Etiket: aanhouding

Borg geweier vir boer wat swarte raakry

‘n Oos-Vrystaatse boer, wat in hegtenis geneem is nadat hy na bewering verlede Vrydag ‘n sestigjarige swarte raakgery het, se aansoek om borgtog is vanoggend in die Bethlehemse landdroshof na Maandag uitgestel.

Josef van Eeden (34) het na bewering vir Johannes Mahlaku op ‘n plaas buite Bethlehem raakgery. Mahlaku het Saterdag, in ‘n plaaslike hospitaal, aan sy beserings beswyk. Van Eeden het homself Dinsdag aan die polisie oorgegee.

Volgens Oos-Vrystaatse polisiewoordvoerder, Zweli Mohobeleli, het Van Eeden na bewering oor Mahlaku gery.

Hy sê twee aanklagte van moord word tans teen Van Eeden ondersoek.

Die ander saak hou verband met ‘n voorval, laat verlede jaar in Fouriesburg, toe Van Eeden na bewering ‘n 36-jarige man noodlottig gewond het. Die oorledene wou Van Eeden glo met ‘n byl aanval, waarna hy hom geskiet het.

Van Eeden se prokureur het aan OFM-nuus gesê hy het namens sy kliënt voorwaardelik toegestem dat die borgtogaansoek uitgestel word. Die voorwaardes is dat die aansoek finaal op 17 Oktober aangehoor word en dat die staat moet seker maak dat die ondersoekbeampte teenwoordig is en alles in plek is.

Niemann sê as dit blyk dat die staat weer eens volgende Maandag, soos vandag, nie reg is vir die borgtogaansoek nie en met vertragingstegniek blyk besig te wees, behou hy hom die reg voor om die saak onmiddellik na die Hooggeregshof te neem.

Nieman sê wat werklik gebeur het, sal Maandag ter tafel gelê word. Van Eeden is steeds in aanhouding.

Bron: OFM

Oorbevolking in SA-tronke onder die loep

Suid-Afrikaanse tronke is nommer een in Afrika en elfde in die wêreld in terme van oorbevolking.

Dit is een van die kwessies wat aan die lig gebring is deur die Gebiedskommissaris vir die Departement van Korrektiewe Dienste (DKD), Nthako Nyapotse.

Hy het gepraat by ‘n rondetafelgesprek oor die verbetering van toestande vir gearresteerdes en aangehoue persone, wat by die Grootvlei-gevangenis buite Bloemfontein plaasgevind het.

Verdere statistiek toon dat daar tans sowat 159 000 gevangenes in die land is, maar dat daar slegs bedruimte vir 120 000 gevangenes beskikbaar is.

Nyapotse sê die DKD het strategieë geïdentifiseer om oorbevolking te evalueer.

“Ons verwyder kinders uit ons fasiliteite, na ‘n plek van veiligheid, maar daar is nie baie nie. Ons het sowat drie tans.

“Daar is ook ‘n hofbeslissing wat sê onwettige immigrante moet nie in ons fasiliteite aangehou word nie. Ons het ook die aantal aangehoudenes met borgtog laat afneem, in terme van Artikel 63 van die Wet op Kriminele Wet prosedures,” sê Nyapotse.

Lyk by laerskool: Polisie, veiligheidsmaatskappy beskuldig mekaar

‘n Moord word ondersoek nadat ’n lyk Maandagoggend by Laerskool Wonderboom-Suid in Pretoria gevind is.

Polisiewoordvoerder adjudant-offisier Hero Gumbu sê die oorsaak van die man se dood is nog onbekend en niemand is tot dusver in hegtenis geneem nie.

Die Gauteng departement van onderwys is nie bewus van die voorval nie.

‘n Veiligheidsmaatskappy-woordvoerder sê hulle het Sondagnag na ’n noodoproep ondersoek by die skool gaan instel.

Blykbaar is ‘n swartman opgemerk wat tussen die eiendomme in die omgewing rondbeweeg het.

“Die man het oor ’n muur van die skoolperseel gespring en werkers van die skool het hom aangekeer,” het die woordvoerder gesê.

Die polisie het klaarblyklik nie dadelik gereageer op die wenk nie.

Werkers by die skool het die man verrmoedelik aangehou, en teen Maandagoggend het die polisie die man dood aangetref.

Adjudant-offisier Hero Gumbu het bevestig die lyk was die van die man wat vroeër by die skool aangehou is.

Wilde aantygings is deur die polisie gemaak dat die veiligheidsmaatskappy verantwoordelik is vir die man se dood, maar toe veiligheidsmaatskappy se personeel die perseel verlaat het, was alles glo nog onder beheer.

Gumbu sê die veiligheidsmaatskappy se optrede op die misdaadtoneel word ondersoek.

Skoolhoof Rina Pretorius sê sy is aangeraai om geen kommentaar oor die aangeleentheid te lewer nie.

Die laerskool moes in 2014 ‘n reuse geldinsamelingspoging van stapel stuur vir ‘n beter sekuriteitstelsel vir die skool nadat hulle op 8 September beroof is.

Die skool is vanjaar 103 jaar oud en ten spyte van talle briewe wat hulle aan die Departement van Onderwys gestuur het, ontvang hulle geen hulp of ondersteuning vir die beveiliging van die onderwysers en leerlinge nie.

Die onderwysdepartement bied slegs berading aan vir slagoffers van misdaad.

Bron: Rekord Moot

Man brand in sel dood

Die onafhanklike polisie-ondersoekdirektoraat ondersoek ‘n voorval waarin die 44-jarige Klaas Tieties dood aangetref is in ‘n polisie-aanhoudingsel.

Volgens Opod-woordvoerder, Grace Langa het die voorval Donderdag plaasgevind by die Kenhardt-polisiestasie in die Noord-Kaap.

Tieties is in hegtenis geneem nadat hy op straat gedrink het. Hy is saam met ’n ander man, wat vir dieselfde oortreding gearresteer is, in die sel aangehou.

Langa sê beamptes het tussen 15:00 en 16:00 op sy lyk afgekom. Hy was van sy bo-bene tot sy bolyf verbrand. Langa sê sy liggaam is agter die seldeur aangetref, en was met ‘n kombers bedek.

Marteling in SA deur polisie laat menseregte-organisasies koud

Geen internasionale menseregte-organisasie het eens kennis geneem van tien Suid-Afrikaanse polisiebeamptes wat van moord en marteling aangekla word nie, ten spyte daarvan dat sulke organisasies oorverteenwoordig is in die land.

Die tien is borgtog in die Tembisa-landdroshof aan die Oos-Rand geweier.

Hulle het ‘n 37-jarige man verlede jaar in Ivory Park in hegtenis geneem en hom na bewering onderweg na die polisiekantoor gemartel.

Die polisielede is Donderdag in hegtenis geneem. Die Onafhanklike Polisie Ondersoekdirektoraat ondersoek die saak.

Dit volg kort nadat die Hooggeregshof in Pretoria agt oudpolisiemanne skuldig bevind het aan die moord op die taxibestuurder, Mido Macia.