Taalsnobisme kan tot die dood lei. Dit is die afleiding wat die linkse dagblad, Libération, verlede week gemaak het nadat dit aan die lig gekom het dat honderde kankerpasiënte oor ‘n lang tydperk aan dodelike hoeveelhede bestraling blootgestel is in die Jean-Monnet-hospitaal in Epinal, Frankryk.
Gesondheidsminister Roselyne Bachelot het 4 500 pasiënte gevra om aan te meld by haar departement nadat 700 mense die verkeerde dosis bestraling ontvang het. Vyf mense is reeds oorlede as gevolg daarvan en honderde het ernstige inwendige skade opgedoen. Die fout het gekom omdat die personeel blykbaar nie die Engelse aanwysings behoorlik verstaan het nie en nie die moed gehad het om dit te erken nie.
