onder Indonesië se streng teen-terroristewette skuldig bevind. Hulle het hulle appèlle uitgeput en Indonesië se prokureur-generaal het gesê die vonnis kan enige dag uitgevoer word noudat die heilige maand Ramadan verby is. Begenadiging word dikwels tydens Ramadan aan kriminele betoon.
Die Bali-aanvalle, wat na bewering deur al-Kaida befonds is, is deur lede van Jemaah Islamiyah, 'n militante groep van Suidoos-Asië uitgevoer. Hulle het sedertdien nog minstens drie ander selfmoordbomaanvalle in Indonesië uitgevoer. Die groep is hoofsaaklik in die streek ontbind met hulle leiers óf dood óf in die tronk.
15:39:41 Sjina se staatsmedia sê twee mense in Oos-Tibet is aan die dodelikste en seldsaamste plaagvorm dood. Die gesondheidsdepartement van die Himalaja-streek is Vrydag daarvan verwittig dat twee mense aan 'n onbekende siekte in 'n dorpie in die Linzhi-gebied dood is.
Gesondheidsowerhede het die slagoffers ondersoek en bevind dat hulle aan longpes dood is. Die verslag van die ondersoek het nie die oorledenes geïdentifiseer nie maar gesondheidsowerhede in Hong Kong sê hulle was 'n getroude paar wat in September simptome van die siekte ontwikkel het. 'n Woordvoerder van Hong Kong se Sentrum vir Gesondheidsbeskerming sê die 35-jarige man is op 20 September dood. Sy 38-jarige vrou is vyf dae later dood.
Die sentrum sê longpes wat deur besmette diere – hoofsaaklik knaagdiere – aan mense oorgedra word, is hoogs aansteeklik. Dit kan tussen mense versprei word deur asemhalingsdruppels van 'n geïnfekteerde persoon in te asem. Die inkubasieperiode van die siekte is tussen een en vier dae. Dit kan deur vinnige antibiotiese behandeling binne 24 uur ná infeksie behandel word.
Pubu Zhuoma, hoof van Tibet se gesondheidsdepartement, sê gevalle van mensplae het in die verlede in Tibet voorgekom. Hy sê siekte voorkomingsbeamptes is lank reeds besig om plaagvoorkoming en –beheer in siektegebiede uit te voer. Hulle het goeie resultate behaal in die beheer van epidemies onder diere en daar was geen epidemies onder mense nie. Volgens die verslag het die owerhede onmiddellik voorkomende en beheermaatreels in die dorpie ingestel. Geen nuwe gevalle van die siekte is aangemeld nie en die siekte is onder bedwang gehou.
Die Europese Unie het Woensdag een van die hoogste boetes ooit opgelê vir kartelaktiwiteite, op wat hulle noem ‘n “paraffienmafia” wat daarvan beskuldig word dat hulle pryse en markte gemanipuleer het.
‘n Groep maatskappye wat paraffien-was maak, is beveel om boetes ter waarde van amper €700 miljoen te betaal. Dit is amper $1 mijard of R8 miljard.
Neelie Kroes van die Europese Kommissie het die groep van nege maatskappye, wat deur Sasol gelei is, ‘n paraffienmafia genoem, wat amper elke Europese verbruiker geraak het.
