Ten spyte van die hoë koste verbonde aan breëband was daar die afgelope twee jaar ’n toename van 120% in Internetgebruikers in Suid-Afrika. Die syfer het toegeneem van 1,8 miljoen in 2005 tot 3,9 miljoen gebruikers in 2007.
Volgens Matthew Buckland van die Aanlyn-uitgewersvereniging is die groei “fenomenaal.“ Engels word gebruik deur 52% van plaaslike gebruikers (2,10 miljoen), gevolg deur Afrikaans met 28% (1,11 miljoen). Sowat 36% van die Internetgebruikers is tussen 25 en 34 jaar oud, gevolg deur 35% tussen die ouderdomme van 35-49. 54% Van alle plaaslike gebruikers is mans, teenoor 45% vrouegebruikers.
Wat ook interessant is, is dat Suid-Afrika derde op die wêreldlys is van lande wat die Internet deur middel van hul selfone gebruik. Die Verenigde Koninkryk is eerste, gevolg deur die VSA, Suid-Afrika, Indië en Indonesië.
’n Kwart van Afrika se Internetgebruikers bevind hulle in Suid-Afrika. Telkom-landlyne verteenwoordig tans 39% van die totale telefoonverbindings op die vasteland.
Die Zimbabwiese regering het gister ’n nuwe wetsontwerp voorgestel ingevolge waarvan swart Zimbabwiese burgers ’n 51% aandeel in openbare maatskappye sal bekom.
Dit is nog nie seker hoe privaat maatskappye geraak sal word nie. Buitelandse beleggers beheer tans verskeie Zimbabwiese firmas, veral in die mynbedryf. Die regering oorweeg hier skynbaar ’n ander vorm van bemagtiging. Verlede jaar het vele van die plaaslike mynbase gewaarsku dat hulle hul deure sal sluit indien Mugabe poog om die myne oor te neem.
Sommige van die firmas wat op beide die Zimbabwiese en Londense effektebeurse gelys is, sluit Hwange, NMB-bank en Ou Mutual in. Van die firmas wat waarskynlik deur die nuwe beleid geraak gaan word, sluit Barclays, Bindura Nickel Corporation en Rio Zim in.
Volgens die wetsontwerp word “inheemse Zimbabwiërs“ gedefinieer as persone wat voor 1980 “benadeel is deur onregverdige diskriminasie gebaseer op ras en sulke persone se nasate.” Die wetsontwerp maak dit duidelik dat geen nuwe belegging goedgekeur sal word indien “inheemse Zimbabwiërs” nie die beherende aandeel het nie. Regeringsdepartemente sal voortaan ook 51% van hulle aankope moet doen by besighede waarin Zimbabwiërs die botoon voer.
Met werkloosheid geskat op nagenoeg 80% en die inflasiekoers wat tans rondom 4 500% huiwer, gaan die nuutste aankondiging beslis net bydra tot die verdere agteruitgang van die Zimbabwiese ekonomie.
Pole het pas daarin geslaag om ’n toegewing oor die Europese Unie-verdrag af te dwing, maar ten koste van die land se verhouding met sommige van die EU-lede.
Leiers van die 27 EU-lidlande het op 23 Junie in Brussel uiteindelik daarin geslaag om eenstemmigheid te bereik oor die opstel van ’n nuwe verdrag wat die EU-grondwet sal vervang wat in 2005 deur beide Nederlandse en Franse kiesers by die stembusse verwerp is. Die nuwe verdrag sal teen die einde van 2007 gefinaliseer word.
EU-leiers, onder aanvoering van kanselier Angela Merkel, het ’n konsessie aan Pole gemaak deur te besluit om die huidige EU-verkiesingstelsel onveranderd te behou tot 2017. President Lech Kaczynski en sy tweelingbroer, die eerste minister Jaroslaw Kaczynski, het die besluit as ’n oorwinning vir Pole bestempel. Die Poolse eerste minister het ander EU-lande by die pas afgelope beraad geskok toe hy gesê het Pole is op groter stemregvoordele geregtig aangesien die land se bevolking nou veel meer as die huidige 38 miljoen sou beloop indien die Nazi’s nie miljoene Pole tydens die Tweede Wêreldoorlog vermoor het nie.
Die Italiaanse eerste minister, Romano Prodi, het in sy reaksie op die beraad gesê Europa het die gemeenskaplike wil om te vorder, verloor. Hy het Engeland veroordeel weens die land se “hardkoppige aandrang” om ’n Europese vlag en volkslied uitgesluit te kry van die EU-verdrag en het ook die houding van Pole gekritiseer. Die Duitse dagblad Bild, wat Angela Merkel ondersteun, meen dat dit beter sou gewees het as die samesprekings misluk het en glo nie dat die Kaczynski-broers met die konsessie van Brussel tevrede gaan wees nie.
Werk aan die bou van die Saal is in 1678 begin. Die sewentien boogvensters wat ‘n uitsig bied op een van die mooiste tuine in Europa, is deur argitek Jules Hardouin-Mansart beplan om die Sonkoning en sy eggenote se appartemente aan mekaar te verbind.
Aan die noordekant van die Spieëlsaal is die Oorlogsaal en aan die suidekant die Vredesaal. Lodewyk XIV het die vertrek daagliks as ‘n deurgang na sy Kapel geneem. Die swanesang van sy absolutistiese heerskappy is in die lang vertrek, toe vol ornate silwer meubels, voltrek.
In die negentiende eeu is die vredesluiting om Pruise se oorwinning oor Frankryk te vier op 18 Januarie 1871 in die Spieëlsaal afgehandel en Willem I is tot die Keiserryk se koning gekroon. Die swaar oorlogskuld wat Frankryk opgelê is, sou bydra tot Pruise se opbloei.
Vir die eerste maal in die Spieëlsaal se geskiedenis is ‘n volle restourasieprojek, van vloer tot dak, deurgevoer. Elke stukkie brons, hout en glas is skoongemaak en waar nodig herstel, teen ‘n prys van 12 miljoen euro.
Die oorspronklike werk van Le Brun is dus hierdie keer heeltemal noukeurig blootgelê en die 40 personeellede betrokke was oorstelp met die vonds. "’n Baie fyn oog vir kleur en ‘n baie groot skilder," sê Meneer Didier wat die projek gelei het. Die herstelwerk het die span in staat gestel om te sien hoe die skilder sy tonele beplan het en waar hy gehuiwer het. Sodoende kon hulle ‘n unieke insig in sy werkmetode verkry.
Die ontdekking wat kunshistorici die meeste getref het, was dat die blou wat Le Brun gebruik het simbolies van donker na lig geskakeer word hoe nader die kyker aan die Oorlogsaal beweeg. Die oorspronklike groen-brons verguldings van die lyste en om die vensters is ook teruggebring. Elke detail is deur en deur geverifieer om met argiefbeskrywings te klop. "Ons het niks bygevoeg nie," het die direkteur bevestig.
Die provinsiale gesondheidsdepartement van die Noord-Kaap word tans deur die plaaslike tesourie en die kantoor van die eerste minister geadministreer. Dit volg op jare van nepotisme en korrupsie.
Volgens die waarnemende LUR vir gesondheid in die Noord-Kaap, Gomolemo Lucas, gaan “verstandige finansiële stelsels“ vir die department geskep word. Hy het toegegee dat daar verskeie wanpraktyke in die tenderproses die afgelope paar jaar plaasgevind het. Lucas se uitsprake bevestig die ouditeur-generaal se bevindinge van laas jaar. Die OG het naamlik op ’n hele klomp onreëlmatighede in die departement se finansiële bestuur afgekom. Probleme is toegeskryf aan onbekwaamheid en ook aan korrupsie.
President Vladimir Poetin het Donderdagaand ‘n konferensie van geskiedenisonderwysers in Moskou toegespreek waar hy na hoofstukke uit die Russiese verlede onder Stalin verwys het as "problematies" en "verskriklik". Hy het bygevoeg dat elke staat egter met soortgelyke dinge uit sy geskiedenis worstel. In Rusland, so onlangs as die twintigste eeu, is miljoene mense tydens Josef Stalin se skrikbewind gedood.
Die "verskriklike sy" van die Russiese geskiedenis was veral die hongersnood in 1932 – 1933 in die Oekraïene en ander dele van Rusland waartydens tussen vyf en sewe miljoen mense dood is. Gedurende die "Groot Terreur", 1937 tot 1938, toe byna 1,6 miljoen mense aangehou is, het 700 000 slagoffers omgekom wat doodgeskiet is. Ander is daarna in kampe oorlede.
Tydens die Tweede Wêreldoorlog is miljoene Duitsers, Tsjetsjniërs, Krim-Tartare en ander volke uit hul gebiede gedeporteer en na raming het tussen 20 en 30 persent die onmenslike toestande nie oorleef nie.
Die konferensie is gehou om nuwe leerplanne vir skole te bespreek omdat die materiaal van die negentigerjare vervang moet word. Die bestaande handboeke vir skoolgaande kinders, so lui die kritiek, behandel die Russiese geskiedenis van die 20ste eeu as ‘n reeks opeenvolgende katastrofes. Om die outoriteit van die staat weer te herstel, moet "foute" uitgewys word, maar ook suksesse.
"’n Mens kan nie toelaat dat ons skuldgevoelens opgelê word nie," het Poetin aan die onderwysers gesê. Waar daar ooglopende swak voorstellings van die Russiese geskiedenis in ‘n skoolhandboek voorkom, het hy vermaan dat "baie handboeke deur mense geskryf is wat deur buitelanders betaal is. Diegene wat betaal, bepaal die deuntjie."
Die twee vakbonde, naamlik die Nigeria Labour Congress, wat hoofsaaklik uit handearbeiders bestaan, en die Trade Union Congress wat witboordjiewerkers bedien, is ontevrede met die feit dat brandstof 15% duurder geword het. President Umaru Yar’adua weier om die verhoging wat sy voorganger afgekondig het, ongedaan te maak.
Die regering hou vol dat die staking deur "politieke" gronde teweeggebring is omdat dit onverantwoordelik is om vir ‘n toename van 5 naira ‘n land te verlam. Die wisselkoers is tans 128 naira vir $1. Olusegun Obasanjo het die verhoogde prys van 65 na 75 naira op 28 Mei bekend gemaak.
Die regering het by monde van die president ná twee dae aangekondig dat hulle wel sal oorweeg om die prys te verlaag na 70 naira per liter. Ander toegewings is ook voorgelê in die hoop dat die stakers sal besgee.
Verdubbelde verkoopsbelasting wat teen die einde van Mei ingestel sou word, sal laat vaar word en ‘n salarisverhoging van 15% terugwerkend vanaf 1 Januarie 2007 is aangebied. Die vorige regering het reeds die verhoging aangekondig, maar amptenare het nooit die beloofde beter vergoeding ontvang nie.
Die twee vakbonde hou egter voet by stuk dat die hoër brandstofprys onaanvaarbaar is en het onderneem om die arbeidsaksie vol te hou totdat die regering gehoor aan hul eis gee. Die gevolg van die besluit is oral in Nigerië sigbaar.
Met sonsopkoms staan honderde taxi’s dig saamgedrom om vulstasies met 25 of 50 liter kannetjies gereed om die paar druppels brandstof nog beskikbaar in die hande te probeer kry. Die meeste stasies ontvang geen brandstof meer van privaat- of regeringsdepots nie. Die groot hawe van Lagos, Apapa, word byna heeltemal lamgelê omdat die Nigerian Port Authority asook doeanebeamptes deelneem aan die staking.
By die Murtala Mohamed-lughawe word internasionale vlugte wat uit Lagos vertrek gedwing om van hul direkte trajekte af te sien omdat hulle elders moet aandoen om eers vol te maak aangesien vliegtuigbrandstof ook nie meer volop is nie.
Nigerië is die sesde grootste olieuitvoerder ter wêreld, maar die land se belangrikste bron van inkomste word skynbaar nie geraak deur die krisis nie. Die multinasionale instansies wat meesal in die suide opereer, maak gebruik van hul eie personeel.
Die NLC het Woensdag aangekondig dat hulle toesig sal hou oor stakende werkers om te verhoed dat hulle terugkeer na hul poste voordat ‘n gewenste uitkoms bereik is. Verskeie Nigeriese koerante het foto’s van padblokkades en versperrings deur munisipale busse geplaas om werkers te waarsku dat hulle dopgehou word.
Die regering het dieselfde dag bevestig dat "die reg om te staak gerespekteer word, maar dat dit nie misbruik moet word om wet en orde te ondermyn nie." Hulle het die vakbonde daaraan herinner dat niemand gedwing mag word om aan die staking deel te neem nie.
President Yar’adua is besonder kwesbaar vir die politieke druk wat tans oplaai omdat hy nog geen regering aangewys het sedert hy op 29 Mei die amp oorgeneem het nie. Volgens die onafhanklike koerant This Day verkeer hy tussen twee vure. As hy te kragdadig optree om sy posisie te legitimeer sal hy sy gewilde beeld van ‘n "gewillige dienaar" by die bevolking prysgee. Indien hy nie optree nie, sal die maatskaplike onrus verder uitbrei.
Watter manier van optrede hy ookal kies, is dit duidelik dat die mag van die president ‘n knou toegedien is en dat dit niks goeds voorspel vir die afsienbare toekoms in Nigerië nie.
Die nuwe direkteur-generaal van die departement van binnelandse sake, Mavuso Msimang, het Woensdag teenoor die parlement se staande komitee oor openbare rekeninge (SKOOR) toegegee dat die departement se kontrak met die maatskappy wat die Lindela-repatriasiesentrum naby Krugersdorp bestuur, “’n bedrogspul” is.
“Dit is nie ’n goeie kontrak nie. Ons gaan dit definitief volgende jaar hersien om te kyk of dit nie verbeter kan word tot voordeel van die departement nie,“ het Msimang erken.
Die kontrak is opgestel met Leading Prospects Bpk, wat die sentrum namens die departement bestuur. Die dokument is só opgestel dat die departement slegs voordeel trek wanneer die sentrum optimaal benut word. Volgens Msimang is die deparement se doelwit om die getal onwettige immigrante in die land te verminder.
Daarom maak die kontrak nie sin nie, want die departement behoort nie voordeel te trek uit die feit dat daar meer onwettige immigrante in die sentrum aangehou word nie. Volgens die kontrak betaal die departement R80 per dag per aangehoudene aan Leading Prospects Bpk, met die aanname dat daar maandeliks 3 250 persone by die sentrum aangehou word.
Selfs al word daar minder persone aangehou, is die departement egter steeds verplig om dieselfde bedrag te betaal. Oor die afgelope paar jaar het die aantal persone wat by Lindela aangehou word, gedaal tot sowat 1 500 per maand.
SKOOR het die departement beveel om binne die volgende twee weke die name van alle direkteure en aandeelhouers van Leading Prospects Bpk aan die komitee voor te lê. Daar word tans gespekuleer dat sommige van die aandeelhouers prominente politici is.
Leading Prospects Bpk het ’n kontrak van tien jaar met die departement van binnelandse sake.
Die dokumente is op die internet te besigtig op die organisasie se webwerf. Oesama het blykbaar ‘n Ryan Air 727 gebruik, alom bekend as die "vlug van die Bin Laden-familie", wat op 19 September 2001 vanaf Los Angeles opgestyg het met Saoediërs aan boord. Terwyl die FBI ontken dat Oesama dit gehuur het, staan daar duidelik in die verslag dat die "Saoediese koninklike gesin of Oesama Bin Laden die vliegtuig gehuur het".
Die groep het daarna in Orlando geland, toe in Washington aangedoen en later na Boston gereis. Die vliegtuig het daarna egter die VSA verlaat en die volgende dag in Parys aangekom. Ses vlugte tussen 14 en 24 September 2001 altesaam is opgeteken om Oesama Bin Laden se familie en gesin uit die VSA te ontruim volgens JW.
"Volgens die FBI, en dit is ongelooflik, het nie een Saoediër of een van die lede van die Bin Laden-gesin enige inligting van waarde aan die ondersoekers kon lewer nie." verklaar JW op hul webtuiste. ‘n Paar dae ná die verskriklike aanvalle op New York, die Pentagon en verskeie passasiersvliegtuie wat daarvoor aangewend is, is die vermeende baasbrein se naastes en gesin dus deur die FBI ondervra sonder dat dit enige nuttige inligting opgelewer het.
Die organisasie is bekommerd dat die FBI, wat hoegenaamd geen ongerymdhede opgemerk het nie, nie hulle werk behoorlik gedoen het nie. ‘n Segspersoon van die FBI het ter verduideliking gesê dat die onafhanklike Kommissie van Ondersoek na 11 September 2001 se voorvalle bevind het dat "geen persoon aan boord met terrorisme verbind kon word nie" en dat "geen politieke inmenging" die vlug uit die VSA gehelp het nie. Kennelik het die FBI egter ook nie veel gedoen om die vlug te keer nie.
Nie minder nie as 46 naamsveranderinge word tans in Kaapstad oorweeg. Volgens ’n aankondiging gister van Helen Zille, die stad se burgemeester, sal die name nou geadverteer word en die publiek genooi word om kommentaar te lewer. Die name sal daarna deur die burgemeesterskomitee oorweeg word.
’n Paneel onder leiding van Rhoda Kadalie het voorgestel dat Kromboom-straat in die suidelike deel van Kaapstad na die musikant Taliep Petersen vernoem word. Hendrik Verwoerd-rylaan in Panorama kan nou Beyers Naude-rylaan word, Hans Strydom-laan in die middestad Albert Luthuli-laan en JB Hertzog-boulevard Nelson Mandela-boulevard. Ander figure wat herdenk sal word, sluit Jan Rabie, Uys Krige, die hartchirurg Chris Barnard en ANC-vryheidsvegters soos Anton Fransch en Ashley Kriel in. Die paneel het verder besluit dat al die NY-strate in Guguletu verander behoort te word. NY staan vir “Native Yard.“
Die paneellede het téén die voorstel besluit om die lughawe te vernoem na Khoi San Internasionaal. Hulle het ook besluit téén die verandering van De Waal-rylaan na Hoerikwaggo-rylaan en het eerder die naam van die PAC-leier Philip Kgosana voorgestel. ’n Verdere voorstel om Oswald Pirow-straat in die middestad na Anti Nazi-straat te herdoop, is ook verwerp.
Intussen gaan die hofsaak van die Demokratiese Alliansie teen die 176 voorgestelde naamsveranderinge in Durban voort. Meer nuus in hierdie verband word môre verwag.
