Kwazulu-Natal – Bladsy 3

Sadou agter Vavi

Die onderwysersvakbond, Sadou, se grootste streek in KwaZulu-Natal, Kokstad, eis ‘n terugtrekking van die besluit om die president van Sadou, Thobile Ntola, en die hoofsekretaris van Cosatu, Zwelinzima Vavi, te skors.

Sadou se Kokstad-streek het gister ‘n vergadering in Port Edward gehou.

Ntola is geskors nadat hy ‘n platform aan Vavi verskaf het om Sadou toe te spreek by die vakbond se vergadering in Oos-Londen.

Vavi is op sy beurt geskors na ‘n buite-egtelike verhouding met ‘n junior personeellid. Zamuxolo Matwasa sê die klagtes teen Vavi en Ntola dra geen gewig nie. – RSG

R28 miljoen vir jazzfees verdwyn

Die KwaZulu-Natalse regering het R28 miljoen vir ‘n jazz-fees in Durban betaal wat nooit plaasgevind het nie, het die Sunday Tribune berig.

Die ekonomiese ontwikkeling en toerisme departement is besig om deel van die geld te verhaal. In Junie verlede jaar is ‘n ooreenkoms aangegaan met ‘n konsortium om die internasionaal bekende North Sea Jazz Festival aan te bied.

Die fees het nie plaasvind soos geskeduleer is in November nie as gevolg van ‘n geskil tussen die feespromotors, die fees se Nederlandse bestuur Mojo, en die departement. Die Sunday Tribune berig dat die departement R28 miljoen opgedok het, waarvan R16.9 miljoen bestee is sonder dat die fees plaasgevind het.

Die geleentheid is gekanselleer en die departement het ‘n terugbetaling van sowat R11 miljoen betaal aan Charmaine Cornille, een van die promotors, om die regte vir die fees van Mojo te bekom. Mojo het sedertdien beweer hulle is nooit betaal vir die regte nie.

Die departement het ‘n ooreenkoms aangegaan met die MPM/Softskills konsortium. Cornille was een van MPM se eienaars. MPM is later vervang deur Profile Kommunikasie, ook in besit van Cornille. Cornille ontken bewerings dat haar rol in die projek gelei het daartoe dat die fees gekanselleer word.

“Ek is ‘n fluitjieblaser in hierdie geval en ek het na die provinsiale tesourie gegaan en hulle van bedrog en korrupsie op groot skaal in kennis gestel,” het sy gesê.

Polisie skiet op betogende studente

Die polisie het glo Woensdag met rubberkoeëls op ‘n groep studente losgetrek wat by die Mangosuthu Universiteit van Tegnologie (MUT) in KwaZulu-Natal betoog het.

“Die studente het die polisie met klippe bestook. Daarna het die polisie met rubberkoeëls teruggeskiet,” het supt. Jay Naicker, polisiewoordvoerder, gesê.

Volgens Naicker was die studente glo onder die invloed van alkohol gewees.

“Die 15 studente wat Dinsdag in hegtenis geneem is vir openbare geweld is later weer vrygelaat en sal op 8 April in die hof verskyn,” het hy gesê.

Na bewering het die betrokke studente teruggekeer na die universiteit en sowat 300 ander studente toegespreek. Dit is gedurende hierdie gesprekke dat hulle die polisie bestook het.

“Niemand is in die voorval beseer nie en die polisie het nog niemand in hegtenis geneem nie.”

new online casino

Vrou met MIV besmet

‘n Vrou van Bedfordview is met die MIV-virus besmet nadat ‘n nooddienswerker haar op die toneel van ‘n ongeluk behandel het, het die hof Woensdag beslis.

Die ongeluk, waarin die vrou kopbeserings opgedoen het, het in Augustus 2000 naby die Mooi Rivier-tolhek in KwaZulu-Natal plaasgevind. Drie doktors en twee spesialiste het bevestig dat sy min of meer in die tyd van die ongeluk met MIV besmet is.

Sy is in die Pietermaritzburg Mediclinic behandel.

Die nooddienswerker het glo die vrou behandel nadat hy ‘n voetganger, wat tydens die ongeluk dood is, behandel het. Regter Shimon Patel het beslis dat die nooddienswerker nie die nodige maatreëls toegepas het om te verseker dat die MIV-virus nie van een pasiënt na die ander versprei nie.

Zuma gas by bulslagting

President Jacob Zuma was Saterdag in Nongoma, KwaZulu-Natal, waar duisende mense die ritueel ter ere van koning Goodwill Zwelithini aanskou het. ’n Bul is deur 30 Zoeloekrygers, tussen die ouderdomme van 16 en 19 jaar, met hul kaal hande doodgemaak.

Die ritueel was deel van die Ukheshwama-oesfees by die Nyokeni-paleis, een van die wonings van Zwelithini.

Animal Rights Africa (ARA) wat die ritueel wou keer deur ’n dringende aansoek by die hooggeregshof in Pietermaritzburg in te dien, kon nie verhoed dat dit voortgaan nie nadat regter Nic van der Reyden Vrydag die ARA se aansoek van die hand gewys het.

Van der Reyden het die geleentheid vergelyk met die Nagmaal en gesê 10 miljoen Zoeloes sal deur die afskaffing van die ritueel geraak word omdat hulle daarin glo.

Hy het ook gesê die simboliese gebaar is belangrik omdat versuim sal beteken dat die Zoeloes hulle koning “vermoor” indien hulle nie die bul op dé wyse dood nie.

Fotograwe, asook vroue en kinders, is nie by die geleentheid toegelaat nie.

Zwelithini het die “praatjies” dat Zoeloes nie respek vir diereregte het nie, afgemaak en gesê Zoeloes mishandel nie diere nie, want hulle gee selfs troetelname om te wys hoe lief hulle diere het.

Hy het die geleentheid as ‘n herontwaking van Zoeloekultuur beskryf.

Hy het sy verligting uitgespreek dat ARA se aansoek misluk het, en die ritueel “wonderlik” genoem. Hy het bygevoeg dat so iets nie bederf kan word deur “mense wat dink hulle weet meer van ons kultuur as onsself nie.

Empangeni-munisipalebestuurder weens ras afgedank

Die munisipale bestuurder van die uMhlathuze-munisipaliteit in Empangeni, Kwazulu-Natal, is deur die ANC-meerderheid vanaf gister geskors. Dr. Tonie Heyneke, ‘n ervare bestuurder, gaan glo ondersoek word met die oog daarop om hom af te dank ten einde ‘n swart ANC-gesinde bestuurder in sy plek aan te stel.

‘n DA-lid van die munisipale raad, Alet Viljoen, het dit as “‘n geval van rassisme” beskryf. “Dis ‘n politieke komplot om van doeltreffende bestuurders ontslae te raak waar ondoeltreffende bestuurders nie die werk gedoen kry nie,” het sy gesê.

Daar is 31 ANC-lede op die raad en 28 van die opposisiepartye, waaronder die DA, IVP en VF+. Die gesamentlike opposisie het die raadsaal verlaat toe daar oor die mosie om Heyneke te skors, gestem is, maar die ANC het steeds ‘n kworum gehad en kon dit deurvoer.

‘n IVP-lid het agterna verklaar: “Dit is kategories gesê dat blankes en Indiërs vanuit die munisipaliteit verwyder gaan word, van bo af. Is dit wat mens ‘n reënboognasie noem?”

Een van die kwessies wat die ANC teen Heyneke hou, is dat hy voortgegaan het om ‘n bestuurder: menslike hulpbronne, aan te stel nadat twee swart lede van die aanstellingspaneel, adjunkstadsbestuurder BB Nhleko en senior bestuurder: korporatiewe dienste Mbali Ndlovu, nie onderhoude met kandidate bygewoon het nie.

Heyneke het verder gegewens dig gehou oor ‘n forensiese ondersoek waarmee hy besig was in die departement van parke, sport en ontspanning waar bedrog van R160 000 gepleeg is en wou nie die ANC-raadslede in besonderhede inlig nie, waarskynlik uit vrees dat getuienis aan die booswigte oorgedra sou word.

‘n IVP-raadslid, Louis van Zyl, het dit as “‘n opsetlike aanval op dr. Heyneke” beskryf. “Tien jaar lank het hy ‘n gevoel van veiligheid aan die raad verleen. Hy beskik oor ‘n bewese baanrekord en het te alle tye professioneel opgetree. Dit is duidelik ‘n komplot teen hom.”

Heyneke het in sy reaksie die munisipaliteit gevra om voort te gaan met die lewering van dienste met die steun van inwoners en belastingbetalers.

“Met verwysing na die aantygings wat met dié besluit teen my gemaak word, kan ek alle belanghebbendes verseker dat ek niks verkeerds gedoen het nie.

“Mense moenie deur hierdie verwikkeling ontstel word nie; hulle moet kalm bly. Sommiges mag dit ondersteun en ander nie. ‘n Opwelling in menings mag dalk net die situasie verder polariseer,” het Heyneke bygevoeg.

Die burgemeester, Zakhele Mnqayi, het versigtig gereageer, maar gemeen hy is “teleurgesteld dat die uitvoerende komitee nie in die saak geken is nie”.

IVP-raadslede het die besluit as ‘n “vendetta teen Heyneke” beskryf wat deur politieke inmenging gemotiveer word.

“Dis vir meer as ses weke beplan. Ons maak nie aanstellings op grond van politieke partye en kleur nie, maar op grond van bekwaamheid. Ons het mense nodig wat vir die werk gekwalifiseer is, nie vir die party nie. Hierdie munisipaliteit is besig om in ‘n Spaza-winkel te ontaard,” het IVP-raadslede ná afloop van die vergadering gesê.

детская игрушки