Iran se hoofveiligheidsonderhandelaar gaan vandeesmaand die Europese Unie se buitelandsesakehoof ontmoet.
Die EU hoop dat Iran binnekort formele onderhandelings oor sy kernprogram sal begin.
Voorheen het diplomate gesê dat Iran 'n internasionale pakket van aansporingsmaatreëls om sy uraanverrykingsprogram te laat vaar, verwerp het.
'n Onlangse telefoongesprek was, volgens senior EU-diplomate, egter positief.
Hulle het gesê die oproep skep die moontlikheid dat die Iranese binnekort dalk tot samesprekings oor hul uraanverrykingsprogram mag instem.
Amerikaanse en Irakese amptenare het omtrent 600 ton se rou uraan van Irak se vernaamste kernopslagplek verwyder.
Geelkoek word op 'n vroeë stadium van die kernsiklus gebruik. Na intensiewe verwerking word dit laegraadse verrykte uraan, wat in brandstofreaktors gebruik kan word.
Die stof kan nie in die huidige vorm gebruik word om 'n kernwapen te vervaardig nie.
Amptenare het egter gesê dat daar gesondheidsgevare aan gekonsentreerde vorms van natuurlike uraan verbonde is.
Cameco, 'n Kanadese maatskappy wat uraan verkoop, het die stof aangeskaf.
Ondanks opposisie tuis en in Rusland gaan die Tsjeggiese Republiek môre 'n verdrag onderteken om 'n Amerikaanse missielverdedigingsradarstelsel op Tsjeggiese grondgebied te bou.
Washington wil die radar suidwes van Praag bou met 10 onderskeppingsvuurpyle in Pole.
Die Tsjeggiese verdrag gaan opposisie in die parlement teëkom hoewel die land 'n lid van NAVO en die Europese Unie is.
'n Onlangse meningsopname he getoon dat 68 persent van Tsjegge teen die skild gekant is, terwyl slegs 24 persent dit sterk ondersteun.
Missieltegnologie is besig om regdeur die wêreld te versprei, volgens die Tsjeggiese buitelandsesakeminister Karel Schwarzenberg. Hy het gesê dit sou beter wees om paraat te wees.
Die Groep van Agt-ryknasies sal vandag poog om skeptiese Afrikalande te oortuig dat hul beloftes om hulp aan die vasteland te verdubbel steeds nagekom sal word.
Om hul goedertrou te toon, het die G8 nie minder nie as sewe Afrikaleiers na die eerste dag van die jaarlikse spitsberaad genooi wat in 'n luukse hotel op die noordelike Japannese eiland Hokkaido plaasvind.
Van die besprekingspunte op die sakelys vir drie dae van samesprekings is klimaatsverandering, rekordoliepryse en 'n verslegtende globale ekonomie. Maar president George W. Bush, wat van Afrika 'n persoonlike prioriteit gemaak het, het gesê hy sal sy medeleiers aansê om hul hulpbeloftes na te kom.
Tydens 'n vorige G8-spitsberaad in Gleneagles, Skotland, het die G8 ooreengekom om hulp aan Afrika teen 2010 te verdubbel as deel van 'n groter poging om globale armoede aan te spreek.
nomadies. Behalwe die byna 40% wat in die hoostad Oelan Bator woon, bly perdry vir die res 'n onafskeidbare deel van hul daaglikse bestaan.
Mongolië was een van die lande wat Amerika se inval in Irak ondersteun het en voer tans 'n delikate diplomatieke balanseertoertjie uit tussen sy bure Rusland en China, asook die VSA. Nadat die kommunistiese regime van 1924 in 1991 tot 'n val gekom het, het die land merendeels uit die openbare oog verdwyn.
Tot onlangs, toe grootskaalse onluste die hoofstad getref het. Die oproer is gevoed deur ontevredenheid met die uitslag van parlementêre verkiesings wat op 29 Junie gehou is. Die eertydse kommuniste van die Mongoolse Revolusionêre Party het aangekondig dat hulle met 'n aansienlike meerderheid gewen het nog voordat die uitslae amptelik aangekondig is.
Duisende mense het daarna die strate ingevaar om te protesteer teen die MRP se eiewil. Die situasie het die volgende dag hande uitgeruk toe die skare met behulp van petrolbomme deur die polisieversperrings voor die MRP se hoofkantoor gebars het. Dié heldhaftige daad lyk op die soort "Oranje Revolusies" wat Rusland se satelliete teister.
Die MRP het beslis veld gewen agv moeilike ekonomiese kwessies en veral korrupsie. Die Wall Street Journal het voor die algemene verkiesing van 24 Junie egter geskryf dat die Revolusionêres waarskynlik gaan verloor.
Die toestand in die land bekommer die VSA en die Amerikaanse media stel deesdae weer intens belang in wat in die verafgeleë Oelan Bator gebeur. Die Washington Post het 'n dag ná die verkiesing die rede daarvoor verskaf: Rusland stel te veel in sy eertydse bondgenoot belang.
Mongolië was nie net in die verlede afhanklik van Rusland nie, maar bly dit in 'n mate steeds omdat Rusland 80% van sy olie-invoere lewer.
Die wêreld se uraanreserwes lyk min of meer as volg: Australië – 27 persent, Kasakhstan – 17 persent, Kanada – 15 persent, Suid-Afrika – 11 persent, Namibië – 8 persent, Brasilië – 7 persent, Rusland – 5 persent en die VSA en Oesbhekistan 4 persent elk. Mongolië beklee die derde plek op die lys.
Volgens die Wall Street Journal besit Russiese aandeelhouers reeds 49 % van die aandele in die land se spoorweë, bedryf die kopersmelter en beheer die hele goudproduksie.
Amerika is bekommerd dat Rusland beplan om 'n kernaanleg in Mongolië te bou in die lig daarvan dat Russiese militariste hegte bande met die land gesmee het. Mongolië het, ten spyte daarvan dat die land oor geen seetoegang beskik nie, ook 'n vloot wat die Russe goedgunstiglik help onderhou. Die VSA glo dat Mongoolse skepe allerlei bedenklike seereise na Noord-Korea en Sirië onderneem.
Trouens, die Washington Post se artikel eindig deur te waarsku dat die tyd uitloop vir die VSA om in die situasie in te gryp. Wat die Wall Street Journal betref, is dit nie meer lank voordat Mongolië terugkeer na 'n ekonomiese satelliet van Rusland en die VSA alle invloed verloor nie.
Mededinging om strategiese grondstowwe raak al hoe feller. Waar die Koue Oorlog 'n stryd van idees was, verteenwoordig materiële welvaart met oliereserwes wat uiteindelik gaan opdroog, deesdae die wekroep sover dit internasionale aangeleenthede aangaan.
Amerikaanse motoriste trotseer die gevaar van ongebreidelde dwelmgeweld in Meksiko om met goedkoop Meksikaanse brandstof vol te maak.
Hoewel daaglikse skietery in Meksikaanse grensdorpe 'n werklike gevaar verteenwoordig, sê motoriste dat hulle tot $100 per maand kan bespaar.
Die ekstra vraag veroorsaak tans tekorte by honderde van Meksiko se grensvulstasies en sommige het begin om petrol te rantsoeneer.
Meksiko se gesubsidieerde prys is omtrent $1,40 per gelling goedkoper as in die VSA waar dit $4 of net meer as R8 per liter kos.
Condoleezza Rice het China vandeesweek gevra om die VN-veiligheidsraad se strafoptrede teen Zimbabwe te steun.
Rice sê dat Washington met China saamstem dat Afrikanasies 'n groter rol moet speel, maar meen dat bykomende optrede in dié geval nodig is.
Na die vergadering met Rice, het die Chinese minister van buitelandse sake egter gesê dat Beijing ten gunste is van onderhandelings tussen Mugabe en die opposisie.
China is 'n permanente lid van die Veiligheidsraad en beskik daarom oor vetoreg oor enige besluite.
Die openingsvlug van die eerste gereelde diens in amper ses dekades het vandag in Taipei geland.
Die twee het in 1949 verdeel aan die einde van 'n burgeroorlog.
Die Airbus A330 vanaf China is met water bespuit en ongeveer 100 Chinese toeriste is deur 'n tradisionale leeudans by die Yaojoean internasionale lughawe verwelkom.
Ses-en-twintig toergroepe van China sal vandag vanuit Beijing, Sjanghai en Goeangsjoe aankom terwyl nege vlugte na Sjina vanaf Taiwan op dieselfde dag sal vertrek.
Kernprogramme in die Midde-Ooste en Suid-Asië dreig om in 'n streekswapenwedloop te ontaard.
Hoewel nie-kernmoondhede daarop geregtig is om vreedsame kernkrag onder die Kernsperverdrag te ontwikkel, veroorsaak die verrykingsprogram in Iran, wat wel die verdrag onderteken het, groot internasionale kommer.
In Mei 1995 het lede van die Kernsperverdrag besluit om dit onbepaald te verleng, maar geskille bestaan tussen die lande wat dit onderteken het, wat die verdrag verder verswak.
Die enigste land ter wêreld wat tot dusver vrywillig sy kernprogram gestaak het, is Suid-Afrika.
NASA, die Amerikaanse ruimte-administrasie, gaan sy samewerking met Rusland en ander lande versterk ten einde die VSA teen 'n moontlike asteroïdebotsing te beskerm.
Die Amerikaanse Kongres beplan om Rusland se RT-70-radar vir dié doel te gebruik.
Die voorspelde aantal asteroïdes, wat 'n bedreiging vir die planeet Aarde verteenwoordig, beslaan ongeveer 25 000.
Om 'n moontlike botsing met die aarde te vermy, sal die VSA met ander lande moet saamwerk.
Rusland se RT-70, wat bekend as die II-2500-radar bekend staan, is 'n baie kragtige radarstelsel wat die doel kan dien.
Die radar bevind hom in die verre ooste van Rusland, in die dorp Galenki.
Associated Press berig dat 'n baie geringe vorm van vroulike besnydenis, wat gewoonlik 'n speldsteek is, dikwels op babadogtertjies in Indonesië uitgevoer word.
Die regering het in 'n mediese omsendbrief gesê dat daar geen straf sal wees vir diegene wat dit ignoreer nie, maar het nie die kennisgewing openbaar gemaak nie.
Die praktyk word deur sommige Islam-predikers as verpligtend beskou.
Die Wêreldgesondheidsorganisasie beraam dat omtrent twee miljoen meisies gevaar loop om die oefening te ondergaan.
Hy het teenoor verslaggewers in Noord-Dakota aangedui dat indien hy president sou word, hy na alles nie op die onmiddellike onttrekking van Amerikaanse magte in Irak sou aandring nie.
Obama was nog deurgaans 'n driftige teenstaander van die oorlog in Irak.
Hy het blykbaar nou sy posisie hersien en sê nadat hy bevelvoerders geraadpleeg het, is dit duidelik dat sy aanvanklike posisie nie haalbaar is nie.
Hy het aanvanklik gesê dat hy alle troepe binne sestien maande sou laat onttrek.
Die Republikeinse Party het Obama van besluiteloosheid beskuldig.
Segsman Alex Conant sê daar blyk geen vraagstuk te wees waarin Obama onwillig is om 'n ommekeer te maak nie.
Die Wêreldbank het 'n beroep op die leiers van die G8 wat aanstaande week in Japan vergader gedoen om nuwe verbintenisse tot hulp aan te gaan ten einde hongersnood en onstabiliteit in dosyne lande te voorkom.
Die president, Robert Zoellick sê dit was 'n mensgemaakte ramp en moet deur mense herstel word.
Volgens Zoellick beloop die IMF en die Wêreldvoedselprogram se korttermynbehoeftes $10 miljard.
Die IMF het Dinsdag 'n aparte verslag vrygestel wat aantoon dat sekere ontwikkelende lande by 'n keerpunt verkeer indien voedsel- en brandstofpryse hoog bly.
Die Wêreldbank het bereken dat die BNP van 41 lande onder die huidige omstandighede met tussen 3 en 10 persent gaan daal.
Die Russiese leier Dmitri Medwedef het na 'n oproep deur die Republikeinse presidentskandidaat, John McCain, dat Rusland by die G8
verbied moet word, gesê dat Rusland nie langer deur die VSA oorheers sal word nie.
Soos wat olie-inkomste die Russiese ekonomie aangehelp het, het Rusland se rol in die wêreldekonomie verhoog.
Net 'n dekade gelede was die Russiese ekonomie in wanorde en die land was desperaat vir Westerse hulp.
Die Russiese president het net Russies gepraat hoewel hy geen tolk nodig gehad het om vrae wat in Engels gestel is te verstaan nie.
