Deus ex machina vir Afrikanerselfbeskikking vanuit die Krim

roodt_dan_wikideur Dan Roodt

[followbutton username=’danroodt’ count=’true’ lang=’en’ theme=’light’]

Hou van Dan Roodt se Facebookblad

Vandag word daar deur die inwoners van die Krim in ‘n referendum oor selfbeskikking gestem. Daarmee is die twee miljoen inwoners van die Krim besig om die wêreldgeskiedenis te verander, want so pas het die internasionale stelsel wat sedert die ineenstorting van die Berlynse muur in November 1989 gegeld het, insgelyks verkrummel.

Amerika, Brittanje en die Europese Unie wou die referendum ten alle koste verhoed, maar Rusland het vanuit die staanspoor die proses beheer en selfs gisteraand se stemming in die Veiligheidsraad van die Verenigde Nasies kon dit nie keer nie.

Terwyl die meeste Suid-Afrikaanse koerante vandag oor gister se rugby of die komende verkiesing berig, vind daar in die Krim ‘n gebeurtenis plaas wat vir ons van die uiterste belang is. Nes aan die einde van die Eerste Wêreldoorlog, word selfbeskikking weereens ‘n internasionale kwessie. Woodrow Wilson, die Amerikaanse president aan die einde van daardie oorlog, het onomwonde verklaar dat “die reg op selfbeskikking… heilig is”. Hy het ook sy beroemde “veertien punte” gestel wat selfbeskikking veronderstel het.

Jan Smuts het gesê dat die toekoms van Suid-Afrika altyd van buite die land bepaal sal word. Dit was so in 1899, maar ook in 1990. Die Nasionale Party het in die tagtigerjare die binnelandse stryd teen die ANC, SAKP en sy bondgenote gewen, maar dit in die buiteland verloor. Met die hulp van die destydse Sowjetunie, Oos-Duitsland, Swede, asook die magtige links-liberale partye en media in Brittanje en die VSA, is die destydse NP-regering gedwing om met ‘n skimagtige terreurbeweging genaamd die ANC te “onderhandel”.

Terwyl mnr. FW de Klerk in sy referendumvraag van 1992 aan die blanke kiesers ‘n mandaat versoek het om met onderhandeling voort te gaan, het hy die “ja”-stem as carte blanche geïnterpreteer om tot ‘n volskaalse politieke, ekonomiese en militêre kapitulasie in te stem. Net soos twee miljoen hoofsaaklik Russiessprekende inwoners van die Krim ná die Amerikaans-gesteunde magsgreep op 22 Februarie 2014 hul onder ‘n vreemde meerderheid bevind het, word die Afrikaner vanaf 27 April 1994 op alle gebiede oorheers.

Die ineenstorting van die Berlynse muur was ‘n swaar slag vir Links en natuurlik vir die Sowjetunie wat byna dadelik begin verbrokkel het. Hier is egter die ironie: pleks dat De Klerk hierdie keerpunt in die wêreldgeskiedenis in sy guns aangewend het om die Suid-Afrikaanse kommuniste en links-liberale te troef, het presies die teenoorgestelde gebeur! Soos ek al tevore geskryf het, het FW ‘n geleentheid in ‘n ramp omskep.

1989 was die deus ex machina wat vir die Afrikaner ‘n ramp geskep het; kan die huidige gebeure in die Krim die katalisator word wat ons volk weer na vryheid lei? Weereens gaan dit om ‘n eksterne faktor buite ons beheer wat groot verandering bring.

Die enigste logiese afleiding oor die ramp van 1989 wat ‘n mens kan maak, is dat FW de Klerk na Groot Brittanje oorgeloop het en begin het om die Britse belang in ons land te bevorder. Ook sy broer Wimpie, wat ‘n groot kokkedoor in beide die Broederbond en die Afrikaanse media was, het in die aanloop tot die Groot Afrikaneroorgawe met die Britse geheimediens in Londen vergader, soos wat Chris Louw in sy boek Boetman en die swanesang van die verligtes berig het.

Afrikaners het tydens die Koue Oorlog besonder goed gevaar. Die periode vanaf 1948-1989 wat deur Leon Lemmer vandag as die “Afrikanerperiode” in ons geskiedenis gekenskets word, was ‘n bloeityd vir die land wat vinnig tot ‘n nywerheidsland ontwikkel het. Maar veral die Afrikaner was vir die eerste keer werklik verenig oor al vier provinsies, asook die ou Suidwes-Afrika wat feitlik as ‘n vyfde provinsie van Suid-Afrika geadministreer is. Die Afrikaanse kultuur, onderwysinstellings, weermag, Eskom, Transnet, Yskor, Sasol, die SAL, die SAUK en ander semi-staatsinstellings het groot hoogtes bereik, in teenstelling met die korrupte, finansieel wankelrige oorblyfsels van daardie instellings wat vandag oorbly.

Op die tydstip dat ons vyande se droom van ‘n klasselose kommunistiese utopie finaal “tot die asblik van die geskiedenis verdoem is”, om Trotski aan te haal, het daardie Afrikanerperiode egter eensklaps aan sy einde gekom. Dit is vervang met ‘n voortgesette Britse periode waardeur Suid-Afrika grotendeels tot die invloedsfeer van die Verenigde Koninkryk behoort. Afgesien van die nuwe klas van korrupte swart politici en hul meelopers, het Brittanje die meeste by die magsgreep van die ANC/SAKP op Suid-Afrika gebaat.

Om maar enkele voorbeelde hiervan te noem:

Die Indiese vriend van die toentertydse eerste minister, Tony Blair, het Yskor verniet gekry deur middel van ‘n agterbakse finansiële transaksie. Met ons staalnywerheid agter die blad, het Mittal ook ander staalfabrieke in Europa oorgeneem en sodoende die wêreld se rykste staalmagnaat geword. Afrikaners het dekades lank in Yskor se fabrieke gesweet en soms gesterf om Mittal, wat ‘n Britse burger is, se fortuin te skep.

Die oorname van ABSA, waarin die meeste voormalige Afrikanerbanke soos Volkskas en Trustbank saamgevoeg is, deur Barclays het ook nie deursigtig geskied nie en die valuta- en ander implikasies vir die land is nooit verreken nie. Soos ek dit verstaan, het ABSA eers Barclays se takke oral in Afrika met rande gekoop, waarna Barclays dieselfde fondse gebruik het om ABSA uit te koop. Verlede week verseker iemand my dat die helfte van Barclays se dividend tans deur ABSA verseker word wat sy Afrikanerkliënte met kostes melk om Brittanje se grootste bank te midde van die internasionale geldkrisis staande te hou.

Vodacom, die land se winsgewendste selfoonmaatskappy wat insgelyks met die staatsfondse van Telkom ontwikkel is, word vandag deur Vodafone van Brittanje besit. Suid-Afrikaanse selfoontariewe is van die duurste ter wêreld en uiteraard is die winste wat dié Britse maatskappy vanuit Suid-Afrika verhaal, insgelyks van die hoogste ter wêreld.

Britse maatskappye het ‘n leidende rol tydens die korrupte wapentransaksie, waaroor die laaste woord nog nie gespreek is nie, gespeel. Trevor Manuel het in die geheim en sonder goedkeuring van die parlement ‘n ooreenkoms met die Britse regering gesluit waarmee die Suid-Afrikaanse belastingbetaler betalings aan die Britse wapenmaatskappye waarborg. Blykbaar het ons nog nie eens begin om aan die wapens af te betaal nie en word daar tans net rente gedelg.

Soos die toeval dit wil hê, is Manuel se vrou, Maria Ramos, ook die uitvoerende hoof van ABSA en dien op die uitvoerende komitee van Barclays. Sy is nie eens ‘n gebore Suid-Afrikaner nie (op haar geboortesertifikaat staan blykbaar Lissabon), maar het voorheen aan die Universiteit van Londen nagraads gestudeer, wat haar seker kwalifiseer om ‘n leidende rol in die Suid-Afrikaanse ekonomie te speel, eers by Transnet en nou by ABSA.

My vermoede is dat daar ‘n langtermyn- Britse plan was om Suid-Afrika ná 1948, maar veral ná Republiekwording in 1961 en ons uittrede uit die Statebond, oor te neem en by verstek deur ‘n swart regering te laat regeer. Die ANC-bewind beskik oor geen werklike mag nie omdat die weermag afgetakel is en sy eie kaders uit ‘n spul hopelose, korrupte en onbekwame skurke bestaan wie se ambisie nie verder strek as om die staatskas leeg te steel nie. Die mag agter die troon is die Verenigde Koninkryk, met Rusland en China wat deur middel van BRICS poog om dié magsgreep op die land af te water.

Weereens: onthou Jan Smuts se gesegde: Ons lot sal vanuit die buiteland bepaal word.

Die Krim
Die Krim

Vandaar dus my opgewondendheid oor wat nou besig is om in die Krim te gebeur. Ten einde die Sowjetryk af te takel, het die VSA die beginsel van selfbeskikking ondersteun en oral in Oos-Europa die onafhanklikwording van state binne die Russiese invloedsfeer gesteun. Waar daar wel pro-Russiese regerings tot stand gekom het, het George Soros en ander Amerikaners se nie-regeringsorgansisasies die plaaslike politiek deur sogenaamde “kleurrevolusies” gemanipuleer om pro-Amerikaanse satellietstate rondom Rusland te vestig. Op 22 Februarie het die jongste van dié revolusies of staatsgrepe plaasgevind toe die verkose president van die Oekraïne, Viktor Janoekowitsj, uit sy land moes vlug nadat die Amerikaanse NRO’s duisende mense opgesweep, maar ook huursoldate betaal het om die onluspolisie met bofbalkolwe en koeëls te bestook.

Omdat die meesal Russiese inwoners van die Krim nie onder ‘n Amerikaanse marionetregering wil leef nie, het hulle met die steun van Rusland besluit om vandag referendum te hou. Alle voorspellings dui daarop dat die bevolking met ‘n oorweldigende meerderheid ten gunste van óf onafhanklikheid van die Oekraïne, óf inlywing by Rusland gaan stem.

Die Amerikaners, asook Duitsland en die res van die Europese Unie wat lyk my net skoothondjies van die VSA geword het, dreig nou met omvattende ekonomiese sanksies teen Rusland omdat hulle vandag se referendum as “onwettig” beskou.

Waneer dit egter die VSA pas, is selfbeskikking nie onwetttig nie, soos die beroemde geval van Kosovo wat in 2008 tot ‘n eensydige onafhanklikheidsverklaring teenoor Serwië en die res van die Federasie van Joego-Slawië oorgegaan het. Ten einde sy Serwiese bondgenoot te ondersteun, het Rusland tevergeefs die onafhanklikwording van Kosovo probeer teenstaan.

In sy verklaring ná afloop van sy ontmoeting met John Kerry, die Amerikaanse buitelandse minister, het die hoof- Russiese diplomaat, Sergei Lawrof, die lande en bevolkingsgroepe genoem wat oor die afgelope aantal jare meesal met Brits-Amerikaanse steun selfbeskikking verkry het. Volgens Lawrof moet die Krim as ‘n spesiale geval hanteer word, net soos wat die VSA en ander Westerse moondhede in 2008 die onafhanklikheid van Kosovo as ‘n spesiale geval gesien het. Lawrof het verder gesê:

“Is daar presedente in die internasionale reg. Daar is presedente, natuurlik. Elkeen verstaan dat die Krim vir Rusland iets baie belangriks, wat dit vir Rusland beteken. Dit beteken oneindig meer as die Falklandeilande vir die Verenigde Koninkryk of die Comore-eilande vir Frankryk.”

Onder Afrikanergroepe het die Kosowo-geval die afgelope aantal jare belangstelling gewek, omdat dit gesien word as ‘n voorbeeld van ‘n bevolkingsgroep wat hom eensydig onafhanklik kan verklaar, iets wat deur die volkereg en artikel 1 van die Verenigde Nasies se handves ondersteun word.

Die probleem is egter dat Kosowo sonder die militêre steun van NAVO en Amerikaanse erkenning nooit onafhanklik van Joego-Slawië sou geword het nie. Omdat soveel Afrikaners prokureurs en advokate is, sien hulle politiek ook soos ‘n hofsaak wat deur een of ander regter beslis gaan word. Politiek gaan egter oor mag en, soos wat die VSA oor die afgelope aantal jare gedemonstreer het, maak hy wat oor mag beskik die reëls. Diie Obama-bewind en die sogenaamde “neocons” of neokonserwatiewe in die VSA voel hulle nie meer aan reëls gebonde nie. Al wat tel, is naakte magsuitbreiding en Oekraïne, Rusland, Iran en ander lande wat aan die Amerikaanse empaaier ontkom, verkeer in hul visier.

In hul legalistiese benadering tot politiek, maak Afrikaners die fout om die volkereg of selfs die huidige Suid-Afrikaanse Grondwet met sy beroemde artikel 235 as die bepalende faktor in ‘n volk se onafhanklikheidstryd te sien. Artikel 235 lui immers:

Die Suid-Afrikaanse bevolking as geheel se reg op selfbeskikking soos in hierdie Grondwet vergestalt, belet nie, binne die raamwerk van dié reg, die erkenning nie van die konsep van die reg van enige gemeenskap wat ‘n gemeenskaplike kultuur- en taalerfenis deel, op selfbeskikking binne ‘n territoriale entiteit in die Republiek of op enige ander wyse, soos deur nasionale wetgewing bepaal.

In weerwil van dié mooiklinkende artikel, geniet Afrikaners vandag geen selfbeskikking of selfs selfregering nie. Die Britse Ryk is bloot deur ‘n Bantoeryk vervang… Of is die Bantoeryk dalk net ‘n voortsetting van die Britse Ryk, soos ek hier bo probeer aandui?

Interessant is dat ‘n geskil oor taalregte ook die huidige konflik in die Oekraïne onderlê. Een van die eerste dinge wat die nuwe pro-Amerikaanse bewind in Kiëf gedoen het, was om die Russiese taal oral in Oekraïne te verbied! Lui dit iewers by ons ‘n klokkie? Afrikaans wat uit die staatsdiens en die groot maatskappye geweer word, veranderings van Afrikaanse name, met Afrikaanse skole en universiteite wat verengels word?

Vandag werk duisende Afrikaners vir die Britse Ryk omdat hulle swartes, kleurlinge en Indiërs Engels leer of hulle in Engels onderrig. Ons belastings word insgelyks gebruik om Engels te bevorder en Britse vooroordele, selfs oor ons eie mense, in die land en elders ter wêreld te versprei. Kortom, Afrikaners het die slawe van die Britse Bantoeryk geword!

Die Angel-Saksiese standpunt oor die Krim het egter ‘n nuwe verdeling teenoor Rusland, selfs ‘n nuwe Koue Oorlog, geskep. Die nuwe globale bars of kraak gaan nie meer oor ekonomiese filosofie – kapitalisme teenoor kommunisme – nie, maar oor identiteit en nasieskap. Die Anglo-Amerikaanse Ryk is onherroeplik verbind tot multikulturalisme en ‘n gemengde identiteit met ‘n onderliggende anti-blanke substraat. Hierteenoor staan Rusland ‘n klassieke volkskap gegrond op nasionalisme en die erkenning van nasionale soewereiniteit en taalregte voor. Ironies is Wladimir Poetin, wat tans deur CCN, die BBC, die New York Times en ander links-liberale media vir ‘n “nuwe Stalin” uitgekryt word, een van die gewildste leiers onder Westerse konserwatiewe. Obama se aggressie in Oos-Europa word deur Amerikaanse konserwatiewe soos Pat Buchanan en Ron Paul gestriem. In Wes-Europa is Poetin veral gewild onder die nuwe geslag nasionalistiese kiesers wat die Franse Front National of die Nederlandse PVV of die Oostenrykse Vryheidsparty ondersteun.

Ook onder Afrikaners styg die bewondering vir Poetin wat oënskynlik alleen die Amerikaanse reus en sy Britse en Europese sikofante aandurf deur selfbeskikking en die voortbestaan van kleiner volkere teen ‘n allesoorheersende imperialisme verdedig.

Die breuk in die wêreld wat die Nuwe Koue Oorlog meebring, loop ook deur Suid-Afrika: aan die een kant die imperialistiese Anglo-Bantoe-Suid-Afrikaner en die ander kant die Afrikaner, die Khoisan, Vendas en ander groepe wat op selfbeskikking aandring.

Afrikaners sal die selfbeskikkingsyster moet smee terwyl hy warm is. Binne die volgende dae en weke sal ons vertoë tot buitelandse ambassades en moondhede moet rig waarin ons insgelyks op ‘n referendum oor selfbeskikking aandring. Die Britse ambassadrise in Suid-Afrika, Judith Macgregor, het gister getwiet dat die referendum in die Krim “onwettig” is, anders as die Skotse referendum oor selfbeskikking wat in September gehou word.

Wel, kom ons stel ‘n voorbeeld aan die wêreld deur ‘n wettige referendum in Suid-Afrika oor Afrikanerselfbeskikking te hou, met die moontlike hulp van mev. Mcgregor wat soveel begrip vir die Skotse vryheidstrewe toon. Oor die presiese grense van ‘n Afrikanerstaat en ons bates kan agterna onderhandel word, solank die beginsel erken word dat ons – soos die Kosoware, die Katalane, die Skotte en die Russiese inwoners van die Krim – onsself moet regeer.

Ek is selfs bereid om ‘n deel van die Noord-Kaap as tuisland te aanvaar, mits ons vir die infrakstruktuur en ander bates in Gauteng uitbetaal word. Dit is triljoene rande werd en ons gaan nie sonder vergoeding daarvan afstand doen nie. As die VSA so pas elf miljard dollar vir die nuwe, onverkose bewind in die Oekraïne kan skenk, is daar sekerlik baie internasionale fondse beskikbaar om vryheid vir Afrikaners te verseker.

Brittanje het nog altyd dubbele standaarde teenoor, enersyds Boere en Afrikaners, en andersyds die Sotho’s, Tswanas, Swazi’s, Iere, Skotte, Falklanders, Oekraïners, ens., gehandhaaf. Britse Bantoestans soos Lesotho en Swaziland wat nie eens hul eie staatsdienssalarisse sonder buitelandse hulp kan betaal nie, geniet volle onafhanklikheid terwyl hulle die territoriale integriteit van Suid-Afrika skend. Maar die Afrikaner word in ‘n onderdanige, verdrukte posisie teenoor die korrupte Bantoe-imperialiste gehou.

Hoe rym dit?

Dit spreek vanself dat ons in die komende verkiesing vir Front Nasionaal behoort te stem, om aan te toon dat daar steun vir die beginsel van Afrikanerselfbeskikking bestaan.

Of is ons al so deur Amerikaanse en Britse multikulturele propaganda gebreinspoel dat ons bereid is om slawerny in die vorm van plaasmoorde, geweld, permanente taal- en rassediskriminasie te aanvaar?

Die meerderheid Afrikaners hoef ons nie in die aanvanklike fase van dié beweging te ondersteun nie. In elk geval het niemand ooit in 1992 ten gunste van oorgawe aan die ANC/SAKP ingestem nie; ‘n komitee van Verraaierkaners rondom mnr. FW de Klerk het dit bloot namens ons gedoen ten einde hul Noord-Atlantiese meesters tevrede te stel. Gehoorsaam soos wat hulle is, het die meerderheid Afrikaners agterna daarby ingeval en is verder deur die media gebreinspoel om die juk te aanvaar.

Wat nou belangrik is, is dat ‘n saakmakende minderheid vryheidsgesinde Afrikaners hul stemme ten gunste van selfbeskikking moet uitbring. Ook die intellektuele en politieke debat moet binne die nuwe geopolitieke konteks gevoer word, waarin selfbeskikking soos ná 1918 ‘n kardinale rol speel.

Ons het niks meer om te verloor behalwe die kettings wat ons aan die gewelddadige, korrupte eenheidstaat bind nie!

praag, die dinkskrum vir Afrikanervryheid en -selfbeskikking. Sluit aan!

37 thoughts on “Deus ex machina vir Afrikanerselfbeskikking vanuit die Krim”

  1. Staande applous Dok.

    Niks kan bygevoeg of weggeneem word. Baie dankie.

    NS: Ek bid vir ‘n leier soos Mnr Putin … hy is hart en siel VIR sy mense en ek is geensins verbaas dat hulle 100% agter hom staan nie. Dis lekker, verfrissend om die ondersteuning vir hom van reg oor die wereld te lees, met uitsondering van ‘n paar.

    Nou, selfbeskikking vir ons mense. Voorwaarts, gee die pas aan.

  2. Oeg dankie tog eerstens Dr Dan dat jy woorde gebruik het wat ek kan verstaan.
    En dan is hierdie skrywe van u ook baie maklik om te verstaan, en niemand kan dit wat jy gesê het weg redeneer nie.
    Kry ‘n vertaler wat hierdie stukkie na Russies kan vertaal, en stuur dit vir Putin se persoonlikke aandag.
    Dit is net jammer dat u nie genoem het dat Putin vir die Nobel prys vir vrede benoem is nie.

  3. Toe de Klerk in 1992 die volk gevra het of hulle met die vyand moet onderhandel het hy toe al geweet wat hy gaan doen . Op n slinkse wyse het hy die niksvermoedende Afrikaner belieg en bedrieg deur onder andere te praat van eie skole en wigte en teenwigte. Daar het niks van gekom nie en net soos in die res van hierdie donker kontinent loop ons dieselfde paadjie.
    Amerika en Britanje se geskiedenis stink en die wreedhede wat hulle aan ander nasies gedoen het laat apartheid lyk na n sondagskool piekniek. Ek wil deur blankes regeer word uit en klaar. Ons kan nie so aangaan nie en daarom my beroep op almal om die FN party te steun . Die uurglas loop leeg en tyd is nie aan ons kant nie. Ons moet wegkom van hierdie tirannie van die swart hordes. Laat ons saamstaan.

    1. WIlliam, ek stem saam met wat jy hier sê maar ek is bietjie harder op die Afrikaners wat Ja gestem het en nou spyt het se saak. Met daardie verkiesing was ek ‘n jong lat – skaars stemgeregtig. Tog was die uiteinde van ‘n ja-stem so duidelik soos daglig. Jy kon met ‘n stok in die donker voel wat daai-klerk en sy breinlose en beginsellose maatjies in die mou gevoer het.

      Ek is dus versigtig vir hierdie tipe referendum storie – daar is te veel onder ons wat soos ons lyk maar wat in hulle harte eerder saam met die volk wil ploeter –

      1. Jy is reg Rooikop – ek het baie houe gevat in daardie tyd. Vandag ly die ganse wit volk onder fw se verraad. Onthou jy hierdie plakkaat ?
        Ek is trots op my NEE-STEM ! Dit sal ek altyd uitbasuin en ek het nie ‘n skaam haar op my kop nie !

      2. Jy weet Rooikop, jy praat nou so oor die wat “Ja” gestem het, Hier, op PRAAG lees ek nooit van die wat glad nie gestem het nie. Is dit nie dalk juis hulle wat die bal laat val het nie? Soos ek dit sien is almal ewe “skuldig”. Die wat buite stemming gebly het dan mos net eenvoudig die “Nee”- stemmers ge-neutraliseer, en het efffektief “Ja” gestem.

        1. Marula -ek weet nie van daardie groep nie – dit is egter ‘n geldige punt wat jy maak.

          As ek my suwwe brein raadpleeg kan ek onthou dat die webly aksies eers na die referendum – m.a.w met die algemene verkiesings daarna begin het – ek mag verkeerd wees.

          Myns insiens was die laaste paar NP verkiesings gekook – dalk die referendum ook om die “gewenste” resultaat te lewer en ek dink hulle sou ongeag watookal dieselfde uitslag verseker het. Ek en my vriendekring (buiten die wat in elk geval pienk was) het almal sover ek weet NEE gesê vir de Klerk. Ek het met bitter min mense te doene gekry wat voor die tyd sou erken hulle gaan JA stem – daarom was ek redelik verbaas oor die uitslag wat destyds behaal is en daarom my bedenkinge oor die geldigheid van die resultaat.

        1. Soos die Russe se, in elke grap is daar so n halwe grappie.

          Is dan nie waar nie. Al is die “Leier” nou iemand wat spandex dra met n groot “S” op die borskas en heen-en-weer kan vlieg, is daar net een manier om al die Afrikaners uit te ken.
          Hulle loop almal met n stukkie “Kryptonite” in die sak rond!

  6. RIEMPIES, SPESIAAL VIR JOU GEPLAAS.

    Front Nasionaal – Suid Afrika

    WES KAAP – SATERDAG –

    Franci Kunneke – Wat n wonderlike Saterdagmiddag was dit nie vandag nie. Om mense soos Daniel Lötter en sy span in my huis te kon he, Mense wat staan vir GOD en saam glo dat ons mense ook regte het. FN staan vir alles waarin baie blankes glo, ons het baie werk om die wat nog nie weet dat FN bestaan nie , in te lig. Saam kan ons weer waardes, geloof en selfbeskiking terug bring in ons afrikaner gemeenskap. Ons is gereed vir die pad vorentoe.

  7. Uitstekende skrywe Dr Dan
    Sopas berig op RT dat die ‘Regses’ in Oekraine die russiese oliepype wil saboteer.
    Vraag:
    Wat kan ons afrilkaners doen om die wêreld verlee te maak oor ons samewerking /diens/ vaardighede?

    Wat het ons waarsonder die Weste nie kan klaarkom nie?

    Trippie Leana Riempies Dolk dr Dan en die span – wat dink julle?

    1. Ongelukkig in my opinie was die enigste ding wat onder ons “beheer” was waarsonder die wêreld nie kan klaar kom nie, is platinum.

      Ja ons mense het destyds groot industrie in hierdie land gevestig en goeie geld daarmee gemaak. Die industrieë was egter teen die laat 90s al verdouderd (miskien SASOL en ESKOM nie, maar YSKOR verseker) – die NP het geld op ‘n proxy-oorlog vir die VSA gemors en aangehou mors – hierdie het ons finansiëel seergemaak – daarom was daar nie nuwe paaie gebou van regtige groot waarde na die 80s nie. Dit wag goedkoper om staal uit Japan in te voer wat met ons steenkool en Sishen erts vervaardig was as om die staal by Yskor te koop!

      Baie van die oorlogstegnologie wat vir ons voorgehou is as “so great” wat deur Afrikaners ontwikkel is, is doodeenvoudig aanmekaar “gehack” – die stelsel ingenieurs op van daardie projekte moet afgeslag word as jy die kwaliteit van die werk sien.

      Ons eie waarde was heeltemal oordrewe voorgegee deur die NP.

  8. Dr Roodt ek hou van wat u sê. Ek het egter so ‘n vuil vermoede dat al sou ons so ‘n referendum hou, ons veel minder steun sal hê as wat mense sou voorgee. As gevolg hiervan mag ons dalk wel ‘n stuk “onbruikbare” grondgebied gegun word maar die kans dat ons vir ons huidige bates na behore vergoed sal word reken ek is skraal.

    Hoewel ek negatief klink is ek nie – ek is verskriklik opgewonde dat u en die FN uiteindelik opstaan vir ons selfbeskikking. Ons voorouers was nie lui nie en al kry ons net ‘n stuk woestyn is ek seker dat met harde werk ons binne een of twee generasies weer ‘n beskawing daar sal kan opbou. Die koste sal baie mense afskrik (ons is nou maar eens gemaklike mammonaanbidders) maar ek reken tog dat van ons so ‘n skuif sal maak. Die een doelstelling sal moet wees om industrie te vestig – om mense werk te gee en om nodige valuta te verdien om die opbouproses te finansier. Ek reken dit is juis in hierdie tweede deel dat Orania nie geslaagd is nie. (In die moderne hoë tegnologie era is ‘n behoorlike internetverbinding en koerierdiens omtrant al wat nodig is om te begin besigheid doen.)

    1. Groot probleem vir Orania.
      Nie die nodige kundiges in veral moderne boumetodes nie.
      Daar word aangedring dat slegs van plaaslikke bouspanne gebruik gemaak mag word.
      Geen tydelikke swart slawe word toegelaat nie.
      Eienaardig dat Vodacom en Eskom nie aan daardie standaarde moes voldoen toe hulle Orania se stelsel opgradeer het nie.
      Eienaardig dat kleurlinge en swartes in winkels toegelaat word.
      Eienaardig dat dit ‘n swarte is wat die dorp se brandstof aflewer.
      En so kan ons tot vervelens toe aangaan en aangaan.

      1. Raai wie se Impi Tsotsis nie die gras op die sypaadjies van Orania mag sny nie?

        Arnold de Beer is ook op ‘Vry Afrikaners’ verban.

        Arnold het jy al jpu spannetjie tsotsis by FN geregistreer en wit T hempies en blou pette gekry Hmm? Hulle sal seker jou FN plakate moet opsit?

        1. Dit is juis die probleem daar by jou.
          Niemand sny die gras nie. Ek het jou dit reeds gesê.
          Korrek. Ek is verban omdat ek ongemaklikke vraë gevra het.
          Ek maak ten volle gebruik van slawe arbeid. Die Bybel het my so geleer.

          2. Wikipedia het heelwat oor hom geskryf. Sy menings word verbind met die Nouvelle Droite beweging in Europa.

      3. Ken hom nie… plaas ‘n paar skakels hier? Ek dink ons moet ook weer na die Oostenrykse skool kyk, en daar is ‘n eietydse verteenwoordiger genaamd Hans Hoppe. Afrikaners verkeer in die unieke posisie dat ons eintlik ook van die staat ontslae kan raak en bloot as organiese gemeenskap, byna staatloos, kan bly voortbestaan, sodra ons van die ANC-staat vry is.

  9. Jy is reg dat ons te veel regsgerig is – maar eerder magsgerig moet word. Dit verander die prentjie heelwat en sal verdere denke van die individu vereis. Die leier-leemte vererger die situasie tussen die “early-adopters” wat FN nou ondersteun en die massas wat ons nodig het om FN te ondersteun. Ons het dus ‘n taktiese groepie nodig om hierin leiding te neem. Ek kan dalk hierby inval.

Maak 'n opvolg-bydrae